অধ্যায় 4

4.1

নারদ উবাচ
কর্ণস্তু সমবাপ্যৈতদস্ত্রং ভার্গবনন্দনাৎ
দুর্যোধনেন সহিতো মুমুদে ভরতর্ষভ

ততঃ কদাচিদ্রাজানঃ সমাজগ্মুঃ স্বয়ংবরে
কলিঙ্গবিষয়ে রাজন্রাজ্ঞশ্চিত্রাঙ্গদস্য চ

শ্রীমদ্রাজপুরং নাম নগরং তত্র ভারত
রাজানঃ শতশস্তত্র কন্যার্থং সমুপাগমন্

শ্রুত্বা দুর্যোধনস্তত্র সমেতান্সর্বপার্থিবান্
রথেন কাঞ্চনাঙ্গেন কর্ণেন সহিতো যয়ৌ

ততঃ স্বয়ংবরে তস্মিন্সংপ্রবৃত্তে মহোত্সবে
সমাপেতুর্নৃপতয়ঃ কন্যার্থে নৃপসত্তম

শিশুপালো জরাসংধো ভীষ্মকো বক্র এব চ
কপোতরোমা নীলশ্চ রুক্মী চ দৃঢবিক্রমঃ

সৃগালশ্চ মহারাজ স্ত্রীরাজ্যাধিপতিশ্চ যঃ
অশোকঃ শতধন্বা চ ভোজো বীরশ্চ নামতঃ

এতে চান্যে চ বহবো দক্ষিণাং দিশমাশ্রিতাঃ
ম্লেচ্ছাচার্যাশ্চ রাজানঃ প্রাচ্যোদীচ্যাশ্চ ভারত

কাঞ্চনাঙ্গদিনঃ সর্বে বদ্ধজাম্বূনদস্রজঃ
সর্বে ভাস্বরদেহাশ্চ ব্যাঘ্রা ইব মদোত্কটাঃ

ততঃ সমুপবিষ্টেষু তেষু রাজসু ভারত
বিবেশ রঙ্গং সা কন্যা ধাত্রীবর্ষধরান্বিতা

ততঃ সংশ্রাব্যমাণেষু রাজ্ঞাং নামসু ভারত
অত্যক্রামদ্ধার্তরাষ্ট্রং সা কন্যা বরবর্ণিনী

দুর্যোধনস্তু কৌরব্যো নামর্ষয়ত লঙ্ঘনম্
প্রত্যষেধচ্চ তাং কন্যামসত্কৃত্য নরাধিপান্

স বীর্যমদমত্তত্বাদ্ভীষ্মদ্রোণাবুপাশ্রিতঃ
রথমারোপ্য তাং কন্যামাজুহাব নরাধিপান্

তমন্বয়াদ্রথী খড্গী ভদ্ধগোধাঙ্গুলিত্রবান্
কর্ণঃ শস্ত্রভৃতাং শ্রেষ্ঠঃ পৃষ্ঠতঃ পুরুষর্ষভ

ততো বিমর্দঃ সুমহান্রাজ্ঞামাসীদ্যুধিষ্ঠির
সংনহ্যতাং তনুত্রাণি রথান্যোজয়তামপি

তেঽভ্যধাবন্ত সংক্রুদ্ধাঃ কর্ণদুর্যোধনাবুভৌ
শরবর্ষাণি মুঞ্চন্তো মেঘাঃ পর্বতয়োরিব

কর্ণস্তেষামাপততামেকৈকেন ক্ষুরেণ হ
ধনূংষি সশরাবাপান্যপাতয়ত ভূতলে

ততো বিধনুষঃ কাংশ্চিত্কাংশ্চিদুদ্যতকার্মুকান্
কাংশ্চিদুদ্বহতো বাণান্রথশক্তিগদাস্তথা

লাঘবাদাকুলীকৃত্য কর্ণঃ প্রহরতাং বরঃ
হতসূতাংশ্চ ভূয়িষ্ঠানবজিগ্যে নরাধিপান্

তে স্বয়ং ত্বরয়ন্তোঽশ্বান্যাহি যাহীতি বাদিনঃ
ব্যপেয়ুস্তে রণং হিত্বা রাজানো ভগ্নমানসাঃ

দুর্যোধনস্তু কর্ণেন পাল্যমানোঽভ্যয়াত্তদা
হৃষ্টঃ কন্যামুপাদায় নগরং নাগসাহ্বয়ম্