Utshovঅধ্যায় 15
15.1
উপমন্যুরুবাচ
এতান্সহস্রশশ্চান্যান্সমনুধ্যাতবান্হরঃ
কস্মাত্প্রসাদং ভগবান্ন কুর্যাত্তব মাধব
15.2
ত্বাদৃশেন হি দেবানাং শ্লাঘনীয়ঃ সমাগমঃ
ব্রহ্মণ্যেনানৃশংসেন শ্রদ্দধানেন চাপ্যুত
জপ্যং চ তে প্রদাস্যামি যেন দ্রক্ষ্যসি শংকরম্
15.3
কৃষ্ণ উবাচ
অব্রুবং তমহং ব্রহ্মংস্ত্বত্প্রসাদান্মহামুনে
দ্রক্ষ্যে দিতিজসংঘানাং মর্দনং ত্রিদশেশ্বরম্
15.4
দিনেঽষ্টমে চ বিপ্রেণ দীক্ষিতোঽহং যথাবিধি
দণ্ডী মুণ্ডী কুশী চীরী ঘৃতাক্তো মেখলী তথা
15.5
মাসমেকং ফলাহারো দ্বিতীয়ং সলিলাশনঃ
তৃতীয়ং চ চতুর্থং চ পঞ্চমং চানিলাশনঃ
15.6
একপাদেন তিষ্ঠংশ্চ ঊর্ধ্ববাহুরতন্দ্রিতঃ
তেজঃ সূর্যসহস্রস্য অপশ্যং দিবি ভারত
15.7
তস্য মধ্যগতং চাপি তেজসঃ পাণ্ডুনন্দন
ইন্দ্রায়ুধপিনদ্ধাঙ্গং বিদ্যুন্মালাগবাক্ষকম্
নীলশৈলচয়প্রখ্যং বলাকাভূষিতং ঘনম্
15.8
তমাস্থিতশ্চ ভগবান্দেব্যা সহ মহাদ্যুতিঃ
তপসা তেজসা কান্ত্যা দীপ্তয়া সহ ভার্যয়া
15.9
ররাজ ভগবাংস্তত্র দেব্যা সহ মহেশ্বরঃ
সোমেন সহিতঃ সূর্যো যথা মেঘস্থিতস্তথা
15.10
সংহৃষ্টরোমা কৌন্তেয় বিস্ময়োত্ফুল্ললোচনঃ
অপশ্যং দেবসংঘানাং গতিমার্তিহরং হরম্
15.11
কিরীটিনং গদিনং শূলপাণিং; ব্যাঘ্রাজিনং জটিলং দণ্ডপাণিম্
পিনাকিনং বজ্রিণং তীক্ষ্ণদংষ্ট্রং; শুভাঙ্গদং ব্যালয়জ্ঞোপবীতম্
15.12
দিব্যাং মালামুরসানেকবর্ণাং; সমুদ্বহন্তং গুল্ফদেশাবলম্বাম্
চন্দ্রং যথা পরিবিষ্টং সসংধ্যং; বর্ষাত্যয়ে তদ্বদপশ্যমেনম্
15.13
প্রমথানাং গণৈশ্চৈব সমন্তাত্পরিবারিতম্
শরদীব সুদুষ্প্রেক্ষ্যং পরিবিষ্টং দিবাকরম্
15.14
একাদশ তথা চৈনং রুদ্রাণাং বৃষবাহনম্
অস্তুবন্নিয়তাত্মানঃ কর্মভিঃ শুভকর্মিণম্
15.15
আদিত্যা বসবঃ সাধ্যা বিশ্বেদেবাস্তথাশ্বিনৌ
বিশ্বাভিঃ স্তুতিভির্দেবং বিশ্বদেবং সমস্তুবন্
15.16
শতক্রতুশ্চ ভগবান্বিষ্ণুশ্চাদিতিনন্দনৌ
ব্রহ্মা রথন্তরং সাম ঈরয়ন্তি ভবান্তিকে
15.17
যোগীশ্বরাঃ সুবহবো যোগদং পিতরং গুরুম্
ব্রহ্মর্ষয়শ্চ সসুতাস্তথা দেবর্ষয়শ্চ বৈ
15.18
পৃথিবী চান্তরিক্ষং চ নক্ষত্রাণি গ্রহাস্তথা
মাসার্ধমাসা ঋতবো রাত্র্যঃ সংবত্সরাঃ ক্ষণাঃ
15.19
মুহূর্তাশ্চ নিমেষাশ্চ তথৈব যুগপর্যয়াঃ
দিব্যা রাজন্নমস্যন্তি বিদ্যাঃ সর্বা দিশস্তথা
15.20
সনত্কুমারো বেদাশ্চ ইতিহাসাস্তথৈব চ
মরীচিরঙ্গিরা অত্রিঃ পুলস্ত্যঃ পুলহঃ ক্রতুঃ
15.21
মনবঃ সপ্তসোমশ্চ অথর্বা সবৃহস্পতিঃ
ভৃগুর্দক্ষঃ কশ্যপশ্চ বসিষ্ঠঃ কাশ্য এব চ
15.22
ছন্দাংসি দীক্ষা যজ্ঞাশ্চ দক্ষিণাঃ পাবকো হবিঃ
যজ্ঞোপগানি দ্রব্যাণি মূর্তিমন্তি যুধিষ্ঠির
15.23
প্রজানাং পতয়ঃ সর্বে সরিতঃ পন্নগা নগাঃ
দেবানাং মাতরঃ সর্বা দেবপত্ন্যঃ সকন্যকাঃ
15.24
সহস্রাণি মুনীনাং চ অয়ুতান্যর্বুদানি চ
নমস্যন্তি প্রভুং শান্তং পর্বতাঃ সাগরা দিশঃ
15.25
গন্ধর্বাপ্সরসশ্চৈব গীতবাদিত্রকোবিদাঃ
দিব্যতানেন গায়ন্তঃ স্তুবন্তি ভবমদ্ভুতম্
বিদ্যাধরা দানবাশ্চ গুহ্যকা রাক্ষসাস্তথা
15.26
সর্বাণি চৈব ভূতানি স্থাবরাণি চরাণি চ
নমস্যন্তি মহারাজ বাঙ্মনঃকর্মভির্বিভুম্
পুরস্তাদ্বিষ্ঠিতঃ শর্বো মমাসীত্ত্রিদশেশ্বরঃ
15.27
পুরস্তাদ্বিষ্ঠিতং দৃষ্ট্বা মমেশানং চ ভারত
সপ্রজাপতিশক্রান্তং জগন্মামভ্যুদৈক্ষত
15.28
ঈক্ষিতুং চ মহাদেবং ন মে শক্তিরভূত্তদা
ততো মামব্রবীদ্দেবঃ পশ্য কৃষ্ণ বদস্ব চ
15.29
শিরসা বন্দিতে দেবে দেবী প্রীতা উমাভবৎ
ততোঽহমস্তুবং স্থাণুং স্তুতং ব্রহ্মাদিভিঃ সুরৈঃ
15.30
নমোঽস্তু তে শাশ্বত সর্বয়োনে; ব্রহ্মাধিপং ত্বামৃষয়ো বদন্তি
তপশ্চ সত্ত্বং চ রজস্তমশ্চ; ত্বামেব সত্যং চ বদন্তি সন্তঃ
15.31
ত্বং বৈ ব্রহ্মা চ রুদ্রশ্চ বরুণোঽগ্নির্মনুর্ভবঃ
ধাতা ত্বষ্টা বিধাতা চ ত্বং প্রভুঃ সর্বতোমুখঃ
15.32
ত্বত্তো জাতানি ভূতানি স্থাবরাণি চরাণি চ
ত্বমাদিঃ সর্বভূতানাং সংহারশ্চ ত্বমেব হি
15.33
যে চেন্দ্রিয়ার্থাশ্চ মনশ্চ কৃত্স্নং; যে বায়বঃ সপ্ত তথৈব চাগ্নিঃ
যে বা দিবিস্থা দেবতাশ্চাপি পুংসাং; তস্মাত্পরং ত্বামৃষয়ো বদন্তি
15.34
বেদা যজ্ঞাশ্চ সোমশ্চ দক্ষিণা পাবকো হবিঃ
যজ্ঞোপগং চ যত্কিংচিদ্ভগবাংস্তদসংশয়ম্
15.35
ইষ্টং দত্তমধীতং চ ব্রতানি নিয়মাশ্চ যে
হ্রীঃ কীর্তিঃ শ্রীর্দ্যুতিস্তুষ্টিঃ সিদ্ধিশ্চৈব ত্বদর্পণা
15.36
কামঃ ক্রোধো ভয়ং লোভো মদঃ স্তম্ভোঽথ মত্সরঃ
আধয়ো ব্যাধয়শ্চৈব ভগবংস্তনয়াস্তব
15.37
কৃতির্বিকারঃ প্রলয়ঃ প্রধানং প্রভবোঽব্যয়ঃ
মনসঃ পরমা যোনিঃ স্বভাবশ্চাপি শাশ্বতঃ
অব্যক্তঃ পাবন বিভো সহস্রাংশো হিরণ্ময়ঃ
15.38
আদির্গুণানাং সর্বেষাং ভবান্বৈ জীবনাশ্রয়ঃ
মহানাত্মা মতির্ব্রহ্মা বিশ্বঃ শংভুঃ স্বয়ংভুবঃ
15.39
বুদ্ধিঃ প্রজ্ঞোপলব্ধিশ্চ সংবিত্খ্যাতির্ধৃতিঃ স্মৃতিঃ
পর্যায়বাচকৈঃ শব্দৈর্মহানাত্মা বিভাব্যসে
15.40
ত্বাং বুদ্ধ্বা ব্রাহ্মণো বিদ্বান্ন প্রমোহং নিগচ্ছতি
হৃদয়ং সর্বভূতানাং ক্ষেত্রজ্ঞস্ত্বমৃষিষ্টুতঃ
15.41
সর্বতঃপাণিপাদস্ত্বং সর্বতোক্ষিশিরোমুখঃ
সর্বতঃশ্রুতিমাঁল্লোকে সর্বমাবৃত্য তিষ্ঠসি
15.42
ফলং ত্বমসি তিগ্মাংশো নিমেষাদিষু কর্মসু
ত্বং বৈ প্রভার্চিঃ পুরুষঃ সর্বস্য হৃদি সংস্থিতঃ
অণিমা লঘিমা প্রাপ্তিরীশানো জ্যোতিরব্যয়ঃ
15.43
ত্বয়ি বুদ্ধির্মতির্লোকাঃ প্রপন্নাঃ সংশ্রিতাশ্চ যে
ধ্যানিনো নিত্যয়োগাশ্চ সত্যসংধা জিতেন্দ্রিয়াঃ
15.44
যস্ত্বাং ধ্রুবং বেদয়তে গুহাশয়ং; প্রভুং পুরাণং পুরুষং বিশ্বরূপম্
হিরণ্ময়ং বুদ্ধিমতাং পরাং গতিং; স বুদ্ধিমান্বুদ্ধিমতীত্য তিষ্ঠতি
15.45
বিদিত্বা সপ্ত সূক্ষ্মাণি ষডঙ্গং ত্বাং চ মূর্তিতঃ
প্রধানবিধিয়োগস্থস্ত্বামেব বিশতে বুধঃ
15.46
এবমুক্তে ময়া পার্থ ভবে চার্তিবিনাশনে
চরাচরং জগত্সর্বং সিংহনাদমথাকরোৎ
15.47
সবিপ্রসংঘাশ্চ সুরাসুরাশ্চ; নাগাঃ পিশাচাঃ পিতরো বয়াংসি
রক্ষোগণা ভূতগণাশ্চ সর্বে; মহর্ষয়শ্চৈব তথা প্রণেমুঃ
15.48
মম মূর্ধ্নি চ দিব্যানাং কুসুমানাং সুগন্ধিনাম্
রাশয়ো নিপতন্তি স্ম বায়ুশ্চ সুসুখো ববৌ
15.49
নিরীক্ষ্য ভগবান্দেবীমুমাং মাং চ জগদ্ধিতঃ
শতক্রতুং চাভিবীক্ষ্য স্বয়ং মামাহ শংকরঃ
15.50
বিদ্মঃ কৃষ্ণ পরাং ভক্তিমস্মাসু তব শত্রুহন্
ক্রিয়তামাত্মনঃ শ্রেয়ঃ প্রীতির্হি পরমা ত্বয়ি
15.51
বৃণীষ্বাষ্টৌ বরান্কৃষ্ণ দাতাস্মি তব সত্তম
ব্রূহি যাদবশার্দূল যানিচ্ছসি সুদুর্লভান্