Chapter 5

5.1

नारद उवाच
आविष्कृतबलं कर्णं ज्ञात्वा राजा तु मागधः
आह्वयद्द्वैरथेनाजौ जरासंधो महीपतिः

Narada uvacha
Avishkritabalam karnam gyatva raja tu magadhah
Ahvayaddvairathenajau jarasandho mahipatih

तयोः समभवद्युद्धं दिव्यास्त्रविदुषोर्द्वयोः
युधि नानाप्रहरणैरन्योन्यमभिवर्षतोः

Tayoh samabhavadyuddham divyastravidushordvayoh
Yudhi nanapraharanairanyonyamabhivarshatoh

क्षीणबाणौ विधनुषौ भग्नखड्गौ महीं गतौ
बाहुभिः समसज्जेतामुभावपि बलान्वितौ

Kshinabanau vidhanushau bhagnakhadgau mahim gatau
Bahubhih samasajjetamubhavapi balanvitau

बाहुकण्टकयुद्धेन तस्य कर्णोऽथ युध्यतः
बिभेद संधिं देहस्य जरया श्लेषितस्य ह

Bahukantakayuddhena tasya karnotha yudhyatah
Bibheda sandhim dehasya jaraya shleshitasya ha

स विकारं शरीरस्य दृष्ट्वा नृपतिरात्मनः
प्रीतोऽस्मीत्यब्रवीत्कर्णं वैरमुत्सृज्य भारत

Sa vikaram sharirasya drishtva nripatiratmanah
Pritosmityabravitkarnam vairamutsrijya bharata

प्रीत्या ददौ स कर्णाय मालिनीं नगरीमथ
अङ्गेषु नरशार्दूल स राजासीत्सपत्नजित्

Pritya dadau sa karnaya malinim nagarimatha
Angeshu narashardula sa rajasitsapatnajit

पालयामास चम्पां तु कर्णः परबलार्दनः
दुर्योधनस्यानुमते तवापि विदितं तथा

Palayamasa champam tu karnah parabalardanah
Duryodhanasyanumate tavapi viditam tatha

एवं शस्त्रप्रतापेन प्रथितः सोऽभवत्क्षितौ
त्वद्धितार्थं सुरेन्द्रेण भिक्षितो वर्मकुण्डले

Evam shastrapratapena prathitah sobhavatkshitau
Tvaddhitartham surendrena bhikshito varmakundale

स दिव्ये सहजे प्रादात्कुण्डले परमार्चिते
सहजं कवचं चैव मोहितो देवमायया

Sa divye sahaje pradatkundale paramarchite
Sahajam kavacham chaiva mohito devamayaya

विमुक्तः कुण्डलाभ्यां च सहजेन च वर्मणा
निहतो विजयेनाजौ वासुदेवस्य पश्यतः

Vimuktah kundalabhyam cha sahajena cha varmana
Nihato vijayenajau vasudevasya pashyatah

ब्राह्मणस्याभिशापेन रामस्य च महात्मनः
कुन्त्याश्च वरदानेन मायया च शतक्रतोः

Brahmanasyabhishapena ramasya cha mahatmanah
Kuntyashcha varadanena mayaya cha shatakratoh

भीष्मावमानात्संख्यायां रथानामर्धकीर्तनात्
शल्यात्तेजोवधाच्चापि वासुदेवनयेन च

Bhishmavamanatsankhyayam rathanamardhakirtanat
Shalyattejovadhachchapi vasudevanayena cha

रुद्रस्य देवराजस्य यमस्य वरुणस्य च
कुबेरद्रोणयोश्चैव कृपस्य च महात्मनः

Rudrasya devarajasya yamasya varunasya cha
Kuberadronayoshchaiva kripasya cha mahatmanah

अस्त्राणि दिव्यान्यादाय युधि गाण्डीवधन्वना
हतो वैकर्तनः कर्णो दिवाकरसमद्युतिः

Astrani divyanyadaya yudhi gandivadhanvana
Hato vaikartanah karno divakarasamadyutih

एवं शप्तस्तव भ्राता बहुभिश्चापि वञ्चितः
न शोच्यः स नरव्याघ्रो युद्धे हि निधनं गतः

Evam shaptastava bhrata bahubhishchapi vanchitah
Na shochyah sa naravyaghro yuddhe hi nidhanam gatah