Utshovঅধ্যায় 1
1.1
যুধিষ্ঠির উবাচ
শমো বহুবিধাকারঃ সূক্ষ্ম উক্তঃ পিতামহ
ন চ মে হৃদয়ে শান্তিরস্তি কৃত্বেদমীদৃশম্
1.2
অস্মিন্নর্থে বহুবিধা শান্তিরুক্তা ত্বয়ানঘ
স্বকৃতে কা নু শান্তিঃ স্যাচ্ছমাদ্বহুবিধাদপি
1.3
শরাচিতশরীরং হি তীব্রব্রণমুদীক্ষ্য চ
শমং নোপলভে বীর দুষ্কৃতান্যেব চিন্তয়ন্
1.4
রুধিরেণাবসিক্তাঙ্গং প্রস্রবন্তং যথাচলম্
ত্বাং দৃষ্ট্বা পুরুষব্যাঘ্র সীদে বর্ষাস্বিবাম্বুজম্
1.5
অতঃ কষ্টতরং কিং নু মত্কৃতে যত্পিতামহঃ
ইমামবস্থাং গমিতঃ প্রত্যমিত্রৈ রণাজিরে
তথৈবান্যে নৃপতয়ঃ সহপুত্রাঃ সবান্ধবাঃ
1.6
বয়ং হি ধার্তরাষ্ট্রাশ্চ কালমন্যুবশানুগাঃ
কৃত্বেদং নিন্দিতং কর্ম প্রাপ্স্যামঃ কাং গতিং নৃপ
1.7
অহং তব হ্যন্তকরঃ সুহৃদ্বধকরস্তথা
ন শান্তিমধিগচ্ছামি পশ্যংস্ত্বাং দুঃখিতং ক্ষিতৌ
1.8
ভীষ্ম উবাচ
পরতন্ত্রং কথং হেতুমাত্মানমনুপশ্যসি
কর্মণ্যস্মিন্মহাভাগ সূক্ষ্মং হ্যেতদতীন্দ্রিয়ম্
1.9
অত্রাপ্যুদাহরন্তীমমিতিহাসং পুরাতনম্
সংবাদং মৃত্যুগৌতম্যোঃ কাললুব্ধকপন্নগৈঃ
1.10
গৌতমী নাম কৌন্তেয় স্থবিরা শমসংয়ুতা
সর্পেণ দষ্টং স্বং পুত্রমপশ্যদ্গতচেতনম্
1.11
অথ তং স্নায়ুপাশেন বদ্ধ্বা সর্পমমর্ষিতঃ
লুব্ধকোঽর্জুনকো নাম গৌতম্যাঃ সমুপানয়ৎ
1.12
তাং চাব্রবীদয়ং তে স পুত্রহা পন্নগাধমঃ
ব্রূহি ক্ষিপ্রং মহাভাগে বধ্যতাং কেন হেতুনা
1.13
অগ্নৌ প্রক্ষিপ্যতামেষ চ্ছিদ্যতাং খণ্ডশোঽপি বা
ন হ্যয়ং বালহা পাপশ্চিরং জীবিতুমর্হতি
1.14
গৌতম্যুবাচ
বিসৃজৈনমবুদ্ধিস্ত্বং ন বধ্যোঽর্জুনক ত্বয়া
কো হ্যাত্মানং গুরুং কুর্যাত্প্রাপ্তব্যে সতি চিন্তয়ন্
1.15
প্লবন্তে ধর্মলঘবো লোকেঽম্ভসি যথা প্লবাঃ
মজ্জন্তি পাপগুরবঃ শস্ত্রং স্কন্নমিবোদকে
1.16
ন চামৃত্যুর্ভবিতা বৈ হতেঽস্মি;ন্কো বাত্যয়ঃ স্যাদহতেঽস্মিঞ্জনস্য
অস্যোত্সর্গে প্রাণয়ুক্তস্য জন্তো;র্মৃত্যোর্লোকং কো নু গচ্ছেদনন্তম্
1.17
লুব্ধক উবাচ
জানাম্যেবং নেহ গুণাগুণজ্ঞাঃ; সর্বে নিয়ুক্তা গুরবো বৈ ভবন্তি
স্বস্থস্যৈতে তূপদেশা ভবন্তি; তস্মাত্ক্ষুদ্রং সর্পমেনং হনিষ্যে
1.18
সমীপ্সন্তঃ কালয়োগং ত্যজন্তি; সদ্যঃ শুচং ত্বর্থবিদস্ত্যজন্তি
শ্রেয়ঃ ক্ষয়ঃ শোচতাং নিত্যশো হি; তস্মাত্ত্যাজ্যং জহি শোকং হতেঽস্মিন্
1.19
গৌতম্যুবাচ
ন চৈবার্তির্বিদ্যতেঽস্মদ্বিধানাং; ধর্মারামঃ সততং সজ্জনো হি
নিত্যায়স্তো বালজনো ন চাস্তি; ধর্মো হ্যেষ প্রভবাম্যস্য নাহম্
1.20
ন ব্রাহ্মণানাং কোপোঽস্তি কুতঃ কোপাচ্চ যাতনা
মার্দবাত্ক্ষম্যতাং সাধো মুচ্যতামেষ পন্নগঃ
1.21
লুব্ধক উবাচ
হত্বা লাভঃ শ্রেয় এবাব্যয়ং স্যা;ত্সদ্যো লাভো বলবদ্ভিঃ প্রশস্তঃ
কালাল্লাভো যস্তু সদ্যো ভবেত; হতে শ্রেয়ঃ কুত্সিতে ত্বীদৃশে স্যাৎ
1.22
গৌতম্যুবাচ
কার্থপ্রাপ্তির্গৃহ্য শত্রুং নিহত্য; কা বা শান্তিঃ প্রাপ্য শত্রুং নমুক্ত্বা
কস্মাত্সৌম্য ভুজগে ন ক্ষমেয়ং; মোক্ষং বা কিং কারণং নাস্য কুর্যাম্
1.23
লুব্ধক উবাচ
অস্মাদেকস্মাদ্বহবো রক্ষিতব্যা; নৈকো বহুভ্যো গৌতমি রক্ষিতব্যঃ
কৃতাগসং ধর্মবিদস্ত্যজন্তি; সরীসৃপং পাপমিমং জহি ত্বম্
1.24
গৌতম্যুবাচ
নাস্মিন্হতে পন্নগে পুত্রকো মে; সংপ্রাপ্স্যতে লুব্ধক জীবিতং বৈ
গুণং চান্যং নাস্য বধে প্রপশ্যে; তস্মাত্সর্পং লুব্ধক মুঞ্চ জীবম্
1.25
লুব্ধক উবাচ
বৃত্রং হত্বা দেবরাট্শ্রেষ্ঠভাগ্বৈ; যজ্ঞং হত্বা ভাগমবাপ চৈব
শূলী দেবো দেববৃত্তং কুরু ত্বং; ক্ষিপ্রং সর্পং জহি মা ভূদ্বিশঙ্কা
1.26
ভীষ্ম উবাচ
অসকৃত্প্রোচ্যমানাপি গৌতমী ভুজগং প্রতি
লুব্ধকেন মহাভাগা পাপে নৈবাকরোন্মতিম্
1.27
ঈষদুচ্ছ্বসমানস্তু কৃচ্ছ্রাত্সংস্তভ্য পন্নগঃ
উত্সসর্জ গিরং মন্দাং মানুষীং পাশপীডিতঃ
1.28
কো ন্বর্জুনক দোষোঽত্র বিদ্যতে মম বালিশ
অস্বতন্ত্রং হি মাং মৃত্যুর্বিবশং যদচূচুদৎ
1.29
তস্যায়ং বচনাদ্দষ্টো ন কোপেন ন কাম্যয়া
তস্য তত্কিল্বিষং লুব্ধ বিদ্যতে যদি কিল্বিষম্
1.30
লুব্ধক উবাচ
যদ্যন্যবশগেনেদং কৃতং তে পন্নগাশুভম্
কারণং বৈ ত্বমপ্যত্র তস্মাত্ত্বমপি কিল্বিষী
1.31
মৃত্পাত্রস্য ক্রিয়ায়াং হি দণ্ডচক্রাদয়ো যথা
কারণত্বে প্রকল্প্যন্তে তথা ত্বমপি পন্নগ
1.32
কিল্বিষী চাপি মে বধ্যঃ কিল্বিষী চাসি পন্নগ
আত্মানং কারণং হ্যত্র ত্বমাখ্যাসি ভুজংগম
1.33
সর্প উবাচ
সর্ব এতে হ্যস্ববশা দণ্ডচক্রাদয়ো যথা
তথাহমপি তস্মান্মে নৈষ হেতুর্মতস্তব
1.34
অথ বা মতমেতত্তে তেঽপ্যন্যোন্যপ্রয়োজকাঃ
কার্যকারণসংদেহো ভবত্যন্যোন্যচোদনাৎ
1.35
এবং সতি ন দোষো মে নাস্মি বধ্যো ন কিল্বিষী
কিল্বিষং সমবায়ে স্যান্মন্যসে যদি কিল্বিষম্
1.36
লুব্ধক উবাচ
কারণং যদি ন স্যাদ্বৈ ন কর্তা স্যাস্ত্বমপ্যুত
বিনাশে কারণং ত্বং চ তস্মাদ্বধ্যোঽসি মে মতঃ
1.37
অসত্যপি কৃতে কার্যে নেহ পন্নগ লিপ্যতে
তস্মান্নাত্রৈব হেতুঃ স্যাদ্বধ্যঃ কিং বহু ভাষসে
1.38
সর্প উবাচ
কার্যাভাবে ক্রিয়া ন স্যাত্সত্যসত্যপি কারণে
তস্মাত্ত্বমস্মিন্হেতৌ মে বাচ্যো হেতুর্বিশেষতঃ
1.39
যদ্যহং কারণত্বেন মতো লুব্ধক তত্ত্বতঃ
অন্যঃ প্রয়োগে স্যাদত্র কিল্বিষী জন্তুনাশনে
1.40
লুব্ধক উবাচ
বধ্যস্ত্বং মম দুর্বুদ্ধে বালঘাতী নৃশংসকৃৎ
ভাষসে কিং বহু পুনর্বধ্যঃ সন্পন্নগাধম
1.41
সর্প উবাচ
যথা হবীংষি জুহ্বানা মখে বৈ লুব্ধকর্ত্বিজঃ
ন ফলং প্রাপ্নুবন্ত্যত্র পরলোকে তথা হ্যহম্
1.42
ভীষ্ম উবাচ
তথা ব্রুবতি তস্মিংস্তু পন্নগে মৃত্যুচোদিতে
আজগাম ততো মৃত্যুঃ পন্নগং চাব্রবীদিদম্
1.43
কালেনাহং প্রণুদিতঃ পন্নগ ত্বামচূচুদম্
বিনাশহেতুর্নাস্য ত্বমহং বা প্রাণিনঃ শিশোঃ
1.44
যথা বায়ুর্জলধরান্বিকর্ষতি ততস্ততঃ
তদ্বজ্জলদবত্সর্প কালস্যাহং বশানুগঃ
1.45
সাত্ত্বিকা রাজসাশ্চৈব তামসা যে চ কেচন
ভাবাঃ কালাত্মকাঃ সর্বে প্রবর্তন্তে হি জন্তুষু
1.46
জঙ্গমাঃ স্থাবরাশ্চৈব দিবি বা যদি বা ভুবি
সর্বে কালাত্মকাঃ সর্প কালাত্মকমিদং জগৎ
1.47
প্রবৃত্তয়শ্চ যা লোকে তথৈব চ নিবৃত্তয়ঃ
তাসাং বিকৃতয়ো যাশ্চ সর্বং কালাত্মকং স্মৃতম্
1.48
আদিত্যশ্চন্দ্রমা বিষ্ণুরাপো বায়ুঃ শতক্রতুঃ
অগ্নিঃ খং পৃথিবী মিত্র ওষধ্যো বসবস্তথা
1.49
সরিতঃ সাগরাশ্চৈব ভাবাভাবৌ চ পন্নগ
সর্বে কালেন সৃজ্যন্তে হ্রিয়ন্তে চ তথা পুনঃ
1.50
এবং জ্ঞাত্বা কথং মাং ত্বং সদোষং সর্প মন্যসে
অথ চৈবংগতে দোষো ময়ি ত্বমপি দোষবান্
1.51
সর্প উবাচ
নির্দোষং দোষবন্তং বা ন ত্বা মৃত্যো ব্রবীম্যহম্
ত্বয়াহং চোদিত ইতি ব্রবীম্যেতাবদেব তু
1.52
যদি কালে তু দোষোঽস্তি যদি তত্রাপি নেষ্যতে
দোষো নৈব পরীক্ষ্যো মে ন হ্যত্রাধিকৃতা বয়ম্
1.53
নির্মোক্ষস্ত্বস্য দোষস্য ময়া কার্যো যথা তথা
মৃত্যো বিদোষঃ স্যামেব যথা তন্মে প্রয়োজনম্
1.54
ভীষ্ম উবাচ
সর্পোঽথার্জুনকং প্রাহ শ্রুতং তে মৃত্যুভাষিতম্
নানাগসং মাং পাশেন সংতাপয়িতুমর্হসি
1.55
লুব্ধক উবাচ
মৃত্যোঃ শ্রুতং মে বচনং তব চৈব ভুজংগম
নৈব তাবদ্বিদোষত্বং ভবতি ত্বয়ি পন্নগ
1.56
মৃত্যুস্ত্বং চৈব হেতুর্হি জন্তোরস্য বিনাশনে
উভয়ং কারণং মন্যে ন কারণমকারণম্
1.57
ধিঙ্মৃত্যুং চ দুরাত্মানং ক্রূরং দুঃখকরং সতাম্
ত্বাং চৈবাহং বধিষ্যামি পাপং পাপস্য কারণম্
1.58
মৃত্যুরুবাচ
বিবশৌ কালবশগাবাবাং তদ্দিষ্টকারিণৌ
নাবাং দোষেণ গন্তব্যৌ যদি সম্যক্প্রপশ্যসি
1.59
লুব্ধক উবাচ
যুবামুভৌ কালবশৌ যদি বৈ মৃত্যুপন্নগৌ
হর্ষক্রোধৌ কথং স্যাতামেতদিচ্ছামি বেদিতুম্
1.60
মৃত্যুরুবাচ
যাঃ কাশ্চিদিহ চেষ্টাঃ স্যুঃ সর্বাঃ কালপ্রচোদিতাঃ
পূর্বমেবৈতদুক্তং হি ময়া লুব্ধক কালতঃ
1.61
তস্মাদুভৌ কালবশাবাবাং তদ্দিষ্টকারিণৌ
নাবাং দোষেণ গন্তব্যৌ ত্বয়া লুব্ধক কর্হিচিৎ
1.62
ভীষ্ম উবাচ
অথোপগম্য কালস্তু তস্মিন্ধর্মার্থসংশয়ে
অব্রবীত্পন্নগং মৃত্যুং লুব্ধমর্জুনকং চ তম্
1.63
কাল উবাচ
নৈবাহং নাপ্যয়ং মৃত্যুর্নায়ং লুব্ধক পন্নগঃ
কিল্বিষী জন্তুমরণে ন বয়ং হি প্রয়োজকাঃ
1.64
অকরোদ্যদয়ং কর্ম তন্নোঽর্জুনক চোদকম্
প্রণাশহেতুর্নান্যোঽস্য বধ্যতেঽয়ং স্বকর্মণা
1.65
যদনেন কৃতং কর্ম তেনায়ং নিধনং গতঃ
বিনাশহেতুঃ কর্মাস্য সর্বে কর্মবশা বয়ম্
1.66
কর্মদায়াদবাঁল্লোকঃ কর্মসংবন্ধলক্ষণঃ
কর্মাণি চোদয়ন্তীহ যথান্যোন্যং তথা বয়ম্
1.67
যথা মৃত্পিণ্ডতঃ কর্তা কুরুতে যদ্যদিচ্ছতি
এবমাত্মকৃতং কর্ম মানবঃ প্রতিপদ্যতে
1.68
যথা ছায়াতপৌ নিত্যং সুসংবদ্ধৌ নিরন্তরম্
তথা কর্ম চ কর্তা চ সংবদ্ধাবাত্মকর্মভিঃ
1.69
এবং নাহং ন বৈ মৃত্যুর্ন সর্পো ন তথা ভবান্
ন চেয়ং ব্রাহ্মণী বৃদ্ধা শিশুরেবাত্র কারণম্
1.70
তস্মিংস্তথা ব্রুবাণে তু ব্রাহ্মণী গৌতমী নৃপ
স্বকর্মপ্রত্যয়াঁল্লোকান্মত্বার্জুনকমব্রবীৎ
1.71
নৈব কালো ন ভুজগো ন মৃত্যুরিহ কারণম্
স্বকর্মভিরয়ং বালঃ কালেন নিধনং গতঃ
1.72
ময়া চ তত্কৃতং কর্ম যেনায়ং মে মৃতঃ সুতঃ
যাতু কালস্তথা মৃত্যুর্মুঞ্চার্জুনক পন্নগম্
1.73
ভীষ্ম উবাচ
ততো যথাগতং জগ্মুর্মৃত্যুঃ কালোঽথ পন্নগঃ
অভূদ্বিরোষোঽর্জুনকো বিশোকা চৈব গৌতমী
1.74
এতচ্ছ্রুত্বা শমং গচ্ছ মা ভূশ্চিন্তাপরো নৃপ
স্বকর্মপ্রত্যয়াঁল্লোকাংস্ত্রীন্বিদ্ধি মনুজর্ষভ
1.75
ন তু ত্বয়া কৃতং পার্থ নাপি দুর্যোধনেন বৈ
কালেন তত্কৃতং বিদ্ধি বিহতা যেন পার্থিবাঃ
1.76
বৈশংপায়ন উবাচ
ইত্যেতদ্বচনং শ্রুত্বা বভূব বিগতজ্বরঃ
যুধিষ্ঠিরো মহাতেজাঃ পপ্রচ্ছেদং চ ধর্মবিৎ