Utshovঅধ্যায় 4
4.1
ভীষ্ম উবাচ
শ্রূয়তাং পার্থ তত্ত্বেন বিশ্বামিত্রো যথা পুরা
ব্রাহ্মণত্বং গতস্তাত ব্রহ্মর্ষিত্বং তথৈব চ
4.2
ভরতস্যান্বয়ে চৈবাজমীঢো নাম পার্থিবঃ
বভূব ভরতশ্রেষ্ঠ যজ্বা ধর্মভৃতাং বরঃ
4.3
তস্য পুত্রো মহানাসীজ্জহ্নুর্নাম নরেশ্বরঃ
দুহিতৃত্বমনুপ্রাপ্তা গঙ্গা যস্য মহাত্মনঃ
4.4
তস্যাত্মজস্তুল্যগুণঃ সিন্ধুদ্বীপো মহায়শাঃ
সিন্ধুদ্বীপাচ্চ রাজর্ষির্বলাকাশ্বো মহাবলঃ
4.5
বল্লভস্তস্য তনয়ঃ সাক্ষাদ্ধর্ম ইবাপরঃ
কুশিকস্তস্য তনয়ঃ সহস্রাক্ষসমদ্যুতিঃ
4.6
কুশিকস্যাত্মজঃ শ্রীমান্গাধির্নাম জনেশ্বরঃ
অপুত্রঃ স মহাবাহুর্বনবাসমুদাবসৎ
4.7
কন্যা জজ্ঞে সুতা তস্য বনে নিবসতঃ সতঃ
নাম্না সত্যবতী নাম রূপেণাপ্রতিমা ভুবি
4.8
তাং বব্রে ভার্গবঃ শ্রীমাংশ্চ্যবনস্যাত্মজঃ প্রভুঃ
ঋচীক ইতি বিখ্যাতো বিপুলে তপসি স্থিতঃ
4.9
স তাং ন প্রদদৌ তস্মৈ ঋচীকায় মহাত্মনে
দরিদ্র ইতি মত্বা বৈ গাধিঃ শত্রুনিবর্হণঃ
4.10
প্রত্যাখ্যায় পুনর্যান্তমব্রবীদ্রাজসত্তমঃ
শুল্কং প্রদীয়তাং মহ্যং ততো বেত্স্যসি মে সুতাম্
4.11
ঋচীক উবাচ
কিং প্রয়চ্ছামি রাজেন্দ্র তুভ্যং শুল্কমহং নৃপ
দুহিতুর্ব্রূহ্যসংসক্তো মাত্রাভূত্তে বিচারণা
4.12
গাধিরুবাচ
চন্দ্ররশ্মিপ্রকাশানাং হয়ানাং বাতরংহসাম্
একতঃ শ্যামকর্ণানাং সহস্রং দেহি ভার্গব
4.13
ভীষ্ম উবাচ
ততঃ স ভৃগুশার্দূলশ্চ্যবনস্যাত্মজঃ প্রভুঃ
অব্রবীদ্বরুণং দেবমাদিত্যং পতিমম্ভসাম্
4.14
একতঃ শ্যামকর্ণানাং হয়ানাং চন্দ্রবর্চসাম্
সহস্রং বাতবেগানাং ভিক্ষে ত্বাং দেবসত্তম
4.15
তথেতি বরুণো দেব আদিত্যো ভৃগুসত্তমম্
উবাচ যত্র তে ছন্দস্তত্রোত্থাস্যন্তি বাজিনঃ
4.16
ধ্যাতমাত্রে ঋচীকেন হয়ানাং চন্দ্রবর্চসাম্
গঙ্গাজলাত্সমুত্তস্থৌ সহস্রং বিপুলৌজসাম্
4.17
অদূরে কন্যকুব্জস্য গঙ্গায়াস্তীরমুত্তমম্
অশ্বতীর্থং তদদ্যাপি মানবাঃ পরিচক্ষতে
4.18
তত্তদা গাধয়ে তাত সহস্রং বাজিনাং শুভম্
ঋচীকঃ প্রদদৌ প্রীতঃ শুল্কার্থং জপতাং বরঃ
4.19
ততঃ স বিস্মিতো রাজা গাধিঃ শাপভয়েন চ
দদৌ তাং সমলংকৃত্য কন্যাং ভৃগুসুতায় বৈ
4.20
জগ্রাহ পাণিং বিধিনা তস্য ব্রহ্মর্ষিসত্তমঃ
সা চ তং পতিমাসাদ্য পরং হর্ষমবাপ হ
4.21
স তুতোষ চ বিপ্রর্ষিস্তস্যা বৃত্তেন ভারত
ছন্দয়ামাস চৈবৈনাং বরেণ বরবর্ণিনীম্
4.22
মাত্রে তত্সর্বমাচখ্যৌ সা কন্যা রাজসত্তমম্
অথ তামব্রবীন্মাতা সুতাং কিংচিদবাঙ্মুখীম্
4.23
মমাপি পুত্রি ভর্তা তে প্রসাদং কর্তুমর্হতি
অপত্যস্য প্রদানেন সমর্থঃ স মহাতপাঃ
4.24
ততঃ সা ত্বরিতং গত্বা তত্সর্বং প্রত্যবেদয়ৎ
মাতুশ্চিকীর্ষিতং রাজন্নৃচীকস্তামথাব্রবীৎ
4.25
গুণবন্তমপত্যং বৈ ত্বং চ সা জনয়িষ্যথঃ
জনন্যাস্তব কল্যাণি মা ভূদ্বৈ প্রণয়োঽন্যথা
4.26
তব চৈব গুণশ্লাঘী পুত্র উত্পত্স্যতে শুভে
অস্মদ্বংশকরঃ শ্রীমাংস্তব ভ্রাতা চ বংশকৃৎ
4.27
ঋতুস্নাতা চ সাশ্বত্থং ত্বং চ বৃক্ষমুদুম্বরম্
পরিষ্বজেথাঃ কল্যাণি তত ইষ্টমবাপ্স্যথঃ
4.28
চরুদ্বয়মিদং চৈব মন্ত্রপূতং শুচিস্মিতে
ত্বং চ সা চোপয়ুঞ্জীথাং ততঃ পুত্রাববাপ্স্যথঃ
4.29
ততঃ সত্যবতী হৃষ্টা মাতরং প্রত্যভাষত
যদৃচীকেন কথিতং তচ্চাচখ্যৌ চরুদ্বয়ম্
4.30
তামুবাচ ততো মাতা সুতাং সত্যবতীং তদা
পুত্রি মূর্ধ্না প্রপন্নায়াঃ কুরুষ্ব বচনং মম
4.31
ভর্ত্রা য এষ দত্তস্তে চরুর্মন্ত্রপুরস্কৃতঃ
এতং প্রয়চ্ছ মহ্যং ত্বং মদীয়ং ত্বং গৃহাণ চ
4.32
ব্যত্যাসং বৃক্ষয়োশ্চাপি করবাব শুচিস্মিতে
যদি প্রমাণং বচনং মম মাতুরনিন্দিতে
4.33
ব্যক্তং ভগবতা চাত্র কৃতমেবং ভবিষ্যতি
ততো মে ত্বচ্চরৌ ভাবঃ পাদপে চ সুমধ্যমে
কথং বিশিষ্টো ভ্রাতা তে ভবেদিত্যেব চিন্তয়
4.34
তথা চ কৃতবত্যৌ তে মাতা সত্যবতী চ সা
অথ গর্ভাবনুপ্রাপ্তে উভে তে বৈ যুধিষ্ঠির
4.35
দৃষ্ট্বা গর্ভমনুপ্রাপ্তাং ভার্যাং স চ মহানৃষিঃ
উবাচ তাং সত্যবতীং দুর্মনা ভৃগুসত্তমঃ
4.36
ব্যত্যাসেনোপয়ুক্তস্তে চরুর্ব্যক্তং ভবিষ্যতি
ব্যত্যাসঃ পাদপে চাপি সুব্যক্তং তে কৃতঃ শুভে
4.37
ময়া হি বিশ্বং যদ্ব্রহ্ম ত্বচ্চরৌ সংনিবেশিতম্
ক্ষত্রবীর্যং চ সকলং চরৌ তস্যা নিবেশিতম্
4.38
ত্রিলোকবিখ্যাতগুণং ত্বং বিপ্রং জনয়িষ্যসি
সা চ ক্ষত্রং বিশিষ্টং বৈ তত এতত্কৃতং ময়া
4.39
ব্যত্যাসস্তু কৃতো যস্মাত্ত্বয়া মাত্রা তথৈব চ
তস্মাত্সা ব্রাহ্মণশ্রেষ্ঠং মাতা তে জনয়িষ্যতি
4.40
ক্ষত্রিয়ং তূগ্রকর্মাণং ত্বং ভদ্রে জনয়িষ্যসি
ন হি তে তত্কৃতং সাধু মাতৃস্নেহেন ভামিনি
4.41
সা শ্রুত্বা শোকসংতপ্তা পপাত বরবর্ণিনী
ভূমৌ সত্যবতী রাজংশ্ছিন্নেব রুচিরা লতা
4.42
প্রতিলভ্য চ সা সংজ্ঞাং শিরসা প্রণিপত্য চ
উবাচ ভার্যা ভর্তারং গাধেয়ী ব্রাহ্মণর্ষভম্
4.43
প্রসাদয়ন্ত্যাং ভার্যায়াং ময়ি ব্রহ্মবিদাং বর
প্রসাদং কুরু বিপ্রর্ষে ন মে স্যাত্ক্ষত্রিয়ঃ সুতঃ
4.44
কামং মমোগ্রকর্মা বৈ পৌত্রো ভবিতুমর্হতি
ন তু মে স্যাত্সুতো ব্রহ্মন্নেষ মে দীয়তাং বরঃ
4.45
এবমস্ত্বিতি হোবাচ স্বাং ভার্যাং সুমহাতপাঃ
ততঃ সা জনয়ামাস জমদগ্নিং সুতং শুভম্
4.46
বিশ্বামিত্রং চাজনয়দ্গাধের্ভার্যা যশস্বিনী
ঋষেঃ প্রভাবাদ্রাজেন্দ্র ব্রহ্মর্ষিং ব্রহ্মবাদিনম্
4.47
ততো ব্রাহ্মণতাং যাতো বিশ্বামিত্রো মহাতপাঃ
ক্ষত্রিয়ঃ সোঽপ্যথ তথা ব্রহ্মবংশস্য কারকঃ
4.48
তস্য পুত্রা মহাত্মানো ব্রহ্মবংশবিবর্ধনাঃ
তপস্বিনো ব্রহ্মবিদো গোত্রকর্তার এব চ
4.49
মধুচ্ছন্দশ্চ ভগবান্দেবরাতশ্চ বীর্যবান্
অক্ষীণশ্চ শকুন্তশ্চ বভ্রুঃ কালপথস্তথা
4.50
যাজ্ঞবল্ক্যশ্চ বিখ্যাতস্তথা স্থূণো মহাব্রতঃ
উলূকো যমদূতশ্চ তথর্ষিঃ সৈন্ধবায়নঃ
4.51
কর্ণজঙ্ঘশ্চ ভগবান্গালবশ্চ মহানৃষিঃ
ঋষির্বজ্রস্তথাখ্যাতঃ শালঙ্কায়ন এব চ
4.52
লালাট্যো নারদশ্চৈব তথা কূর্চমুখঃ স্মৃতঃ
বাদুলির্মুসলশ্চৈব রক্ষোগ্রীবস্তথৈব চ
4.53
অঙ্ঘ্রিকো নৈকভৃচ্চৈব শিলায়ূপঃ সিতঃ শুচিঃ
চক্রকো মারুতন্তব্যো বাতঘ্নোঽথাশ্বলায়নঃ
4.54
শ্যামায়নোঽথ গার্গ্যশ্চ জাবালিঃ সুশ্রুতস্তথা
কারীষিরথ সংশ্রুত্যঃ পরপৌরবতন্তবঃ
4.55
মহানৃষিশ্চ কপিলস্তথর্ষিস্তারকায়নঃ
তথৈব চোপগহনস্তথর্ষিশ্চার্জুনায়নঃ
4.56
মার্গমিত্রির্হিরণ্যাক্ষো জঙ্ঘারির্বভ্রুবাহনঃ
সূতির্বিভূতিঃ সূতশ্চ সুরঙ্গশ্চ তথৈব হি
4.57
আরাদ্ধির্নাময়শ্চৈব চাম্পেয়োজ্জয়নৌ তথা
নবতন্তুর্বকনখঃ শয়োনরতিরেব চ
4.58
শয়োরুহশ্চারুমত্স্যঃ শিরীষী চাথ গার্দভিঃ
উজ্জয়োনিরদাপেক্ষী নারদী চ মহানৃষিঃ
বিশ্বামিত্রাত্মজাঃ সর্বে মুনয়ো ব্রহ্মবাদিনঃ
4.59
তন্নৈষ ক্ষত্রিয়ো রাজন্বিশ্বামিত্রো মহাতপাঃ
ঋচীকেনাহিতং ব্রহ্ম পরমেতদ্যুধিষ্ঠির
4.60
এতত্তে সর্বমাখ্যাতং তত্ত্বেন ভরতর্ষভ
বিশ্বামিত্রস্য বৈ জন্ম সোমসূর্যাগ্নিতেজসঃ
4.61
যত্র যত্র চ সংদেহো ভূয়স্তে রাজসত্তম
তত্র তত্র চ মাং ব্রূহি চ্ছেত্তাস্মি তব সংশয়ান্