Utshovঅধ্যায় 6
6.1
বৈশংপায়ন উবাচ
এতাবদুক্ত্বা দেবর্ষির্বিররাম স নারদঃ
যুধিষ্ঠিরস্তু রাজর্ষির্দধ্যৌ শোকপরিপ্লুতঃ
6.2
তং দীনমনসং বীরমধোবদনমাতুরম্
নিঃশ্বসন্তং যথা নাগং পর্যশ্রুনয়নং তথা
6.3
কুন্তী শোকপরীতাঙ্গী দুঃখোপহতচেতনা
অব্রবীন্মধুরাভাষা কালে বচনমর্থবৎ
6.4
যুধিষ্ঠির মহাবাহো নৈনং শোচিতুমর্হসি
জহি শোকং মহাপ্রাজ্ঞ শৃণু চেদং বচো মম
6.5
যতিতঃ স ময়া পূর্বং ভ্রাত্র্যং জ্ঞাপয়িতুং তব
ভাস্করেণ চ দেবেন পিত্রা ধর্মভৃতাং বর
6.6
যদ্বাচ্যং হিতকামেন সুহৃদা ভূতিমিচ্ছতা
তথা দিবাকরেণোক্তঃ স্বপ্নান্তে মম চাগ্রতঃ
6.7
ন চৈনমশকদ্ভানুরহং বা স্নেহকারণৈঃ
পুরা প্রত্যনুনেতুং বা নেতুং বাপ্যেকতাং ত্বয়া
6.8
ততঃ কালপরীতঃ স বৈরস্যোদ্ধুক্ষণে রতঃ
প্রতীপকারী যুষ্মাকমিতি চোপেক্ষিতো ময়া
6.9
ইত্যুক্তো ধর্মরাজস্তু মাত্রা বাষ্পাকুলেক্ষণঃ
উবাচ বাক্যং ধর্মাত্মা শোকব্যাকুলচেতনঃ
6.10
ভবত্যা গূঢমন্ত্রত্বাত্পীডিতোঽস্মীত্যুবাচ তাম্
শশাপ চ মহাতেজাঃ সর্বলোকেষু চ স্ত্রিয়ঃ
ন গুহ্যং ধারয়িষ্যন্তীত্যতিদুঃখসমন্বিতঃ
6.11
স রাজা পুত্রপৌত্রাণাং সংবন্ধিসুহৃদাং তথা
স্মরন্নুদ্বিগ্নহৃদয়ো বভূবাস্বস্থচেতনঃ
6.12
ততঃ শোকপরীতাত্মা সধূম ইব পাবকঃ
নির্বেদমকরোদ্ধীমান্রাজা সংতাপপীডিতঃ