Utshovঅধ্যায় 2
2.1
যুধিষ্ঠির উবাচ
পিতামহ মহাপ্রাজ্ঞ সর্বশাস্ত্রবিশারদ
শ্রুতং মে মহদাখ্যানমিদং মতিমতাং বর
2.2
ভূয়স্তু শ্রোতুমিচ্ছামি ধর্মার্থসহিতং নৃপ
কথ্যমানং ত্বয়া কিংচিত্তন্মে ব্যাখ্যাতুমর্হসি
2.3
কেন মৃত্যুর্গৃহস্থেন ধর্মমাশ্রিত্য নির্জিতঃ
ইত্যেতত্সর্বমাচক্ষ্ব তত্ত্বেন মম পার্থিব
2.4
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
যথা মৃত্যুর্গৃহস্থেন ধর্মমাশ্রিত্য নির্জিতঃ
2.5
মনোঃ প্রজাপতে রাজন্নিক্ষ্বাকুরভবত্সুতঃ
তস্য পুত্রশতং জজ্ঞে নৃপতেঃ সূর্যবর্চসঃ
2.6
দশমস্তস্য পুত্রস্তু দশাশ্বো নাম ভারত
মাহিষ্মত্যামভূদ্রাজা ধর্মাত্মা সত্যবিক্রমঃ
2.7
দশাশ্বস্য সুতস্ত্বাসীদ্রাজা পরমধার্মিকঃ
সত্যে তপসি দানে চ যস্য নিত্যং রতং মনঃ
2.8
মদিরাশ্ব ইতি খ্যাতঃ পৃথিব্যাং পৃথিবীপতিঃ
ধনুর্বেদে চ বেদে চ নিরতো যোঽভবত্সদা
2.9
মদিরাশ্বস্য পুত্রস্তু দ্যুতিমান্নাম পার্থিবঃ
মহাভাগো মহাতেজা মহাসত্ত্বো মহাবলঃ
2.10
পুত্রো দ্যুতিমতস্ত্বাসীত্সুবীরো নাম পার্থিবঃ
ধর্মাত্মা কোশবাংশ্চাপি দেবরাজ ইবাপরঃ
2.11
সুবীরস্য তু পুত্রোঽভূত্সর্বসংগ্রামদুর্জয়ঃ
দুর্জয়েত্যভিবিখ্যাতঃ সর্বশাস্ত্রবিশারদঃ
2.12
দুর্জয়স্যেন্দ্রবপুষঃ পুত্রোঽগ্নিসদৃশদ্যুতিঃ
দুর্যোধনো নাম মহান্রাজাসীদ্রাজসত্তম
2.13
তস্যেন্দ্রসমবীর্যস্য সংগ্রামেষ্বনিবর্তিনঃ
বিষয়শ্চ প্রভাবশ্চ তুল্যমেবাভ্যবর্তত
2.14
রত্নৈর্ধনৈশ্চ পশুভিঃ সস্যৈশ্চাপি পৃথগ্বিধৈঃ
নগরং বিষয়শ্চাস্য প্রতিপূর্ণং তদাভবৎ
2.15
ন তস্য বিষয়ে চাভূত্কৃপণো নাপি দুর্গতঃ
ব্যাধিতো বা কৃশো বাপি তস্মিন্নাভূন্নরঃ ক্বচিৎ
2.16
সুদক্ষিণো মধুরবাগনসূয়ুর্জিতেন্দ্রিয়ঃ
ধর্মাত্মা চানৃশংসশ্চ বিক্রান্তোঽথাবিকত্থনঃ
2.17
যজ্বা বদান্যো মেধাবী ব্রহ্মণ্যঃ সত্যসংগরঃ
ন চাবমন্তা দাতা চ বেদবেদাঙ্গপারগঃ
2.18
তং নর্মদা দেবনদী পুণ্যা শীতজলা শিবা
চকমে পুরুষশ্রেষ্ঠং স্বেন ভাবেন ভারত
2.19
তস্য জজ্ঞে তদা নদ্যাং কন্যা রাজীবলোচনা
নাম্না সুদর্শনা রাজন্রূপেণ চ সুদর্শনা
2.20
তাদৃগ্রূপা ন নারীষু ভূতপূর্বা যুধিষ্ঠির
দুর্যোধনসুতা যাদৃগভবদ্বরবর্ণিনী
2.21
তামগ্নিশ্চকমে সাক্ষাদ্রাজকন্যাং সুদর্শনাম্
ভূত্বা চ ব্রাহ্মণঃ সাক্ষাদ্বরয়ামাস তং নৃপম্
2.22
দরিদ্রশ্চাসবর্ণশ্চ মমায়মিতি পার্থিবঃ
ন দিত্সতি সুতাং তস্মৈ তাং বিপ্রায় সুদর্শনাম্
2.23
ততোঽস্য বিততে যজ্ঞে নষ্টোঽভূদ্ধব্যবাহনঃ
ততো দুর্যোধনো রাজা বাক্যমাহর্ত্বিজস্তদা
2.24
দুষ্কৃতং মম কিং নু স্যাদ্ভবতাং বা দ্বিজর্ষভাঃ
যেন নাশং জগামাগ্নিঃ কৃতং কুপুরুষেষ্বিব
2.25
ন হ্যল্পং দুষ্কৃতং নোঽস্তি যেনাগ্নির্নাশমাগতঃ
ভবতাং বাথ বা মহ্যং তত্ত্বেনৈতদ্বিমৃশ্যতাম্
2.26
এতদ্রাজ্ঞো বচঃ শ্রুত্বা বিপ্রাস্তে ভরতর্ষভ
নিয়তা বাগ্যতাশ্চৈব পাবকং শরণং যয়ুঃ
2.27
তান্দর্শয়ামাস তদা ভগবান্হব্যবাহনঃ
স্বং রূপং দীপ্তিমত্কৃত্বা শরদর্কসমদ্যুতিঃ
2.28
ততো মহাত্মা তানাহ দহনো ব্রাহ্মণর্ষভান্
বরয়াম্যাত্মনোঽর্থায় দুর্যোধনসুতামিতি
2.29
ততস্তে কাল্যমুত্থায় তস্মৈ রাজ্ঞে ন্যবেদয়ন্
ব্রাহ্মণা বিস্মিতাঃ সর্বে যদুক্তং চিত্রভানুনা
2.30
ততঃ স রাজা তচ্ছ্রুত্বা বচনং ব্রহ্মবাদিনাম্
অবাপ্য পরমং হর্ষং তথেতি প্রাহ বুদ্ধিমান্
2.31
প্রায়াচত নৃপঃ শুল্কং ভগবন্তং বিভাবসুম্
নিত্যং সাংনিধ্যমিহ তে চিত্রভানো ভবেদিতি
তমাহ ভগবানগ্নিরেবমস্ত্বিতি পার্থিবম্
2.32
ততঃ সাংনিধ্যমধ্যাপি মাহিষ্মত্যাং বিভাবসোঃ
দৃষ্টং হি সহদেবেন দিশো বিজয়তা তদা
2.33
ততস্তাং সমলংকৃত্য কন্যামহতবাসসম্
দদৌ দুর্যোধনো রাজা পাবকায় মহাত্মনে
2.34
প্রতিজগ্রাহ চাগ্নিস্তাং রাজপুত্রীং সুদর্শনাম্
বিধিনা বেদদৃষ্টেন বসোর্ধারামিবাধ্বরে
2.35
তস্যা রূপেণ শীলেন কুলেন বপুষা শ্রিয়া
অভবত্প্রীতিমানগ্নির্গর্ভং তস্যাং সমাদধে
2.36
তস্যাং সমভবত্পুত্রো নাম্নাগ্নেয়ঃ সুদর্শনঃ
শিশুরেবাধ্যগাত্সর্বং স চ ব্রহ্ম সনাতনম্
2.37
অথৌঘবান্নাম নৃপো নৃগস্যাসীত্পিতামহঃ
তস্যাপ্যোঘবতী কন্যা পুত্রশ্চৌঘরথোঽভবৎ
2.38
তামোঘবান্দদৌ তস্মৈ স্বয়মোঘবতীং সুতাম্
সুদর্শনায় বিদুষে ভার্যার্থে দেবরূপিণীম্
2.39
স গৃহস্থাশ্রমরতস্তয়া সহ সুদর্শনঃ
কুরুক্ষেত্রেঽবসদ্রাজন্নোঘবত্যা সমন্বিতঃ
2.40
গৃহস্থশ্চাবজেষ্যামি মৃত্যুমিত্যেব স প্রভো
প্রতিজ্ঞামকরোদ্ধীমান্দীপ্ততেজা বিশাং পতে
2.41
তামথৌঘবতীং রাজন্স পাবকসুতোঽব্রবীৎ
অতিথেঃ প্রতিকূলং তে ন কর্তব্যং কথংচন
2.42
যেন যেন চ তুষ্যেত নিত্যমেব ত্বয়াতিথিঃ
অপ্যাত্মনঃ প্রদানেন ন তে কার্যা বিচারণা
2.43
এতদ্ব্রতং মম সদা হৃদি সংপরিবর্ততে
গৃহস্থানাং হি সুশ্রোণি নাতিথের্বিদ্যতে পরম্
2.44
প্রমাণং যদি বামোরু বচস্তে মম শোভনে
ইদং বচনমব্যগ্রা হৃদি ত্বং ধারয়েঃ সদা
2.45
নিষ্ক্রান্তে ময়ি কল্যাণি তথা সংনিহিতেঽনঘে
নাতিথিস্তেঽবমন্তব্যঃ প্রমাণং যদ্যহং তব
2.46
তমব্রবীদোঘবতী যতা মূর্ধ্নি কৃতাঞ্জলিঃ
ন মে ত্বদ্বচনাত্কিংচিদকর্তব্যং কথংচন
2.47
জিগীষমাণং তু গৃহে তদা মৃত্যুঃ সুদর্শনম্
পৃষ্ঠতোঽন্বগমদ্রাজন্রন্ধ্রান্বেষী তদা সদা
2.48
ইধ্মার্থং তু গতে তস্মিন্নগ্নিপুত্রে সুদর্শনে
অতিথির্ব্রাহ্মণঃ শ্রীমাংস্তামাহৌঘবতীং তদা
2.49
আতিথ্যং দত্তমিচ্ছামি ত্বয়াদ্য বরবর্ণিনি
প্রমাণং যদি ধর্মস্তে গৃহস্থাশ্রমসংমতঃ
2.50
ইত্যুক্তা তেন বিপ্রেণ রাজপুত্রী যশস্বিনী
বিধিনা প্রতিজগ্রাহ বেদোক্তেন বিশাং পতে
2.51
আসনং চৈব পাদ্যং চ তস্মৈ দত্ত্বা দ্বিজাতয়ে
প্রোবাচৌঘবতী বিপ্রং কেনার্থঃ কিং দদামি তে
2.52
তামব্রবীত্ততো বিপ্রো রাজপুত্রীং সুদর্শনাম্
ত্বয়া মমার্থঃ কল্যাণি নির্বিশঙ্কে তদাচর
2.53
যদি প্রমাণং ধর্মস্তে গৃহস্থাশ্রমসংমতঃ
প্রদানেনাত্মনো রাজ্ঞি কর্তুমর্হসি মে প্রিয়ম্
2.54
তথা সংছন্দ্যমানোঽন্যৈরীপ্সিতৈর্নৃপকন্যয়া
নান্যমাত্মপ্রদানাত্স তস্যা বব্রে বরং দ্বিজঃ
2.55
সা তু রাজসুতা স্মৃত্বা ভর্তুর্বচনমাদিতঃ
তথেতি লজ্জমানা সা তমুবাচ দ্বিজর্ষভম্
2.56
ততো রহঃ স বিপ্রর্ষিঃ সা চৈবোপবিবেশ হ
সংস্মৃত্য ভর্তুর্বচনং গৃহস্থাশ্রমকাঙ্ক্ষিণঃ
2.57
অথেধ্মান্সমুপাদায় স পাবকিরুপাগমৎ
মৃত্যুনা রৌদ্রভাবেন নিত্যং বন্ধুরিবান্বিতঃ
2.58
ততস্ত্বাশ্রমমাগম্য স পাবকসুতস্তদা
তামাজুহাবৌঘবতীং ক্বাসি যাতেতি চাসকৃৎ
2.59
তস্মৈ প্রতিবচঃ সা তু ভর্ত্রে ন প্রদদৌ তদা
করাভ্যাং তেন বিপ্রেণ স্পৃষ্টা ভর্তৃব্রতা সতী
2.60
উচ্ছিষ্টাস্মীতি মন্বানা লজ্জিতা ভর্তুরেব চ
তূষ্ণীংভূতাভবত্সাধ্বী ন চোবাচাথ কিংচন
2.61
অথ তাং পুনরেবেদং প্রোবাচ স সুদর্শনঃ
ক্ব সা সাধ্বী ক্ব সা যাতা গরীয়ঃ কিমতো মম
2.62
পতিব্রতা সত্যশীলা নিত্যং চৈবার্জবে রতা
কথং ন প্রত্যুদেত্যদ্য স্ময়মানা যথা পুরা
2.63
উটজস্থস্তু তং বিপ্রঃ প্রত্যুবাচ সুদর্শনম্
অতিথিং বিদ্ধি সংপ্রাপ্তং পাবকে ব্রাহ্মণং চ মাম্
2.64
অনয়া ছন্দ্যমানোঽহং ভার্যয়া তব সত্তম
তৈস্তৈরতিথিসত্কারৈরার্জবেঽস্যা দৃঢং মনঃ
2.65
অনেন বিধিনা সেয়ং মামর্চতি শুভাননা
অনুরূপং যদত্রাদ্য তদ্ভবান্বক্তুমর্হতি
2.66
কূটমুদ্গরহস্তস্তু মৃত্যুস্তং বৈ সমন্বয়াৎ
হীনপ্রতিজ্ঞমত্রৈনং বধিষ্যামীতি চিন্তয়ন্
2.67
সুদর্শনস্তু মনসা কর্মণা চক্ষুষা গিরা
ত্যক্তের্ষ্যস্ত্যক্তমন্যুশ্চ স্ময়মানোঽব্রবীদিদম্
2.68
সুরতং তেঽস্তু বিপ্রাগ্র্য প্রীতির্হি পরমা মম
গৃহস্থস্য হি ধর্মোঽগ্র্যঃ সংপ্রাপ্তাতিথিপূজনম্
2.69
অতিথিঃ পূজিতো যস্য গৃহস্থস্য তু গচ্ছতি
নান্যস্তস্মাত্পরো ধর্ম ইতি প্রাহুর্মনীষিণঃ
2.70
প্রাণা হি মম দারাশ্চ যচ্চান্যদ্বিদ্যতে বসু
অতিথিভ্যো ময়া দেয়মিতি মে ব্রতমাহিতম্
2.71
নিঃসংদিগ্ধং ময়া বাক্যমেতত্তে সমুদাহৃতম্
তেনাহং বিপ্র সত্যেন স্বয়মাত্মানমালভে
2.72
পৃথিবী বায়ুরাকাশমাপো জ্যোতিশ্চ পঞ্চমম্
বুদ্ধিরাত্মা মনঃ কালো দিশশ্চৈব গুণা দশ
2.73
নিত্যমেতে হি পশ্যন্তি দেহিনাং দেহসংশ্রিতাঃ
সুকৃতং দুষ্কৃতং চাপি কর্ম ধর্মভৃতাং বর
2.74
যথৈষা নানৃতা বাণী ময়াদ্য সমুদাহৃতা
তেন সত্যেন মাং দেবাঃ পালয়ন্তু দহন্তু বা
2.75
ততো নাদঃ সমভবদ্দিক্ষু সর্বাসু ভারত
অসকৃত্সত্যমিত্যেব নৈতন্মিথ্যেতি সর্বশঃ
2.76
উটজাত্তু ততস্তস্মান্নিশ্চক্রাম স বৈ দ্বিজঃ
বপুষা খং চ ভূমিং চ ব্যাপ্য বায়ুরিবোদ্যতঃ
2.77
স্বরেণ বিপ্রঃ শৈক্ষেণ ত্রীঁল্লোকাননুনাদয়ন্
উবাচ চৈনং ধর্মজ্ঞং পূর্বমামন্ত্র্য নামতঃ
2.78
ধর্মোঽহমস্মি ভদ্রং তে জিজ্ঞাসার্থং তবানঘ
প্রাপ্তঃ সত্যং চ তে জ্ঞাত্বা প্রীতির্মে পরমা ত্বয়ি
2.79
বিজিতশ্চ ত্বয়া মৃত্যুর্যোঽয়ং ত্বামনুগচ্ছতি
রন্ধ্রান্বেষী তব সদা ত্বয়া ধৃত্যা বশীকৃতঃ
2.80
ন চাস্তি শক্তিস্ত্রৈলোক্যে কস্যচিত্পুরুষোত্তম
পতিব্রতামিমাং সাধ্বীং তবোদ্বীক্ষিতুমপ্যুত
2.81
রক্ষিতা ত্বদ্গুণৈরেষা পতিব্রতগুণৈস্তথা
অধৃষ্যা যদিয়ং ব্রূয়াত্তথা তন্নান্যথা ভবেৎ
2.82
এষা হি তপসা স্বেন সংয়ুক্তা ব্রহ্মবাদিনী
পাবনার্থং চ লোকস্য সরিচ্ছ্রেষ্ঠা ভবিষ্যতি
2.83
অর্ধেনৌঘবতী নাম ত্বামর্ধেনানুয়াস্যতি
শরীরেণ মহাভাগা যোগো হ্যস্যা বশে স্থিতঃ
2.84
অনয়া সহ লোকাংশ্চ গন্তাসি তপসার্জিতান্
যত্র নাবৃত্তিমভ্যেতি শাশ্বতাংস্তান্সনাতনান্
2.85
অনেন চৈব দেহেন লোকাংস্ত্বমভিপত্স্যসে
নির্জিতশ্চ ত্বয়া মৃত্যুরৈশ্বর্যং চ তবোত্তমম্
2.86
পঞ্চ ভূতান্যতিক্রান্তঃ স্ববীর্যাচ্চ মনোভবঃ
গৃহস্থধর্মেণানেন কামক্রোধৌ চ তে জিতৌ
2.87
স্নেহো রাগশ্চ তন্দ্রী চ মোহো দ্রোহশ্চ কেবলঃ
তব শুশ্রূষয়া রাজন্রাজপুত্র্যা বিনির্জিতাঃ
2.88
ভীষ্ম উবাচ
শুক্লানাং তু সহস্রেণ বাজিনাং রথমুত্তমম্
যুক্তং প্রগৃহ্য ভগবান্ব্যবসায়ো জগাম তম্
2.89
মৃত্যুরাত্মা চ লোকাশ্চ জিতা ভূতানি পঞ্চ চ
বুদ্ধিঃ কালো মনো ব্যোম কামক্রোধৌ তথৈব চ
2.90
তস্মাদ্গৃহাশ্রমস্থস্য নান্যদ্দৈবতমস্তি বৈ
ঋতেঽতিথিং নরব্যাঘ্র মনসৈতদ্বিচারয়
2.91
অতিথিঃ পূজিতো যস্য ধ্যায়তে মনসা শুভম্
ন তত্ক্রতুশতেনাপি তুল্যমাহুর্মনীষিণঃ
2.92
পাত্রং ত্বতিথিমাসাদ্য শীলাঢ্যং যো ন পূজয়েৎ
স দত্ত্বা সুকৃতং তস্য ক্ষপয়েত হ্যনর্চিতঃ
2.93
এতত্তে কথিতং পুত্র ময়াখ্যানমনুত্তমম্
যথা হি বিজিতো মৃত্যুর্গৃহস্থেন পুরাভবৎ
2.94
ধন্যং যশস্যমায়ুষ্যমিদমাখ্যানমুত্তমম্
বুভূষতাভিমন্তব্যং সর্বদুশ্চরিতাপহম্
2.95
য ইদং কথয়েদ্বিদ্বানহন্যহনি ভারত
সুদর্শনস্য চরিতং পুণ্যাঁল্লোকানবাপ্নুয়াৎ