Utshovঅধ্যায় 16
16.1
কৃষ্ণ উবাচ
মূর্ধ্না নিপত্য নিয়তস্তেজঃসংনিচয়ে ততঃ
পরমং হর্ষমাগম্য ভগবন্তমথাব্রুবম্
16.2
ধর্মে দৃঢত্বং যুধি শত্রুঘাতং; যশস্তথাগ্র্যং পরমং বলং চ
যোগপ্রিয়ত্বং তব সংনিকর্ষং; বৃণে সুতানাং চ শতং শতানি
16.3
এবমস্ত্বিতি তদ্বাক্যং ময়োক্তঃ প্রাহ শংকরঃ
16.4
ততো মাং জগতো মাতা ধরণী সর্বপাবনী
উবাচোমা প্রণিহিতা শর্বাণী তপসাং নিধিঃ
16.5
দত্তো ভগবতা পুত্রঃ সাম্বো নাম তবানঘ
মত্তোঽপ্যষ্টৌ বরানিষ্টান্গৃহাণ ত্বং দদামি তে
প্রণম্য শিরসা সা চ ময়োক্তা পাণ্ডুনন্দন
16.6
দ্বিজেষ্বকোপং পিতৃতঃ প্রসাদং; শতং সুতানামুপভোগং পরং চ
কুলে প্রীতিং মাতৃতশ্চ প্রসাদং; শমপ্রাপ্তিং প্রবৃণে চাপি দাক্ষ্যম্
16.7
দেব্যুবাচ
এবং ভবিষ্যত্যমরপ্রভাব; নাহং মৃষা জাতু বদে কদাচিৎ
ভার্যাসহস্রাণি চ ষোডশৈব; তাসু প্রিয়ত্বং চ তথাক্ষয়ত্বম্
16.8
প্রীতিং চাগ্র্যাং বান্ধবানাং সকাশা;দ্দদামি তে বপুষঃ কাম্যতাং চ
ভোক্ষ্যন্তে বৈ সপ্ততির্বৈ শতানি; গৃহে তুভ্যমতিথীনাং চ নিত্যম্
16.9
বাসুদেব উবাচ
এবং দত্ত্বা বরান্দেবো মম দেবী চ ভারত
অন্তর্হিতঃ ক্ষণে তস্মিন্সগণো ভীমপূর্বজ
16.10
এতদত্যদ্ভুতং সর্বং ব্রাহ্মণায়াতিতেজসে
উপমন্যবে ময়া কৃত্স্নমাখ্যাতং কৌরবোত্তম
16.11
নমস্কৃত্বা তু স প্রাহ দেবদেবায় সুব্রত
নাস্তি শর্বসমো দানে নাস্তি শর্বসমো রণে
নাস্তি শর্বসমো দেবো নাস্তি শর্বসমা গতিঃ
16.12
ঋষিরাসীত্কৃতে তাত তণ্ডিরিত্যেব বিশ্রুতঃ
দশ বর্ষসহস্রাণি তেন দেবঃ সমাধিনা
আরাধিতোঽভূদ্ভক্তেন তস্যোদর্কং নিশাময়
16.13
স দৃষ্টবান্মহাদেবমস্তৌষীচ্চ স্তবৈর্বিভুম্
পবিত্রাণাং পবিত্রস্ত্বং গতির্গতিমতাং বর
অত্যুগ্রং তেজসাং তেজস্তপসাং পরমং তপঃ
16.14
বিশ্বাবসুহিরণ্যাক্ষপুরুহূতনমস্কৃত
ভূরিকল্যাণদ বিভো পুরুসত্য নমোঽস্তু তে
16.15
জাতীমরণভীরূণাং যতীনাং যততাং বিভো
নির্বাণদ সহস্রাংশো নমস্তেঽস্তু সুখাশ্রয়
16.16
ব্রহ্মা শতক্রতুর্বিষ্ণুর্বিশ্বেদেবা মহর্ষয়ঃ
ন বিদুস্ত্বাং তু তত্ত্বেন কুতো বেত্স্যামহে বয়ম্
16.17
ত্বত্তঃ প্রবর্ততে কালস্ত্বয়ি কালশ্চ লীয়তে
কালাখ্যঃ পুরুষাখ্যশ্চ ব্রহ্মাখ্যশ্চ ত্বমেব হি
16.18
তনবস্তে স্মৃতাস্তিস্রঃ পুরাণজ্ঞৈঃ সুরর্ষিভিঃ
অধিপৌরুষমধ্যাত্মমধিভূতাধিদৈবতম্
অধিলোক্যাধিবিজ্ঞানমধিয়জ্ঞস্ত্বমেব হি
16.19
ত্বাং বিদিত্বাত্মদেহস্থং দুর্বিদং দৈবতৈরপি
বিদ্বাংসো যান্তি নির্মুক্তাঃ পরং ভাবমনাময়ম্
16.20
অনিচ্ছতস্তব বিভো জন্মমৃত্যুরনেকতঃ
দ্বারং ত্বং স্বর্গমোক্ষাণামাক্ষেপ্তা ত্বং দদাসি চ
16.21
ত্বমেব মোক্ষঃ স্বর্গশ্চ কামঃ ক্রোধস্ত্বমেব হি
সত্ত্বং রজস্তমশ্চৈব অধশ্চোর্ধ্বং ত্বমেব হি
16.22
ব্রহ্মা বিষ্ণুশ্চ রুদ্রশ্চ স্কন্দেন্দ্রৌ সবিতা যমঃ
বরুণেন্দূ মনুর্ধাতা বিধাতা ত্বং ধনেশ্বরঃ
16.23
ভূর্বায়ুর্জ্যোতিরাপশ্চ বাগ্বুদ্ধিস্ত্বং মতির্মনঃ
কর্ম সত্যানৃতে চোভে ত্বমেবাস্তি চ নাস্তি চ
16.24
ইন্দ্রিয়াণীন্দ্রিয়ার্থাশ্চ তত্পরং প্রকৃতের্ধ্রুবম্
বিশ্বাবিশ্বপরো ভাবশ্চিন্ত্যাচিন্ত্যস্ত্বমেব হি
16.25
যচ্চৈতত্পরমং ব্রহ্ম যচ্চ তত্পরমং পদম্
যা গতিঃ সাংখ্যয়োগানাং স ভবান্নাত্র সংশয়ঃ
16.26
নূনমদ্য কৃতার্থাঃ স্ম নূনং প্রাপ্তাঃ সতাং গতিম্
যাং গতিং প্রাপ্নুবন্তীহ জ্ঞাননির্মলবুদ্ধয়ঃ
16.27
অহো মূঢাঃ স্ম সুচিরমিমং কালমচেতসঃ
যন্ন বিদ্মঃ পরং দেবং শাশ্বতং যং বিদুর্বুধাঃ
16.28
সোঽয়মাসাদিতঃ সাক্ষাদ্বহুভির্জন্মভির্ময়া
ভক্তানুগ্রহকৃদ্দেবো যং জ্ঞাত্বামৃতমশ্নুতে
16.29
দেবাসুরমনুষ্যাণাং যচ্চ গুহ্যং সনাতনম্
গুহায়াং নিহিতং ব্রহ্ম দুর্বিজ্ঞেয়ং সুরৈরপি
16.30
স এষ ভগবান্দেবঃ সর্বকৃত্সর্বতোমুখঃ
সর্বাত্মা সর্বদর্শী চ সর্বগঃ সর্ববেদিতা
16.31
প্রাণকৃত্প্রাণভৃত্প্রাণী প্রাণদঃ প্রাণিনাং গতিঃ
দেহকৃদ্দেহভৃদ্দেহী দেহভুগ্দেহিনাং গতিঃ
16.32
অধ্যাত্মগতিনিষ্ঠানাং ধ্যানিনামাত্মবেদিনাম্
অপুনর্মারকামানাং যা গতিঃ সোঽয়মীশ্বরঃ
16.33
অয়ং চ সর্বভূতানাং শুভাশুভগতিপ্রদঃ
অয়ং চ জন্মমরণে বিদধ্যাত্সর্বজন্তুষু
16.34
অয়ং চ সিদ্ধিকামানামৃষীণাং সিদ্ধিদঃ প্রভুঃ
অয়ং চ মোক্ষকামানাং দ্বিজানাং মোক্ষদঃ প্রভুঃ
16.35
ভূরাদ্যান্সর্বভুবনানুত্পাদ্য সদিবৌকসঃ
বিভর্তি দেবস্তনুভিরষ্টাভিশ্চ দদাতি চ
16.36
অতঃ প্রবর্ততে সর্বমস্মিন্সর্বং প্রতিষ্ঠিতম্
অস্মিংশ্চ প্রলয়ং যাতি অয়মেকঃ সনাতনঃ
16.37
অয়ং স সত্যকামানাং সত্যলোকঃ পরঃ সতাম্
অপবর্গশ্চ মুক্তানাং কৈবল্যং চাত্মবাদিনাম্
16.38
অয়ং ব্রহ্মাদিভিঃ সিদ্ধৈর্গুহায়াং গোপিতঃ প্রভুঃ
দেবাসুরমনুষ্যাণাং ন প্রকাশো ভবেদিতি
16.39
তং ত্বাং দেবাসুরনরাস্তত্ত্বেন ন বিদুর্ভবম্
মোহিতাঃ খল্বনেনৈব হৃচ্ছয়েন প্রবেশিতাঃ
16.40
যে চৈনং সংপ্রপদ্যন্তে ভক্তিয়োগেন ভারত
তেষামেবাত্মনাত্মানং দর্শয়ত্যেষ হৃচ্ছয়ঃ
16.41
যং জ্ঞাত্বা ন পুনর্জন্ম মরণং চাপি বিদ্যতে
যং বিদিত্বা পরং বেদ্যং বেদিতব্যং ন বিদ্যতে
16.42
যং লব্ধ্বা পরমং লাভং মন্যতে নাধিকং পুনঃ
প্রাণসূক্ষ্মাং পরাং প্রাপ্তিমাগচ্ছত্যক্ষয়াবহাম্
16.43
যং সাংখ্যা গুণতত্ত্বজ্ঞাঃ সাংখ্যশাস্ত্রবিশারদাঃ
সূক্ষ্মজ্ঞানরতাঃ পূর্বং জ্ঞাত্বা মুচ্যন্তি বন্ধনৈঃ
16.44
যং চ বেদবিদো বেদ্যং বেদান্তেষু প্রতিষ্ঠিতম্
প্রাণায়ামপরা নিত্যং যং বিশন্তি জপন্তি চ
16.45
অয়ং স দেবয়ানানামাদিত্যো দ্বারমুচ্যতে
অয়ং চ পিতৃয়ানানাং চন্দ্রমা দ্বারমুচ্যতে
16.46
এষ কালগতিশ্চিত্রা সংবত্সরয়ুগাদিষু
ভাবাভাবৌ তদাত্বে চ অয়নে দক্ষিণোত্তরে
16.47
এবং প্রজাপতিঃ পূর্বমারাধ্য বহুভিঃ স্তবৈঃ
বরয়ামাস পুত্রত্বে নীললোহিতসংজ্ঞিতম্
16.48
ঋগ্ভির্যমনুশংসন্তি তন্ত্রে কর্মণি বহ্বৃচঃ
যজুর্ভির্যং ত্রিধা বেদ্যং জুহ্বত্যধ্বর্যবোঽধ্বরে
16.49
সামভির্যং চ গায়ন্তি সামগাঃ শুদ্ধবুদ্ধয়ঃ
যজ্ঞস্য পরমা যোনিঃ পতিশ্চায়ং পরঃ স্মৃতঃ
16.50
রাত্র্যহঃশ্রোত্রনয়নঃ পক্ষমাসশিরোভুজঃ
ঋতুবীর্যস্তপোধৈর্যো হ্যব্দগুহ্যোরুপাদবান্
16.51
মৃত্যুর্যমো হুতাশশ্চ কালঃ সংহারবেগবান্
কালস্য পরমা যোনিঃ কালশ্চায়ং সনাতনঃ
16.52
চন্দ্রাদিত্যৌ সনক্ষত্রৌ সগ্রহৌ সহ বায়ুনা
ধ্রুবঃ সপ্তর্ষয়শ্চৈব ভুবনাঃ সপ্ত এব চ
16.53
প্রধানং মহদব্যক্তং বিশেষান্তং সবৈকৃতম্
ব্রহ্মাদি স্তম্বপর্যন্তং ভূতাদি সদসচ্চ যৎ
16.54
অষ্টৌ প্রকৃতয়শ্চৈব প্রকৃতিভ্যশ্চ যত্পরম্
অস্য দেবস্য যদ্ভাগং কৃত্স্নং সংপরিবর্ততে
16.55
এতত্পরমমানন্দং যত্তচ্ছাশ্বতমেব চ
এষা গতির্বিরক্তানামেষ ভাবঃ পরঃ সতাম্
16.56
এতত্পদমনুদ্বিগ্নমেতদ্ব্রহ্ম সনাতনম্
শাস্ত্রবেদাঙ্গবিদুষামেতদ্ধ্যানং পরং পদম্
16.57
ইয়ং সা পরমা কাষ্ঠা ইয়ং সা পরমা কলা
ইয়ং সা পরমা সিদ্ধিরিয়ং সা পরমা গতিঃ
16.58
ইয়ং সা পরমা শান্তিরিয়ং সা নির্বৃতিঃ পরা
যং প্রাপ্য কৃতকৃত্যাঃ স্ম ইত্যমন্যন্ত বেধসঃ
16.59
ইয়ং তুষ্টিরিয়ং সিদ্ধিরিয়ং শ্রুতিরিয়ং স্মৃতিঃ
অধ্যাত্মগতিনিষ্ঠানাং বিদুষাং প্রাপ্তিরব্যয়া
16.60
যজতাং যজ্ঞকামানাং যজ্ঞৈর্বিপুলদক্ষিণৈঃ
যা গতির্দৈবতৈর্দিব্যা সা গতিস্ত্বং সনাতন
16.61
জপ্যহোমব্রতৈঃ কৃচ্ছ্রৈর্নিয়মৈর্দেহপাতনৈঃ
তপ্যতাং যা গতির্দেব বৈরাজে সা গতির্ভবান্
16.62
কর্মন্যাসকৃতানাং চ বিরক্তানাং ততস্ততঃ
যা গতির্ব্রহ্মভবনে সা গতিস্ত্বং সনাতন
16.63
অপুনর্মারকামানাং বৈরাগ্যে বর্ততাং পরে
বিকৃতীনাং লয়ানাং চ সা গতিস্ত্বং সনাতন
16.64
জ্ঞানবিজ্ঞাননিষ্ঠানাং নিরুপাখ্যা নিরঞ্জনা
কৈবল্যা যা গতির্দেব পরমা সা গতির্ভবান্
16.65
বেদশাস্ত্রপুরাণোক্তাঃ পঞ্চৈতা গতয়ঃ স্মৃতাঃ
ত্বত্প্রসাদাদ্ধি লভ্যন্তে ন লভ্যন্তেঽন্যথা বিভো
16.66
ইতি তণ্ডিস্তপোয়োগাত্তুষ্টাবেশানমব্যয়ম্
জগৌ চ পরমং ব্রহ্ম যত্পুরা লোককৃজ্জগৌ
16.67
ব্রহ্মা শতক্রতুর্বিষ্ণুর্বিশ্বেদেবা মহর্ষয়ঃ
ন বিদুস্ত্বামিতি ততস্তুষ্টঃ প্রোবাচ তং শিবঃ
16.68
অক্ষয়শ্চাব্যয়শ্চৈব ভবিতা দুঃখবর্জিতঃ
যশস্বী তেজসা যুক্তো দিব্যজ্ঞানসমন্বিতঃ
16.69
ঋষীণামভিগম্যশ্চ সূত্রকর্তা সুতস্তব
মত্প্রসাদাদ্দ্বিজশ্রেষ্ঠ ভবিষ্যতি ন সংশয়ঃ
16.70
কং বা কামং দদাম্যদ্য ব্রূহি যদ্বত্স কাঙ্ক্ষসে
প্রাঞ্জলিঃ স উবাচেদং ত্বয়ি ভক্তির্দৃঢাস্তু মে
16.71
এবং দত্ত্বা বরং দেবো বন্দ্যমানঃ সুরর্ষিভিঃ
স্তূয়মানশ্চ বিবুধৈস্তত্রৈবান্তরধীয়ত
16.72
অন্তর্হিতে ভগবতি সানুগে যাদবেশ্বর
ঋষিরাশ্রমমাগম্য মমৈতত্প্রোক্তবানিহ
16.73
যানি চ প্রথিতান্যাদৌ তণ্ডিরাখ্যাতবান্মম
নামানি মানবশ্রেষ্ঠ তানি ত্বং শৃণু সিদ্ধয়ে
16.74
দশ নামসহস্রাণি বেদেষ্বাহ পিতামহঃ
শর্বস্য শাস্ত্রেষু তথা দশ নামশতানি বৈ
16.75
গুহ্যানীমানি নামানি তণ্ডির্ভগবতোঽচ্যুত
দেবপ্রসাদাদ্দেবেশ পুরা প্রাহ মহাত্মনে