অধ্যায় 2

2.1

বৈশংপায়ন উবাচ
স এবমুক্তস্তু মুনির্নারদো বদতাং বরঃ
কথয়ামাস তত্সর্বং যথা শপ্তঃ স সূতজঃ

2.2

এবমেতন্মহাবাহো যথা বদসি ভারত
ন কর্ণার্জুনয়োঃ কিংচিদবিষহ্যং ভবেদ্রণে

2.3

গুহ্যমেতত্তু দেবানাং কথয়িষ্যামি তে নৃপ
তন্নিবোধ মহারাজ যথা বৃত্তমিদং পুরা

2.4

ক্ষত্রং স্বর্গং কথং গচ্ছেচ্ছস্ত্রপূতমিতি প্রভো
সংঘর্ষজননস্তস্মাত্কন্যাগর্ভো বিনির্মিতঃ

2.5

স বালস্তেজসা যুক্তঃ সূতপুত্রত্বমাগতঃ
চকারাঙ্গিরসাং শ্রেষ্ঠে ধনুর্বেদং গুরৌ তব

2.6

স বলং ভীমসেনস্য ফল্গুনস্য চ লাঘবম্
বুদ্ধিং চ তব রাজেন্দ্র যময়োর্বিনয়ং তথা

2.7

সখ্যং চ বাসুদেবেন বাল্যে গাণ্ডীবধন্বনঃ
প্রজানামনুরাগং চ চিন্তয়ানো ব্যদহ্যত

2.8

স সখ্যমগমদ্বাল্যে রাজ্ঞা দুর্যোধনেন বৈ
যুষ্মাভির্নিত্যসংদ্বিষ্টো দৈবাচ্চাপি স্বভাবতঃ

2.9

বিদ্যাধিকমথালক্ষ্য ধনুর্বেদে ধনংজয়ম্
দ্রোণং রহস্যুপাগম্য কর্ণো বচনমব্রবীৎ

2.10

ব্রহ্মাস্ত্রং বেত্তুমিচ্ছামি সরহস্যনিবর্তনম্
অর্জুনেন সমো যুদ্ধে ভবেয়মিতি মে মতিঃ

2.11

সমঃ পুত্রেষু চ স্নেহঃ শিষ্যেষু চ তব ধ্রুবম্
ত্বত্প্রসাদান্ন মাং ব্রূয়ুরকৃতাস্ত্রং বিচক্ষণাঃ

2.12

দ্রোণস্তথোক্তঃ কর্ণেন সাপেক্ষঃ ফল্গুনং প্রতি
দৌরাত্ম্যং চাপি কর্ণস্য বিদিত্বা তমুবাচ হ

2.13

ব্রহ্মাস্ত্রং ব্রাহ্মণো বিদ্যাদ্যথাবচ্চরিতব্রতঃ
ক্ষত্রিয়ো বা তপস্বী যো নান্যো বিদ্যাত্কথংচন

2.14

ইত্যুক্তোঽঙ্গিরসাং শ্রেষ্ঠমামন্ত্র্য প্রতিপূজ্য চ
জগাম সহসা রামং মহেন্দ্রং পর্বতং প্রতি

2.15

স তু রামমুপাগম্য শিরসাভিপ্রণম্য চ
ব্রাহ্মণো ভার্গবোঽস্মীতি গৌরবেণাভ্যগচ্ছত

2.16

রামস্তং প্রতিজগ্রাহ পৃষ্ট্বা গোত্রাদি সর্বশঃ
উষ্যতাং স্বাগতং চেতি প্রীতিমাংশ্চাভবদ্ভৃশম্

2.17

তত্র কর্ণস্য বসতো মহেন্দ্রে পর্বতোত্তমে
গন্ধর্বৈ রাক্ষসৈর্যক্ষৈর্দেবৈশ্চাসীত্সমাগমঃ

2.18

স তত্রেষ্বস্ত্রমকরোদ্ভৃগুশ্রেষ্ঠাদ্যথাবিধি
প্রিয়শ্চাভবদত্যর্থং দেবগন্ধর্বরক্ষসাম্

2.19

স কদাচিত্সমুদ্রান্তে বিচরন্নাশ্রমান্তিকে
একঃ খড্গধনুষ্পাণিঃ পরিচক্রাম সূতজঃ

2.20

সোঽগ্নিহোত্রপ্রসক্তস্য কস্যচিদ্ব্রহ্মবাদিনঃ
জঘানাজ্ঞানতঃ পার্থ হোমধেনুং যদৃচ্ছয়া

2.21

তদজ্ঞানকৃতং মত্বা ব্রাহ্মণায় ন্যবেদয়ৎ
কর্ণঃ প্রসাদয়ংশ্চৈনমিদমিত্যব্রবীদ্বচঃ

2.22

অবুদ্ধিপূর্বং ভগবন্ধেনুরেষা হতা তব
ময়া তত্র প্রসাদং মে কুরুষ্বেতি পুনঃ পুনঃ

2.23

তং স বিপ্রোঽব্রবীত্ক্রুদ্ধো বাচা নির্ভর্ত্সয়ন্নিব
দুরাচার বধার্হস্ত্বং ফলং প্রাপ্নুহি দুর্মতে

2.24

যেন বিস্পর্ধসে নিত্যং যদর্থং ঘটসেঽনিশম্
যুধ্যতস্তেন তে পাপ ভূমিশ্চক্রং গ্রসিষ্যতি

2.25

ততশ্চক্রে মহীগ্রস্তে মূর্ধানং তে বিচেতসঃ
পাতয়িষ্যতি বিক্রম্য শত্রুর্গচ্ছ নরাধম

2.26

যথেয়ং গৌর্হতা মূঢ প্রমত্তেন ত্বয়া মম
প্রমত্তস্যৈবমেবান্যঃ শিরস্তে পাতয়িষ্যতি

2.27

ততঃ প্রসাদয়ামাস পুনস্তং দ্বিজসত্তমম্
গোভির্ধনৈশ্চ রত্নৈশ্চ স চৈনং পুনরব্রবীৎ

2.28

নেদং মদ্ব্যাহৃতং কুর্যাত্সর্বলোকোঽপি বৈ মৃষা
গচ্ছ বা তিষ্ঠ বা যদ্বা কার্যং তে তত্সমাচর

2.29

ইত্যুক্তো ব্রাহ্মণেনাথ কর্ণো দৈন্যাদধোমুখঃ
রামমভ্যাগমদ্ভীতস্তদেব মনসা স্মরন্

Contains text from DharmicData, made available under the Open Database License (ODbL). Simple meanings are written by AI and can contain mistakes.