অধ্যায় 5

5.1

যুধিষ্ঠির উবাচ
আনৃশংসস্য ধর্মস্য গুণান্ভক্তজনস্য চ
শ্রোতুমিচ্ছামি কার্ত্স্ন্যেন তন্মে ব্রূহি পিতামহ

5.2

ভীষ্ম উবাচ
বিষয়ে কাশিরাজস্য গ্রামান্নিষ্ক্রম্য লুব্ধকঃ
সবিষং কাণ্ডমাদায় মৃগয়ামাস বৈ মৃগম্

5.3

তত্র চামিষলুব্ধেন লুব্ধকেন মহাবনে
অবিদূরে মৃগং দৃষ্ট্বা বাণঃ প্রতিসমাহিতঃ

5.4

তেন দুর্বারিতাস্ত্রেণ নিমিত্তচপলেষুণা
মহান্বনতরুর্বিদ্ধো মৃগং তত্র জিঘাংসতা

5.5

স তীক্ষ্ণবিষদিগ্ধেন শরেণাতিবলাত্কৃতঃ
উত্সৃজ্য ফলপত্রাণি পাদপঃ শোষমাগতঃ

5.6

তস্মিন্বৃক্ষে তথাভূতে কোটরেষু চিরোষিতঃ
ন জহাতি শুকো বাসং তস্য ভক্ত্যা বনস্পতেঃ

5.7

নিষ্প্রচারো নিরাহারো গ্লানঃ শিথিলবাগপি
কৃতজ্ঞঃ সহ বৃক্ষেণ ধর্মাত্মা স ব্যশুষ্যত

5.8

তমুদারং মহাসত্ত্বমতিমানুষচেষ্টিতম্
সমদুঃখসুখং জ্ঞাত্বা বিস্মিতঃ পাকশাসনঃ

5.9

ততশ্চিন্তামুপগতঃ শক্রঃ কথময়ং দ্বিজঃ
তির্যগ্যোনাবসংভাব্যমানৃশংস্যং সমাস্থিতঃ

5.10

অথ বা নাত্র চিত্রং হীত্যভবদ্বাসবস্য তু
প্রাণিনামিহ সর্বেষাং সর্বং সর্বত্র দৃশ্যতে

5.11

ততো ব্রাহ্মণবেষেণ মানুষং রূপমাস্থিতঃ
অবতীর্য মহীং শক্রস্তং পক্ষিণমুবাচ হ

5.12

শুক ভোঃ পক্ষিণাং শ্রেষ্ঠ দাক্ষেয়ী সুপ্রজাস্ত্বয়া
পৃচ্ছে ত্বা শুষ্কমেতং বৈ কস্মান্ন ত্যজসি দ্রুমম্

5.13

অথ পৃষ্টঃ শুকঃ প্রাহ মূর্ধ্না সমভিবাদ্য তম্
স্বাগতং দেবরাজায় বিজ্ঞাতস্তপসা ময়া

5.14

ততো দশশতাক্ষেণ সাধু সাধ্বিতি ভাষিতম্
অহো বিজ্ঞানমিত্যেবং তপসা পূজিতস্ততঃ

5.15

তমেবং শুভকর্মাণং শুকং পরমধার্মিকম্
বিজানন্নপি তাং প্রাপ্তিং পপ্রচ্ছ বলসূদনঃ

5.16

নিষ্পত্রমফলং শুষ্কমশরণ্যং পতত্রিণাম্
কিমর্থং সেবসে বৃক্ষং যদা মহদিদং বনম্

5.17

অন্যেঽপি বহবো বৃক্ষাঃ পত্রসংছন্নকোটরাঃ
শুভাঃ পর্যাপ্তসংচারা বিদ্যন্তেঽস্মিন্মহাবনে

5.18

গতায়ুষমসামর্থ্যং ক্ষীণসারং হতশ্রিয়ম্
বিমৃশ্য প্রজ্ঞয়া ধীর জহীমং হ্যস্থিরং দ্রুমম্

5.19

তদুপশ্রুত্য ধর্মাত্মা শুকঃ শক্রেণ ভাষিতম্
সুদীর্ঘমভিনিঃশ্বস্য দীনো বাক্যমুবাচ হ

5.20

অনতিক্রমণীয়ানি দৈবতানি শচীপতে
যত্রাভবস্তত্র ভবস্তন্নিবোধ সুরাধিপ

5.21

অস্মিন্নহং দ্রুমে জাতঃ সাধুভিশ্চ গুণৈর্যুতঃ
বালভাবে চ সংগুপ্তঃ শত্রুভিশ্চ ন ধর্ষিতঃ

5.22

কিমনুক্রোশবৈফল্যমুত্পাদয়সি মেঽনঘ
আনৃশংস্যেঽনুরক্তস্য ভক্তস্যানুগতস্য চ

5.23

অনুক্রোশো হি সাধূনাং সুমহদ্ধর্মলক্ষণম্
অনুক্রোশশ্চ সাধূনাং সদা প্রীতিং প্রয়চ্ছতি

5.24

ত্বমেব দৈবতৈঃ সর্বৈঃ পৃচ্ছ্যসে ধর্মসংশয়ান্
অতস্ত্বং দেব দেবানামাধিপত্যে প্রতিষ্ঠিতঃ

5.25

নার্হসি ত্বং সহস্রাক্ষ ত্যাজয়িত্বেহ ভক্তিতঃ
সমর্থমুপজীব্যেমং ত্যজেয়ং কথমদ্য বৈ

5.26

তস্য বাক্যেন সৌম্যেন হর্ষিতঃ পাকশাসনঃ
শুকং প্রোবাচ ধর্মজ্ঞমানৃশংস্যেন তোষিতঃ

5.27

বরং বৃণীষ্বেতি তদা স চ বব্রে বরং শুকঃ
আনৃশংস্যপরো নিত্যং তস্য বৃক্ষস্য সংভবম্

5.28

বিদিত্বা চ দৃঢাং শক্রস্তাং শুকে শীলসংপদম্
প্রীতঃ ক্ষিপ্রমথো বৃক্ষমমৃতেনাবসিক্তবান্

5.29

ততঃ ফলানি পত্রাণি শাখাশ্চাপি মনোরমাঃ
শুকস্য দৃঢভক্তিত্বাচ্ছ্রীমত্ত্বং চাপ স দ্রুমঃ

5.30

শুকশ্চ কর্মণা তেন আনৃশংস্যকৃতেন হ
আয়ুষোঽন্তে মহারাজ প্রাপ শক্রসলোকতাম্

5.31

এবমেব মনুষ্যেন্দ্র ভক্তিমন্তং সমাশ্রিতঃ
সর্বার্থসিদ্ধিং লভতে শুকং প্রাপ্য যথা দ্রুমঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.