অধ্যায় 152

152.1

বৈশংপায়ন উবাচ
তূষ্ণীংভূতে তদা ভীষ্মে পটে চিত্রমিবার্পিতম্
মুহূর্তমিব চ ধ্যাত্বা ব্যাসঃ সত্যবতীসুতঃ
নৃপং শয়ানং গাঙ্গেয়মিদমাহ বচস্তদা

রাজন্প্রকৃতিমাপন্নঃ কুরুরাজো যুধিষ্ঠিরঃ
সহিতো ভ্রাতৃভিঃ সর্বৈঃ পার্থিবৈশ্চানুয়ায়িভিঃ

উপাস্তে ত্বাং নরব্যাঘ্র সহ কৃষ্ণেন ধীমতা
তমিমং পুরয়ানায় ত্বমনুজ্ঞাতুমর্হসি

এবমুক্তো ভগবতা ব্যাসেন পৃথিবীপতিঃ
যুধিষ্ঠিরং সহামাত্যমনুজজ্ঞে নদীসুতঃ

উবাচ চৈনং মধুরং ততঃ শাংতনবো নৃপঃ
প্রবিশস্ব পুরং রাজন্ব্যেতু তে মানসো জ্বরঃ

যজস্ব বিবিধৈর্যজ্ঞৈর্বহ্বন্নৈঃ স্বাপ্তদক্ষিণৈঃ
যয়াতিরিব রাজেন্দ্র শ্রদ্ধাদমপুরঃসরঃ

ক্ষত্রধর্মরতঃ পার্থ পিতৄন্দেবাংশ্চ তর্পয়
শ্রেয়সা যোক্ষ্যসে চৈব ব্যেতু তে মানসো জ্বরঃ

রঞ্জয়স্ব প্রজাঃ সর্বাঃ প্রকৃতীঃ পরিসান্ত্বয়
সুহৃদঃ ফলসত্কারৈরভ্যর্চয় যথার্হতঃ

অনু ত্বাং তাত জীবন্তু মিত্রাণি সুহৃদস্তথা
চৈত্যস্থানে স্থিতং বৃক্ষং ফলবন্তমিব দ্বিজাঃ

আগন্তব্যং চ ভবতা সময়ে মম পার্থিব
বিনিবৃত্তে দিনকরে প্রবৃত্তে চোত্তরায়ণে

তথেত্যুক্ত্বা তু কৌন্তেয়ঃ সোঽভিবাদ্য পিতামহম্
প্রয়য়ৌ সপরীবারো নগরং নাগসাহ্বয়ম্

ধৃতরাষ্ট্রং পুরস্কৃত্য গান্ধারীং চ পতিব্রতাম্
সহ তৈরৃষিভিঃ সর্বৈর্ভ্রাতৃভিঃ কেশবেন চ

পৌরজানপদৈশ্চৈব মন্ত্রিবৃদ্ধৈশ্চ পার্থিবঃ
প্রবিবেশ কুরুশ্রেষ্ঠ পুরং বারণসাহ্বয়ম্