Utshovঅধ্যায় 14
14.1
যুধিষ্ঠির উবাচ
পিতামহেশায় বিভো নামান্যাচক্ষ্ব শংভবে
বভ্রবে বিশ্বমায়ায় মহাভাগ্যং চ তত্ত্বতঃ
14.2
ভীষ্ম উবাচ
সুরাসুরগুরো দেব বিষ্ণো ত্বং বক্তুমর্হসি
শিবায় বিশ্বরূপায় যন্মাং পৃচ্ছদ্যুধিষ্ঠিরঃ
14.3
নাম্নাং সহস্রং দেবস্য তণ্ডিনা ব্রহ্ময়োনিনা
নিবেদিতং ব্রহ্মলোকে ব্রহ্মণো যত্পুরাভবৎ
14.4
দ্বৈপায়নপ্রভৃতয়স্তথৈবেমে তপোধনাঃ
ঋষয়ঃ সুব্রতা দান্তাঃ শৃণ্বন্তু গদতস্তব
14.5
ধ্রুবায় নন্দিনে হোত্রে গোপ্ত্রে বিশ্বসৃজেঽগ্নয়ে
মহাভাগ্যং বিভো ব্রূহি মুণ্ডিনেঽথ কপর্দিনে
14.6
বাসুদেব উবাচ
ন গতিঃ কর্মণাং শক্যা বেত্তুমীশস্য তত্ত্বতঃ
14.7
হিরণ্যগর্ভপ্রমুখা দেবাঃ সেন্দ্রা মহর্ষয়ঃ
ন বিদুর্যস্য নিধনমাদিং বা সূক্ষ্মদর্শিনঃ
স কথং নরমাত্রেণ শক্যো জ্ঞাতুং সতাং গতিঃ
14.8
তস্যাহমসুরঘ্নস্য কাংশ্চিদ্ভগবতো গুণান্
ভবতাং কীর্তয়িষ্যামি ব্রতেশায় যথাতথম্
14.9
বৈশংপায়ন উবাচ
এবমুক্ত্বা তু ভগবান্গুণাংস্তস্য মহাত্মনঃ
উপস্পৃশ্য শুচির্ভূত্বা কথয়ামাস ধীমতঃ
14.10
বাসুদেব উবাচ
শুশ্রূষধ্বং ব্রাহ্মণেন্দ্রাস্ত্বং চ তাত যুধিষ্ঠির
ত্বং চাপগেয় নামানি নিশাময় জগত্পতেঃ
14.11
যদবাপ্তং চ মে পূর্বং সাম্বহেতোঃ সুদুষ্করম্
যথা চ ভগবান্দৃষ্টো ময়া পূর্বং সমাধিনা
14.12
শম্বরে নিহতে পূর্বং রৌক্মিণেয়েন ধীমতা
অতীতে দ্বাদশে বর্ষে জাম্ববত্যব্রবীদ্ধি মাম্
14.13
প্রদ্যুম্নচারুদেষ্ণাদীন্রুক্মিণ্যা বীক্ষ্য পুত্রকান্
পুত্রার্থিনী মামুপেত্য বাক্যমাহ যুধিষ্ঠির
14.14
শূরং বলবতাং শ্রেষ্ঠং কান্তরূপমকল্মষম্
আত্মতুল্যং মম সুতং প্রয়চ্ছাচ্যুত মাচিরম্
14.15
ন হি তেঽপ্রাপ্যমস্তীহ ত্রিষু লোকেষু কিংচন
লোকান্সৃজেস্ত্বমপরানিচ্ছন্যদুকুলোদ্বহ
14.16
ত্বয়া দ্বাদশ বর্ষাণি বায়ুভূতেন শুষ্যতা
আরাধ্য পশুভর্তারং রুক্মিণ্যা জনিতাঃ সুতাঃ
14.17
চারুদেষ্ণঃ সুচারুশ্চ চারুবেষো যশোধরঃ
চারুশ্রবাশ্চারুয়শাঃ প্রদ্যুম্নঃ শংভুরেব চ
14.18
যথা তে জনিতাঃ পুত্রা রুক্মিণ্যাশ্চারুবিক্রমাঃ
তথা মমাপি তনয়ং প্রয়চ্ছ বলশালিনম্
14.19
ইত্যেবং চোদিতো দেব্যা তামবোচং সুমধ্যমাম্
অনুজানীহি মাং রাজ্ঞি করিষ্যে বচনং তব
সা চ মামব্রবীদ্গচ্ছ বিজয়ায় শিবায় চ
14.20
ব্রহ্মা শিবঃ কাশ্যপশ্চ নদ্যো দেবা মনোনুগাঃ
ক্ষেত্রৌষধ্যো যজ্ঞবাহাচ্ছন্দাংস্যৃষিগণা ধরা
14.21
সমুদ্রা দক্ষিণা স্তোভা ঋক্ষাণি পিতরো গ্রহাঃ
দেবপত্ন্যো দেবকন্যা দেবমাতর এব চ
14.22
মন্বন্তরাণি গাবশ্চ চন্দ্রমাঃ সবিতা হরিঃ
সাবিত্রী ব্রহ্মবিদ্যা চ ঋতবো বত্সরাঃ ক্ষপাঃ
14.23
ক্ষণা লবা মুহূর্তাশ্চ নিমেষা যুগপর্যয়াঃ
রক্ষন্তু সর্বত্র গতং ত্বাং যাদব সুখাবহম্
অরিষ্টং গচ্ছ পন্থানমপ্রমত্তো ভবানঘ
14.24
এবং কৃতস্বস্ত্যয়নস্তয়াহং; তামভ্যনুজ্ঞায় কপীন্দ্রপুত্রীম্
পিতুঃ সমীপে নরসত্তমস্য; মাতুশ্চ রাজ্ঞশ্চ তথাহুকস্য
14.25
তমর্থমাবেদ্য যদব্রবীন্মাং; বিদ্যাধরেন্দ্রস্য সুতা ভৃশার্তা
তানভ্যনুজ্ঞায় তদাতিদুঃখা;দ্গদং তথৈবাতিবলং চ রামম্
14.26
প্রাপ্যানুজ্ঞাং গুরুজনাদহং তার্ক্ষ্যমচিন্তয়ম্
সোঽবহদ্ধিমবন্তং মাং প্রাপ্য চৈনং ব্যসর্জয়ম্
14.27
তত্রাহমদ্ভুতান্ভাবানপশ্যং গিরিসত্তমে
ক্ষেত্রং চ তপসাং শ্রেষ্ঠং পশ্যাম্যাশ্রমমুত্তমম্
14.28
দিব্যং বৈয়াঘ্রপদ্যস্য উপমন্যোর্মহাত্মনঃ
পূজিতং দেবগন্ধর্বৈর্ব্রাহ্ম্যা লক্ষ্ম্যা সমন্বিতম্
14.29
ধবককুভকদম্বনারিকেলৈঃ; কুরবককেতকজম্বুপাটলাভিঃ
বটবরুণকবত্সনাভবিল্বৈঃ; সরলকপিত্থপ্রিয়ালসালতালৈঃ
14.30
বদরীকুন্দপুন্নাগৈরশোকাম্রাতিমুক্তকৈঃ
ভল্লাতকৈর্মধূকৈশ্চ চম্পকৈঃ পনসৈস্তথা
14.31
বন্যৈর্বহুবিধৈর্বৃক্ষৈঃ ফলপুষ্পপ্রদৈর্যুতম্
পুষ্পগুল্মলতাকীর্ণং কদলীষণ্ডশোভিতম্
14.32
নানাশকুনিসংভোজ্যৈঃ ফলৈর্বৃক্ষৈরলংকৃতম্
যথাস্থানবিনিক্ষিপ্তৈর্ভূষিতং বনরাজিভিঃ
14.33
রুরুবারণশার্দূলসিংহদ্বীপিসমাকুলম্
কুরঙ্গবর্হিণাকীর্ণং মার্জারভুজগাবৃতম্
পূগৈশ্চ মৃগজাতীনাং মহিষর্ক্ষনিষেবিতম্
14.34
নানাপুষ্পরজোমিশ্রো গজদানাধিবাসিতঃ
দিব্যস্ত্রীগীতবহুলো মারুতোঽত্র সুখো ববৌ
14.35
ধারানিনাদৈর্বিহগপ্রণাদৈঃ; শুভৈস্তথা বৃংহিতৈঃ কুঞ্জরাণাম্
গীতৈস্তথা কিংনরাণামুদারৈঃ; শুভৈঃ স্বনৈঃ সামগানাং চ বীর
14.36
অচিন্ত্যং মনসাপ্যন্যৈঃ সরোভিঃ সমলংকৃতম্
বিশালৈশ্চাগ্নিশরণৈর্ভূষিতং কুশসংবৃতম্
14.37
বিভূষিতং পুণ্যপবিত্রতোয়য়া; সদা চ জুষ্টং নৃপ জহ্নুকন্যয়া
মহাত্মভির্ধর্মভৃতাং বরিষ্ঠৈ;র্মহর্ষিভির্ভূষিতমগ্নিকল্পৈঃ
14.38
বায্বাহারৈরম্বুপৈর্জপ্যনিত্যৈঃ; সংপ্রক্ষালৈর্যতিভির্ধ্যাননিত্যৈঃ
ধূমাশনৈরূষ্মপৈঃ ক্ষীরপৈশ্চ; বিভূষিতং ব্রাহ্মণেন্দ্রৈঃ সমন্তাৎ
14.39
গোচারিণোঽথাশ্মকুট্টা দন্তোলূখলিনস্তথা
মরীচিপাঃ ফেনপাশ্চ তথৈব মৃগচারিণঃ
14.40
সুদুঃখান্নিয়মাংস্তাংস্তান্বহতঃ সুতপোন্বিতান্
পশ্যন্নুত্ফুল্লনয়নঃ প্রবেষ্টুমুপচক্রমে
14.41
সুপূজিতং দেবগণৈর্মহাত্মভিঃ; শিবাদিভির্ভারত পুণ্যকর্মভিঃ
ররাজ তচ্চাশ্রমমণ্ডলং সদা; দিবীব রাজন্রবিমণ্ডলং যথা
14.42
ক্রীডন্তি সর্পৈর্নকুলা মৃগৈর্ব্যাঘ্রাশ্চ মিত্রবৎ
প্রভাবাদ্দীপ্ততপসঃ সংনিকর্ষগুণান্বিতাঃ
14.43
তত্রাশ্রমপদে শ্রেষ্ঠে সর্বভূতমনোরমে
সেবিতে দ্বিজশার্দূলৈর্বেদবেদাঙ্গপারগৈঃ
14.44
নানানিয়মবিখ্যাতৈরৃষিভিশ্চ মহাত্মভিঃ
প্রবিশন্নেব চাপশ্যং জটাচীরধরং প্রভুম্
14.45
তেজসা তপসা চৈব দীপ্যমানং যথানলম্
শিষ্যমধ্যগতং শান্তং যুবানং ব্রাহ্মণর্ষভম্
শিরসা বন্দমানং মামুপমন্যুরভাষত
14.46
স্বাগতং পুণ্ডরীকাক্ষ সফলানি তপাংসি নঃ
যত্পূজ্যঃ পূজয়সি নো দ্রষ্টব্যো দ্রষ্টুমিচ্ছসি
14.47
তমহং প্রাঞ্জলির্ভূত্বা মৃগপক্ষিষ্বথাগ্নিষু
ধর্মে চ শিষ্যবর্গে চ সমপৃচ্ছমনাময়ম্
14.48
ততো মাং ভগবানাহ সাম্না পরমবল্গুনা
লপ্স্যসে তনয়ং কৃষ্ণ আত্মতুল্যমসংশয়ম্
14.49
তপঃ সুমহদাস্থায় তোষয়েশানমীশ্বরম্
ইহ দেবঃ সপত্নীকঃ সমাক্রীডত্যধোক্ষজ
14.50
ইহৈব দেবতাশ্রেষ্ঠং দেবাঃ সর্ষিগণাঃ পুরা
তপসা ব্রহ্মচর্যেণ সত্যেন চ দমেন চ
তোষয়িত্বা শুভান্কামান্প্রাপ্নুবংস্তে জনার্দন
14.51
তেজসাং তপসাং চৈব নিধিঃ স ভগবানিহ
শুভাশুভান্বিতান্ভাবান্বিসৃজন্সংক্ষিপন্নপি
আস্তে দেব্যা সহাচিন্ত্যো যং প্রার্থয়সি শত্রুহন্
14.52
হিরণ্যকশিপুর্যোঽভূদ্দানবো মেরুকম্পনঃ
তেন সর্বামরৈশ্বর্যং শর্বাত্প্রাপ্তং সমার্বুদম্
14.53
তস্যৈব পুত্রপ্রবরো মন্দরো নাম বিশ্রুতঃ
মহাদেববরাচ্ছক্রং বর্ষার্বুদময়োধয়ৎ
14.54
বিষ্ণোশ্চক্রং চ তদ্ঘোরং বজ্রমাখণ্ডলস্য চ
শীর্ণং পুরাভবত্তাত গ্রহস্যাঙ্গেষু কেশব
14.55
অর্দ্যমানাশ্চ বিবুধা গ্রহেণ সুবলীয়সা
শিবদত্তবরাঞ্জঘ্নুরসুরেন্দ্রান্সুরা ভৃশম্
14.56
তুষ্টো বিদ্যুত্প্রভস্যাপি ত্রিলোকেশ্বরতামদাৎ
শতং বর্ষসহস্রাণাং সর্বলোকেশ্বরোঽভবৎ
মমৈবানুচরো নিত্যং ভবিতাসীতি চাব্রবীৎ
14.57
তথা পুত্রসহস্রাণাময়ুতং চ দদৌ প্রভুঃ
কুশদ্বীপং চ স দদৌ রাজ্যেন ভগবানজঃ
14.58
তথা শতমুখো নাম ধাত্রা সৃষ্টো মহাসুরঃ
যেন বর্ষশতং সাগ্রমাত্মমাংসৈর্হুতোঽনলঃ
তং প্রাহ ভগবাংস্তুষ্টঃ কিং করোমীতি শংকরঃ
14.59
তং বৈ শতমুখঃ প্রাহ যোগো ভবতু মেঽদ্ভুতঃ
বলং চ দৈবতশ্রেষ্ঠ শাশ্বতং সংপ্রয়চ্ছ মে
14.60
স্বায়ংভুবঃ ক্রতুশ্চাপি পুত্রার্থমভবত্পুরা
আবিশ্য যোগেনাত্মানং ত্রীণি বর্ষশতান্যপি
14.61
তস্য দেবোঽদদত্পুত্রান্সহস্রং ক্রতুসংমিতান্
যোগেশ্বরং দেবগীতং বেত্থ কৃষ্ণ ন সংশয়ঃ
14.62
বালখিল্যা মঘবতা অবজ্ঞাতাঃ পুরা কিল
তৈঃ ক্রুদ্ধৈর্ভগবান্রুদ্রস্তপসা তোষিতো হ্যভূৎ
14.63
তাংশ্চাপি দৈবতশ্রেষ্ঠঃ প্রাহ প্রীতো জগত্পতিঃ
সুপর্ণং সোমহর্তারং তপসোত্পাদয়িষ্যথ
14.64
মহাদেবস্য রোষাচ্চ আপো নষ্টাঃ পুরাভবন্
তাশ্চ সপ্তকপালেন দেবৈরন্যাঃ প্রবর্তিতাঃ
14.65
অত্রের্ভার্যাপি ভর্তারং সংত্যজ্য ব্রহ্মবাদিনী
নাহং তস্য মুনের্ভূয়ো বশগা স্যাং কথংচন
ইত্যুক্ত্বা সা মহাদেবমগচ্ছচ্ছরণং কিল
14.66
নিরাহারা ভয়াদত্রেস্ত্রীণি বর্ষশতান্যপি
অশেত মুসলেষ্বেব প্রসাদার্থং ভবস্য সা
14.67
তামব্রবীদ্ধসন্দেবো ভবিতা বৈ সুতস্তব
বংশে তবৈব নাম্না তু খ্যাতিং যাস্যতি চেপ্সিতাম্
14.68
শাকল্যঃ সংশিতাত্মা বৈ নব বর্ষশতান্যপি
আরাধয়ামাস ভবং মনোয়জ্ঞেন কেশব
14.69
তং চাহ ভগবাংস্তুষ্টো গ্রন্থকারো ভবিষ্যসি
বত্সাক্ষয়া চ তে কীর্তিস্ত্রৈলোক্যে বৈ ভবিষ্যতি
অক্ষয়ং চ কুলং তেঽস্তু মহর্ষিভিরলংকৃতম্
14.70
সাবর্ণিশ্চাপি বিখ্যাত ঋষিরাসীত্কৃতে যুগে
ইহ তেন তপস্তপ্তং ষষ্টিং বর্ষশতান্যথ
14.71
তমাহ ভগবান্রুদ্রঃ সাক্ষাত্তুষ্টোঽস্মি তেঽনঘ
গ্রন্থকৃল্লোকবিখ্যাতো ভবিতাস্যজরামরঃ
14.72
ময়াপি চ যথা দৃষ্টো দেবদেবঃ পুরা বিভুঃ
সাক্ষাত্পশুপতিস্তাত তচ্চাপি শৃণু মাধব
14.73
যদর্থং চ মহাদেবঃ প্রয়তেন ময়া পুরা
আরাধিতো মহাতেজাস্তচ্চাপি শৃণু বিস্তরম্
14.74
যদবাপ্তং চ মে পূর্বং দেবদেবান্মহেশ্বরাৎ
তত্সর্বমখিলেনাদ্য কথয়িষ্যামি তেঽনঘ
14.75
পুরা কৃতয়ুগে তাত ঋষিরাসীন্মহায়শাঃ
ব্যাঘ্রপাদ ইতি খ্যাতো বেদবেদাঙ্গপারগঃ
তস্যাহমভবং পুত্রো ধৌম্যশ্চাপি মমানুজঃ
14.76
কস্যচিত্ত্বথ কালস্য ধৌম্যেন সহ মাধব
আগচ্ছমাশ্রমং ক্রীডন্মুনীনাং ভাবিতাত্মনাম্
14.77
তত্রাপি চ ময়া দৃষ্টা দুহ্যমানা পয়স্বিনী
লক্ষিতং চ ময়া ক্ষীরং স্বাদুতো হ্যমৃতোপমম্
14.78
ততঃ পিষ্টং সমালোড্য তোয়েন সহ মাধব
আবয়োঃ ক্ষীরমিত্যেব পানার্থমুপনীয়তে
14.79
অথ গব্যং পয়স্তাত কদাচিত্প্রাশিতং ময়া
ততঃ পিষ্টরসং তাত ন মে প্রীতিমুদাবহৎ
14.80
ততোঽহমব্রুবং বাল্যাজ্জননীমাত্মনস্তদা
ক্ষীরোদনসমায়ুক্তং ভোজনং চ প্রয়চ্ছ মে
14.81
ততো মামব্রবীন্মাতা দুঃখশোকসমন্বিতা
পুত্রস্নেহাত্পরিষ্বজ্য মূর্ধ্নি চাঘ্রায় মাধব
14.82
কুতঃ ক্ষীরোদনং বত্স মুনীনাং ভাবিতাত্মনাম্
বনে নিবসতাং নিত্যং কন্দমূলফলাশিনাম্
14.83
অপ্রসাদ্য বিরূপাক্ষং বরদং স্থাণুমব্যয়ম্
কুতঃ ক্ষীরোদনং বত্স সুখানি বসনানি চ
14.84
তং প্রপদ্য সদা বত্স সর্বভাবেন শংকরম্
তত্প্রসাদাচ্চ কামেভ্যঃ ফলং প্রাপ্স্যসি পুত্রক
14.85
জনন্যাস্তদ্বচঃ শ্রুত্বা তদাপ্রভৃতি শত্রুহন্
মম ভক্তির্মহাদেবে নৈষ্ঠিকী সমপদ্যত
14.86
ততোঽহং তপ আস্থায় তোষয়ামাস শংকরম্
দিব্যং বর্ষসহস্রং তু পাদাঙ্গুষ্ঠাগ্রবিষ্ঠিতঃ
14.87
একং বর্ষশতং চৈব ফলাহারস্তদাভবম্
দ্বিতীয়ং শীর্ণপর্ণাশী তৃতীয়ং চাম্বুভোজনঃ
শতানি সপ্ত চৈবাহং বায়ুভক্ষস্তদাভবম্
14.88
ততঃ প্রীতো মহাদেবঃ সর্বলোকেশ্বরঃ প্রভুঃ
শক্ররূপং স কৃত্বা তু সর্বৈর্দেবগণৈর্বৃতঃ
সহস্রাক্ষস্তদা ভূত্বা বজ্রপাণির্মহায়শাঃ
14.89
সুধাবদাতং রক্তাক্ষং স্তব্ধকর্ণং মদোত্কটম্
আবেষ্টিতকরং রৌদ্রং চতুর্দংষ্ট্রং মহাগজম্
14.90
সমাস্থিতশ্চ ভগবান্দীপ্যমানঃ স্বতেজসা
আজগাম কিরীটী তু হারকেয়ূরভূষিতঃ
14.91
পাণ্ডুরেণাতপত্রেণ ধ্রিয়মাণেন মূর্ধনি
সেব্যমানোঽপ্সরোভিশ্চ দিব্যগন্ধর্বনাদিতঃ
14.92
ততো মামাহ দেবেন্দ্রঃ প্রীতস্তেঽহং দ্বিজোত্তম
বরং বৃণীষ্ব মত্তস্ত্বং যত্তে মনসি বর্ততে
14.93
শক্রস্য তু বচঃ শ্রুত্বা নাহং প্রীতমনাভবম্
অব্রুবং চ তদা কৃষ্ণ দেবরাজমিদং বচঃ
14.94
নাহং ত্বত্তো বরং কাঙ্ক্ষে নান্যস্মাদপি দৈবতাৎ
মহাদেবাদৃতে সৌম্য সত্যমেতদ্ব্রবীমি তে
14.95
পশুপতিবচনাদ্ভবামি সদ্যঃ; কৃমিরথ বা তরুরপ্যনেকশাখঃ
অপশুপতিবরপ্রসাদজা মে; ত্রিভুবনরাজ্যবিভূতিরপ্যনিষ্টা
14.96
অপি কীটঃ পতংগো বা ভবেয়ং শংকরাজ্ঞয়া
ন তু শক্র ত্বয়া দত্তং ত্রৈলোক্যমপি কাময়ে
14.97
যাবচ্ছশাঙ্কশকলামলবদ্ধমৌলি;র্ন প্রীয়তে পশুপতির্ভগবান্মমেশঃ
তাবজ্জরামরণজন্মশতাভিঘাতৈ;র্দুঃখানি দেহবিহিতানি সমুদ্বহামি
14.98
দিবসকরশশাঙ্কবহ্নিদীপ্তং; ত্রিভুবনসারমপারমাদ্যমেকম্
অজরমমরমপ্রসাদ্য রুদ্রং; জগতি পুমানিহ কো লভেত শান্তিম্
14.99
শক্র উবাচ
কঃ পুনস্তব হেতুর্বৈ ঈশে কারণকারণে
যেন দেবাদৃতেঽন্যস্মাত্প্রসাদং নাভিকাঙ্ক্ষসি
14.100
উপমন্যুরুবাচ
হেতুভির্বা কিমন্যৈস্তে ঈশঃ কারণকারণম্
ন শুশ্রুম যদন্যস্য লিঙ্গমভ্যর্চ্যতে সুরৈঃ
14.101
কস্যান্যস্য সুরৈঃ সর্বৈর্লিঙ্গং মুক্ত্বা মহেশ্বরম্
অর্চ্যতেঽর্চিতপূর্বং বা ব্রূহি যদ্যস্তি তে শ্রুতিঃ
14.102
যস্য ব্রহ্মা চ বিষ্ণুশ্চ ত্বং চাপি সহ দৈবতৈঃ
অর্চয়ধ্বং সদা লিঙ্গং তস্মাচ্ছ্রেষ্ঠতমো হি সঃ
14.103
তস্মাদ্বরমহং কাঙ্ক্ষে নিধনং বাপি কৌশিক
গচ্ছ বা তিষ্ঠ বা শক্র যথেষ্টং বলসূদন
14.104
কামমেষ বরো মেঽস্তু শাপো বাপি মহেশ্বরাৎ
ন চান্যাং দেবতাং কাঙ্ক্ষে সর্বকামফলান্যপি
14.105
এবমুক্ত্বা তু দেবেন্দ্রং দুঃখাদাকুলিতেন্দ্রিয়ঃ
ন প্রসীদতি মে রুদ্রঃ কিমেতদিতি চিন্তয়ন্
অথাপশ্যং ক্ষণেনৈব তমেবৈরাবতং পুনঃ
14.106
হংসকুন্দেন্দুসদৃশং মৃণালকুমুদপ্রভম্
বৃষরূপধরং সাক্ষাত্ক্ষীরোদমিব সাগরম্
14.107
কৃষ্ণপুচ্ছং মহাকায়ং মধুপিঙ্গললোচনম্
জাম্বূনদেন দাম্না চ সর্বতঃ সমলংকৃতম্
14.108
রক্তাক্ষং সুমহানাসং সুকর্ণং সুকটীতটম্
সুপার্শ্বং বিপুলস্কন্ধং সুরূপং চারুদর্শনম্
14.109
ককুদং তস্য চাভাতি স্কন্ধমাপূর্য বিষ্ঠিতম্
তুষারগিরিকূটাভং সিতাভ্রশিখরোপমম্
14.110
তমাস্থিতশ্চ ভগবান্দেবদেবঃ সহোময়া
অশোভত মহাদেবঃ পৌর্ণমাস্যামিবোডুরাট্
14.111
তস্য তেজোভবো বহ্নিঃ সমেঘঃ স্তনয়িত্নুমান্
সহস্রমিব সূর্যাণাং সর্বমাবৃত্য তিষ্ঠতি
14.112
ঈশ্বরঃ সুমহাতেজাঃ সংবর্তক ইবানলঃ
যুগান্তে সর্বভূতানি দিধক্ষুরিব চোদ্যতঃ
14.113
তেজসা তু তদা ব্যাপ্তে দুর্নিরীক্ষ্যে সমন্ততঃ
পুনরুদ্বিগ্নহৃদয়ঃ কিমেতদিতি চিন্তয়ম্
14.114
মুহূর্তমিব তত্তেজো ব্যাপ্য সর্বা দিশো দশ
প্রশান্তং চ ক্ষণেনৈব দেবদেবস্য মায়য়া
14.115
অথাপশ্যং স্থিতং স্থাণুং ভগবন্তং মহেশ্বরম্
সৌরভেয়গতং সৌম্যং বিধূমমিব পাবকম্
সহিতং চারুসর্বাঙ্গ্যা পার্বত্যা পরমেশ্বরম্
14.116
নীলকণ্ঠং মহাত্মানমসক্তং তেজসাং নিধিম্
অষ্টাদশভুজং স্থাণুং সর্বাভরণভূষিতম্
14.117
শুক্লাম্বরধরং দেবং শুক্লমাল্যানুলেপনম্
শুক্লধ্বজমনাধৃষ্যং শুক্লয়জ্ঞোপবীতিনম্
14.118
গায়দ্ভির্নৃত্যমানৈশ্চ উত্পতদ্ভিরিতস্ততঃ
বৃতং পারিষদৈর্দিব্যৈরাত্মতুল্যপরাক্রমৈঃ
14.119
বালেন্দুমুকুটং পাণ্ডুং শরচ্চন্দ্রমিবোদিতম্
ত্রিভির্নেত্রৈঃ কৃতোদ্দ্যোতং ত্রিভিঃ সূর্যৈরিবোদিতৈঃ
14.120
অশোভত চ দেবস্য মালা গাত্রে সিতপ্রভে
জাতরূপময়ৈঃ পদ্মৈর্গ্রথিতা রত্নভূষিতা
14.121
মূর্তিমন্তি তথাস্ত্রাণি সর্বতেজোময়ানি চ
ময়া দৃষ্টানি গোবিন্দ ভবস্যামিততেজসঃ
14.122
ইন্দ্রায়ুধসহস্রাভং ধনুস্তস্য মহাত্মনঃ
পিনাকমিতি বিখ্যাতং স চ বৈ পন্নগো মহান্
14.123
সপ্তশীর্ষো মহাকায়স্তীক্ষ্ণদংষ্ট্রো বিষোল্বণঃ
জ্যাবেষ্টিতমহাগ্রীবঃ স্থিতঃ পুরুষবিগ্রহঃ
14.124
শরশ্চ সূর্যসংকাশঃ কালানলসমদ্যুতিঃ
যত্তদস্ত্রং মহাঘোরং দিব্যং পাশুপতং মহৎ
14.125
অদ্বিতীয়মনির্দেশ্যং সর্বভূতভয়াবহম্
সস্ফুলিঙ্গং মহাকায়ং বিসৃজন্তমিবানলম্
14.126
একপাদং মহাদংষ্ট্রং সহস্রশিরসোদরম্
সহস্রভুজজিহ্বাক্ষমুদ্গিরন্তমিবানলম্
14.127
ব্রাহ্মান্নারায়ণাদৈন্দ্রাদাগ্নেয়াদপি বারুণাৎ
যদ্বিশিষ্টং মহাবাহো সর্বশস্ত্রবিঘাতনম্
14.128
যেন তত্ত্রিপুরং দগ্ধ্বা ক্ষণাদ্ভস্মীকৃতং পুরা
শরেণৈকেন গোবিন্দ মহাদেবেন লীলয়া
14.129
নির্দদাহ জগত্কৃত্স্নং ত্রৈলোক্যং সচরাচরম্
মহেশ্বরভুজোত্সৃষ্টং নিমেষার্ধান্ন সংশয়ঃ
14.130
নাবধ্যো যস্য লোকেঽস্মিন্ব্রহ্মবিষ্ণুসুরেষ্বপি
তদহং দৃষ্টবাংস্তাত আশ্চর্যাদ্ভুতমুত্তমম্
14.131
গুহ্যমস্ত্রং পরং চাপি তত্তুল্যাধিকমেব বা
যত্তচ্ছূলমিতি খ্যাতং সর্বলোকেষু শূলিনঃ
14.132
দারয়েদ্যন্মহীং কৃত্স্নাং শোষয়েদ্বা মহোদধিম্
সংহরেদ্বা জগত্কৃত্স্নং বিসৃষ্টং শূলপাণিনা
14.133
যৌবনাশ্বো হতো যেন মাংধাতা সবলঃ পুরা
চক্রবর্তী মহাতেজাস্ত্রিলোকবিজয়ী নৃপঃ
14.134
মহাবলো মহাবীর্যঃ শক্রতুল্যপরাক্রমঃ
করস্থেনৈব গোবিন্দ লবণস্যেহ রক্ষসঃ
14.135
তচ্ছূলমতিতীক্ষ্ণাগ্রং সুভীমং লোমহর্ষণম্
ত্রিশিখাং ভ্রুকুটীং কৃত্বা তর্জমানমিব স্থিতম্
14.136
বিধূমং সার্চিষং কৃষ্ণং কালসূর্যমিবোদিতম্
সর্পহস্তমনির্দেশ্যং পাশহস্তমিবান্তকম্
দৃষ্টবানস্মি গোবিন্দ তদস্ত্রং রুদ্রসংনিধৌ
14.137
পরশুস্তীক্ষ্ণধারশ্চ দত্তো রামস্য যঃ পুরা
মহাদেবেন তুষ্টেন ক্ষত্রিয়াণাং ক্ষয়ংকরঃ
কার্তবীর্যো হতো যেন চক্রবর্তী মহামৃধে
14.138
ত্রিঃসপ্তকৃত্বঃ পৃথিবী যেন নিঃক্ষত্রিয়া কৃতা
জামদগ্ন্যেন গোবিন্দ রামেণাক্লিষ্টকর্মণা
14.139
দীপ্তধারঃ সুরৌদ্রাস্যঃ সর্পকণ্ঠাগ্রবেষ্টিতঃ
অভবচ্ছূলিনোঽভ্যাশে দীপ্তবহ্নিশিখোপমঃ
14.140
অসংখ্যেয়ানি চাস্ত্রাণি তস্য দিব্যানি ধীমতঃ
প্রাধান্যতো ময়ৈতানি কীর্তিতানি তবানঘ
14.141
সব্যদেশে তু দেবস্য ব্রহ্মা লোকপিতামহঃ
দিব্যং বিমানমাস্থায় হংসয়ুক্তং মনোজবম্
14.142
বামপার্শ্বগতশ্চৈব তথা নারায়ণঃ স্থিতঃ
বৈনতেয়ং সমাস্থায় শঙ্খচক্রগদাধরঃ
14.143
স্কন্দো ময়ূরমাস্থায় স্থিতো দেব্যাঃ সমীপতঃ
শক্তিং কণ্ঠে সমাদায় দ্বিতীয় ইব পাবকঃ
14.144
পুরস্তাচ্চৈব দেবস্য নন্দিং পশ্যাম্যবস্থিতম্
শূলং বিষ্টভ্য তিষ্ঠন্তং দ্বিতীয়মিব শংকরম্
14.145
স্বায়ংভুবাদ্যা মনবো ভৃগ্বাদ্যা ঋষয়স্তথা
শক্রাদ্যা দেবতাশ্চৈব সর্ব এব সমভ্যয়ুঃ
14.146
তেঽভিবাদ্য মহাত্মানং পরিবার্য সমন্ততঃ
অস্তুবন্বিবিধৈঃ স্তোত্রৈর্মহাদেবং সুরাস্তদা
14.147
ব্রহ্মা ভবং তদা স্তুন্বন্রথন্তরমুদীরয়ন্
জ্যেষ্ঠসাম্না চ দেবেশং জগৌ নারায়ণস্তদা
গৃণঞ্শক্রঃ পরং ব্রহ্ম শতরুদ্রীয়মুত্তমম্
14.148
ব্রহ্মা নারায়ণশ্চৈব দেবরাজশ্চ কৌশিকঃ
অশোভন্ত মহাত্মানস্ত্রয়স্ত্রয় ইবাগ্নয়ঃ
14.149
তেষাং মধ্যগতো দেবো ররাজ ভগবাঞ্শিবঃ
শরদ্ঘনবিনির্মুক্তঃ পরিবিষ্ট ইবাংশুমান্
ততোঽহমস্তুবং দেবং স্তবেনানেন সুব্রতম্
14.150
নমো দেবাধিদেবায় মহাদেবায় বৈ নমঃ
শক্রায় শক্ররূপায় শক্রবেষধরায় চ
14.151
নমস্তে বজ্রহস্তায় পিঙ্গলায়ারুণায় চ
পিনাকপাণয়ে নিত্যং খড্গশূলধরায় চ
14.152
নমস্তে কৃষ্ণবাসায় কৃষ্ণকুঞ্চিতমূর্ধজে
কৃষ্ণাজিনোত্তরীয়ায় কৃষ্ণাষ্টমিরতায় চ
14.153
শুক্লবর্ণায় শুক্লায় শুক্লাম্বরধরায় চ
শুক্লভস্মাবলিপ্তায় শুক্লকর্মরতায় চ
14.154
ত্বং ব্রহ্মা সর্বদেবানাং রুদ্রাণাং নীললোহিতঃ
আত্মা চ সর্বভূতানাং সাংখ্যে পুরুষ উচ্যসে
14.155
ঋষভস্ত্বং পবিত্রাণাং যোগিনাং নিষ্কলঃ শিবঃ
আশ্রমাণাং গৃহস্থস্ত্বমীশ্বরাণাং মহেশ্বরঃ
কুবেরঃ সর্বয়ক্ষাণাং ক্রতূনাং বিষ্ণুরুচ্যসে
14.156
পর্বতানাং মহামেরুর্নক্ষত্রাণাং চ চন্দ্রমাঃ
বসিষ্ঠস্ত্বমৃষীণাং চ গ্রহাণাং সূর্য উচ্যসে
14.157
আরণ্যানাং পশূনাং চ সিংহস্ত্বং পরমেশ্বরঃ
গ্রাম্যাণাং গোবৃষশ্চাসি ভগবাঁল্লোকপূজিতঃ
14.158
আদিত্যানাং ভবান্বিষ্ণুর্বসূনাং চৈব পাবকঃ
পক্ষিণাং বৈনতেয়শ্চ অনন্তো ভুজগেষু চ
14.159
সামবেদশ্চ বেদানাং যজুষাং শতরুদ্রিয়ম্
সনত্কুমারো যোগীনাং সাংখ্যানাং কপিলো হ্যসি
14.160
শক্রোঽসি মরুতাং দেব পিতৄণাং ধর্মরাডসি
ব্রহ্মলোকশ্চ লোকানাং গতীনাং মোক্ষ উচ্যসে
14.161
ক্ষীরোদঃ সাগরাণাং চ শৈলানাং হিমবান্গিরিঃ
বর্ণানাং ব্রাহ্মণশ্চাসি বিপ্রাণাং দীক্ষিতো দ্বিজঃ
আদিস্ত্বমসি লোকানাং সংহর্তা কাল এব চ
14.162
যচ্চান্যদপি লোকেষু সত্ত্বং তেজোধিকং স্মৃতম্
তত্সর্বং ভগবানেব ইতি মে নিশ্চিতা মতিঃ
14.163
নমস্তে ভগবন্দেব নমস্তে ভক্তবত্সল
যোগেশ্বর নমস্তেঽস্তু নমস্তে বিশ্বসংভব
14.164
প্রসীদ মম ভক্তস্য দীনস্য কৃপণস্য চ
অনৈশ্বর্যেণ যুক্তস্য গতির্ভব সনাতন
14.165
যং চাপরাধং কৃতবানজ্ঞানাত্পরমেশ্বর
মদ্ভক্ত ইতি দেবেশ তত্সর্বং ক্ষন্তুমর্হসি
14.166
মোহিতশ্চাস্মি দেবেশ তুভ্যং রূপবিপর্যয়াৎ
তেন নার্ঘ্যং ময়া দত্তং পাদ্যং চাপি সুরেশ্বর
14.167
এবং স্তুত্বাহমীশানং পাদ্যমর্ঘ্যং চ ভক্তিতঃ
কৃতাঞ্জলিপুটো ভূত্বা সর্বং তস্মৈ ন্যবেদয়ম্
14.168
ততঃ শীতাম্বুসংয়ুক্তা দিব্যগন্ধসমন্বিতা
পুষ্পবৃষ্টিঃ শুভা তাত পপাত মম মূর্ধনি
14.169
দুন্দুভিশ্চ ততো দিব্যস্তাডিতো দেবকিংকরৈঃ
ববৌ চ মারুতঃ পুণ্যঃ শুচিগন্ধঃ সুখাবহঃ
14.170
ততঃ প্রীতো মহাদেবঃ সপত্নীকো বৃষধ্বজঃ
অব্রবীত্ত্রিদশাংস্তত্র হর্ষয়ন্নিব মাং তদা
14.171
পশ্যধ্বং ত্রিদশাঃ সর্বে উপমন্যোর্মহাত্মনঃ
ময়ি ভক্তিং পরাং দিব্যামেকভাবাদবস্থিতাম্
14.172
এবমুক্তাস্ততঃ কৃষ্ণ সুরাস্তে শূলপাণিনা
ঊচুঃ প্রাঞ্জলয়ঃ সর্বে নমস্কৃত্বা বৃষধ্বজম্
14.173
ভগবন্দেবদেবেশ লোকনাথ জগত্পতে
লভতাং সর্বকামেভ্যঃ ফলং ত্বত্তো দ্বিজোত্তমঃ
14.174
এবমুক্তস্ততঃ শর্বঃ সুরৈর্ব্রহ্মাদিভিস্তথা
আহ মাং ভগবানীশঃ প্রহসন্নিব শংকরঃ
14.175
বত্সোপমন্যো প্রীতোঽস্মি পশ্য মাং মুনিপুংগব
দৃঢভক্তোঽসি বিপ্রর্ষে ময়া জিজ্ঞাসিতো হ্যসি
14.176
অনয়া চৈব ভক্ত্যা তে অত্যর্থং প্রীতিমানহম্
তস্মাত্সর্বান্দদাম্যদ্য কামাংস্তব যথেপ্শিতান্
14.177
এবমুক্তস্য চৈবাথ মহাদেবেন মে বিভো
হর্ষাদশ্রূণ্যবর্তন্ত লোমহর্ষশ্চ জায়তে
14.178
অব্রুবং চ তদা দেবং হর্ষগদ্গদয়া গিরা
জানুভ্যামবনিং গত্বা প্রণম্য চ পুনঃ পুনঃ
14.179
অদ্য জাতো হ্যহং দেব অদ্য মে সফলং তপঃ
যন্মে সাক্ষান্মহাদেবঃ প্রসন্নস্তিষ্ঠতেঽগ্রতঃ
14.180
যং ন পশ্যন্তি চারাধ্য দেবা হ্যমিতবিক্রমম্
তমহং দৃষ্টবান্দেবং কোঽন্যো ধন্যতরো ময়া
14.181
এবং ধ্যায়ন্তি বিদ্বাংসঃ পরং তত্ত্বং সনাতনম্
ষড্বিংশকমিতি খ্যাতং যত্পরাত্পরমক্ষরম্
14.182
স এষ ভগবান্দেবঃ সর্বতত্ত্বাদিরব্যয়ঃ
সর্বতত্ত্ববিধানজ্ঞঃ প্রধানপুরুষেশ্বরঃ
14.183
যোঽসৃজদ্দক্ষিণাদঙ্গাদ্ব্রহ্মাণং লোকসংভবম্
বামপার্শ্বাত্তথা বিষ্ণুং লোকরক্ষার্থমীশ্বরঃ
যুগান্তে চৈব সংপ্রাপ্তে রুদ্রমঙ্গাত্সৃজত্প্রভুঃ
14.184
স রুদ্রঃ সংহরন্কৃত্স্নং জগত্স্থাবরজঙ্গমম্
কালো ভূত্বা মহাতেজাঃ সংবর্তক ইবানলঃ
14.185
এষ দেবো মহাদেবো জগত্সৃষ্ট্বা চরাচরম্
কল্পান্তে চৈব সর্বেষাং স্মৃতিমাক্ষিপ্য তিষ্ঠতি
14.186
সর্বগঃ সর্বভূতাত্মা সর্বভূতভবোদ্ভবঃ
আস্তে সর্বগতো নিত্যমদৃশ্যঃ সর্বদৈবতৈঃ
14.187
যদি দেয়ো বরো মহ্যং যদি তুষ্টশ্চ মে প্রভুঃ
ভক্তির্ভবতু মে নিত্যং শাশ্বতী ত্বয়ি শংকর
14.188
অতীতানাগতং চৈব বর্তমানং চ যদ্বিভো
জানীয়ামিতি মে বুদ্ধিস্ত্বত্প্রসাদাত্সুরোত্তম
14.189
ক্ষীরোদনং চ ভুঞ্জীয়ামক্ষয়ং সহ বান্ধবৈঃ
আশ্রমে চ সদা মহ্যং সাংনিধ্যং পরমস্তু তে
14.190
এবমুক্তঃ স মাং প্রাহ ভগবাঁল্লোকপূজিতঃ
মহেশ্বরো মহাতেজাশ্চরাচরগুরুঃ প্রভুঃ
14.191
অজরশ্চামরশ্চৈব ভব দুঃখবিবর্জিতঃ
শীলবান্গুণসংপন্নঃ সর্বজ্ঞঃ প্রিয়দর্শনঃ
14.192
অক্ষয়ং যৌবনং তেঽস্তু তেজশ্চৈবানলোপমম্
ক্ষীরোদঃ সাগরশ্চৈব যত্র যত্রেচ্ছসে মুনে
14.193
তত্র তে ভবিতা কামং সাংনিধ্যং পয়সো নিধেঃ
ক্ষীরোদনং চ ভুঙ্ক্ষ্ব ত্বমমৃতেন সমন্বিতম্
14.194
বন্ধুভিঃ সহিতঃ কল্পং ততো মামুপয়াস্যসি
সাংনিধ্যমাশ্রমে নিত্যং করিষ্যামি দ্বিজোত্তম
14.195
তিষ্ঠ বত্স যথাকামং নোত্কণ্ঠাং কর্তুমর্হসি
স্মৃতঃ স্মৃতশ্চ তে বিপ্র সদা দাস্যামি দর্শনম্
14.196
এবমুক্ত্বা স ভগবান্সূর্যকোটিসমপ্রভঃ
মমেশানো বরং দত্ত্বা তত্রৈবান্তরধীয়ত
14.197
এবং দৃষ্টো ময়া কৃষ্ণ দেবদেবঃ সমাধিনা
তদবাপ্তং চ মে সর্বং যদুক্তং তেন ধীমতা
14.198
প্রত্যক্ষং চৈব তে কৃষ্ণ পশ্য সিদ্ধান্ব্যবস্থিতান্
ঋষীন্বিদ্যাধরান্যক্ষান্গন্ধর্বাপ্সরসস্তথা
14.199
পশ্য বৃক্ষান্মনোরম্যান্সদা পুষ্পফলান্বিতান্
সর্বর্তুকুসুমৈর্যুক্তান্স্নিগ্ধপত্রান্সুশাখিনঃ
সর্বমেতন্মহাবাহো দিব্যভাবসমন্বিতম্