Utshovঅধ্যায় 9
9.1
যুধিষ্ঠির উবাচ
মুহূর্তং তাবদেকাগ্রো মনঃশ্রোত্রেঽন্তরাত্মনি
ধারয়িত্বাপি তে শ্রুত্বা রোচতাং বচনং মম
9.2
সার্থগম্যমহং মার্গং ন জাতু ত্বত্কৃতে পুনঃ
গচ্ছেয়ং তদ্গমিষ্যামি হিত্বা গ্রাম্যসুখান্যুত
9.3
ক্ষেম্যশ্চৈকাকিনা গম্যঃ পন্থাঃ কোঽস্তীতি পৃচ্ছ মাম্
অথ বা নেচ্ছসি প্রষ্টুমপৃচ্ছন্নপি মে শৃণু
9.4
হিত্বা গ্রাম্যসুখাচারং তপ্যমানো মহত্তপঃ
অরণ্যে ফলমূলাশী চরিষ্যামি মৃগৈঃ সহ
9.5
জুহ্বানোঽগ্নিং যথাকালমুভৌ কালাবুপস্পৃশন্
কৃশঃ পরিমিতাহারশ্চর্মচীরজটাধরঃ
9.6
শীতবাতাতপসহঃ ক্ষুত্পিপাসাশ্রমক্ষমঃ
তপসা বিধিদৃষ্টেন শরীরমুপশোষয়ন্
9.7
মনঃকর্ণসুখা নিত্যং শৃণ্বন্নুচ্চাবচা গিরঃ
মুদিতানামরণ্যেষু বসতাং মৃগপক্ষিণাম্
9.8
আজিঘ্রন্পেশলান্গন্ধান্ফুল্লানাং বৃক্ষবীরুধাম্
নানারূপান্বনে পশ্যন্রমণীয়ান্বনৌকসঃ
9.9
বানপ্রস্থজনস্যাপি দর্শনং কুলবাসিনঃ
নাপ্রিয়াণ্যাচরিষ্যামি কিং পুনর্গ্রামবাসিনাম্
9.10
একান্তশীলী বিমৃশন্পক্বাপক্বেন বর্তয়ন্
পিতৄন্দেবাংশ্চ বন্যেন বাগ্ভিরদ্ভিশ্চ তর্পয়ন্
9.11
এবমারণ্যশাস্ত্রাণামুগ্রমুগ্রতরং বিধিম্
সেবমানঃ প্রতীক্ষিষ্যে দেহস্যাস্য সমাপনম্
9.12
অথ বৈকোঽহমেকাহমেকৈকস্মিন্বনস্পতৌ
চরন্ভৈক্ষ্যং মুনির্মুণ্ডঃ ক্ষপয়িষ্যে কলেবরম্
9.13
পাংসুভিঃ সমবচ্ছন্নঃ শূন্যাগারপ্রতিশ্রয়ঃ
বৃক্ষমূলনিকেতো বা ত্যক্তসর্বপ্রিয়াপ্রিয়ঃ
9.14
ন শোচন্ন প্রহৃষ্যংশ্চ তুল্যনিন্দাত্মসংস্তুতিঃ
নিরাশীর্নির্মমো ভূত্বা নির্দ্বংদ্বো নিষ্পরিগ্রহঃ
9.15
আত্মারামঃ প্রসন্নাত্মা জডান্ধবধিরাকৃতিঃ
অকুর্বাণঃ পরৈঃ কাংচিত্সংবিদং জাতু কেনচিৎ
9.16
জঙ্গমাজঙ্গমান্সর্বান্নবিহিংসংশ্চতুর্বিধান্
প্রজাঃ সর্বাঃ স্বধর্মস্থাঃ সমঃ প্রাণভৃতঃ প্রতি
9.17
ন চাপ্যবহসন্কংচিন্ন কুর্বন্ভ্রুকুটীং ক্বচিৎ
প্রসন্নবদনো নিত্যং সর্বেন্দ্রিয়সুসংয়তঃ
9.18
অপৃচ্ছন্কস্যচিন্মার্গং ব্রজন্যেনৈব কেনচিৎ
ন দেশং ন দিশং কাংচিদ্গন্তুমিচ্ছন্বিশেষতঃ
9.19
গমনে নিরপেক্ষশ্চ পশ্চাদনবলোকয়ন্
ঋজুঃ প্রণিহিতো গচ্ছংস্ত্রসস্থাবরবর্জকঃ
9.20
স্বভাবস্তু প্রয়াত্যগ্রে প্রভবন্ত্যশনান্যপি
দ্বংদ্বানি চ বিরুদ্ধানি তানি সর্বাণ্যচিন্তয়ন্
9.21
অল্পং বাস্বাদু বা ভোজ্যং পূর্বালাভেন জাতু চিৎ
অন্যেষ্বপি চরঁল্লাভমলাভে সপ্ত পূরয়ন্
9.22
বিধূমে ন্যস্তমুসলে ব্যঙ্গারে ভুক্তবজ্জনে
অতীতপাত্রসংচারে কালে বিগতভিক্ষুকে
9.23
এককালং চরন্ভৈক্ষ্যং গৃহে দ্বে চৈব পঞ্চ চ
স্পৃহাপাশান্বিমুচ্যাহং চরিষ্যামি মহীমিমাম্
9.24
ন জিজীবিষুবত্কিংচিন্ন মুমূর্ষুবদাচরন্
জীবিতং মরণং চৈব নাভিনন্দন্ন চ দ্বিষন্
9.25
বাস্যৈকং তক্ষতো বাহুং চন্দনেনৈকমুক্ষতঃ
নাকল্যাণং ন কল্যাণং চিন্তয়ন্নুভয়োস্তয়োঃ
9.26
যাঃ কাশ্চিজ্জীবতা শক্যাঃ কর্তুমভ্যুদয়ক্রিয়াঃ
সর্বাস্তাঃ সমভিত্যজ্য নিমেষাদিব্যবস্থিতঃ
9.27
তেষু নিত্যমসক্তশ্চ ত্যক্তসর্বেন্দ্রিয়ক্রিয়ঃ
সুপরিত্যক্তসংকল্পঃ সুনির্ণিক্তাত্মকল্মষঃ
9.28
বিমুক্তঃ সর্বসঙ্গেভ্যো ব্যতীতঃ সর্ববাগুরাঃ
ন বশে কস্যচিত্তিষ্ঠন্সধর্মা মাতরিশ্বনঃ
9.29
বীতরাগশ্চরন্নেবং তুষ্টিং প্রাপ্স্যামি শাশ্বতীম্
তৃষ্ণয়া হি মহত্পাপমজ্ঞানাদস্মি কারিতঃ
9.30
কুশলাকুশলান্যেকে কৃত্বা কর্মাণি মানবাঃ
কার্যকারণসংশ্লিষ্টং স্বজনং নাম বিভ্রতি
9.31
আয়ুষোঽন্তে প্রহায়েদং ক্ষীণপ্রায়ং কলেবরম্
প্রতিগৃহ্ণাতি তত্পাপং কর্তুঃ কর্মফলং হি তৎ
9.32
এবং সংসারচক্রেঽস্মিন্ব্যাবিদ্ধে রথচক্রবৎ
সমেতি ভূতগ্রামোঽয়ং ভূতগ্রামেণ কার্যবান্
9.33
জন্মমৃত্যুজরাব্যাধিবেদনাভিরুপদ্রুতম্
অসারমিমমস্বন্তং সংসারং ত্যজতঃ সুখম্
9.34
দিবঃ পতত্সু দেবেষু স্থানেভ্যশ্চ মহর্ষিষু
কো হি নাম ভবেনার্থী ভবেত্কারণতত্ত্ববিৎ
9.35
কৃত্বা হি বিবিধং কর্ম তত্তদ্বিবিধলক্ষণম্
পার্থিবৈর্নৃপতিঃ স্বল্পৈঃ কারণৈরেব বধ্যতে
9.36
তস্মাত্প্রজ্ঞামৃতমিদং চিরান্মাং প্রত্যুপস্থিতম্
তত্প্রাপ্য প্রার্থয়ে স্থানমব্যয়ং শাশ্বতং ধ্রুবম্
9.37
এতয়া সততং বৃত্ত্যা চরন্নেবংপ্রকারয়া
দেহং সংস্থাপয়িষ্যামি নির্ভয়ং মার্গমাস্থিতঃ