অধ্যায় 353

353.1

ভীষ্ম উবাচ
স চামন্ত্র্যোরগশ্রেষ্ঠং ব্রাহ্মণঃ কৃতনিশ্চয়ঃ
দীক্ষাকাঙ্ক্ষী তদা রাজংশ্চ্যবনং ভার্গবং শ্রিতঃ

স তেন কৃতসংস্কারো ধর্মমেবোপতস্থিবান্
তথৈব চ কথামেতাং রাজন্কথিতবাংস্তদা

ভার্গবেণাপি রাজেন্দ্র জনকস্য নিবেশনে
কথৈষা কথিতা পুণ্যা নারদায় মহাত্মনে

নারদেনাপি রাজেন্দ্র দেবেন্দ্রস্য নিবেশনে
কথিতা ভরতশ্রেষ্ঠ পৃষ্টেনাক্লিষ্টকর্মণা

দেবরাজেন চ পুরা কথৈষা কথিতা শুভা
সমস্তেভ্যঃ প্রশস্তেভ্যো বসুভ্যো বসুধাধিপ

যদা চ মম রামেণ যুদ্ধমাসীত্সুদারুণম্
বসুভিশ্চ তদা রাজন্কথেয়ং কথিতা মম

পৃচ্ছমানায় তত্ত্বেন ময়া তুভ্যং বিশাং পতে
কথেয়ং কথিতা পুণ্যা ধর্ম্যা ধর্মভৃতাং বর

তদেষ পরমো ধর্মো যন্মাং পৃচ্ছসি ভারত
অসন্নধীরনাকাঙ্ক্ষী ধর্মার্থকরণে নৃপ

স চ কিল কৃতনিশ্চয়ো দ্বিজাগ্র্যো; ভুজগপতিপ্রতিদেশিতার্থকৃত্যঃ
যমনিয়মসমাহিতো বনান্তং; পরিগণিতোঞ্ছশিলাশনঃ প্রবিষ্টঃ