Utshovঅধ্যায় 8
8.1
যুধিষ্ঠির উবাচ
কে পূজ্যাঃ কে নমস্কার্যাঃ কান্নমস্যসি ভারত
এতন্মে সর্বমাচক্ষ্ব যেষাং স্পৃহয়সে নৃপ
8.2
উত্তমাপদ্গতস্যাপি যত্র তে বর্ততে মনঃ
মনুষ্যলোকে সর্বস্মিন্যদমুত্রেহ চাপ্যুত
8.3
ভীষ্ম উবাচ
স্পৃহয়ামি দ্বিজাতীনাং যেষাং ব্রহ্ম পরং ধনম্
যেষাং স্বপ্রত্যয়ঃ স্বর্গস্তপঃস্বাধ্যায়সাধনঃ
8.4
যেষাং বৃদ্ধাশ্চ বালাশ্চ পিতৃপৈতামহীং ধুরম্
উদ্বহন্তি ন সীদন্তি তেষাং বৈ স্পৃহয়াম্যহম্
8.5
বিদ্যাস্বভিবিনীতানাং দান্তানাং মৃদুভাষিণাম্
শ্রুতবৃত্তোপপন্নানাং সদাক্ষরবিদাং সতাম্
8.6
সংসত্সু বদতাং যেষাং হংসানামিব সংঘশঃ
মঙ্গল্যরূপা রুচিরা দিব্যজীমূতনিঃস্বনাঃ
8.7
সম্যগুচ্চারিতা বাচঃ শ্রূয়ন্তে হি যুধিষ্ঠির
শুশ্রূষমাণে নৃপতৌ প্রেত্য চেহ সুখাবহাঃ
8.8
যে চাপি তেষাং শ্রোতারঃ সদা সদসি সংমতাঃ
বিজ্ঞানগুণসংপন্নাস্তেষাং চ স্পৃহয়াম্যহম্
8.9
সুসংস্কৃতানি প্রয়তাঃ শুচীনি গুণবন্তি চ
দদত্যন্নানি তৃপ্ত্যর্থং ব্রাহ্মণেভ্যো যুধিষ্ঠির
যে চাপি সততং রাজংস্তেষাং চ স্পৃহয়াম্যহম্
8.10
শক্যং হ্যেবাহবে যোদ্ধুং ন দাতুমনসূয়িতম্
শূরা বীরাশ্চ শতশঃ সন্তি লোকে যুধিষ্ঠির
তেষাং সংখ্যায়মানানাং দানশূরো বিশিষ্যতে
8.11
ধন্যঃ স্যাং যদ্যহং ভূয়ঃ সৌম্য ব্রাহ্মণকোঽপি বা
কুলে জাতো ধর্মগতিস্তপোবিদ্যাপরায়ণঃ
8.12
ন মে ত্বত্তঃ প্রিয়তরো লোকেঽস্মিন্পাণ্ডুনন্দন
ত্বত্তশ্চ মে প্রিয়তরা ব্রাহ্মণা ভরতর্ষভ
8.13
যথা মম প্রিয়তরাস্ত্বত্তো বিপ্রাঃ কুরূদ্বহ
তেন সত্যেন গচ্ছেয়ং লোকান্যত্র স শংতনুঃ
8.14
ন মে পিতা প্রিয়তরো ব্রাহ্মণেভ্যস্তথাভবৎ
ন মে পিতুঃ পিতা বাপি যে চান্যেঽপি সুহৃজ্জনাঃ
8.15
ন হি মে বৃজিনং কিংচিদ্বিদ্যতে ব্রাহ্মণেষ্বিহ
অণু বা যদি বা স্থূলং বিদিতং সাধুকর্মভিঃ
8.16
কর্মণা মনসা বাপি বাচা বাপি পরংতপ
যন্মে কৃতং ব্রাহ্মণেষু তেনাদ্য ন তপাম্যহম্
8.17
ব্রহ্মণ্য ইতি মামাহুস্তয়া বাচাস্মি তোষিতঃ
এতদেব পবিত্রেভ্যঃ সর্বেভ্যঃ পরমং স্মৃতম্
8.18
পশ্যামি লোকানমলাঞ্ছুচীন্ব্রাহ্মণয়ায়িনঃ
তেষু মে তাত গন্তব্যমহ্নায় চ চিরায় চ
8.19
যথা পত্যাশ্রয়ো ধর্মঃ স্ত্রীণাং লোকে যুধিষ্ঠির
স দেবঃ সা গতির্নান্যা ক্ষত্রিয়স্য তথা দ্বিজাঃ
8.20
ক্ষত্রিয়ঃ শতবর্ষী চ দশবর্ষী চ ব্রাহ্মণঃ
পিতাপুত্রৌ চ বিজ্ঞেয়ৌ তয়োর্হি ব্রাহ্মণঃ পিতা
8.21
নারী তু পত্যভাবে বৈ দেবরং কুরুতে পতিম্
পৃথিবী ব্রাহ্মণালাভে ক্ষত্রিয়ং কুরুতে পতিম্
8.22
পুত্রবচ্চ ততো রক্ষ্যা উপাস্যা গুরুবচ্চ তে
অগ্নিবচ্চোপচর্যা বৈ ব্রাহ্মণাঃ কুরুসত্তম
8.23
ঋজূন্সতঃ সত্যশীলান্সর্বভূতহিতে রতান্
আশীবিষানিব ক্রুদ্ধান্দ্বিজানুপচরেত্সদা
8.24
তেজসস্তপসশ্চৈব নিত্যং বিভ্যেদ্যুধিষ্ঠির
উভে চৈতে পরিত্যাজ্যে তেজশ্চৈব তপস্তথা
8.25
ব্যবসায়স্তয়োঃ শীঘ্রমুভয়োরেব বিদ্যতে
হন্যুঃ ক্রুদ্ধা মহারাজ ব্রাহ্মণা যে তপস্বিনঃ
8.26
ভূয়ঃ স্যাদুভয়ং দত্তং ব্রাহ্মণাদ্যদকোপনাৎ
কুর্যাদুভয়তঃশেষং দত্তশেষং ন শেষয়েৎ
8.27
দণ্ডপাণির্যথা গোষু পালো নিত্যং স্থিরো ভবেৎ
ব্রাহ্মণান্ব্রহ্ম চ তথা ক্ষত্রিয়ঃ পরিপালয়েৎ
8.28
পিতেব পুত্রান্রক্ষেথা ব্রাহ্মণান্ব্রহ্মতেজসঃ
গৃহে চৈষামবেক্ষেথাঃ কচ্চিদস্তীহ জীবনম্