UtshovChapter 4
4.1
भीष्म उवाच
श्रूयतां पार्थ तत्त्वेन विश्वामित्रो यथा पुरा
ब्राह्मणत्वं गतस्तात ब्रह्मर्षित्वं तथैव च
Bhishma uvacha
Shruyatam partha tattvena vishvamitro yatha pura
Brahmanatvam gatastata brahmarshitvam tathaiva cha
4.2
भरतस्यान्वये चैवाजमीढो नाम पार्थिवः
बभूव भरतश्रेष्ठ यज्वा धर्मभृतां वरः
Bharatasyanvaye chaivajamidho nama parthivah
Babhuva bharatashreshtha yajva dharmabhritam varah
4.3
तस्य पुत्रो महानासीज्जह्नुर्नाम नरेश्वरः
दुहितृत्वमनुप्राप्ता गङ्गा यस्य महात्मनः
Tasya putro mahanasijjahnurnama nareshvarah
Duhitritvamanuprapta ganga yasya mahatmanah
4.4
तस्यात्मजस्तुल्यगुणः सिन्धुद्वीपो महायशाः
सिन्धुद्वीपाच्च राजर्षिर्बलाकाश्वो महाबलः
Tasyatmajastulyagunah sindhudvipo mahayashah
Sindhudvipachcha rajarshirbalakashvo mahabalah
4.5
वल्लभस्तस्य तनयः साक्षाद्धर्म इवापरः
कुशिकस्तस्य तनयः सहस्राक्षसमद्युतिः
Vallabhastasya tanayah sakshaddharma ivaparah
Kushikastasya tanayah sahasrakshasamadyutih
4.6
कुशिकस्यात्मजः श्रीमान्गाधिर्नाम जनेश्वरः
अपुत्रः स महाबाहुर्वनवासमुदावसत्
Kushikasyatmajah shrimangadhirnama janeshvarah
Aputrah sa mahabahurvanavasamudavasat
4.7
कन्या जज्ञे सुता तस्य वने निवसतः सतः
नाम्ना सत्यवती नाम रूपेणाप्रतिमा भुवि
Kanya jagye suta tasya vane nivasatah satah
Namna satyavati nama rupenapratima bhuvi
4.8
तां वव्रे भार्गवः श्रीमांश्च्यवनस्यात्मजः प्रभुः
ऋचीक इति विख्यातो विपुले तपसि स्थितः
Tam vavre bhargavah shrimanshchyavanasyatmajah prabhuh
Richika iti vikhyato vipule tapasi sthitah
4.9
स तां न प्रददौ तस्मै ऋचीकाय महात्मने
दरिद्र इति मत्वा वै गाधिः शत्रुनिबर्हणः
Sa tam na pradadau tasmai richikaya mahatmane
Daridra iti matva vai gadhih shatrunibarhanah
4.10
प्रत्याख्याय पुनर्यान्तमब्रवीद्राजसत्तमः
शुल्कं प्रदीयतां मह्यं ततो वेत्स्यसि मे सुताम्
Pratyakhyaya punaryantamabravidrajasattamah
Shulkam pradiyatam mahyam tato vetsyasi me sutam
4.11
ऋचीक उवाच
किं प्रयच्छामि राजेन्द्र तुभ्यं शुल्कमहं नृप
दुहितुर्ब्रूह्यसंसक्तो मात्राभूत्ते विचारणा
Richika uvacha
Kim prayachchhami rajendra tubhyam shulkamaham nripa
Duhiturbruhyasansakto matrabhutte vicharana
4.12
गाधिरुवाच
चन्द्ररश्मिप्रकाशानां हयानां वातरंहसाम्
एकतः श्यामकर्णानां सहस्रं देहि भार्गव
Gadhiruvacha
Chandrarashmiprakashanam hayanam vataranhasam
Ekatah shyamakarnanam sahasram dehi bhargava
4.13
भीष्म उवाच
ततः स भृगुशार्दूलश्च्यवनस्यात्मजः प्रभुः
अब्रवीद्वरुणं देवमादित्यं पतिमम्भसाम्
Bhishma uvacha
Tatah sa bhrigushardulashchyavanasyatmajah prabhuh
Abravidvarunam devamadityam patimambhasam
4.14
एकतः श्यामकर्णानां हयानां चन्द्रवर्चसाम्
सहस्रं वातवेगानां भिक्षे त्वां देवसत्तम
Ekatah shyamakarnanam hayanam chandravarchasam
Sahasram vataveganam bhikshe tvam devasattama
4.15
तथेति वरुणो देव आदित्यो भृगुसत्तमम्
उवाच यत्र ते छन्दस्तत्रोत्थास्यन्ति वाजिनः
Tatheti varuno deva adityo bhrigusattamam
Uvacha yatra te chhandastatrotthasyanti vajinah
4.16
ध्यातमात्रे ऋचीकेन हयानां चन्द्रवर्चसाम्
गङ्गाजलात्समुत्तस्थौ सहस्रं विपुलौजसाम्
Dhyatamatre richikena hayanam chandravarchasam
Gangajalatsamuttasthau sahasram vipulaujasam
4.17
अदूरे कन्यकुब्जस्य गङ्गायास्तीरमुत्तमम्
अश्वतीर्थं तदद्यापि मानवाः परिचक्षते
Adure kanyakubjasya gangayastiramuttamam
Ashvatirtham tadadyapi manavah parichakshate
4.18
तत्तदा गाधये तात सहस्रं वाजिनां शुभम्
ऋचीकः प्रददौ प्रीतः शुल्कार्थं जपतां वरः
Tattada gadhaye tata sahasram vajinam shubham
Richikah pradadau pritah shulkartham japatam varah
4.19
ततः स विस्मितो राजा गाधिः शापभयेन च
ददौ तां समलंकृत्य कन्यां भृगुसुताय वै
Tatah sa vismito raja gadhih shapabhayena cha
Dadau tam samalankritya kanyam bhrigusutaya vai
4.20
जग्राह पाणिं विधिना तस्य ब्रह्मर्षिसत्तमः
सा च तं पतिमासाद्य परं हर्षमवाप ह
Jagraha panim vidhina tasya brahmarshisattamah
Sa cha tam patimasadya param harshamavapa ha
4.21
स तुतोष च विप्रर्षिस्तस्या वृत्तेन भारत
छन्दयामास चैवैनां वरेण वरवर्णिनीम्
Sa tutosha cha viprarshistasya vrittena bharata
Chhandayamasa chaivainam varena varavarninim
4.22
मात्रे तत्सर्वमाचख्यौ सा कन्या राजसत्तमम्
अथ तामब्रवीन्माता सुतां किंचिदवाङ्मुखीम्
Matre tatsarvamachakhyau sa kanya rajasattamam
Atha tamabravinmata sutam kinchidavanmukhim
4.23
ममापि पुत्रि भर्ता ते प्रसादं कर्तुमर्हति
अपत्यस्य प्रदानेन समर्थः स महातपाः
Mamapi putri bharta te prasadam kartumarhati
Apatyasya pradanena samarthah sa mahatapah
4.24
ततः सा त्वरितं गत्वा तत्सर्वं प्रत्यवेदयत्
मातुश्चिकीर्षितं राजन्नृचीकस्तामथाब्रवीत्
Tatah sa tvaritam gatva tatsarvam pratyavedayat
Matushchikirshitam rajannrichikastamathabravit
4.25
गुणवन्तमपत्यं वै त्वं च सा जनयिष्यथः
जनन्यास्तव कल्याणि मा भूद्वै प्रणयोऽन्यथा
Gunavantamapatyam vai tvam cha sa janayishyathah
Jananyastava kalyani ma bhudvai pranayonyatha
4.26
तव चैव गुणश्लाघी पुत्र उत्पत्स्यते शुभे
अस्मद्वंशकरः श्रीमांस्तव भ्राता च वंशकृत्
Tava chaiva gunashlaghi putra utpatsyate shubhe
Asmadvanshakarah shrimanstava bhrata cha vanshakrit
4.27
ऋतुस्नाता च साश्वत्थं त्वं च वृक्षमुदुम्बरम्
परिष्वजेथाः कल्याणि तत इष्टमवाप्स्यथः
Ritusnata cha sashvattham tvam cha vrikshamudumbaram
Parishvajethah kalyani tata ishtamavapsyathah
4.28
चरुद्वयमिदं चैव मन्त्रपूतं शुचिस्मिते
त्वं च सा चोपयुञ्जीथां ततः पुत्राववाप्स्यथः
Charudvayamidam chaiva mantraputam shuchismite
Tvam cha sa chopayunjitham tatah putravavapsyathah
4.29
ततः सत्यवती हृष्टा मातरं प्रत्यभाषत
यदृचीकेन कथितं तच्चाचख्यौ चरुद्वयम्
Tatah satyavati hrishta mataram pratyabhashata
Yadrichikena kathitam tachchachakhyau charudvayam
4.30
तामुवाच ततो माता सुतां सत्यवतीं तदा
पुत्रि मूर्ध्ना प्रपन्नायाः कुरुष्व वचनं मम
Tamuvacha tato mata sutam satyavatim tada
Putri murdhna prapannayah kurushva vachanam mama
4.31
भर्त्रा य एष दत्तस्ते चरुर्मन्त्रपुरस्कृतः
एतं प्रयच्छ मह्यं त्वं मदीयं त्वं गृहाण च
Bhartra ya esha dattaste charurmantrapuraskritah
Etam prayachchha mahyam tvam madiyam tvam grihana cha
4.32
व्यत्यासं वृक्षयोश्चापि करवाव शुचिस्मिते
यदि प्रमाणं वचनं मम मातुरनिन्दिते
Vyatyasam vrikshayoshchapi karavava shuchismite
Yadi pramanam vachanam mama maturanindite
4.33
व्यक्तं भगवता चात्र कृतमेवं भविष्यति
ततो मे त्वच्चरौ भावः पादपे च सुमध्यमे
कथं विशिष्टो भ्राता ते भवेदित्येव चिन्तय
Vyaktam bhagavata chatra kritamevam bhavishyati
Tato me tvachcharau bhavah padape cha sumadhyame
Katham vishishto bhrata te bhavedityeva chintaya
4.34
तथा च कृतवत्यौ ते माता सत्यवती च सा
अथ गर्भावनुप्राप्ते उभे ते वै युधिष्ठिर
Tatha cha kritavatyau te mata satyavati cha sa
Atha garbhavanuprapte ubhe te vai yudhishthira
4.35
दृष्ट्वा गर्भमनुप्राप्तां भार्यां स च महानृषिः
उवाच तां सत्यवतीं दुर्मना भृगुसत्तमः
Drishtva garbhamanupraptam bharyam sa cha mahanrishih
Uvacha tam satyavatim durmana bhrigusattamah
4.36
व्यत्यासेनोपयुक्तस्ते चरुर्व्यक्तं भविष्यति
व्यत्यासः पादपे चापि सुव्यक्तं ते कृतः शुभे
Vyatyasenopayuktaste charurvyaktam bhavishyati
Vyatyasah padape chapi suvyaktam te kritah shubhe
4.37
मया हि विश्वं यद्ब्रह्म त्वच्चरौ संनिवेशितम्
क्षत्रवीर्यं च सकलं चरौ तस्या निवेशितम्
Maya hi vishvam yadbrahma tvachcharau sanniveshitam
Kshatraviryam cha sakalam charau tasya niveshitam
4.38
त्रिलोकविख्यातगुणं त्वं विप्रं जनयिष्यसि
सा च क्षत्रं विशिष्टं वै तत एतत्कृतं मया
Trilokavikhyatagunam tvam vipram janayishyasi
Sa cha kshatram vishishtam vai tata etatkritam maya
4.39
व्यत्यासस्तु कृतो यस्मात्त्वया मात्रा तथैव च
तस्मात्सा ब्राह्मणश्रेष्ठं माता ते जनयिष्यति
Vyatyasastu krito yasmattvaya matra tathaiva cha
Tasmatsa brahmanashreshtham mata te janayishyati
4.40
क्षत्रियं तूग्रकर्माणं त्वं भद्रे जनयिष्यसि
न हि ते तत्कृतं साधु मातृस्नेहेन भामिनि
Kshatriyam tugrakarmanam tvam bhadre janayishyasi
Na hi te tatkritam sadhu matrisnehena bhamini
4.41
सा श्रुत्वा शोकसंतप्ता पपात वरवर्णिनी
भूमौ सत्यवती राजंश्छिन्नेव रुचिरा लता
Sa shrutva shokasantapta papata varavarnini
Bhumau satyavati rajanshchhinneva ruchira lata
4.42
प्रतिलभ्य च सा संज्ञां शिरसा प्रणिपत्य च
उवाच भार्या भर्तारं गाधेयी ब्राह्मणर्षभम्
Pratilabhya cha sa sangyam shirasa pranipatya cha
Uvacha bharya bhartaram gadheyi brahmanarshabham
4.43
प्रसादयन्त्यां भार्यायां मयि ब्रह्मविदां वर
प्रसादं कुरु विप्रर्षे न मे स्यात्क्षत्रियः सुतः
Prasadayantyam bharyayam mayi brahmavidam vara
Prasadam kuru viprarshe na me syatkshatriyah sutah
4.44
कामं ममोग्रकर्मा वै पौत्रो भवितुमर्हति
न तु मे स्यात्सुतो ब्रह्मन्नेष मे दीयतां वरः
Kamam mamograkarma vai pautro bhavitumarhati
Na tu me syatsuto brahmannesha me diyatam varah
4.45
एवमस्त्विति होवाच स्वां भार्यां सुमहातपाः
ततः सा जनयामास जमदग्निं सुतं शुभम्
Evamastviti hovacha svam bharyam sumahatapah
Tatah sa janayamasa jamadagnim sutam shubham
4.46
विश्वामित्रं चाजनयद्गाधेर्भार्या यशस्विनी
ऋषेः प्रभावाद्राजेन्द्र ब्रह्मर्षिं ब्रह्मवादिनम्
Vishvamitram chajanayadgadherbharya yashasvini
Risheh prabhavadrajendra brahmarshim brahmavadinam
4.47
ततो ब्राह्मणतां यातो विश्वामित्रो महातपाः
क्षत्रियः सोऽप्यथ तथा ब्रह्मवंशस्य कारकः
Tato brahmanatam yato vishvamitro mahatapah
Kshatriyah sopyatha tatha brahmavanshasya karakah
4.48
तस्य पुत्रा महात्मानो ब्रह्मवंशविवर्धनाः
तपस्विनो ब्रह्मविदो गोत्रकर्तार एव च
Tasya putra mahatmano brahmavanshavivardhanah
Tapasvino brahmavido gotrakartara eva cha
4.49
मधुच्छन्दश्च भगवान्देवरातश्च वीर्यवान्
अक्षीणश्च शकुन्तश्च बभ्रुः कालपथस्तथा
Madhuchchhandashcha bhagavandevaratashcha viryavan
Akshinashcha shakuntashcha babhruh kalapathastatha
4.50
याज्ञवल्क्यश्च विख्यातस्तथा स्थूणो महाव्रतः
उलूको यमदूतश्च तथर्षिः सैन्धवायनः
Yagyavalkyashcha vikhyatastatha sthuno mahavratah
Uluko yamadutashcha tatharshih saindhavayanah
4.51
कर्णजङ्घश्च भगवान्गालवश्च महानृषिः
ऋषिर्वज्रस्तथाख्यातः शालङ्कायन एव च
Karnajanghashcha bhagavangalavashcha mahanrishih
Rishirvajrastathakhyatah shalankayana eva cha
4.52
लालाट्यो नारदश्चैव तथा कूर्चमुखः स्मृतः
वादुलिर्मुसलश्चैव रक्षोग्रीवस्तथैव च
Lalatyo naradashchaiva tatha kurchamukhah smritah
Vadulirmusalashchaiva rakshogrivastathaiva cha
4.53
अङ्घ्रिको नैकभृच्चैव शिलायूपः सितः शुचिः
चक्रको मारुतन्तव्यो वातघ्नोऽथाश्वलायनः
Anghriko naikabhrichchaiva shilayupah sitah shuchih
Chakrako marutantavyo vataghnothashvalayanah
4.54
श्यामायनोऽथ गार्ग्यश्च जाबालिः सुश्रुतस्तथा
कारीषिरथ संश्रुत्यः परपौरवतन्तवः
Shyamayanotha gargyashcha jabalih sushrutastatha
Karishiratha sanshrutyah parapauravatantavah
4.55
महानृषिश्च कपिलस्तथर्षिस्तारकायनः
तथैव चोपगहनस्तथर्षिश्चार्जुनायनः
Mahanrishishcha kapilastatharshistarakayanah
Tathaiva chopagahanastatharshishcharjunayanah
4.56
मार्गमित्रिर्हिरण्याक्षो जङ्घारिर्बभ्रुवाहनः
सूतिर्विभूतिः सूतश्च सुरङ्गश्च तथैव हि
Margamitrirhiranyaksho jangharirbabhruvahanah
Sutirvibhutih sutashcha surangashcha tathaiva hi
4.57
आराद्धिर्नामयश्चैव चाम्पेयोज्जयनौ तथा
नवतन्तुर्बकनखः शयोनरतिरेव च
Araddhirnamayashchaiva champeyojjayanau tatha
Navatanturbakanakhah shayonaratireva cha
4.58
शयोरुहश्चारुमत्स्यः शिरीषी चाथ गार्दभिः
उज्जयोनिरदापेक्षी नारदी च महानृषिः
विश्वामित्रात्मजाः सर्वे मुनयो ब्रह्मवादिनः
Shayoruhashcharumatsyah shirishi chatha gardabhih
Ujjayoniradapekshi naradi cha mahanrishih
Vishvamitratmajah sarve munayo brahmavadinah
4.59
तन्नैष क्षत्रियो राजन्विश्वामित्रो महातपाः
ऋचीकेनाहितं ब्रह्म परमेतद्युधिष्ठिर
Tannaisha kshatriyo rajanvishvamitro mahatapah
Richikenahitam brahma parametadyudhishthira
4.60
एतत्ते सर्वमाख्यातं तत्त्वेन भरतर्षभ
विश्वामित्रस्य वै जन्म सोमसूर्याग्नितेजसः
Etatte sarvamakhyatam tattvena bharatarshabha
Vishvamitrasya vai janma somasuryagnitejasah
4.61
यत्र यत्र च संदेहो भूयस्ते राजसत्तम
तत्र तत्र च मां ब्रूहि च्छेत्तास्मि तव संशयान्
Yatra yatra cha sandeho bhuyaste rajasattama
Tatra tatra cha mam bruhi chchhettasmi tava sanshayan