অধ্যায় 352

352.1

ব্রাহ্মণ উবাচ
আশ্চর্যং নাত্র সংদেহঃ সুপ্রীতোঽস্মি ভুজংগম
অন্বর্থোপগতৈর্বাক্যৈঃ পন্থানং চাস্মি দর্শিতঃ

স্বস্তি তেঽস্তু গমিষ্যামি সাধো ভুজগসত্তম
স্মরণীয়োঽস্মি ভবতা সংপ্রেষণনিয়োজনৈঃ

নাগ উবাচ
অনুক্ত্বা মদ্গতং কার্যং ক্বেদানীং প্রস্থিতো ভবান্
উচ্যতাং দ্বিজ যত্কার্যং যদর্থং ত্বমিহাগতঃ

উক্তানুক্তে কৃতে কার্যে মামামন্ত্র্য দ্বিজর্ষভ
ময়া প্রত্যভ্যনুজ্ঞাতস্ততো যাস্যসি ব্রাহ্মণ

ন হি মাং কেবলং দৃষ্ট্বা ত্যক্ত্বা প্রণয়বানিহ
গন্তুমর্হসি বিপ্রর্ষে বৃক্ষমূলগতো যথা

ত্বয়ি চাহং দ্বিজশ্রেষ্ঠ ভবান্ময়ি ন সংশয়ঃ
লোকোঽয়ং ভবতঃ সর্বঃ কা চিন্তা ময়ি তেঽনঘ

ব্রাহ্মণ উবাচ
এবমেতন্মহাপ্রাজ্ঞ বিজ্ঞাতার্থ ভুজংগম
নাতিরিক্তাস্ত্বয়া দেবাঃ সর্বথৈব যথাতথম্

য এবাহং স এব ত্বমেবমেতদ্ভুজংগম
অহং ভবাংশ্চ ভূতানি সর্বে সর্বত্রগাঃ সদা

আসীত্তু মে ভোগপতে সংশয়ঃ পুণ্যসংচয়ে
সোঽহমুঞ্ছব্রতং সাধো চরিষ্যাম্যর্থদর্শনম্

এষ মে নিশ্চয়ঃ সাধো কৃতঃ কারণবত্তরঃ
আমন্ত্রয়ামি ভদ্রং তে কৃতার্থোঽস্মি ভুজংগম