Utshovঅধ্যায় 8
8.1
বৈশংপায়ন উবাচ
অথার্জুন উবাচেদমধিক্ষিপ্ত ইবাক্ষমী
অভিনীততরং বাক্যং দৃঢবাদপরাক্রমঃ
8.2
দর্শয়ন্নৈন্দ্রিরাত্মানমুগ্রমুগ্রপরাক্রমঃ
স্ময়মানো মহাতেজাঃ সৃক্কিণী সংলিহন্মুহুঃ
8.3
অহো দুঃখমহো কৃচ্ছ্রমহো বৈক্লব্যমুত্তমম্
যত্কৃত্বামানুষং কর্ম ত্যজেথাঃ শ্রিয়মুত্তমাম্
8.4
শত্রূন্হত্বা মহীং লব্ধ্বা স্বধর্মেণোপপাদিতাম্
হতামিত্রঃ কথং সর্বং ত্যজেথা বুদ্ধিলাঘবাৎ
8.5
ক্লীবস্য হি কুতো রাজ্যং দীর্ঘসূত্রস্য বা পুনঃ
কিমর্থং চ মহীপালানবধীঃ ক্রোধমূর্ছিতঃ
8.6
যো হ্যাজিজীবিষেদ্ভৈক্ষ্যং কর্মণা নৈব কেনচিৎ
সমারম্ভান্বুভূষেত হতস্বস্তিরকিংচনঃ
সর্বলোকেষু বিখ্যাতো ন পুত্রপশুসংহিতঃ
8.7
কাপালীং নৃপ পাপিষ্ঠাং বৃত্তিমাস্থায় জীবতঃ
সংত্যজ্য রাজ্যমৃদ্ধং তে লোকোঽয়ং কিং বদিষ্যতি
8.8
সর্বারম্ভান্সমুত্সৃজ্য হতস্বস্তিরকিংচনঃ
কস্মাদাশংসসে ভৈক্ষ্যং চর্তুং প্রাকৃতবত্প্রভো
8.9
অস্মিন্রাজকুলে জাতো জিত্বা কৃত্স্নাং বসুংধরাম্
ধর্মার্থাবখিলৌ হিত্বা বনং মৌঢ্যাত্প্রতিষ্ঠসে
8.10
যদীমানি হবীংষীহ বিমথিষ্যন্ত্যসাধবঃ
ভবতা বিপ্রহীণানি প্রাপ্তং ত্বামেব কিল্বিষম্
8.11
আকিংচন্যমনাশাস্যমিতি বৈ নহুষোঽব্রবীৎ
কৃত্যা নৃশংসা হ্যধনে ধিগস্ত্বধনতামিহ
8.12
অশ্বস্তনমৃষীণাং হি বিদ্যতে বেদ তদ্ভবান্
যং ত্বিমং ধর্মমিত্যাহুর্ধনাদেষ প্রবর্ততে
8.13
ধর্মং সংহরতে তস্য ধনং হরতি যস্য যঃ
হ্রিয়মাণে ধনে রাজন্বয়ং কস্য ক্ষমেমহি
8.14
অভিশস্তবত্প্রপশ্যন্তি দরিদ্রং পার্শ্বতঃ স্থিতম্
দারিদ্র্যং পাতকং লোকে কস্তচ্ছংসিতুমর্হতি
8.15
পতিতঃ শোচ্যতে রাজন্নির্ধনশ্চাপি শোচ্যতে
বিশেষং নাধিগচ্ছামি পতিতস্যাধনস্য চ
8.16
অর্থেভ্যো হি বিবৃদ্ধেভ্যঃ সংভৃতেভ্যস্ততস্ততঃ
ক্রিয়াঃ সর্বাঃ প্রবর্তন্তে পর্বতেভ্য ইবাপগাঃ
8.17
অর্থাদ্ধর্মশ্চ কামশ্চ স্বর্গশ্চৈব নরাধিপ
প্রাণয়াত্রা হি লোকস্য বিনার্থং ন প্রসিধ্যতি
8.18
অর্থেন হি বিহীনস্য পুরুষস্যাল্পমেধসঃ
ব্যুচ্ছিদ্যন্তে ক্রিয়াঃ সর্বা গ্রীষ্মে কুসরিতো যথা
8.19
যস্যার্থাস্তস্য মিত্রাণি যস্যার্থাস্তস্য বান্ধবাঃ
যস্যার্থাঃ স পুমাঁল্লোকে যস্যার্থাঃ স চ পণ্ডিতঃ
8.20
অধনেনার্থকামেন নার্থঃ শক্যো বিবিত্সতা
অর্থৈরর্থা নিবধ্যন্তে গজৈরিব মহাগজাঃ
8.21
ধর্মঃ কামশ্চ স্বর্গশ্চ হর্ষঃ ক্রোধঃ শ্রুতং দমঃ
অর্থাদেতানি সর্বাণি প্রবর্তন্তে নরাধিপ
8.22
ধনাত্কুলং প্রভবতি ধনাদ্ধর্মঃ প্রবর্ততে
নাধনস্যাস্ত্যয়ং লোকো ন পরঃ পুরুষোত্তম
8.23
নাধনো ধর্মকৃত্যানি যথাবদনুতিষ্ঠতি
ধনাদ্ধি ধর্মঃ স্রবতি শৈলাদ্গিরিনদী যথা
8.24
যঃ কৃশাশ্বঃ কৃশগবঃ কৃশভৃত্যঃ কৃশাতিথিঃ
স বৈ রাজন্কৃশো নাম ন শরীরকৃশঃ কৃশঃ
8.25
অবেক্ষস্ব যথান্যায়ং পশ্য দেবাসুরং যথা
রাজন্কিমন্যজ্জ্ঞাতীনাং বধাদৃধ্যন্তি দেবতাঃ
8.26
ন চেদ্ধর্তব্যমন্যস্য কথং তদ্ধর্মমারভেৎ
এতাবানেব বেদেষু নিশ্চয়ঃ কবিভিঃ কৃতঃ
8.27
অধ্যেতব্যা ত্রয়ী বিদ্যা ভবিতব্যং বিপশ্চিতা
সর্বথা ধনমাহার্যং যষ্টব্যং চাপি যত্নতঃ
8.28
দ্রোহাদ্দেবৈরবাপ্তানি দিবি স্থানানি সর্বশঃ
ইতি দেবা ব্যবসিতা বেদবাদাশ্চ শাশ্বতাঃ
8.29
অধীয়ন্তে তপস্যন্তি যজন্তে যাজয়ন্তি চ
কৃত্স্নং তদেব চ শ্রেয়ো যদপ্যাদদতেঽন্যতঃ
8.30
ন পশ্যামোঽনপহৃতং ধনং কিংচিত্ক্বচিদ্বয়ম্
এবমেব হি রাজানো জয়ন্তি পৃথিবীমিমাম্
8.31
জিত্বা মমত্বং ব্রুবতে পুত্রা ইব পিতুর্ধনে
রাজর্ষয়ো জিতস্বর্গা ধর্মো হ্যেষাং নিগদ্যতে
8.32
যথৈব পূর্ণাদুদধেঃ স্যন্দন্ত্যাপো দিশো দশ
এবং রাজকুলাদ্বিত্তং পৃথিবীং প্রতিতিষ্ঠতি
8.33
আসীদিয়ং দিলীপস্য নৃগস্য নহুষস্য চ
অম্বরীষস্য মান্ধাতুঃ পৃথিবী সা ত্বয়ি স্থিতা
8.34
স ত্বাং দ্রব্যময়ো যজ্ঞঃ সংপ্রাপ্তঃ সর্বদক্ষিণঃ
তং চেন্ন যজসে রাজন্প্রাপ্তস্ত্বং দেবকিল্বিষম্
8.35
যেষাং রাজাশ্বমেধেন যজতে দক্ষিণাবতা
উপেত্য তস্যাবভৃথং পূতাঃ সর্বে ভবন্তি তে
8.36
বিশ্বরূপো মহাদেবঃ সর্বমেধে মহামখে
জুহাব সর্বভূতানি তথৈবাত্মানমাত্মনা
8.37
শাশ্বতোঽয়ং ভূতিপথো নাস্যান্তমনুশুশ্রুম
মহান্দাশরথঃ পন্থা মা রাজন্কাপথং গমঃ