Utshovঅধ্যায় 10
10.1
ভীম উবাচ
শ্রোত্রিয়স্যেব তে রাজন্মন্দকস্যাবিপশ্চিতঃ
অনুবাকহতাবুদ্ধির্নৈষা তত্ত্বার্থদর্শিনী
10.2
আলস্যে কৃতচিত্তস্য রাজধর্মানসূয়তঃ
বিনাশে ধার্তরাষ্ট্রাণাং কিং ফলং ভরতর্ষভ
10.3
ক্ষমানুকম্পা কারুণ্যমানৃশংস্যং ন বিদ্যতে
ক্ষাত্রমাচরতো মার্গমপি বন্ধোস্ত্বদন্তরে
10.4
যদীমাং ভবতো বুদ্ধিং বিদ্যাম বয়মীদৃশীম্
শস্ত্রং নৈব গ্রহীষ্যামো ন বধিষ্যাম কংচন
10.5
ভৈক্ষ্যমেবাচরিষ্যাম শরীরস্যা বিমোক্ষণাৎ
ন চেদং দারুণং যুদ্ধমভবিষ্যন্মহীক্ষিতাম্
10.6
প্রাণস্যান্নমিদং সর্বমিতি বৈ কবয়ো বিদুঃ
স্থাবরং জঙ্গমং চৈব সর্বং প্রাণস্য ভোজনম্
10.7
আদদানস্য চেদ্রাজ্যং যে কেচিত্পরিপন্থিনঃ
হন্তব্যাস্ত ইতি প্রাজ্ঞাঃ ক্ষত্রধর্মবিদো বিদুঃ
10.8
তে সদোষা হতাস্মাভী রাজ্যস্য পরিপন্থিনঃ
তান্হত্বা ভুঙ্ক্ষ্ব ধর্মেণ যুধিষ্ঠির মহীমিমাম্
10.9
যথা হি পুরুষঃ খাত্বা কূপমপ্রাপ্য চোদকম্
পঙ্কদিগ্ধো নিবর্তেত কর্মেদং নস্তথোপমম্
10.10
যথারুহ্য মহাবৃক্ষমপহৃত্য ততো মধু
অপ্রাশ্য নিধনং গচ্ছেত্কর্মেদং নস্তথোপমম্
10.11
যথা মহান্তমধ্বানমাশয়া পুরুষঃ পতন্
স নিরাশো নিবর্তেত কর্মেদং নস্তথোপমম্
10.12
যথা শত্রূন্ঘাতয়িত্বা পুরুষঃ কুরুসত্তম
আত্মানং ঘাতয়েত্পশ্চাত্কর্মেদং নস্তথাবিধম্
10.13
যথান্নং ক্ষুধিতো লব্ধ্বা ন ভুঞ্জীত যদৃচ্ছয়া
কামী চ কামিনীং লব্ধ্বা কর্মেদং নস্তথাবিধম্
10.14
বয়মেবাত্র গর্হ্যা হি যে বয়ং মন্দচেতসঃ
ত্বাং রাজন্ননুগচ্ছামো জ্যেষ্ঠোঽয়মিতি ভারত
10.15
বয়ং হি বাহুবলিনঃ কৃতবিদ্যা মনস্বিনঃ
ক্লীবস্য বাক্যে তিষ্ঠামো যথৈবাশক্তয়স্তথা
10.16
অগতীন্কাগতীনস্মান্নষ্টার্থানর্থসিদ্ধয়ে
কথং বৈ নানুপশ্যেয়ুর্জনাঃ পশ্যন্তি যাদৃশম্
10.17
আপত্কালে হি সংন্যাসঃ কর্তব্য ইতি শিষ্যতে
জরয়াভিপরীতেন শত্রুভির্ব্যংসিতেন চ
10.18
তস্মাদিহ কৃতপ্রজ্ঞাস্ত্যাগং ন পরিচক্ষতে
ধর্মব্যতিক্রমং চেদং মন্যন্তে সূক্ষ্মদর্শিনঃ
10.19
কথং তস্মাত্সমুত্পন্নস্তন্নিষ্ঠস্তদুপাশ্রয়ঃ
তদেব নিন্দন্নাসীত শ্রদ্ধা বান্যত্র গৃহ্যতে
10.20
শ্রিয়া বিহীনৈরধনৈর্নাস্তিকৈঃ সংপ্রবর্তিতম্
বেদবাদস্য বিজ্ঞানং সত্যাভাসমিবানৃতম্
10.21
শক্যং তু মৌণ্ড্যমাস্থায় বিভ্রতাত্মানমাত্মনা
ধর্মচ্ছদ্ম সমাস্থায় আসিতুং ন তু জীবিতুম্
10.22
শক্যং পুনররণ্যেষু সুখমেকেন জীবিতুম্
অবিভ্রতা পুত্রপৌত্রান্দেবর্ষীনতিথীন্পিতৄন্
10.23
নেমে মৃগাঃ স্বর্গজিতো ন বরাহা ন পক্ষিণঃ
অথৈতেন প্রকারেণ পুণ্যমাহুর্ন তাঞ্জনাঃ
10.24
যদি সংন্যাসতঃ সিদ্ধিং রাজন্কশ্চিদবাপ্নুয়াৎ
পর্বতাশ্চ দ্রুমাশ্চৈব ক্ষিপ্রং সিদ্ধিমবাপ্নুয়ুঃ
10.25
এতে হি নিত্যসংন্যাসা দৃশ্যন্তে নিরুপদ্রবাঃ
অপরিগ্রহবন্তশ্চ সততং চাত্মচারিণঃ
10.26
অথ চেদাত্মভাগ্যেষু নান্যেষাং সিদ্ধিমশ্নুতে
তস্মাত্কর্মৈব কর্তব্যং নাস্তি সিদ্ধিরকর্মণঃ
10.27
ঔদকাঃ সৃষ্টয়শ্চৈব জন্তবঃ সিদ্ধিমাপ্নুয়ুঃ
যেষামাত্মৈব ভর্তব্যো নান্যঃ কশ্চন বিদ্যতে
10.28
অবেক্ষস্ব যথা স্বৈঃ স্বৈঃ কর্মভির্ব্যাপৃতং জগৎ
তস্মাত্কর্মৈব কর্তব্যং নাস্তি সিদ্ধিরকর্মণঃ