UtshovChapter 152
152.1
वैशंपायन उवाच
तूष्णींभूते तदा भीष्मे पटे चित्रमिवार्पितम्
मुहूर्तमिव च ध्यात्वा व्यासः सत्यवतीसुतः
नृपं शयानं गाङ्गेयमिदमाह वचस्तदा
Vaishampayana uvacha
Tushnimbhute tada bhishme pate chitramivarpitam
Muhurtamiva cha dhyatva vyasah satyavatisutah
Nripam shayanam gangeyamidamaha vachastada
152.2
राजन्प्रकृतिमापन्नः कुरुराजो युधिष्ठिरः
सहितो भ्रातृभिः सर्वैः पार्थिवैश्चानुयायिभिः
Rajanprakritimapannah kururajo yudhishthirah
Sahito bhratribhih sarvaih parthivaishchanuyayibhih
152.3
उपास्ते त्वां नरव्याघ्र सह कृष्णेन धीमता
तमिमं पुरयानाय त्वमनुज्ञातुमर्हसि
Upaste tvam naravyaghra saha krishnena dhimata
Tamimam purayanaya tvamanugyatumarhasi
152.4
एवमुक्तो भगवता व्यासेन पृथिवीपतिः
युधिष्ठिरं सहामात्यमनुजज्ञे नदीसुतः
Evamukto bhagavata vyasena prithivipatih
Yudhishthiram sahamatyamanujagye nadisutah
152.5
उवाच चैनं मधुरं ततः शांतनवो नृपः
प्रविशस्व पुरं राजन्व्येतु ते मानसो ज्वरः
Uvacha chainam madhuram tatah shantanavo nripah
Pravishasva puram rajanvyetu te manaso jvarah
152.6
यजस्व विविधैर्यज्ञैर्बह्वन्नैः स्वाप्तदक्षिणैः
ययातिरिव राजेन्द्र श्रद्धादमपुरःसरः
Yajasva vividhairyagyairbahvannaih svaptadakshinaih
Yayatiriva rajendra shraddhadamapurahsarah
152.7
क्षत्रधर्मरतः पार्थ पितॄन्देवांश्च तर्पय
श्रेयसा योक्ष्यसे चैव व्येतु ते मानसो ज्वरः
Kshatradharmaratah partha pitrindevanshcha tarpaya
Shreyasa yokshyase chaiva vyetu te manaso jvarah
152.8
रञ्जयस्व प्रजाः सर्वाः प्रकृतीः परिसान्त्वय
सुहृदः फलसत्कारैरभ्यर्चय यथार्हतः
Ranjayasva prajah sarvah prakritih parisantvaya
Suhridah phalasatkarairabhyarchaya yatharhatah
152.9
अनु त्वां तात जीवन्तु मित्राणि सुहृदस्तथा
चैत्यस्थाने स्थितं वृक्षं फलवन्तमिव द्विजाः
Anu tvam tata jivantu mitrani suhridastatha
Chaityasthane sthitam vriksham phalavantamiva dvijah
152.10
आगन्तव्यं च भवता समये मम पार्थिव
विनिवृत्ते दिनकरे प्रवृत्ते चोत्तरायणे
Agantavyam cha bhavata samaye mama parthiva
Vinivritte dinakare pravritte chottarayane
152.11
तथेत्युक्त्वा तु कौन्तेयः सोऽभिवाद्य पितामहम्
प्रययौ सपरीवारो नगरं नागसाह्वयम्
Tathetyuktva tu kaunteyah sobhivadya pitamaham
Prayayau saparivaro nagaram nagasahvayam
152.12
धृतराष्ट्रं पुरस्कृत्य गान्धारीं च पतिव्रताम्
सह तैरृषिभिः सर्वैर्भ्रातृभिः केशवेन च
Dhritarashtram puraskritya gandharim cha pativratam
Saha tairrishibhih sarvairbhratribhih keshavena cha
152.13
पौरजानपदैश्चैव मन्त्रिवृद्धैश्च पार्थिवः
प्रविवेश कुरुश्रेष्ठ पुरं वारणसाह्वयम्
Paurajanapadaishchaiva mantrivriddhaishcha parthivah
Pravivesha kurushreshtha puram varanasahvayam