Utshovঅধ্যায় 3
3.1
নারদ উবাচ
কর্ণস্য বাহুবীর্যেণ প্রশ্রয়েণ দমেন চ
তুতোষ ভৃগুশার্দূলো গুরুশুশ্রূষয়া তথা
3.2
তস্মৈ স বিধিবত্কৃত্স্নং ব্রহ্মাস্ত্রং সনিবর্তনম্
প্রোবাচাখিলমব্যগ্রং তপস্বী সুতপস্বিনে
3.3
বিদিতাস্ত্রস্ততঃ কর্ণো রমমাণোঽঽশ্রমে ভৃগোঃ
চকার বৈ ধনুর্বেদে যত্নমদ্ভুতবিক্রমঃ
3.4
ততঃ কদাচিদ্রামস্তু চরন্নাশ্রমমন্তিকাৎ
কর্ণেন সহিতো ধীমানুপবাসেন কর্শিতঃ
3.5
সুষ্বাপ জামদগ্ন্যো বৈ বিস্রম্ভোত্পন্নসৌহৃদঃ
কর্ণস্যোত্সঙ্গ আধায় শিরঃ ক্লান্তমনা গুরুঃ
3.6
অথ কৃমিঃ শ্লেষ্মময়ো মাংসশোণিতভোজনঃ
দারুণো দারুণস্পর্শঃ কর্ণস্যাভ্যাশমাগমৎ
3.7
স তস্যোরুমথাসাদ্য বিভেদ রুধিরাশনঃ
ন চৈনমশকত্ক্ষেপ্তুং হন্তুং বাপি গুরোর্ভয়াৎ
3.8
সংদশ্যমানোঽপি তথা কৃমিণা তেন ভারত
গুরুপ্রবোধশঙ্কী চ তমুপৈক্ষত সূতজঃ
3.9
কর্ণস্তু বেদনাং ধৈর্যাদসহ্যাং বিনিগৃহ্য তাম্
অকম্পন্নব্যথংশ্চৈব ধারয়ামাস ভার্গবম্
3.10
যদা তু রুধিরেণাঙ্গে পরিস্পৃষ্টো ভৃগূদ্বহঃ
তদাবুধ্যত তেজস্বী সংতপ্তশ্চেদমব্রবীৎ
3.11
অহোঽস্ম্যশুচিতাং প্রাপ্তঃ কিমিদং ক্রিয়তে ত্বয়া
কথয়স্ব ভয়ং ত্যক্ত্বা যাথাতথ্যমিদং মম
3.12
তস্য কর্ণস্তদাচষ্ট কৃমিণা পরিভক্ষণম্
দদর্শ রামস্তং চাপি কৃমিং সূকরসংনিভম্
3.13
অষ্টপাদং তীক্ষ্ণদংষ্ট্রং সূচীভিরিব সংবৃতম্
রোমভিঃ সংনিরুদ্ধাঙ্গমলর্কং নাম নামতঃ
3.14
স দৃষ্টমাত্রো রামেণ কৃমিঃ প্রাণানবাসৃজৎ
তস্মিন্নেবাসৃক্সংক্লিন্নে তদদ্ভুতমিবাভবৎ
3.15
ততোঽন্তরিক্ষে দদৃশে বিশ্বরূপঃ করালবান্
রাক্ষসো লোহিতগ্রীবঃ কৃষ্ণাঙ্গো মেঘবাহনঃ
3.16
স রামং প্রাঞ্জলির্ভূত্বা বভাষে পূর্ণমানসঃ
স্বস্তি তে ভৃগুশার্দূল গমিষ্যামি যথাগতম্
3.17
মোক্ষিতো নরকাদস্মি ভবতা মুনিসত্তম
ভদ্রং চ তেঽস্তু নন্দিশ্চ প্রিয়ং মে ভবতা কৃতম্
3.18
তমুবাচ মহাবাহুর্জামদগ্ন্যঃ প্রতাপবান্
কস্ত্বং কস্মাচ্চ নরকং প্রতিপন্নো ব্রবীহি তৎ
3.19
সোঽব্রবীদহমাসং প্রাগ্গৃত্সো নাম মহাসুরঃ
পুরা দেবয়ুগে তাত ভৃগোস্তুল্যবয়া ইব
3.20
সোঽহং ভৃগোঃ সুদয়িতাং ভার্যামপহরং বলাৎ
মহর্ষেরভিশাপেন কৃমিভূতোঽপতং ভুবি
3.21
অব্রবীত্তু স মাং ক্রোধাত্তব পূর্বপিতামহঃ
মূত্রশ্লেষ্মাশনঃ পাপ নিরয়ং প্রতিপত্স্যসে
3.22
শাপস্যান্তো ভবেদ্ব্রহ্মন্নিত্যেবং তমথাব্রুবম্
ভবিতা ভার্গবে রাম ইতি মামব্রবীদ্ভৃগুঃ
3.23
সোঽহমেতাং গতিং প্রাপ্তো যথা নকুশলং তথা
ত্বয়া সাধো সমাগম্য বিমুক্তঃ পাপয়োনিতঃ
3.24
এবমুক্ত্বা নমস্কৃত্য যয়ৌ রামং মহাসুরঃ
রামঃ কর্ণং তু সক্রোধমিদং বচনমব্রবীৎ
3.25
অতিদুঃখমিদং মূঢ ন জাতু ব্রাহ্মণঃ সহেৎ
ক্ষত্রিয়স্যৈব তে ধৈর্যং কাময়া সত্যমুচ্যতাম্
3.26
তমুবাচ ততঃ কর্ণঃ শাপভীতঃ প্রসাদয়ন্
ব্রহ্মক্ষত্রান্তরে সূতং জাতং মাং বিদ্ধি ভার্গব
3.27
রাধেয়ঃ কর্ণ ইতি মাং প্রবদন্তি জনা ভুবি
প্রসাদং কুরু মে ব্রহ্মন্নস্ত্রলুব্ধস্য ভার্গব
3.28
পিতা গুরুর্ন সংদেহো বেদবিদ্যাপ্রদঃ প্রভুঃ
অতো ভার্গব ইত্যুক্তং ময়া গোত্রং তবান্তিকে
3.29
তমুবাচ ভৃগুশ্রেষ্ঠঃ সরোষঃ প্রহসন্নিব
ভূমৌ নিপতিতং দীনং বেপমানং কৃতাঞ্জলিম্
3.30
যস্মান্মিথ্যোপচরিতো অস্ত্রলোভাদিহ ত্বয়া
তস্মাদেতদ্ধি তে মূঢ ব্রহ্মাস্ত্রং প্রতিভাস্যতি
3.31
অন্যত্র বধকালাত্তে সদৃশেন সমেয়ুষঃ
অব্রাহ্মণে ন হি ব্রহ্ম ধ্রুবং তিষ্ঠেত্কদাচন
3.32
গচ্ছেদানীং ন তে স্থানমনৃতস্যেহ বিদ্যতে
ন ত্বয়া সদৃশো যুদ্ধে ভবিতা ক্ষত্রিয়ো ভুবি
3.33
এবমুক্তস্তু রামেণ ন্যায়েনোপজগাম সঃ
দুর্যোধনমুপাগম্য কৃতাস্ত্রোঽস্মীতি চাব্রবীৎ