অধ্যায় 5

5.1

নারদ উবাচ
আবিষ্কৃতবলং কর্ণং জ্ঞাত্বা রাজা তু মাগধঃ
আহ্বয়দ্দ্বৈরথেনাজৌ জরাসংধো মহীপতিঃ

তয়োঃ সমভবদ্যুদ্ধং দিব্যাস্ত্রবিদুষোর্দ্বয়োঃ
যুধি নানাপ্রহরণৈরন্যোন্যমভিবর্ষতোঃ

ক্ষীণবাণৌ বিধনুষৌ ভগ্নখড্গৌ মহীং গতৌ
বাহুভিঃ সমসজ্জেতামুভাবপি বলান্বিতৌ

বাহুকণ্টকয়ুদ্ধেন তস্য কর্ণোঽথ যুধ্যতঃ
বিভেদ সংধিং দেহস্য জরয়া শ্লেষিতস্য হ

স বিকারং শরীরস্য দৃষ্ট্বা নৃপতিরাত্মনঃ
প্রীতোঽস্মীত্যব্রবীত্কর্ণং বৈরমুত্সৃজ্য ভারত

প্রীত্যা দদৌ স কর্ণায় মালিনীং নগরীমথ
অঙ্গেষু নরশার্দূল স রাজাসীত্সপত্নজিৎ

পালয়ামাস চম্পাং তু কর্ণঃ পরবলার্দনঃ
দুর্যোধনস্যানুমতে তবাপি বিদিতং তথা

এবং শস্ত্রপ্রতাপেন প্রথিতঃ সোঽভবত্ক্ষিতৌ
ত্বদ্ধিতার্থং সুরেন্দ্রেণ ভিক্ষিতো বর্মকুণ্ডলে

স দিব্যে সহজে প্রাদাত্কুণ্ডলে পরমার্চিতে
সহজং কবচং চৈব মোহিতো দেবমায়য়া

বিমুক্তঃ কুণ্ডলাভ্যাং চ সহজেন চ বর্মণা
নিহতো বিজয়েনাজৌ বাসুদেবস্য পশ্যতঃ

ব্রাহ্মণস্যাভিশাপেন রামস্য চ মহাত্মনঃ
কুন্ত্যাশ্চ বরদানেন মায়য়া চ শতক্রতোঃ

ভীষ্মাবমানাত্সংখ্যায়াং রথানামর্ধকীর্তনাৎ
শল্যাত্তেজোবধাচ্চাপি বাসুদেবনয়েন চ

রুদ্রস্য দেবরাজস্য যমস্য বরুণস্য চ
কুবেরদ্রোণয়োশ্চৈব কৃপস্য চ মহাত্মনঃ

অস্ত্রাণি দিব্যান্যাদায় যুধি গাণ্ডীবধন্বনা
হতো বৈকর্তনঃ কর্ণো দিবাকরসমদ্যুতিঃ

এবং শপ্তস্তব ভ্রাতা বহুভিশ্চাপি বঞ্চিতঃ
ন শোচ্যঃ স নরব্যাঘ্রো যুদ্ধে হি নিধনং গতঃ