Utshovঅধ্যায় 153
153.1
বৈশংপায়ন উবাচ
ততঃ কুন্তীসুতো রাজা পৌরজানপদং জনম্
পূজয়িত্বা যথান্যায়মনুজজ্ঞে গৃহান্প্রতি
153.2
সান্ত্বয়ামাস নারীশ্চ হতবীরা হতেশ্বরাঃ
বিপুলৈরর্থদানৈশ্চ তদা পাণ্ডুসুতো নৃপঃ
153.3
সোঽভিষিক্তো মহাপ্রাজ্ঞঃ প্রাপ্য রাজ্যং যুধিষ্ঠিরঃ
অবস্থাপ্য নরশ্রেষ্ঠঃ সর্বাঃ স্বপ্রকৃতীস্তদা
153.4
দ্বিজেভ্যো বলমুখ্যেভ্যো নৈগমেভ্যশ্চ সর্বশঃ
প্রতিগৃহ্যাশিষো মুখ্যাস্তদা ধর্মভৃতাং বরঃ
153.5
উষিত্বা শর্বরীঃ শ্রীমান্পঞ্চাশন্নগরোত্তমে
সময়ং কৌরবাগ্র্যস্য সস্মার পুরুষর্ষভঃ
153.6
স নির্যয়ৌ গজপুরাদ্যাজকৈঃ পরিবারিতঃ
দৃষ্ট্বা নিবৃত্তমাদিত্যং প্রবৃত্তং চোত্তরায়ণম্
153.7
ঘৃতং মাল্যং চ গন্ধাংশ্চ ক্ষৌমাণি চ যুধিষ্ঠিরঃ
চন্দনাগরুমুখ্যানি তথা কালাগরূণি চ
153.8
প্রস্থাপ্য পূর্বং কৌন্তেয়ো ভীষ্মসংসাধনায় বৈ
মাল্যানি চ মহার্হাণি রত্নানি বিবিধানি চ
153.9
ধৃতরাষ্ট্রং পুরস্কৃত্য গান্ধারীং চ যশস্বিনীম্
মাতরং চ পৃথাং ধীমান্ভ্রাতৄংশ্চ পুরুষর্ষভঃ
153.10
জনার্দনেনানুগতো বিদুরেণ চ ধীমতা
যুয়ুত্সুনা চ কৌরব্যো যুয়ুধানেন চাভিভো
153.11
মহতা রাজভোগ্যেন পরিবর্হেণ সংবৃতঃ
স্তূয়মানো মহারাজ ভীষ্মস্যাগ্নীননুব্রজন্
153.12
নিশ্চক্রাম পুরাত্তস্মাদ্যথা দেবপতিস্তথা
আসসাদ কুরুক্ষেত্রে ততঃ শাংতনবং নৃপম্
153.13
উপাস্যমানং ব্যাসেন পারাশর্যেণ ধীমতা
নারদেন চ রাজর্ষে দেবলেনাসিতেন চ
153.14
হতশিষ্টৈর্নৃপৈশ্চান্যৈর্নানাদেশসমাগতৈঃ
রক্ষিভিশ্চ মহাত্মানং রক্ষ্যমাণং সমন্ততঃ
153.15
শয়ানং বীরশয়নে দদর্শ নৃপতিস্ততঃ
ততো রথাদবারোহদ্ভ্রাতৃভিঃ সহ ধর্মরাট্
153.16
অভিবাদ্যাথ কৌন্তেয়ঃ পিতামহমরিংদমম্
দ্বৈপায়নাদীন্বিপ্রাংশ্চ তৈশ্চ প্রত্যভিনন্দিতঃ
153.17
ঋত্বিগ্ভির্ব্রহ্মকল্পৈশ্চ ভ্রাতৃভিশ্চ সহাচ্যুতঃ
আসাদ্য শরতল্পস্থমৃষিভিঃ পরিবারিতম্
153.18
অব্রবীদ্ভরতশ্রেষ্ঠং ধর্মরাজো যুধিষ্ঠিরঃ
ভ্রাতৃভিঃ সহ কৌরব্য শয়ানং নিম্নগাসুতম্
153.19
যুধিষ্ঠিরোঽহং নৃপতে নমস্তে জাহ্নবীসুত
শৃণোষি চেন্মহাবাহো ব্রূহি কিং করবাণি তে
153.20
প্রাপ্তোঽস্মি সময়ে রাজন্নগ্নীনাদায় তে বিভো
আচার্যা ব্রাহ্মণাশ্চৈব ঋত্বিজো ভ্রাতরশ্চ মে
153.21
পুত্রশ্চ তে মহাতেজা ধৃতরাষ্ট্রো জনেশ্বরঃ
উপস্থিতঃ সহামাত্যো বাসুদেবশ্চ বীর্যবান্
153.22
হতশিষ্টাশ্চ রাজানঃ সর্বে চ কুরুজাঙ্গলাঃ
তান্পশ্য কুরুশার্দূল সমুন্মীলয় লোচনে
153.23
যচ্চেহ কিংচিত্কর্তব্যং তত্সর্বং প্রাপিতং ময়া
যথোক্তং ভবতা কালে সর্বমেব চ তত্কৃতম্
153.24
এবমুক্তস্তু গাঙ্গেয়ঃ কুন্তীপুত্রেণ ধীমতা
দদর্শ ভারতান্সর্বান্স্থিতান্সংপরিবার্য তম্
153.25
ততশ্চলবলির্ভীষ্মঃ প্রগৃহ্য বিপুলং ভুজম্
ওঘমেঘস্বনো বাগ্মী কালে বচনমব্রবীৎ
153.26
দিষ্ট্যা প্রাপ্তোঽসি কৌন্তেয় সহামাত্যো যুধিষ্ঠির
পরিবৃত্তো হি ভগবান্সহস্রাংশুর্দিবাকরঃ
153.27
অষ্টপঞ্চাশতং রাত্র্যঃ শয়ানস্যাদ্য মে গতাঃ
শরেষু নিশিতাগ্রেষু যথা বর্ষশতং তথা
153.28
মাঘোঽয়ং সমনুপ্রাপ্তো মাসঃ পুণ্যো যুধিষ্ঠির
ত্রিভাগশেষঃ পক্ষোঽয়ং শুক্লো ভবিতুমর্হতি
153.29
এবমুক্ত্বা তু গাঙ্গেয়ো ধর্মপুত্রং যুধিষ্ঠিরম্
ধৃতরাষ্ট্রমথামন্ত্র্য কালে বচনমব্রবীৎ
153.30
রাজন্বিদিতধর্মোঽসি সুনির্ণীতার্থসংশয়ঃ
বহুশ্রুতা হি তে বিপ্রা বহবঃ পর্যুপাসিতাঃ
153.31
বেদশাস্ত্রাণি সর্বাণি ধর্মাংশ্চ মনুজেশ্বর
বেদাংশ্চ চতুরঃ সাঙ্গান্নিখিলেনাববুধ্যসে
153.32
ন শোচিতব্যং কৌরব্য ভবিতব্যং হি তত্তথা
শ্রুতং দেবরহস্যং তে কৃষ্ণদ্বৈপায়নাদপি
153.33
যথা পাণ্ডোঃ সুতা রাজংস্তথৈব তব ধর্মতঃ
তান্পালয় স্থিতো ধর্মে গুরুশুশ্রূষণে রতান্
153.34
ধর্মরাজো হি শুদ্ধাত্মা নিদেশে স্থাস্যতে তব
আনৃশংস্যপরং হ্যেনং জানামি গুরুবত্সলম্
153.35
তব পুত্রা দুরাত্মানঃ ক্রোধলোভপরায়ণাঃ
ঈর্ষ্যাভিভূতা দুর্বৃত্তাস্তান্ন শোচিতুমর্হসি
153.36
বৈশংপায়ন উবাচ
এতাবদুক্ত্বা বচনং ধৃতরাষ্ট্রং মনীষিণম্
বাসুদেবং মহাবাহুমভ্যভাষত কৌরবঃ
153.37
ভগবন্দেবদেবেশ সুরাসুরনমস্কৃত
ত্রিবিক্রম নমস্তেঽস্তু শঙ্খচক্রগদাধর
153.38
অনুজানীহি মাং কৃষ্ণ বৈকুণ্ঠ পুরুষোত্তম
রক্ষ্যাশ্চ তে পাণ্ডবেয়া ভবান্হ্যেষাং পরায়ণম্
153.39
উক্তবানস্মি দুর্বুদ্ধিং মন্দং দুর্যোধনং পুরা
যতঃ কৃষ্ণস্ততো ধর্মো যতো ধর্মস্ততো জয়ঃ
153.40
বাসুদেবেন তীর্থেন পুত্র সংশাম্য পাণ্ডবৈঃ
সংধানস্য পরঃ কালস্তবেতি চ পুনঃ পুনঃ
153.41
ন চ মে তদ্বচো মূঢঃ কৃতবান্স সুমন্দধীঃ
ঘাতয়িত্বেহ পৃথিবীং ততঃ স নিধনং গতঃ
153.42
ত্বাং চ জানাম্যহং বীর পুরাণমৃষিসত্তমম্
নরেণ সহিতং দেবং বদর্যাং সুচিরোষিতম্
153.43
তথা মে নারদঃ প্রাহ ব্যাসশ্চ সুমহাতপাঃ
নরনারায়ণাবেতৌ সংভূতৌ মনুজেষ্বিতি
153.44
বাসুদেব উবাচ
অনুজানামি ভীষ্ম ত্বাং বসূনাপ্নুহি পার্থিব
ন তেঽস্তি বৃজিনং কিংচিন্ময়া দৃষ্টং মহাদ্যুতে
153.45
পিতৃভক্তোঽসি রাজর্ষে মার্কণ্ডেয় ইবাপরঃ
তেন মৃত্যুস্তব বশে স্থিতো ভৃত্য ইবানতঃ
153.46
বৈশংপায়ন উবাচ
এবমুক্তস্তু গাঙ্গেয়ঃ পাণ্ডবানিদমব্রবীৎ
ধৃতরাষ্ট্রমুখাংশ্চাপি সর্বান্সসুহৃদস্তথা
153.47
প্রাণানুত্স্রষ্টুমিচ্ছামি তন্মানুজ্ঞাতুমর্হথ
সত্যে প্রয়তিতব্যং বঃ সত্যং হি পরমং বলম্
153.48
আনৃশংস্যপরৈর্ভাব্যং সদৈব নিয়তাত্মভিঃ
ব্রহ্মণ্যৈর্ধর্মশীলৈশ্চ তপোনীত্যৈশ্চ ভারত
153.49
ইত্যুক্ত্বা সুহৃদঃ সর্বান্সংপরিষ্বজ্য চৈব হ
পুনরেবাব্রবীদ্ধীমান্যুধিষ্ঠিরমিদং বচঃ
153.50
ব্রাহ্মণাশ্চৈব তে নিত্যং প্রাজ্ঞাশ্চৈব বিশেষতঃ
আচার্যা ঋত্বিজশ্চৈব পূজনীয়া নরাধিপ