Utshovঅধ্যায় 6
6.1
যুধিষ্ঠির উবাচ
পিতামহ মহাপ্রাজ্ঞ সর্বশাস্ত্রবিশারদ
দৈবে পুরুষকারে চ কিং স্বিচ্ছ্রেষ্ঠতরং ভবেৎ
6.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
বসিষ্ঠস্য চ সংবাদং ব্রহ্মণশ্চ যুধিষ্ঠির
6.3
দৈবমানুষয়োঃ কিং স্বিত্কর্মণোঃ শ্রেষ্ঠমিত্যুত
পুরা বসিষ্ঠো ভগবান্পিতামহমপৃচ্ছত
6.4
ততঃ পদ্মোদ্ভবো রাজন্দেবদেবঃ পিতামহঃ
উবাচ মধুরং বাক্যমর্থবদ্ধেতুভূষিতম্
6.5
নাবীজং জায়তে কিংচিন্ন বীজেন বিনা ফলম্
বীজাদ্বীজং প্রভবতি বীজাদেব ফলং স্মৃতম্
6.6
যাদৃশং বপতে বীজং ক্ষেত্রমাসাদ্য কর্ষকঃ
সুকৃতে দুষ্কৃতে বাপি তাদৃশং লভতে ফলম্
6.7
যথা বীজং বিনা ক্ষেত্রমুপ্তং ভবতি নিষ্ফলম্
তথা পুরুষকারেণ বিনা দৈবং ন সিধ্যতি
6.8
ক্ষেত্রং পুরুষকারস্তু দৈবং বীজমুদাহৃতম্
ক্ষেত্রবীজসমায়োগাত্ততঃ সস্যং সমৃধ্যতে
6.9
কর্মণঃ ফলনির্বৃত্তিং স্বয়মশ্নাতি কারকঃ
প্রত্যক্ষং দৃশ্যতে লোকে কৃতস্যাপ্যকৃতস্য চ
6.10
শুভেন কর্মণা সৌখ্যং দুঃখং পাপেন কর্মণা
কৃতং সর্বত্র লভতে নাকৃতং ভুজ্যতে ক্বচিৎ
6.11
কৃতী সর্বত্র লভতে প্রতিষ্ঠাং ভাগ্যবিক্ষতঃ
অকৃতী লভতে ভ্রষ্টঃ ক্ষতে ক্ষারাবসেচনম্
6.12
তপসা রূপসৌভাগ্যং রত্নানি বিবিধানি চ
প্রাপ্যতে কর্মণা সর্বং ন দৈবাদকৃতাত্মনা
6.13
তথা স্বর্গশ্চ ভোগশ্চ নিষ্ঠা যা চ মনীষিতা
সর্বং পুরুষকারেণ কৃতেনেহোপপদ্যতে
6.14
জ্যোতীংষি ত্রিদশা নাগা যক্ষাশ্চন্দ্রার্কমারুতাঃ
সর্বে পুরুষকারেণ মানুষ্যাদ্দেবতাং গতাঃ
6.15
অর্থো বা মিত্রবর্গো বা ঐশ্বর্যং বা কুলান্বিতম্
শ্রীশ্চাপি দুর্লভা ভোক্তুং তথৈবাকৃতকর্মভিঃ
6.16
শৌচেন লভতে বিপ্রঃ ক্ষত্রিয়ো বিক্রমেণ চ
বৈশ্যঃ পুরুষকারেণ শূদ্রঃ শুশ্রূষয়া শ্রিয়ম্
6.17
নাদাতারং ভজন্ত্যর্থা ন ক্লীবং নাপি নিষ্ক্রিয়ম্
নাকর্মশীলং নাশূরং তথা নৈবাতপস্বিনম্
6.18
যেন লোকাস্ত্রয়ঃ সৃষ্টা দৈত্যাঃ সর্বাশ্চ দেবতাঃ
স এষ ভগবান্বিষ্ণুঃ সমুদ্রে তপ্যতে তপঃ
6.19
স্বং চেত্কর্মফলং ন স্যাত্সর্বমেবাফলং ভবেৎ
লোকো দৈবং সমালম্ব্য উদাসীনো ভবেন্ন তু
6.20
অকৃত্বা মানুষং কর্ম যো দৈবমনুবর্ততে
বৃথা শ্রাম্যতি সংপ্রাপ্য পতিং ক্লীবমিবাঙ্গনা
6.21
ন তথা মানুষে লোকে ভয়মস্তি শুভাশুভে
যথা ত্রিদশলোকে হি ভয়মল্পেন জায়তে
6.22
কৃতঃ পুরুষকারস্তু দৈবমেবানুবর্ততে
ন দৈবমকৃতে কিংচিত্কস্যচিদ্দাতুমর্হতি
6.23
যদা স্থানান্যনিত্যানি দৃশ্যন্তে দৈবতেষ্বপি
কথং কর্ম বিনা দৈবং স্থাস্যতে স্থাপয়িষ্যতি
6.24
ন দৈবতানি লোকেঽস্মিন্ব্যাপারং যান্তি কস্যচিৎ
ব্যাসঙ্গং জনয়ন্ত্যুগ্রমাত্মাভিভবশঙ্কয়া
6.25
ঋষীণাং দেবতানাং চ সদা ভবতি বিগ্রহঃ
কস্য বাচা হ্যদৈবং স্যাদ্যতো দৈবং প্রবর্ততে
6.26
কথং চাস্য সমুত্পত্তির্যথা দৈবং প্রবর্ততে
এবং ত্রিদশলোকেঽপি প্রাপ্যন্তে বহবশ্ছলাঃ
6.27
আত্মৈব হ্যাত্মনো বন্ধুরাত্মৈব রিপুরাত্মনঃ
আত্মৈব চাত্মনঃ সাক্ষী কৃতস্যাপ্যকৃতস্য চ
6.28
কৃতং চ বিকৃতং কিংচিত্কৃতে কর্মণি সিধ্যতি
সুকৃতে দুষ্কৃতং কর্ম ন যথার্থং প্রপদ্যতে
6.29
দেবানাং শরণং পুণ্যং সর্বং পুণ্যৈরবাপ্যতে
পুণ্যশীলং নরং প্রাপ্য কিং দৈবং প্রকরিষ্যতি
6.30
পুরা যয়াতির্বিভ্রষ্টশ্চ্যাবিতঃ পতিতঃ ক্ষিতৌ
পুনরারোপিতঃ স্বর্গং দৌহিত্রৈঃ পুণ্যকর্মভিঃ
6.31
পুরূরবাশ্চ রাজর্ষির্দ্বিজৈরভিহিতঃ পুরা
ঐল ইত্যভিবিখ্যাতঃ স্বর্গং প্রাপ্তো মহীপতিঃ
6.32
অশ্বমেধাদিভির্যজ্ঞৈঃ সত্কৃতঃ কোসলাধিপঃ
মহর্ষিশাপাত্সৌদাসঃ পুরুষাদত্বমাগতঃ
6.33
অশ্বত্থামা চ রামশ্চ মুনিপুত্রৌ ধনুর্ধরৌ
ন গচ্ছতঃ স্বর্গলোকং সুকৃতেনেহ কর্মণা
6.34
বসুর্যজ্ঞশতৈরিষ্ট্বা দ্বিতীয় ইব বাসবঃ
মিথ্যাভিধানেনৈকেন রসাতলতলং গতঃ
6.35
বলির্বৈরোচনির্বদ্ধো ধর্মপাশেন দৈবতৈঃ
বিষ্ণোঃ পুরুষকারেণ পাতালশয়নঃ কৃতঃ
6.36
শক্রস্যোদস্য চরণং প্রস্থিতো জনমেজয়ঃ
দ্বিজস্ত্রীণাং বধং কৃত্বা কিং দৈবেন ন বারিতঃ
6.37
অজ্ঞানাদ্ব্রাহ্মণং হত্বা স্পৃষ্টো বালবধেন চ
বৈশংপায়নবিপ্রর্ষিঃ কিং দৈবেন নিবারিতঃ
6.38
গোপ্রদানেন মিথ্যা চ ব্রাহ্মণেভ্যো মহামখে
পুরা নৃগশ্চ রাজর্ষিঃ কৃকলাসত্বমাগতঃ
6.39
ধুন্ধুমারশ্চ রাজর্ষিঃ সত্রেষ্বেব জরাং গতঃ
প্রীতিদায়ং পরিত্যজ্য সুষ্বাপ স গিরিব্রজে
6.40
পাণ্ডবানাং হৃতং রাজ্যং ধার্তরাষ্ট্রৈর্মহাবলৈঃ
পুনঃ প্রত্যাহৃতং চৈব ন দৈবাদ্ভুজসংশ্রয়াৎ
6.41
তপোনিয়মসংয়ুক্তা মুনয়ঃ সংশিতব্রতাঃ
কিং তে দৈববলাচ্ছাপমুত্সৃজন্তে ন কর্মণা
6.42
পাপমুত্সৃজতে লোকে সর্বং প্রাপ্য সুদুর্লভম্
লোভমোহসমাপন্নং ন দৈবং ত্রায়তে নরম্
6.43
যথাগ্নিঃ পবনোদ্ধূতঃ সূক্ষ্মোঽপি ভবতে মহান্
তথা কর্মসমায়ুক্তং দৈবং সাধু বিবর্ধতে
6.44
যথা তৈলক্ষয়াদ্দীপঃ প্রম্লানিমুপগচ্ছতি
তথা কর্মক্ষয়াদ্দৈবং প্রম্লানিমুপগচ্ছতি
6.45
বিপুলমপি ধনৌঘং প্রাপ্য ভোগান্স্ত্রিয়ো বা; পুরুষ ইহ ন শক্তঃ কর্মহীনোঽপি ভোক্তুম্
সুনিহিতমপি চার্থং দৈবতৈ রক্ষ্যমাণং; ব্যয়গুণমপি সাধুং কর্মণা সংশ্রয়ন্তে
6.46
ভবতি মনুজলোকাদ্দেবলোকো বিশিষ্টো; বহুতরসুসমৃদ্ধ্যা মানুষাণাং গৃহাণি
পিতৃবনভবনাভং দৃশ্যতে চামরাণাং; ন চ ফলতি বিকর্মা জীবলোকেন দৈবম্
6.47
ব্যপনয়তি বিমার্গং নাস্তি দৈবে প্রভুত্বং; গুরুমিব কৃতমগ্র্যং কর্ম সংয়াতি দৈবম্
অনুপহতমদীনং কামকারেণ দৈবং; নয়তি পুরুষকারঃ সংচিতস্তত্র তত্র
6.48
এতত্তে সর্বমাখ্যাতং ময়া বৈ মুনিসত্তম
ফলং পুরুষকারস্য সদা সংদৃশ্য তত্ত্বতঃ
6.49
অভ্যুত্থানেন দৈবস্য সমারব্ধেন কর্মণা
বিধিনা কর্মণা চৈব স্বর্গমার্গমবাপ্নুয়াৎ