অধ্যায় 3

3.1

যুধিষ্ঠির উবাচ
ব্রাহ্মণ্যং যদি দুষ্প্রাপং ত্রিভির্বর্ণৈর্নরাধিপ
কথং প্রাপ্তং মহারাজ ক্ষত্রিয়েণ মহাত্মনা

বিশ্বামিত্রেণ ধর্মাত্মন্ব্রাহ্মণত্বং নরর্ষভ
শ্রোতুমিচ্ছামি তত্ত্বেন তন্মে ব্রূহি পিতামহ

তেন হ্যমিতবীর্যেণ বসিষ্ঠস্য মহাত্মনঃ
হতং পুত্রশতং সদ্যস্তপসা প্রপিতামহ

যাতুধানাশ্চ বহবো রাক্ষসাস্তিগ্মতেজসঃ
মন্যুনাবিষ্টদেহেন সৃষ্টাঃ কালান্তকোপমাঃ

মহান্কুশিকবংশশ্চ ব্রহ্মর্ষিশতসংকুলঃ
স্থাপিতো নরলোকেঽস্মিন্বিদ্বান্ব্রাহ্মণসংস্তুতঃ

ঋচীকস্যাত্মজশ্চৈব শুনঃশেপো মহাতপাঃ
বিমোক্ষিতো মহাসত্রাত্পশুতামভ্যুপাগতঃ

হরিশ্চন্দ্রক্রতৌ দেবাংস্তোষয়িত্বাত্মতেজসা
পুত্রতামনুসংপ্রাপ্তো বিশ্বামিত্রস্য ধীমতঃ

নাভিবাদয়তে জ্যেষ্ঠং দেবরাতং নরাধিপ
পুত্রাঃ পঞ্চশতাশ্চাপি শপ্তাঃ শ্বপচতাং গতাঃ

ত্রিশঙ্কুর্বন্ধুসংত্যক্ত ইক্ষ্বাকুঃ প্রীতিপূর্বকম্
অবাক্শিরা দিবং নীতো দক্ষিণামাশ্রিতো দিশম্

বিশ্বামিত্রস্য বিপুলা নদী রাজর্ষিসেবিতা
কৌশিকীতি শিবা পুণ্যা ব্রহ্মর্ষিগণসেবিতা

তপোবিঘ্নকরী চৈব পঞ্চচূডা সুসংমতা
রম্ভা নামাপ্সরাঃ শাপাদ্যস্য শৈলত্বমাগতা

তথৈবাস্য ভয়াদ্বদ্ধ্বা বসিষ্ঠঃ সলিলে পুরা
আত্মানং মজ্জয়ামাস বিপাশঃ পুনরুত্থিতঃ

তদাপ্রভৃতি পুণ্যা হি বিপাশাভূন্মহানদী
বিখ্যাতা কর্মণা তেন বসিষ্ঠস্য মহাত্মনঃ

বাগ্ভিশ্চ ভগবান্যেন দেবসেনাগ্রগঃ প্রভুঃ
স্তুতঃ প্রীতমনাশ্চাসীচ্ছাপাচ্চৈনমমোচয়ৎ

ধ্রুবস্যৌত্তানপাদস্য ব্রহ্মর্ষীণাং তথৈব চ
মধ্যে জ্বলতি যো নিত্যমুদীচীমাশ্রিতো দিশম্

তস্যৈতানি চ কর্মাণি তথান্যানি চ কৌরব
ক্ষত্রিয়স্যেত্যতো জাতমিদং কৌতূহলং মম

কিমেতদিতি তত্ত্বেন প্রব্রূহি ভরতর্ষভ
দেহান্তরমনাসাদ্য কথং স ব্রাহ্মণোঽভবৎ

এতত্তত্ত্বেন মে রাজন্সর্বমাখ্যাতুমর্হসি
মতংগস্য যথাতত্ত্বং তথৈবৈতদ্ব্রবীহি মে

স্থানে মতংগো ব্রাহ্মণ্যং নালভদ্ভরতর্ষভ
চণ্ডালয়োনৌ জাতো হি কথং ব্রাহ্মণ্যমাপ্নুয়াৎ