অধ্যায় 7

7.1

যুধিষ্ঠির উবাচ
কর্মণাং মে সমস্তানাং শুভানাং ভরতর্ষভ
ফলানি মহতাং শ্রেষ্ঠ প্রব্রূহি পরিপৃচ্ছতঃ

7.2

ভীষ্ম উবাচ
রহস্যং যদৃষীণাং তু তচ্ছৃণুষ্ব যুধিষ্ঠির
যা গতিঃ প্রাপ্যতে যেন প্রেত্যভাবে চিরেপ্সিতা

7.3

যেন যেন শরীরেণ যদ্যত্কর্ম করোতি যঃ
তেন তেন শরীরেণ তত্তত্ফলমুপাশ্নুতে

7.4

যস্যাং যস্যামবস্থায়াং যত্করোতি শুভাশুভম্
তস্যাং তস্যামবস্থায়াং ভুঙ্ক্তে জন্মনি জন্মনি

7.5

ন নশ্যতি কৃতং কর্ম সদা পঞ্চেন্দ্রিয়ৈরিহ
তে হ্যস্য সাক্ষিণো নিত্যং ষষ্ঠ আত্মা তথৈব চ

7.6

চক্ষুর্দদ্যান্মনো দদ্যাদ্বাচং দদ্যাচ্চ সূনৃতাম্
অনুব্রজেদুপাসীত স যজ্ঞঃ পঞ্চদক্ষিণঃ

7.7

যো দদ্যাদপরিক্লিষ্টমন্নমধ্বনি বর্ততে
শ্রান্তায়াদৃষ্টপূর্বায় তস্য পুণ্যফলং মহৎ

7.8

স্থণ্ডিলে শয়মানানাং গৃহাণি শয়নানি চ
চীরবল্কলসংবীতে বাসাংস্যাভরণানি চ

7.9

বাহনাসনয়ানানি যোগাত্মনি তপোধনে
অগ্নীনুপশয়ানস্য রাজপৌরুষমুচ্যতে

7.10

রসানাং প্রতিসংহারে সৌভাগ্যমনুগচ্ছতি
আমিষপ্রতিসংহারে পশূন্পুত্রাংশ্চ বিন্দতি

7.11

অবাক্শিরাস্তু যো লম্বেদুদবাসং চ যো বসেৎ
সততং চৈকশায়ী যঃ স লভেতেপ্সিতাং গতিম্

7.12

পাদ্যমাসনমেবাথ দীপমন্নং প্রতিশ্রয়ম্
দদ্যাদতিথিপূজার্থং স যজ্ঞঃ পঞ্চদক্ষিণঃ

7.13

বীরাসনং বীরশয্যাং বীরস্থানমুপাসতঃ
অক্ষয়াস্তস্য বৈ লোকাঃ সর্বকামগমাস্তথা

7.14

ধনং লভেত দানেন মৌনেনাজ্ঞাং বিশাং পতে
উপভোগাংশ্চ তপসা ব্রহ্মচর্যেণ জীবিতম্

7.15

রূপমৈশ্বর্যমারোগ্যমহিংসাফলমশ্নুতে
ফলমূলাশিনাং রাজ্যং স্বর্গঃ পর্ণাশিনাং তথা

7.16

প্রায়োপবেশনাদ্রাজ্যং সর্বত্র সুখমুচ্যতে
স্বর্গং সত্যেন লভতে দীক্ষয়া কুলমুত্তমম্

7.17

গবাঢ্যঃ শাকদীক্ষায়াং স্বর্গগামী তৃণাশনঃ
স্ত্রিয়স্ত্রিষবণং স্নাত্বা বায়ুং পীত্বা ক্রতুং লভেৎ

7.18

সলিলাশী ভবেদ্যশ্চ সদাগ্নিঃ সংস্কৃতো দ্বিজঃ
মরুং সাধয়তো রাজ্যং নাকপৃষ্ঠমনাশকে

7.19

উপবাসং চ দীক্ষাং চ অভিষেকং চ পার্থিব
কৃত্বা দ্বাদশবর্ষাণি বীরস্থানাদ্বিশিষ্যতে

7.20

অধীত্য সর্ববেদান্বৈ সদ্যো দুঃখাত্প্রমুচ্যতে
মানসং হি চরন্ধর্মং স্বর্গলোকমবাপ্নুয়াৎ

7.21

যা দুস্ত্যজা দুর্মতিভির্যা ন জীর্যতি জীর্যতঃ
যোঽসৌ প্রাণান্তিকো রোগস্তাং তৃষ্ণাং ত্যজতঃ সুখম্

7.22

যথা ধেনুসহস্রেষু বত্সো বিন্দতি মাতরম্
এবং পূর্বকৃতং কর্ম কর্তারমনুগচ্ছতি

7.23

অচোদ্যমানানি যথা পুষ্পাণি চ ফলানি চ
স্বকালং নাতিবর্তন্তে তথা কর্ম পুরাকৃতম্

7.24

জীর্যন্তি জীর্যতঃ কেশা দন্তা জীর্যন্তি জীর্যতঃ
চক্ষুঃশ্রোত্রে চ জীর্যেতে তৃষ্ণৈকা তু ন জীর্যতে

7.25

যেন প্রীণাতি পিতরং তেন প্রীতঃ প্রজাপতিঃ
প্রীণাতি মাতরং যেন পৃথিবী তেন পূজিতা
যেন প্রীণাত্যুপাধ্যায়ং তেন স্যাদ্ব্রহ্ম পূজিতম্

7.26

সর্বে তস্যাদৃতা ধর্মা যস্যৈতে ত্রয় আদৃতাঃ
অনাদৃতাস্তু যস্যৈতে সর্বাস্তস্যাফলাঃ ক্রিয়াঃ

7.27

বৈশংপায়ন উবাচ
ভীষ্মস্য তদ্বচঃ শ্রুত্বা বিস্মিতাঃ কুরুপুংগবাঃ
আসন্প্রহৃষ্টমনসঃ প্রীতিমন্তোঽভবংস্তদা

7.28

যন্মন্ত্রে ভবতি বৃথা প্রয়ুজ্যমানে; যত্সোমে ভবতি বৃথাভিষূয়মাণে
যচ্চাগ্নৌ ভবতি বৃথাভিহূয়মানে; তত্সর্বং ভবতি বৃথাভিধীয়মানে

7.29

ইত্যেতদৃষিণা প্রোক্তমুক্তবানস্মি যদ্বিভো
শুভাশুভফলপ্রাপ্তৌ কিমতঃ শ্রোতুমিচ্ছসি

Contains text from DharmicData, made available under the Open Database License (ODbL). Simple meanings are written by AI and can contain mistakes.