UtshovChapter 7
7.1
युधिष्ठिर उवाच
कर्मणां मे समस्तानां शुभानां भरतर्षभ
फलानि महतां श्रेष्ठ प्रब्रूहि परिपृच्छतः
Yudhishthira uvacha
Karmanam me samastanam shubhanam bharatarshabha
Phalani mahatam shreshtha prabruhi pariprichchhatah
7.2
भीष्म उवाच
रहस्यं यदृषीणां तु तच्छृणुष्व युधिष्ठिर
या गतिः प्राप्यते येन प्रेत्यभावे चिरेप्सिता
Bhishma uvacha
Rahasyam yadrishinam tu tachchhrinushva yudhishthira
Ya gatih prapyate yena pretyabhave chirepsita
7.3
येन येन शरीरेण यद्यत्कर्म करोति यः
तेन तेन शरीरेण तत्तत्फलमुपाश्नुते
Yena yena sharirena yadyatkarma karoti yah
Tena tena sharirena tattatphalamupashnute
7.4
यस्यां यस्यामवस्थायां यत्करोति शुभाशुभम्
तस्यां तस्यामवस्थायां भुङ्क्ते जन्मनि जन्मनि
Yasyam yasyamavasthayam yatkaroti shubhashubham
Tasyam tasyamavasthayam bhunkte janmani janmani
7.5
न नश्यति कृतं कर्म सदा पञ्चेन्द्रियैरिह
ते ह्यस्य साक्षिणो नित्यं षष्ठ आत्मा तथैव च
Na nashyati kritam karma sada panchendriyairiha
Te hyasya sakshino nityam shashtha atma tathaiva cha
7.6
चक्षुर्दद्यान्मनो दद्याद्वाचं दद्याच्च सूनृताम्
अनुव्रजेदुपासीत स यज्ञः पञ्चदक्षिणः
Chakshurdadyanmano dadyadvacham dadyachcha sunritam
Anuvrajedupasita sa yagyah panchadakshinah
7.7
यो दद्यादपरिक्लिष्टमन्नमध्वनि वर्तते
श्रान्तायादृष्टपूर्वाय तस्य पुण्यफलं महत्
Yo dadyadapariklishtamannamadhvani vartate
Shrantayadrishtapurvaya tasya punyaphalam mahat
7.8
स्थण्डिले शयमानानां गृहाणि शयनानि च
चीरवल्कलसंवीते वासांस्याभरणानि च
Sthandile shayamananam grihani shayanani cha
Chiravalkalasanvite vasansyabharanani cha
7.9
वाहनासनयानानि योगात्मनि तपोधने
अग्नीनुपशयानस्य राजपौरुषमुच्यते
Vahanasanayanani yogatmani tapodhane
Agninupashayanasya rajapaurushamuchyate
7.10
रसानां प्रतिसंहारे सौभाग्यमनुगच्छति
आमिषप्रतिसंहारे पशून्पुत्रांश्च विन्दति
Rasanam pratisanhare saubhagyamanugachchhati
Amishapratisanhare pashunputranshcha vindati
7.11
अवाक्शिरास्तु यो लम्बेदुदवासं च यो वसेत्
सततं चैकशायी यः स लभेतेप्सितां गतिम्
Avakshirastu yo lambedudavasam cha yo vaset
Satatam chaikashayi yah sa labhetepsitam gatim
7.12
पाद्यमासनमेवाथ दीपमन्नं प्रतिश्रयम्
दद्यादतिथिपूजार्थं स यज्ञः पञ्चदक्षिणः
Padyamasanamevatha dipamannam pratishrayam
Dadyadatithipujartham sa yagyah panchadakshinah
7.13
वीरासनं वीरशय्यां वीरस्थानमुपासतः
अक्षयास्तस्य वै लोकाः सर्वकामगमास्तथा
Virasanam virashayyam virasthanamupasatah
Akshayastasya vai lokah sarvakamagamastatha
7.14
धनं लभेत दानेन मौनेनाज्ञां विशां पते
उपभोगांश्च तपसा ब्रह्मचर्येण जीवितम्
Dhanam labheta danena maunenagyam visham pate
Upabhoganshcha tapasa brahmacharyena jivitam
7.15
रूपमैश्वर्यमारोग्यमहिंसाफलमश्नुते
फलमूलाशिनां राज्यं स्वर्गः पर्णाशिनां तथा
Rupamaishvaryamarogyamahinsaphalamashnute
Phalamulashinam rajyam svargah parnashinam tatha
7.16
प्रायोपवेशनाद्राज्यं सर्वत्र सुखमुच्यते
स्वर्गं सत्येन लभते दीक्षया कुलमुत्तमम्
Prayopaveshanadrajyam sarvatra sukhamuchyate
Svargam satyena labhate dikshaya kulamuttamam
7.17
गवाढ्यः शाकदीक्षायां स्वर्गगामी तृणाशनः
स्त्रियस्त्रिषवणं स्नात्वा वायुं पीत्वा क्रतुं लभेत्
Gavadhyah shakadikshayam svargagami trinashanah
Striyastrishavanam snatva vayum pitva kratum labhet
7.18
सलिलाशी भवेद्यश्च सदाग्निः संस्कृतो द्विजः
मरुं साधयतो राज्यं नाकपृष्ठमनाशके
Salilashi bhavedyashcha sadagnih sanskrito dvijah
Marum sadhayato rajyam nakaprishthamanashake
7.19
उपवासं च दीक्षां च अभिषेकं च पार्थिव
कृत्वा द्वादशवर्षाणि वीरस्थानाद्विशिष्यते
Upavasam cha diksham cha abhishekam cha parthiva
Kritva dvadashavarshani virasthanadvishishyate
7.20
अधीत्य सर्ववेदान्वै सद्यो दुःखात्प्रमुच्यते
मानसं हि चरन्धर्मं स्वर्गलोकमवाप्नुयात्
Adhitya sarvavedanvai sadyo duhkhatpramuchyate
Manasam hi charandharmam svargalokamavapnuyat
7.21
या दुस्त्यजा दुर्मतिभिर्या न जीर्यति जीर्यतः
योऽसौ प्राणान्तिको रोगस्तां तृष्णां त्यजतः सुखम्
Ya dustyaja durmatibhirya na jiryati jiryatah
Yosau pranantiko rogastam trishnam tyajatah sukham
7.22
यथा धेनुसहस्रेषु वत्सो विन्दति मातरम्
एवं पूर्वकृतं कर्म कर्तारमनुगच्छति
Yatha dhenusahasreshu vatso vindati mataram
Evam purvakritam karma kartaramanugachchhati
7.23
अचोद्यमानानि यथा पुष्पाणि च फलानि च
स्वकालं नातिवर्तन्ते तथा कर्म पुराकृतम्
Achodyamanani yatha pushpani cha phalani cha
Svakalam nativartante tatha karma purakritam
7.24
जीर्यन्ति जीर्यतः केशा दन्ता जीर्यन्ति जीर्यतः
चक्षुःश्रोत्रे च जीर्येते तृष्णैका तु न जीर्यते
Jiryanti jiryatah kesha danta jiryanti jiryatah
Chakshuhshrotre cha jiryete trishnaika tu na jiryate
7.25
येन प्रीणाति पितरं तेन प्रीतः प्रजापतिः
प्रीणाति मातरं येन पृथिवी तेन पूजिता
येन प्रीणात्युपाध्यायं तेन स्याद्ब्रह्म पूजितम्
Yena prinati pitaram tena pritah prajapatih
Prinati mataram yena prithivi tena pujita
Yena prinatyupadhyayam tena syadbrahma pujitam
7.26
सर्वे तस्यादृता धर्मा यस्यैते त्रय आदृताः
अनादृतास्तु यस्यैते सर्वास्तस्याफलाः क्रियाः
Sarve tasyadrita dharma yasyaite traya adritah
Anadritastu yasyaite sarvastasyaphalah kriyah
7.27
वैशंपायन उवाच
भीष्मस्य तद्वचः श्रुत्वा विस्मिताः कुरुपुंगवाः
आसन्प्रहृष्टमनसः प्रीतिमन्तोऽभवंस्तदा
Vaishampayana uvacha
Bhishmasya tadvachah shrutva vismitah kurupungavah
Asanprahrishtamanasah pritimantobhavanstada
7.28
यन्मन्त्रे भवति वृथा प्रयुज्यमाने; यत्सोमे भवति वृथाभिषूयमाणे
यच्चाग्नौ भवति वृथाभिहूयमाने; तत्सर्वं भवति वृथाभिधीयमाने
Yanmantre bhavati vritha prayujyamane; yatsome bhavati vrithabhishuyamane
Yachchagnau bhavati vrithabhihuyamane; tatsarvam bhavati vrithabhidhiyamane
7.29
इत्येतदृषिणा प्रोक्तमुक्तवानस्मि यद्विभो
शुभाशुभफलप्राप्तौ किमतः श्रोतुमिच्छसि
Ityetadrishina proktamuktavanasmi yadvibho
Shubhashubhaphalapraptau kimatah shrotumichchhasi