Utshovঅধ্যায় 12
12.1
যুধিষ্ঠির উবাচ
স্ত্রীপুংসয়োঃ সংপ্রয়োগে স্পর্শঃ কস্যাধিকো ভবেৎ
এতন্মে সংশয়ং রাজন্যথাবদ্বক্তুমর্হসি
12.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ভঙ্গাশ্বনেন শক্রস্য যথা বৈরমভূত্পুরা
12.3
পুরা ভঙ্গাশ্বনো নাম রাজর্ষিরতিধার্মিকঃ
অপুত্রঃ স নরব্যাঘ্র পুত্রার্থং যজ্ঞমাহরৎ
12.4
অগ্নিষ্টুং নাম রাজর্ষিরিন্দ্রদ্বিষ্টং মহাবলঃ
প্রায়শ্চিত্তেষু মর্ত্যানাং পুত্রকামস্য চেষ্যতে
12.5
ইন্দ্রো জ্ঞাত্বা তু তং যজ্ঞং মহাভাগঃ সুরেশ্বরঃ
অন্তরং তস্য রাজর্ষেরন্বিচ্ছন্নিয়তাত্মনঃ
12.6
কস্যচিত্ত্বথ কালস্য মৃগয়ামটতো নৃপ
ইদমন্তরমিত্যেব শক্রো নৃপমমোহয়ৎ
12.7
একাশ্বেন চ রাজর্ষির্ভ্রান্ত ইন্দ্রেণ মোহিতঃ
ন দিশোঽবিন্দত নৃপঃ ক্ষুত্পিপাসার্দিতস্তদা
12.8
ইতশ্চেতশ্চ বৈ ধাবঞ্শ্রমতৃষ্ণার্দিতো নৃপঃ
সরোঽপশ্যত্সুরুচিরং পূর্ণং পরমবারিণা
সোঽবগাহ্য সরস্তাত পায়য়ামাস বাজিনম্
12.9
অথ পীতোদকং সোঽশ্বং বৃক্ষে বদ্ধ্বা নৃপোত্তমঃ
অবগাহ্য ততঃ স্নাতো রাজা স্ত্রীত্বমবাপ হ
12.10
আত্মানং স্ত্রীকৃতং দৃষ্ট্বা ব্রীডিতো নৃপসত্তমঃ
চিন্তানুগতসর্বাত্মা ব্যাকুলেন্দ্রিয়চেতনঃ
12.11
আরোহিষ্যে কথং ত্বশ্বং কথং যাস্যামি বৈ পুরম্
অগ্নিষ্টুং নাম ইষ্টং মে পুত্রাণাং শতমৌরসম্
12.12
জাতং মহাবলানাং বৈ তান্প্রবক্ষ্যামি কিং ত্বহম্
দারেষু চাস্মদীয়েষু পৌরজানপদেষু চ
12.13
মৃদুত্বং চ তনুত্বং চ বিক্লবত্বং তথৈব চ
স্ত্রীগুণা ঋষিভিঃ প্রোক্তা ধর্মতত্ত্বার্থদর্শিভিঃ
ব্যায়ামঃ কর্কশত্বং চ বীর্যং চ পুরুষে গুণাঃ
12.14
পৌরুষং বিপ্রনষ্টং মে স্ত্রীত্বং কেনাপি মেঽভবৎ
স্ত্রীভাবাত্কথমশ্বং তু পুনরারোঢুমুত্সহে
12.15
মহতা ত্বথ খেদেন আরুহ্যাশ্বং নরাধিপঃ
পুনরায়াত্পুরং তাত স্ত্রীভূতো নৃপসত্তম
12.16
পুত্রা দারাশ্চ ভৃত্যাশ্চ পৌরজানপদাশ্চ তে
কিং ন্বিদং ত্বিতি বিজ্ঞায় বিস্ময়ং পরমং গতাঃ
12.17
অথোবাচ স রাজর্ষিঃ স্ত্রীভূতো বদতাং বরঃ
মৃগয়ামস্মি নির্যাতো বলৈঃ পরিবৃতো দৃঢম্
উদ্ভ্রান্তঃ প্রাবিশং ঘোরামটবীং দৈবমোহিতঃ
12.18
অটব্যাং চ সুঘোরায়াং তৃষ্ণার্তো নষ্টচেতনঃ
সরঃ সুরুচিরপ্রখ্যমপশ্যং পক্ষিভির্বৃতম্
12.19
তত্রাবগাঢঃ স্ত্রীভূতো ব্যক্তং দৈবান্ন সংশয়ঃ
অতৃপ্ত ইব পুত্রাণাং দারাণাং চ ধনস্য চ
12.20
উবাচ পুত্রাংশ্চ ততঃ স্ত্রীভূতঃ পার্থিবোত্তমঃ
সংপ্রীত্যা ভুজ্যতাং রাজ্যং বনং যাস্যামি পুত্রকাঃ
অভিষিচ্য স পুত্রাণাং শতং রাজা বনং গতঃ
12.21
তামাশ্রমে স্ত্রিয়ং তাত তাপসোঽভ্যবপদ্যত
তাপসেনাস্য পুত্রাণামাশ্রমেঽপ্যভবচ্ছতম্
12.22
অথ সা তান্সুতান্গৃহ্য পূর্বপুত্রানভাষত
পুরুষত্বে সুতা যূয়ং স্ত্রীত্বে চেমে শতং সুতাঃ
12.23
একত্র ভুজ্যতাং রাজ্যং ভ্রাতৃভাবেন পুত্রকাঃ
সহিতা ভ্রাতরস্তেঽথ রাজ্যং বুভুজিরে তদা
12.24
তান্দৃষ্ট্বা ভ্রাতৃভাবেন ভুঞ্জানান্রাজ্যমুত্তমম্
চিন্তয়ামাস দেবেন্দ্রো মন্যুনাভিপরিপ্লুতঃ
উপকারোঽস্য রাজর্ষেঃ কৃতো নাপকৃতং ময়া
12.25
ততো ব্রাহ্মণরূপেণ দেবরাজঃ শতক্রতুঃ
ভেদয়ামাস তান্গত্বা নগরং বৈ নৃপাত্মজান্
12.26
ভ্রাতৄণাং নাস্তি সৌভ্রাত্রং যেঽপ্যেকস্য পিতুঃ সুতাঃ
রাজ্যহেতোর্বিবদিতাঃ কশ্যপস্য সুরাসুরাঃ
12.27
যূয়ং ভঙ্গাশ্বনাপত্যাস্তাপসস্যেতরে সুতাঃ
কশ্যপস্য সুরাশ্চৈব অসুরাশ্চ সুতাস্তথা
যুষ্মাকং পৈতৃকং রাজ্যং ভুজ্যতে তাপসাত্মজৈঃ
12.28
ইন্দ্রেণ ভেদিতাস্তে তু যুদ্ধেঽন্যোন্যমপাতয়ন্
তচ্ছ্রুত্বা তাপসী চাপি সংতপ্তা প্ররুরোদ হ
12.29
ব্রাহ্মণচ্ছদ্মনাভ্যেত্য তামিন্দ্রোঽথান্বপৃচ্ছত
কেন দুঃখেন সংতপ্তা রোদিষি ত্বং বরাননে
12.30
ব্রাহ্মণং তু ততো দৃষ্ট্বা সা স্ত্রী করুণমব্রবীৎ
পুত্রাণাং দ্বে শতে ব্রহ্মন্কালেন বিনিপাতিতে
12.31
অহং রাজাভবং বিপ্র তত্র পুত্রশতং ময়া
সমুত্পন্নং সুরূপাণাং বিক্রান্তানাং দ্বিজোত্তম
12.32
কদাচিন্মৃগয়াং যাত উদ্ভ্রান্তো গহনে বনে
অবগাঢশ্চ সরসি স্ত্রীভূতো ব্রাহ্মণোত্তম
পুত্রান্রাজ্যে প্রতিষ্ঠাপ্য বনমস্মি ততো গতঃ
12.33
স্ত্রিয়াশ্চ মে পুত্রশতং তাপসেন মহাত্মনা
আশ্রমে জনিতং ব্রহ্মন্নীতাস্তে নগরং ময়া
12.34
তেষাং চ বৈরমুত্পন্নং কালয়োগেন বৈ দ্বিজ
এতচ্ছোচামি বিপ্রেন্দ্র দৈবেনাভিপরিপ্লুতা
12.35
ইন্দ্রস্তাং দুঃখিতাং দৃষ্ট্বা অব্রবীত্পরুষং বচঃ
পুরা সুদুঃসহং ভদ্রে মম দুঃখং ত্বয়া কৃতম্
12.36
ইন্দ্রদ্বিষ্টেন যজতা মামনাদৃত্য দুর্মতে
ইন্দ্রোঽহমস্মি দুর্বুদ্ধে বৈরং তে যাতিতং ময়া
12.37
ইন্দ্রং তু দৃষ্ট্বা রাজর্ষিঃ পাদয়োঃ শিরসা গতঃ
প্রসীদ ত্রিদশশ্রেষ্ঠ পুত্রকামেন স ক্রতুঃ
ইষ্টস্ত্রিদশশার্দূল তত্র মে ক্ষন্তুমর্হসি
12.38
প্রণিপাতেন তস্যেন্দ্রঃ পরিতুষ্টো বরং দদৌ
পুত্রা বৈ কতমে রাজঞ্জীবন্তু তব শংস মে
স্ত্রীভূতস্য হি যে জাতাঃ পুরুষস্যাথ যেঽভবন্
12.39
তাপসী তু ততঃ শক্রমুবাচ প্রয়তাঞ্জলিঃ
স্ত্রীভূতস্য হি যে জাতাস্তে মে জীবন্তু বাসব
12.40
ইন্দ্রস্তু বিস্মিতো হৃষ্টঃ স্ত্রিয়ং পপ্রচ্ছ তাং পুনঃ
পুরুষোত্পাদিতা যে তে কথং দ্বেষ্যাঃ সুতাস্তব
12.41
স্ত্রীভূতস্য হি যে জাতাঃ স্নেহস্তেভ্যোঽধিকঃ কথম্
কারণং শ্রোতুমিচ্ছামি তন্মে বক্তুমিহার্হসি
12.42
স্ত্র্যুবাচ
স্ত্রিয়াস্ত্বভ্যধিকঃ স্নেহো ন তথা পুরুষস্য বৈ
তস্মাত্তে শক্র জীবন্তু যে জাতাঃ স্ত্রীকৃতস্য বৈ
12.43
ভীষ্ম উবাচ
এবমুক্তে ততস্ত্বিন্দ্রঃ প্রীতো বাক্যমুবাচ হ
সর্ব এবেহ জীবন্তু পুত্রাস্তে সত্যবাদিনি
12.44
বরং চ বৃণু রাজেন্দ্র যং ত্বমিচ্ছসি সুব্রত
পুরুষত্বমথ স্ত্রীত্বং মত্তো যদভিকাঙ্ক্ষসি
12.45
স্ত্র্যুবাচ
স্ত্রীত্বমেব বৃণে শক্র প্রসন্নে ত্বয়ি বাসব
12.46
এবমুক্তস্তু দেবেন্দ্রস্তাং স্ত্রিয়ং প্রত্যুবাচ হ
পুরুষত্বং কথং ত্যক্ত্বা স্ত্রীত্বং রোচয়সে বিভো
12.47
এবমুক্তঃ প্রত্যুবাচ স্ত্রীভূতো রাজসত্তমঃ
স্ত্রিয়াঃ পুরুষসংয়োগে প্রীতিরভ্যধিকা সদা
এতস্মাত্কারণাচ্ছক্র স্ত্রীত্বমেব বৃণোম্যহম্
12.48
রমে চৈবাধিকং স্ত্রীত্বে সত্যং বৈ দেবসত্তম
স্ত্রীভাবেন হি তুষ্টোঽস্মি গম্যতাং ত্রিদশাধিপ
12.49
এবমস্ত্বিতি চোক্ত্বা তামাপৃচ্ছ্য ত্রিদিবং গতঃ
এবং স্ত্রিয়া মহারাজ অধিকা প্রীতিরুচ্যতে