Utshovঅধ্যায় 154
154.1
বৈশংপায়ন উবাচ
এবমুক্ত্বা কুরূন্সর্বান্ভীষ্মঃ শাংতনবস্তদা
তূষ্ণীং বভূব কৌরব্যঃ স মুহূর্তমরিংদম
154.2
ধারয়ামাস চাত্মানং ধারণাসু যথাক্রমম্
তস্যোর্ধ্বমগমন্প্রাণাঃ সংনিরুদ্ধা মহাত্মনঃ
154.3
ইদমাশ্চর্যমাসীচ্চ মধ্যে তেষাং মহাত্মনাম্
যদ্যন্মুঞ্চতি গাত্রাণাং স শংতনুসুতস্তদা
তত্তদ্বিশল্যং ভবতি যোগয়ুক্তস্য তস্য বৈ
154.4
ক্ষণেন প্রেক্ষতাং তেষাং বিশল্যঃ সোঽভবত্তদা
তং দৃষ্ট্বা বিস্মিতাঃ সর্বে বাসুদেবপুরোগমাঃ
সহ তৈর্মুনিভিঃ সর্বৈস্তদা ব্যাসাদিভির্নৃপ
154.5
সংনিরুদ্ধস্তু তেনাত্মা সর্বেষ্বায়তনেষু বৈ
জগাম ভিত্ত্বা মূর্ধানং দিবমভ্যুত্পপাত চ
154.6
মহোল্কেব চ ভীষ্মস্য মূর্ধদেশাজ্জনাধিপ
নিঃসৃত্যাকাশমাবিশ্য ক্ষণেনান্তরধীয়ত
154.7
এবং স নৃপশার্দূল নৃপঃ শাংতনবস্তদা
সময়ুজ্যত লোকৈঃ স্বৈর্ভরতানাং কুলোদ্বহঃ
154.8
ততস্ত্বাদায় দারূণি গন্ধাংশ্চ বিবিধান্বহূন্
চিতাং চক্রুর্মহাত্মানঃ পাণ্ডবা বিদুরস্তথা
যুয়ুত্সুশ্চাপি কৌরব্যঃ প্রেক্ষকাস্ত্বিতরেঽভবন্
154.9
যুধিষ্ঠিরস্তু গাঙ্গেয়ং বিদুরশ্চ মহামতিঃ
ছাদয়ামাসতুরুভৌ ক্ষৌমৈর্মাল্যৈশ্চ কৌরবম্
154.10
ধারয়ামাস তস্যাথ যুয়ুত্সুশ্ছত্রমুত্তমম্
চামরব্যজনে শুভ্রে ভীমসেনার্জুনাবুভৌ
উষ্ণীষে পর্যগৃহ্ণীতাং মাদ্রীপুত্রাবুভৌ তদা
154.11
স্ত্রিয়ঃ কৌরবনাথস্য ভীষ্মং কুরুকুলোদ্ভবম্
তালবৃন্তান্যুপাদায় পর্যবীজন্সমন্ততঃ
154.12
ততোঽস্য বিধিবচ্চক্রুঃ পিতৃমেধং মহাত্মনঃ
যাজকা জুহুবুশ্চাগ্নিং জগুঃ সামানি সামগাঃ
154.13
ততশ্চন্দনকাষ্ঠৈশ্চ তথা কালেয়কৈরপি
কালাগরুপ্রভৃতিভির্গন্ধৈশ্চোচ্চাবচৈস্তথা
154.14
সমবচ্ছাদ্য গাঙ্গেয়ং প্রজ্বাল্য চ হুতাশনম্
অপসব্যমকুর্বন্ত ধৃতরাষ্ট্রমুখা নৃপাঃ
154.15
সংস্কৃত্য চ কুরুশ্রেষ্ঠং গাঙ্গেয়ং কুরুসত্তমাঃ
জগ্মুর্ভাগীরথীতীরমৃষিজুষ্টং কুরূদ্বহাঃ
154.16
অনুগম্যমানা ব্যাসেন নারদেনাসিতেন চ
কৃষ্ণেন ভরতস্ত্রীভির্যে চ পৌরাঃ সমাগতাঃ
154.17
উদকং চক্রিরে চৈব গাঙ্গেয়স্য মহাত্মনঃ
বিধিবত্ক্ষত্রিয়শ্রেষ্ঠাঃ স চ সর্বো জনস্তদা
154.18
ততো ভাগীরথী দেবী তনয়স্যোদকে কৃতে
উত্থায় সলিলাত্তস্মাদ্রুদতী শোকলালসা
154.19
পরিদেবয়তী তত্র কৌরবানভ্যভাষত
নিবোধত যথাবৃত্তমুচ্যমানং ময়ানঘাঃ
154.20
রাজবৃত্তেন সংপন্নঃ প্রজ্ঞয়াভিজনেন চ
সত্কর্তা কুরুবৃদ্ধানাং পিতৃভক্তো দৃঢব্রতঃ
154.21
জামদগ্ন্যেন রামেণ পুরা যো ন পরাজিতঃ
দিব্যৈরস্ত্রৈর্মহাবীর্যঃ স হতোঽদ্য শিখণ্ডিনা
154.22
অশ্মসারময়ং নূনং হৃদয়ং মম পার্থিবাঃ
অপশ্যন্ত্যাঃ প্রিয়ং পুত্রং যত্র দীর্যতি মেঽদ্য বৈ
154.23
সমেতং পার্থিবং ক্ষত্রং কাশিপুর্যাং স্বয়ংবরে
বিজিত্যৈকরথেনাজৌ কন্যাস্তা যো জহার হ
154.24
যস্য নাস্তি বলে তুল্যঃ পৃথিব্যামপি কশ্চন
হতং শিখণ্ডিনা শ্রুত্বা যন্ন দীর্যতি মে মনঃ
154.25
জামদগ্ন্যঃ কুরুক্ষেত্রে যুধি যেন মহাত্মনা
পীডিতো নাতিয়ত্নেন নিহতঃ স শিখণ্ডিনা
154.26
এবংবিধং বহু তদা বিলপন্তীং মহানদীম্
আশ্বাসয়ামাস তদা সাম্না দামোদরো বিভুঃ
154.27
সমাশ্বসিহি ভদ্রে ত্বং মা শুচঃ শুভদর্শনে
গতঃ স পরমাং সিদ্ধিং তব পুত্রো ন সংশয়ঃ
154.28
বসুরেষ মহাতেজাঃ শাপদোষেণ শোভনে
মনুষ্যতামনুপ্রাপ্তো নৈনং শোচিতুমর্হসি
154.29
স এষ ক্ষত্রধর্মেণ যুধ্যমানো রণাজিরে
ধনংজয়েন নিহতো নৈষ নুন্নঃ শিখণ্ডিনা
154.30
ভীষ্মং হি কুরুশার্দূলমুদ্যতেষুং মহারণে
ন শক্তঃ সংয়ুগে হন্তুং সাক্ষাদপি শতক্রতুঃ
154.31
স্বচ্ছন্দেন সুতস্তুভ্যং গতঃ স্বর্গং শুভাননে
ন শক্তাঃ স্যুর্নিহন্তুং হি রণে তং সর্বদেবতাঃ
154.32
তস্মান্মা ত্বং সরিচ্ছ্রেষ্ঠে শোচস্ব কুরুনন্দনম্
বসূনেষ গতো দেবি পুত্রস্তে বিজ্বরা ভব
154.33
ইত্যুক্তা সা তু কৃষ্ণেন ব্যাসেন চ সরিদ্বরা
ত্যক্ত্বা শোকং মহারাজ স্বং বার্যবততার হ
154.34
সত্কৃত্য তে তাং সরিতং ততঃ কৃষ্ণমুখা নৃপাঃ
অনুজ্ঞাতাস্তয়া সর্বে ন্যবর্তন্ত জনাধিপাঃ