Utshovঅধ্যায় 7
7.1
বৈশংপায়ন উবাচ
যুধিষ্ঠিরস্তু ধর্মাত্মা শোকব্যাকুলচেতনঃ
শুশোচ দুঃখসংতপ্তঃ স্মৃত্বা কর্ণং মহারথম্
7.2
আবিষ্টো দুঃখশোকাভ্যাং নিঃশ্বসংশ্চ পুনঃ পুনঃ
দৃষ্ট্বার্জুনমুবাচেদং বচনং শোককর্শিতঃ
7.3
যদ্ভৈক্ষমাচরিষ্যাম বৃষ্ণ্যন্ধকপুরে বয়ম্
জ্ঞাতীন্নিষ্পুরুষান্কৃত্বা নেমাং প্রাপ্স্যাম দুর্গতিম্
7.4
অমিত্রা নঃ সমৃদ্ধার্থা বৃত্তার্থাঃ কুরবঃ কিল
আত্মানমাত্মনা হত্বা কিং ধর্মফলমাপ্নুমঃ
7.5
ধিগস্তু ক্ষাত্রমাচারং ধিগস্তু বলমৌরসম্
ধিগস্ত্বমর্ষং যেনেমামাপদং গমিতা বয়ম্
7.6
সাধু ক্ষমা দমঃ শৌচমবৈরোধ্যমমত্সরঃ
অহিংসা সত্যবচনং নিত্যানি বনচারিণাম্
7.7
বয়ং তু লোভান্মোহাচ্চ স্তম্ভং মানং চ সংশ্রিতাঃ
ইমামবস্থামাপন্না রাজ্যলেশবুভুক্ষয়া
7.8
ত্রৈলোক্যস্যাপি রাজ্যেন নাস্মান্কশ্চিত্প্রহর্ষয়েৎ
বান্ধবান্নিহতান্দৃষ্ট্বা পৃথিব্যামামিষৈষিণঃ
7.9
তে বয়ং পৃথিবীহেতোরবধ্যান্পৃথিবীসমান্
সংপরিত্যজ্য জীবামো হীনার্থা হতবান্ধবাঃ
7.10
আমিষে গৃধ্যমানানামশুনাং নঃ শুনামিব
আমিষং চৈব নো নষ্টমামিষস্য চ ভোজিনঃ
7.11
ন পৃথিব্যা সকলয়া ন সুবর্ণস্য রাশিভিঃ
ন গবাশ্বেন সর্বেণ তে ত্যাজ্যা য ইমে হতাঃ
7.12
সংয়ুক্তাঃ কামমন্যুভ্যাং ক্রোধামর্ষসমন্বিতাঃ
মৃত্যুয়ানং সমারুহ্য গতা বৈবস্বতক্ষয়ম্
7.13
বহু কল্যাণমিচ্ছন্ত ঈহন্তে পিতরঃ সুতান্
তপসা ব্রহ্মচর্যেণ বন্দনেন তিতিক্ষয়া
7.14
উপবাসৈস্তথেজ্যাভির্ব্রতকৌতুকমঙ্গলৈঃ
লভন্তে মাতরো গর্ভাংস্তান্মাসান্দশ বিভ্রতি
7.15
যদি স্বস্তি প্রজায়ন্তে জাতা জীবন্তি বা যদি
সংভাবিতা জাতবলাস্তে দদ্যুর্যদি নঃ সুখম্
ইহ চামুত্র চৈবেতি কৃপণাঃ ফলহেতুকাঃ
7.16
তাসাময়ং সমারম্ভো নিবৃত্তঃ কেবলোঽফলঃ
যদাসাং নিহতাঃ পুত্রা যুবানো মৃষ্টকুণ্ডলাঃ
7.17
অভুক্ত্বা পার্থিবান্ভোগানৃণান্যনবদায় চ
পিতৃভ্যো দেবতাভ্যশ্চ গতা বৈবস্বতক্ষয়ম্
7.18
যদৈষামঙ্গ পিতরৌ জাতৌ কামময়াবিব
সংজাতবলরূপেষু তদৈব নিহতা নৃপাঃ
7.19
সংয়ুক্তাঃ কামমন্যুভ্যাং ক্রোধহর্ষাসমঞ্জসাঃ
ন তে জন্মফলং কিংচিদ্ভোক্তারো জাতু কর্হিচিৎ
7.20
পাঞ্চালানাং কুরূণাং চ হতা এব হি যেঽহতাঃ
তে বয়ং ত্বধমাঁল্লোকান্প্রপদ্যেম স্বকর্মভিঃ
7.21
বয়মেবাস্য লোকস্য বিনাশে কারণং স্মৃতাঃ
ধৃতরাষ্ট্রস্য পুত্রেণ নিকৃত্যা প্রত্যপত্স্মহি
7.22
সদৈব নিকৃতিপ্রজ্ঞো দ্বেষ্টা মায়োপজীবনঃ
মিথ্যাবৃত্তঃ স সততমস্মাস্বনপকারিষু
7.23
অংশকামা বয়ং তে চ ন চাস্মাভির্ন তৈর্জিতম্
ন তৈর্ভুক্তেয়মবনির্ন নার্যো গীতবাদিতম্
7.24
নামাত্যসমিতৌ কথ্যং ন চ শ্রুতবতাং শ্রুতম্
ন রত্নানি পরার্ধ্যানি ন ভূর্ন দ্রবিণাগমঃ
7.25
ঋদ্ধিমস্মাসু তাং দৃষ্ট্বা বিবর্ণো হরিণঃ কৃশঃ
ধৃতরাষ্ট্রস্য নৃপতেঃ সৌবলেন নিবেদিতঃ
7.26
তং পিতা পুত্রগৃদ্ধিত্বাদনুমেনেঽনয়ে স্থিতম্
অনবেক্ষ্যৈব পিতরং গাঙ্গেয়ং বিদুরং তথা
অসংশয়ং ধৃতরাষ্ট্রো যথৈবাহং তথা গতঃ
7.27
অনিয়ম্যাশুচিং লুব্ধং পুত্রং কামবশানুগম্
পতিতো যশসো দীপ্তাদ্ঘাতয়িত্বা সহোদরান্
7.28
ইমৌ বৃদ্ধৌ চ শোকাগ্নৌ প্রক্ষিপ্য স সুয়োধনঃ
অস্মত্প্রদ্বেষসংয়ুক্তঃ পাপবুদ্ধিঃ সদৈব হি
7.29
কো হি বন্ধুঃ কুলীনঃ সংস্তথা ব্রূয়াত্সুহৃজ্জনে
যথাসাবুক্তবান্ক্ষুদ্রো যুয়ুত্সুর্বৃষ্ণিসংনিধৌ
7.30
আত্মনো হি বয়ং দোষাদ্বিনষ্টাঃ শাশ্বতীঃ সমাঃ
প্রদহন্তো দিশঃ সর্বাস্তেজসা ভাস্করা ইব
7.31
সোঽস্মাকং বৈরপুরুষো দুর্মন্ত্রিপ্রগ্রহং গতঃ
দুর্যোধনকৃতে হ্যেতত্কুলং নো বিনিপাতিতম্
অবধ্যানাং বধং কৃত্বা লোকে প্রাপ্তাঃ স্ম বাচ্যতাম্
7.32
কুলস্যাস্যান্তকরণং দুর্মতিং পাপকারিণম্
রাজা রাষ্ট্রেশ্বরং কৃত্বা ধৃতরাষ্ট্রোঽদ্য শোচতি
7.33
হতাঃ শূরাঃ কৃতং পাপং বিষয়ঃ স্বো বিনাশিতঃ
হত্বা নো বিগতো মন্যুঃ শোকো মাং রুন্ধয়ত্যয়ম্
7.34
ধনংজয় কৃতং পাপং কল্যাণেনোপহন্যতে
ত্যাগবাংশ্চ পুনঃ পাপং নালং কর্তুমিতি শ্রুতিঃ
7.35
ত্যাগবাঞ্জন্মমরণে নাপ্নোতীতি শ্রুতির্যদা
প্রাপ্তবর্ত্মা কৃতমতির্ব্রহ্ম সংপদ্যতে তদা
7.36
স ধনংজয় নির্দ্বংদ্বো মুনির্জ্ঞানসমন্বিতঃ
বনমামন্ত্র্য বঃ সর্বান্গমিষ্যামি পরংতপ
7.37
ন হি কৃত্স্নতমো ধর্মঃ শক্যঃ প্রাপ্তুমিতি শ্রুতিঃ
পরিগ্রহবতা তন্মে প্রত্যক্ষমরিসূদন
7.38
ময়া নিসৃষ্টং পাপং হি পরিগ্রহমভীপ্সতা
জন্মক্ষয়নিমিত্তং চ শক্যং প্রাপ্তুমিতি শ্রুতিঃ
7.39
স পরিগ্রহমুত্সৃজ্য কৃত্স্নং রাজ্যং তথৈব চ
গমিষ্যামি বিনির্মুক্তো বিশোকো বিজ্বরস্তথা
7.40
প্রশাধি ত্বমিমামুর্বীং ক্ষেমাং নিহতকণ্টকাম্
ন মমার্থোঽস্তি রাজ্যেন ন ভোগৈর্বা কুরূত্তম
7.41
এতাবদুক্ত্বা বচনং ধর্মরাজো যুধিষ্ঠিরঃ
ব্যুপারমত্ততঃ পার্থঃ কনীয়ান্প্রত্যভাষত