Utshovঅধ্যায় 11
11.1
অর্জুন উবাচ
অত্রৈবোদাহরন্তীমমিতিহাসং পুরাতনম্
তাপসৈঃ সহ সংবাদং শক্রস্য ভরতর্ষভ
11.2
কেচিদ্গৃহান্পরিত্যজ্য বনমভ্যগমন্দ্বিজাঃ
অজাতশ্মশ্রবো মন্দাঃ কুলে জাতাঃ প্রবব্রজুঃ
11.3
ধর্মোঽয়মিতি মন্বানা ব্রহ্মচর্যে ব্যবস্থিতাঃ
ত্যক্ত্বা গৃহান্পিতৄংশ্চৈব তানিন্দ্রোঽন্বকৃপায়ত
11.4
তানাবভাষে ভগবান্পক্ষী ভূত্বা হিরণ্ময়ঃ
সুদুষ্করং মনুষ্যৈশ্চ যত্কৃতং বিঘসাশিভিঃ
11.5
পুণ্যং চ বত কর্মৈষাং প্রশস্তং চৈব জীবিতম্
সংসিদ্ধাস্তে গতিং মুখ্যাং প্রাপ্তা ধর্মপরায়ণাঃ
11.6
ঋষয় ঊচুঃ
অহো বতায়ং শকুনির্বিঘসাশান্প্রশংসতি
অস্মান্নূনময়ং শাস্তি বয়ং চ বিঘসাশিনঃ
11.7
শকুনিরুবাচ
নাহং যুষ্মান্প্রশংসামি পঙ্কদিগ্ধান্রজস্বলান্
উচ্ছিষ্টভোজিনো মন্দানন্যে বৈ বিঘসাশিনঃ
11.8
ঋষয় ঊচুঃ
ইদং শ্রেয়ঃ পরমিতি বয়মেবাভ্যুপাস্মহে
শকুনে ব্রূহি যচ্ছ্রেয়ো ভৃশং বৈ শ্রদ্দধাম তে
11.9
শকুনিরুবাচ
যদি মাং নাভিশঙ্কধ্বং বিভজ্যাত্মানমাত্মনা
ততোঽহং বঃ প্রবক্ষ্যামি যাথাতথ্যং হিতং বচঃ
11.10
ঋষয় ঊচুঃ
শৃণুমস্তে বচস্তাত পন্থানো বিদিতাস্তব
নিয়োগে চৈব ধর্মাত্মন্স্থাতুমিচ্ছাম শাধি নঃ
11.11
শকুনিরুবাচ
চতুষ্পদাং গৌঃ প্রবরা লোহানাং কাঞ্চনং বরম্
শব্দানাং প্রবরো মন্ত্রো ব্রাহ্মণো দ্বিপদাং বরঃ
11.12
মন্ত্রোঽয়ং জাতকর্মাদি ব্রাহ্মণস্য বিধীয়তে
জীবতো যো যথাকালং শ্মশাননিধনাদিতি
11.13
কর্মাণি বৈদিকান্যস্য স্বর্গ্যঃ পন্থাস্ত্বনুত্তমঃ
অথ সর্বাণি কর্মাণি মন্ত্রসিদ্ধানি চক্ষতে
11.14
আম্নায়দৃঢবাদীনি তথা সিদ্ধিরিহেষ্যতে
মাসার্ধমাসা ঋতব আদিত্যশশিতারকম্
11.15
ঈহন্তে সর্বভূতানি তদৃতং কর্মসঙ্গিনাম্
সিদ্ধিক্ষেত্রমিদং পুণ্যময়মেবাশ্রমো মহান্
11.16
অথ যে কর্ম নিন্দন্তো মনুষ্যাঃ কাপথং গতাঃ
মূঢানামর্থহীনানাং তেষামেনস্তু বিদ্যতে
11.17
দেববংশান্পিতৃবংশান্ব্রহ্মবংশাংশ্চ শাশ্বতান্
সংত্যজ্য মূঢা বর্তন্তে ততো যান্ত্যশ্রুতীপথম্
11.18
এতদ্বোঽস্তু তপো যুক্তং দদানীত্যৃষিচোদিতম্
তস্মাত্তদধ্যবসতস্তপস্বি তপ উচ্যতে
11.19
দেববংশান্পিতৃবংশান্ব্রহ্মবংশাংশ্চ শাশ্বতান্
সংবিভজ্য গুরোশ্চর্যাং তদ্বৈ দুষ্করমুচ্যতে
11.20
দেবা বৈ দুষ্করং কৃত্বা বিভূতিং পরমাং গতাঃ
তস্মাদ্গার্হস্থ্যমুদ্বোঢুং দুষ্করং প্রব্রবীমি বঃ
11.21
তপঃ শ্রেষ্ঠং প্রজানাং হি মূলমেতন্ন সংশয়ঃ
কুটুম্ববিধিনানেন যস্মিন্সর্বং প্রতিষ্ঠিতম্
11.22
এতদ্বিদুস্তপো বিপ্রা দ্বংদ্বাতীতা বিমত্সরাঃ
তস্মাদ্বনং মধ্যমং চ লোকেষু তপ উচ্যতে
11.23
দুরাধর্ষং পদং চৈব গচ্ছন্তি বিঘসাশিনঃ
সায়ংপ্রাতর্বিভজ্যান্নং স্বকুটুম্বে যথাবিধি
11.24
দত্ত্বাতিথিভ্যো দেবেভ্যঃ পিতৃভ্যঃ স্বজনস্য চ
অবশিষ্টানি যেঽশ্নন্তি তানাহুর্বিঘসাশিনঃ
11.25
তস্মাত্স্বধর্মমাস্থায় সুব্রতাঃ সত্যবাদিনঃ
লোকস্য গুরবো ভূত্বা তে ভবন্ত্যনুপস্কৃতাঃ
11.26
ত্রিদিবং প্রাপ্য শক্রস্য স্বর্গলোকে বিমত্সরাঃ
বসন্তি শাশ্বতীর্বর্ষা জনা দুষ্করকারিণঃ
11.27
ততস্তে তদ্বচঃ শ্রুত্বা তস্য ধর্মার্থসংহিতম্
উত্সৃজ্য নাস্তিকগতিং গার্হস্থ্যং ধর্মমাশ্রিতাঃ
11.28
তস্মাত্ত্বমপি দুর্ধর্ষ ধৈর্যমালম্ব্য শাশ্বতম্
প্রশাধি পৃথিবীং কৃত্স্নাং হতামিত্রাং নরোত্তম