Utshovঅধ্যায় 1
1.1
বৈশংপায়ন উবাচ
কৃতোদকাস্তে সুহৃদাং সর্বেষাং পাণ্ডুনন্দনাঃ
বিদুরো ধৃতরাষ্ট্রশ্চ সর্বাশ্চ ভরতস্ত্রিয়ঃ
1.2
তত্র তে সুমহাত্মানো ন্যবসন্কুরুনন্দনাঃ
শৌচং নিবর্তয়িষ্যন্তো মাসমেকং বহিঃ পুরাৎ
1.3
কৃতোদকং তু রাজানং ধর্মাত্মানং যুধিষ্ঠিরম্
অভিজগ্মুর্মহাত্মানঃ সিদ্ধা ব্রহ্মর্ষিসত্তমাঃ
1.4
দ্বৈপায়নো নারদশ্চ দেবলশ্চ মহানৃষিঃ
দেবস্থানশ্চ কণ্বশ্চ তেষাং শিষ্যাশ্চ সত্তমাঃ
1.5
অন্যে চ বেদবিদ্বাংসঃ কৃতপ্রজ্ঞা দ্বিজাতয়ঃ
গৃহস্থাঃ স্নাতকাঃ সর্বে দদৃশুঃ কুরুসত্তমম্
1.6
অভিগম্য মহাত্মানঃ পূজিতাশ্চ যথাবিধি
আসনেষু মহার্হেষু বিবিশুস্তে মহর্ষয়ঃ
1.7
প্রতিগৃহ্য ততঃ পূজাং তত্কালসদৃশীং তদা
পর্যুপাসন্যথান্যায়ং পরিবার্য যুধিষ্ঠিরম্
1.8
পুণ্যে ভাগীরথীতীরে শোকব্যাকুলচেতসম্
আশ্বাসয়ন্তো রাজানং বিপ্রাঃ শতসহস্রশঃ
1.9
নারদস্ত্বব্রবীত্কালে ধর্মাত্মানং যুধিষ্ঠিরম্
বিচার্য মুনিভিঃ সার্ধং তত্কালসদৃশং বচঃ
1.10
ভবতো বাহুবীর্যেণ প্রসাদান্মাধবস্য চ
জিতেয়মবনিঃ কৃত্স্না ধর্মেণ চ যুধিষ্ঠির
1.11
দিষ্ট্যা মুক্তাঃ স্থ সংগ্রামাদস্মাল্লোকভয়ংকরাৎ
ক্ষত্রধর্মরতশ্চাপি কচ্চিন্মোদসি পাণ্ডব
1.12
কচ্চিচ্চ নিহতামিত্রঃ প্রীণাসি সুহৃদো নৃপ
কচ্চিচ্ছ্রিয়মিমাং প্রাপ্য ন ত্বাং শোকঃ প্রবাধতে
1.13
যুধিষ্ঠির উবাচ
বিজিতেয়ং মহী কৃত্স্না কৃষ্ণবাহুবলাশ্রয়াৎ
ব্রাহ্মণানাং প্রসাদেন ভীমার্জুনবলেন চ
1.14
ইদং তু মে মহদ্দুঃখং বর্ততে হৃদি নিত্যদা
কৃত্বা জ্ঞাতিক্ষয়মিমং মহান্তং লোভকারিতম্
1.15
সৌভদ্রং দ্রৌপদেয়াংশ্চ ঘাতয়িত্বা প্রিয়ান্সুতান্
জয়োঽয়মজয়াকারো ভগবন্প্রতিভাতি মে
1.16
কিং নু বক্ষ্যতি বার্ষ্ণেয়ী বধূর্মে মধুসূদনম্
দ্বারকাবাসিনী কৃষ্ণমিতঃ প্রতিগতং হরিম্
1.17
দ্রৌপদী হতপুত্রেয়ং কৃপণা হতবান্ধবা
অস্মত্প্রিয়হিতে যুক্তা ভূয়ঃ পীডয়তীব মাম্
1.18
ইদমন্যচ্চ ভগবন্যত্ত্বাং বক্ষ্যামি নারদ
মন্ত্রসংবরণেনাস্মি কুন্ত্যা দুঃখেন যোজিতঃ
1.19
যোঽসৌ নাগায়ুতবলো লোকেঽপ্রতিরথো রণে
সিংহখেলগতির্ধীমান্ঘৃণী দান্তো যতব্রতঃ
1.20
আশ্রয়ো ধার্তরাষ্ট্রাণাং মানী তীক্ষ্ণপরাক্রমঃ
অমর্ষী নিত্যসংরম্ভী ক্ষেপ্তাস্মাকং রণে রণে
1.21
শীঘ্রাস্ত্রশ্চিত্রয়োধী চ কৃতী চাদ্ভুতবিক্রমঃ
গূঢোত্পন্নঃ সুতঃ কুন্ত্যা ভ্রাতাস্মাকং চ সোদরঃ
1.22
তোয়কর্মণি যং কুন্তী কথয়ামাস সূর্যজম্
পুত্রং সর্বগুণোপেতমবকীর্ণং জলে পুরা
1.23
যং সূতপুত্রং লোকোঽয়ং রাধেয়ং চাপ্যমন্যত
স জ্যেষ্ঠপুত্রঃ কুন্ত্যা বৈ ভ্রাতাস্মাকং চ মাতৃজঃ
1.24
অজানতা ময়া সংখ্যে রাজ্যলুব্ধেন ঘাতিতঃ
তন্মে দহতি গাত্রাণি তূলরাশিমিবানলঃ
1.25
ন হি তং বেদ পার্থোঽপি ভ্রাতরং শ্বেতবাহনঃ
নাহং ন ভীমো ন যমৌ স ত্বস্মান্বেদ সুব্রতঃ
1.26
গতা কিল পৃথা তস্য সকাশমিতি নঃ শ্রুতম্
অস্মাকং শমকামা বৈ ত্বং চ পুত্রো মমেত্যথ
1.27
পৃথায়া ন কৃতঃ কামস্তেন চাপি মহাত্মনা
অতিপশ্চাদিদং মাতর্যবোচদিতি নঃ শ্রুতম্
1.28
ন হি শক্ষ্যাম্যহং ত্যক্তুং নৃপং দুর্যোধনং রণে
অনার্যং চ নৃশংসং চ কৃতঘ্নং চ হি মে ভবেৎ
1.29
যুধিষ্ঠিরেণ সংধিং চ যদি কুর্যাং মতে তব
ভীতো রণে শ্বেতবাহাদিতি মাং মংস্যতে জনঃ
1.30
সোঽহং নির্জিত্য সমরে বিজয়ং সহকেশবম্
সংধাস্যে ধর্মপুত্রেণ পশ্চাদিতি চ সোঽব্রবীৎ
1.31
তমবোচত্কিল পৃথা পুনঃ পৃথুলবক্ষসম্
চতুর্ণামভয়ং দেহি কামং যুধ্যস্ব ফল্গুনম্
1.32
সোঽব্রবীন্মাতরং ধীমান্বেপমানঃ কৃতাঞ্জলিঃ
প্রাপ্তান্বিষহ্যাংশ্চতুরো ন হনিষ্যামি তে সুতান্
1.33
পঞ্চৈব হি সুতা মাতর্ভবিষ্যন্তি হি তে ধ্রুবম্
সকর্ণা বা হতে পার্থে সার্জুনা বা হতে ময়ি
1.34
তং পুত্রগৃদ্ধিনী ভূয়ো মাতা পুত্রমথাব্রবীৎ
ভ্রাতৄণাং স্বস্তি কুর্বীথা যেষাং স্বস্তি চিকীর্ষসি
1.35
তমেবমুক্ত্বা তু পৃথা বিসৃজ্যোপয়য়ৌ গৃহান্
সোঽর্জুনেন হতো বীরো ভ্রাতা ভ্রাত্রা সহোদরঃ
1.36
ন চৈব বিবৃতো মন্ত্রঃ পৃথায়াস্তস্য বা মুনে
অথ শূরো মহেষ্বাসঃ পার্থেনাসৌ নিপাতিতঃ
1.37
অহং ত্বজ্ঞাসিষং পশ্চাত্স্বসোদর্যং দ্বিজোত্তম
পূর্বজং ভ্রাতরং কর্ণং পৃথায়া বচনাত্প্রভো
1.38
তেন মে দূয়তেঽতীব হৃদয়ং ভ্রাতৃঘাতিনঃ
কর্ণার্জুনসহায়োঽহং জয়েয়মপি বাসবম্
1.39
সভায়াং ক্লিশ্যমানস্য ধার্তরাষ্ট্রৈর্দুরাত্মভিঃ
সহসোত্পতিতঃ ক্রোধঃ কর্ণং দৃষ্ট্বা প্রশাম্যতি
1.40
যদা হ্যস্য গিরো রূক্ষাঃ শৃণোমি কটুকোদয়াঃ
সভায়াং গদতো দ্যূতে দুর্যোধনহিতৈষিণঃ
1.41
তদা নশ্যতি মে ক্রোধঃ পাদৌ তস্য নিরীক্ষ্য হ
কুন্ত্যা হি সদৃশৌ পাদৌ কর্ণস্যেতি মতির্মম
1.42
সাদৃশ্যহেতুমন্বিচ্ছন্পৃথায়াস্তব চৈব হ
কারণং নাধিগচ্ছামি কথংচিদপি চিন্তয়ন্
1.43
কথং নু তস্য সংগ্রামে পৃথিবী চক্রমগ্রসৎ
কথং চ শপ্তো ভ্রাতা মে তত্ত্বং বক্তুমিহার্হসি
1.44
শ্রোতুমিচ্ছামি ভগবংস্ত্বত্তঃ সর্বং যথাতথম্
ভবান্হি সর্ববিদ্বিদ্বাঁল্লোকে বেদ কৃতাকৃতম্