Utshovঅধ্যায় 151
151.1
যুধিষ্ঠির উবাচ
কিং শ্রেয়ঃ পুরুষস্যেহ কিং কুর্বন্সুখমেধতে
বিপাপ্মা চ ভবেত্কেন কিং বা কল্মষনাশনম্
151.2
ভীষ্ম উবাচ
অয়ং দৈবতবংশো বৈ ঋষিবংশসমন্বিতঃ
দ্বিসংধ্যং পঠিতঃ পুত্র কল্মষাপহরঃ পরঃ
151.3
দেবাসুরগুরুর্দেবঃ সর্বভূতনমস্কৃতঃ
অচিন্ত্যোঽথাপ্যনির্দেশ্যঃ সর্বপ্রাণো হ্যয়োনিজঃ
151.4
পিতামহো জগন্নাথঃ সাবিত্রী ব্রহ্মণঃ সতী
বেদভূরথ কর্তা চ বিষ্ণুর্নারায়ণঃ প্রভুঃ
151.5
উমাপতির্বিরূপাক্ষঃ স্কন্দঃ সেনাপতিস্তথা
বিশাখো হুতভুগ্বায়ুশ্চন্দ্রাদিত্যৌ প্রভাকরৌ
151.6
শক্রঃ শচীপতির্দেবো যমো ধূমোর্ণয়া সহ
বরুণঃ সহ গৌর্যা চ সহ ঋদ্ধ্যা ধনেশ্বরঃ
151.7
সৌম্যা গৌঃ সুরভির্দেবী বিশ্রবাশ্চ মহানৃষিঃ
ষট্কালঃ সাগরো গঙ্গা স্রবন্ত্যোঽথ মরুদ্গণাঃ
151.8
বালখিল্যাস্তপঃসিদ্ধাঃ কৃষ্ণদ্বৈপায়নস্তথা
নারদঃ পর্বতশ্চৈব বিশ্বাবসুর্হহাহুহূঃ
151.9
তুম্বরুশ্চিত্রসেনশ্চ দেবদূতশ্চ বিশ্রুতঃ
দেবকন্যা মহাভাগা দিব্যাশ্চাপ্সরসাং গণাঃ
151.10
উর্বশী মেনকা রম্ভা মিশ্রকেশী অলম্বুষা
বিশ্বাচী চ ঘৃতাচী চ পঞ্চচূডা তিলোত্তমা
151.11
আদিত্যা বসবো রুদ্রাঃ সাশ্বিনঃ পিতরোঽপি চ
ধর্মঃ সত্যং তপো দীক্ষা ব্যবসায়ঃ পিতামহঃ
151.12
শর্বর্যো দিবসাশ্চৈব মারীচঃ কশ্যপস্তথা
শুক্রো বৃহস্পতির্ভৌমো বুধো রাহুঃ শনৈশ্চরঃ
151.13
নক্ষত্রাণ্যৃতবশ্চৈব মাসাঃ সংধ্যাঃ সবত্সরাঃ
বৈনতেয়াঃ সমুদ্রাশ্চ কদ্রুজাঃ পন্নগাস্তথা
151.14
শতদ্রূশ্চ বিপাশা চ চন্দ্রভাগা সরস্বতী
সিন্ধুশ্চ দেবিকা চৈব পুষ্করং তীর্থমেব চ
151.15
গঙ্গা মহানদী চৈব কপিলা নর্মদা তথা
কম্পুনা চ বিশল্যা চ করতোয়াম্বুবাহিনী
151.16
সরয়ূর্গণ্ডকী চৈব লোহিত্যশ্চ মহানদঃ
তাম্রারুণা বেত্রবতী পর্ণাশা গৌতমী তথা
151.17
গোদাবরী চ বেণ্ণা চ কৃষ্ণবেণা তথাদ্রিজা
দৃষদ্বতী চ কাবেরী বংক্ষুর্মন্দাকিনী তথা
151.18
প্রয়াগং চ প্রভাসং চ পুণ্যং নৈমিষমেব চ
তচ্চ বিশ্বেশ্বরস্থানং যত্র তদ্বিমলং সরঃ
151.19
পুণ্যতীর্থৈশ্চ কলিলং কুরুক্ষেত্রং প্রকীর্তিতম্
সিন্ধূত্তমং তপোদানং জম্বূমার্গমথাপি চ
151.20
হিরণ্বতী বিতস্তা চ তথৈবেক্ষুমতী নদী
বেদস্মৃতির্বৈদসিনী মলবাসাশ্চ নদ্যপি
151.21
ভূমিভাগাস্তথা পুণ্যা গঙ্গাদ্বারমথাপি চ
ঋষিকুল্যাস্তথা মেধ্যা নদী চিত্রপথা তথা
151.22
কৌশিকী যমুনা সীতা তথা চর্মণ্বতী নদী
নদী ভীমরথী চৈব বাহুদা চ মহানদী
মহেন্দ্রবাণী ত্রিদিবা নীলিকা চ সরস্বতী
151.23
নন্দা চাপরনন্দা চ তথা তীর্থং মহাহ্রদম্
গয়াথ ফল্গুতীর্থং চ ধর্মারণ্যং সুরৈর্বৃতম্
151.24
তথা দেবনদী পুণ্যা সরশ্চ ব্রহ্মনির্মিতম্
পুণ্যং ত্রিলোকবিখ্যাতং সর্বপাপহরং শিবম্
151.25
হিমবান্পর্বতশ্চৈব দিব্যৌষধিসমন্বিতঃ
বিন্ধ্যো ধাতুবিচিত্রাঙ্গস্তীর্থবানৌষধান্বিতঃ
151.26
মেরুর্মহেন্দ্রো মলয়ঃ শ্বেতশ্চ রজতাচিতঃ
শৃঙ্গবান্মন্দরো নীলো নিষধো দর্দুরস্তথা
151.27
চিত্রকূটোঽঞ্জনাভশ্চ পর্বতো গন্ধমাদনঃ
পুণ্যঃ সোমগিরিশ্চৈব তথৈবান্যে মহীধরাঃ
দিশশ্চ বিদিশশ্চৈব ক্ষিতিঃ সর্বে মহীরুহাঃ
151.28
বিশ্বেদেবা নভশ্চৈব নক্ষত্রাণি গ্রহাস্তথা
পান্তু বঃ সততং দেবাঃ কীর্তিতাকীর্তিতা ময়া
151.29
কীর্তয়ানো নরো হ্যেতান্মুচ্যতে সর্বকিল্বিষৈঃ
স্তুবংশ্চ প্রতিনন্দংশ্চ মুচ্যতে সর্বতো ভয়াৎ
সর্বসংকরপাপেভ্যো দেবতাস্তবনন্দকঃ
151.30
দেবতানন্তরং বিপ্রাংস্তপঃসিদ্ধাংস্তপোধিকান্
কীর্তিতান্কীর্তয়িষ্যামি সর্বপাপপ্রমোচনান্
151.31
যবক্রীতোঽথ রৈভ্যশ্চ কক্ষীবানৌশিজস্তথা
ভৃগ্বঙ্গিরাস্তথা কণ্বো মেধাতিথিরথ প্রভুঃ
বর্হী চ গুণসংপন্নঃ প্রাচীং দিশমুপাশ্রিতাঃ
151.32
ভদ্রাং দিশং মহাভাগা উল্মুচুঃ প্রমুচুস্তথা
মুমুচুশ্চ মহাভাগঃ স্বস্ত্যাত্রেয়শ্চ বীর্যবান্
151.33
মিত্রাবরুণয়োঃ পুত্রস্তথাগস্ত্যঃ প্রতাপবান্
দৃঢায়ুশ্চোর্ধ্ববাহুশ্চ বিশ্রুতাবৃষিসত্তমৌ
151.34
পশ্চিমাং দিশমাশ্রিত্য য এধন্তে নিবোধ তান্
উষদ্গুঃ সহ সোদর্যৈঃ পরিব্যাধশ্চ বীর্যবান্
151.35
ঋষির্দীর্ঘতমাশ্চৈব গৌতমঃ কশ্যপস্তথা
একতশ্চ দ্বিতশ্চৈব ত্রিতশ্চৈব মহর্ষয়ঃ
অত্রেঃ পুত্রশ্চ ধর্মাত্মা তথা সারস্বতঃ প্রভুঃ
151.36
উত্তরাং দিশমাশ্রিত্য য এধন্তে নিবোধ তান্
অত্রির্বসিষ্ঠঃ শক্তিশ্চ পারাশর্যশ্চ বীর্যবান্
151.37
বিশ্বামিত্রো ভরদ্বাজো জমদগ্নিস্তথৈব চ
ঋচীকপৌত্রো রামশ্চ ঋষিরৌদ্দালকিস্তথা
151.38
শ্বেতকেতুঃ কোহলশ্চ বিপুলো দেবলস্তথা
দেবশর্মা চ ধৌম্যশ্চ হস্তিকাশ্যপ এব চ
151.39
লোমশো নাচিকেতশ্চ লোমহর্ষণ এব চ
ঋষিরুগ্রশ্রবাশ্চৈব ভার্গবশ্চ্যবনস্তথা
151.40
এষ বৈ সমবায়স্তে ঋষিদেবসমন্বিতঃ
আদ্যঃ প্রকীর্তিতো রাজন্সর্বপাপপ্রমোচনঃ
151.41
নৃগো যয়াতির্নহুষো যদুঃ পূরুশ্চ বীর্যবান্
ধুন্ধুমারো দিলীপশ্চ সগরশ্চ প্রতাপবান্
151.42
কৃশাশ্বো যৌবনাশ্বশ্চ চিত্রাশ্বঃ সত্যবাংস্তথা
দুঃষন্তো ভরতশ্চৈব চক্রবর্তী মহায়শাঃ
151.43
যবনো জনকশ্চৈব তথা দৃঢরথো নৃপঃ
রঘুর্নরবরশ্চৈব তথা দশরথো নৃপঃ
151.44
রামো রাক্ষসহা বীরঃ শশবিন্দুর্ভগীরথঃ
হরিশ্চন্দ্রো মরুত্তশ্চ জহ্নুর্জাহ্নবিসেবিতা
151.45
মহোদয়ো হ্যলর্কশ্চ ঐলশ্চৈব নরাধিপঃ
করংধমো নরশ্রেষ্ঠঃ কধ্মোরশ্চ নরাধিপঃ
151.46
দক্ষোঽম্বরীষঃ কুকুরো রবতশ্চ মহায়শাঃ
মুচুকুন্দশ্চ রাজর্ষির্মিত্রভানুঃ প্রিয়ংকরঃ
151.47
ত্রসদস্যুস্তথা রাজা শ্বেতো রাজর্ষিসত্তমঃ
মহাভিষশ্চ বিখ্যাতো নিমিরাজস্তথাষ্টকঃ
151.48
আয়ুঃ ক্ষুপশ্চ রাজর্ষিঃ কক্ষেয়ুশ্চ নরাধিপঃ
শিবিরৌশীনরশ্চৈব গয়শ্চৈব নরাধিপঃ
151.49
প্রতর্দনো দিবোদাসঃ সৌদাসঃ কোসলেশ্বরঃ
ঐলো নলশ্চ রাজর্ষির্মনুশ্চৈব প্রজাপতিঃ
151.50
হবিধ্রশ্চ পৃষধ্রশ্চ প্রতীপঃ শংতনুস্তথা
কক্ষসেনশ্চ রাজর্ষির্যে চান্যে নানুকীর্তিতাঃ
151.51
মা বিঘ্নং মা চ মে পাপং মা চ মে পরিপন্থিনঃ
ধ্রুবো জয়ো মে নিত্যং স্যাত্পরত্র চ পরা গতিঃ