Utshovঅধ্যায় 323
323.1
ভীষ্ম উবাচ
ততোঽতীতে মহাকল্পে উত্পন্নেঽঙ্গিরসঃ সুতে
বভূবুর্নির্বৃতা দেবা জাতে দেবপুরোহিতে
323.2
বৃহদ্ব্রহ্ম মহচ্চেতি শব্দাঃ পর্যায়বাচকাঃ
এভিঃ সমন্বিতো রাজন্গুণৈর্বিদ্বান্বৃহস্পতিঃ
323.3
তস্য শিষ্যো বভূবাগ্র্যো রাজোপরিচরো বসুঃ
অধীতবাংস্তদা শাস্ত্রং সম্যক্চিত্রশিখণ্ডিজম্
323.4
স রাজা ভাবিতঃ পূর্বং দৈবেন বিধিনা বসুঃ
পালয়ামাস পৃথিবীং দিবমাখণ্ডলো যথা
323.5
তস্য যজ্ঞো মহানাসীদশ্বমেধো মহাত্মনঃ
বৃহস্পতিরুপাধ্যায়স্তত্র হোতা বভূব হ
323.6
প্রজাপতিসুতাশ্চাত্র সদস্যাস্ত্বভবংস্ত্রয়ঃ
একতশ্চ দ্বিতশ্চৈব ত্রিতশ্চৈব মহর্ষয়ঃ
323.7
ধনুষাক্ষোঽথ রৈভ্যশ্চ অর্বাবসুপরাবসূ
ঋষির্মেধাতিথিশ্চৈব তাণ্ড্যশ্চৈব মহানৃষিঃ
323.8
ঋষিঃ শক্তির্মহাভাগস্তথা বেদশিরাশ্চ যঃ
কপিলশ্চ ঋষিশ্রেষ্ঠঃ শালিহোত্রপিতামহঃ
323.9
আদ্যঃ কঠস্তৈত্তিরিশ্চ বৈশংপায়নপূর্বজঃ
কণ্বোঽথ দেবহোত্রশ্চ এতে ষোডশ কীর্তিতাঃ
সংভৃতাঃ সর্বসংভারাস্তস্মিন্রাজন্মহাক্রতৌ
323.10
ন তত্র পশুঘাতোঽভূত্স রাজৈবং স্থিতোঽভবৎ
অহিংস্রঃ শুচিরক্ষুদ্রো নিরাশীঃ কর্মসংস্তুতঃ
আরণ্যকপদোদ্গীতা ভাগাস্তত্রোপকল্পিতাঃ
323.11
প্রীতস্ততোঽস্য ভগবান্দেবদেবঃ পুরাতনঃ
সাক্ষাত্তং দর্শয়ামাস সোঽদৃশ্যোঽন্যেন কেনচিৎ
323.12
স্বয়ং ভাগমুপাঘ্রায় পুরোডাশং গৃহীতবান্
অদৃশ্যেন হৃতো ভাগো দেবেন হরিমেধসা
323.13
বৃহস্পতিস্ততঃ ক্রুদ্ধঃ স্রুবমুদ্যম্য বেগিতঃ
আকাশং ঘ্নন্স্রুবঃ পাতৈ রোষাদশ্রূণ্যবর্তয়ৎ
323.14
উবাচ চোপরিচরং ময়া ভাগোঽয়মুদ্যতঃ
গ্রাহ্যঃ স্বয়ং হি দেবেন মত্প্রত্যক্ষং ন সংশয়ঃ
323.15
উদ্যতা যজ্ঞভাগা হি সাক্ষাত্প্রাপ্তাঃ সুরৈরিহ
কিমর্থমিহ ন প্রাপ্তো দর্শনং স হরির্বিভুঃ
323.16
ততঃ স তং সমুদ্ধূতং ভূমিপালো মহান্বসুঃ
প্রসাদয়ামাস মুনিং সদস্যাস্তে চ সর্বশঃ
323.17
ঊচুশ্চৈনমসংভ্রান্তা ন রোষং কর্তুমর্হসি
নৈষ ধর্মঃ কৃতয়ুগে যস্ত্বং রোষমচীকৃথাঃ
323.18
অরোষণো হ্যসৌ দেবো যস্য ভাগোঽয়মুদ্যতঃ
ন স শক্যস্ত্বয়া দ্রষ্টুমস্মাভির্বা বৃহস্পতে
যস্য প্রসাদং কুরুতে স বৈ তং দ্রষ্টুমর্হতি
323.19
একতদ্বিতত্রিতা ঊচুঃ
বয়ং হি ব্রহ্মণঃ পুত্রা মানসাঃ পরিকীর্তিতাঃ
গতা নিঃশ্রেয়সার্থং হি কদাচিদ্দিশমুত্তরাম্
323.20
তপ্ত্বা বর্ষসহস্রাণি চত্বারি তপ উত্তমম্
একপাদস্থিতাঃ সম্যক্কাষ্ঠভূতাঃ সমাহিতাঃ
323.21
মেরোরুত্তরভাগে তু ক্ষীরোদস্যানুকূলতঃ
স দেশো যত্র নস্তপ্তং তপঃ পরমদারুণম্
কথং পশ্যেমহি বয়ং দেবং নারায়ণং ত্বিতি
323.22
ততো ব্রতস্যাবভৃথে বাগুবাচাশরীরিণী
সুতপ্তং বস্তপো বিপ্রাঃ প্রসন্নেনান্তরাত্মনা
323.23
যূয়ং জিজ্ঞাসবো ভক্তাঃ কথং দ্রক্ষ্যথ তং প্রভুম্
ক্ষীরোদধেরুত্তরতঃ শ্বেতদ্বীপো মহাপ্রভঃ
323.24
তত্র নারায়ণপরা মানবাশ্চন্দ্রবর্চসঃ
একান্তভাবোপগতাস্তে ভক্তাঃ পুরুষোত্তমম্
323.25
তে সহস্রার্চিষং দেবং প্রবিশন্তি সনাতনম্
অতীন্দ্রিয়া নিরাহারা অনিষ্পন্দাঃ সুগন্ধিনঃ
323.26
একান্তিনস্তে পুরুষাঃ শ্বেতদ্বীপনিবাসিনঃ
গচ্ছধ্বং তত্র মুনয়স্তত্রাত্মা মে প্রকাশিতঃ
323.27
অথ শ্রুত্বা বয়ং সর্বে বাচং তামশরীরিণীম্
যথাখ্যাতেন মার্গেণ তং দেশং প্রতিপেদিরে
323.28
প্রাপ্য শ্বেতং মহাদ্বীপং তচ্চিত্তাস্তদ্দিদৃক্ষবঃ
ততো নো দৃষ্টিবিষয়স্তদা প্রতিহতোঽভবৎ
323.29
ন চ পশ্যাম পুরুষং তত্তেজোহৃতদর্শনাঃ
ততো নঃ প্রাদুরভবদ্বিজ্ঞানং দেবয়োগজম্
323.30
ন কিলাতপ্ততপসা শক্যতে দ্রষ্টুমঞ্জসা
ততঃ পুনর্বর্ষশতং তপ্ত্বা তাত্কালিকং মহৎ
323.31
ব্রতাবসানে সুশুভান্নরান্দদৃশিরে বয়ম্
শ্বেতাংশ্চন্দ্রপ্রতীকাশান্সর্বলক্ষণলক্ষিতান্
323.32
নিত্যাঞ্জলিকৃতান্ব্রহ্ম জপতঃ প্রাগুদঙ্মুখান্
মানসো নাম স জপো জপ্যতে তৈর্মহাত্মভিঃ
তেনৈকাগ্রমনস্ত্বেন প্রীতো ভবতি বৈ হরিঃ
323.33
যা ভবেন্মুনিশার্দূল ভাঃ সূর্যস্য যুগক্ষয়ে
একৈকস্য প্রভা তাদৃক্সাভবন্মানবস্য হ
323.34
তেজোনিবাসঃ স দ্বীপ ইতি বৈ মেনিরে বয়ম্
ন তত্রাভ্যধিকঃ কশ্চিত্সর্বে তে সমতেজসঃ
323.35
অথ সূর্যসহস্রস্য প্রভাং যুগপদুত্থিতাম্
সহসা দৃষ্টবন্তঃ স্ম পুনরেব বৃহস্পতে
323.36
সহিতাশ্চাভ্যধাবন্ত ততস্তে মানবা দ্রুতম্
কৃতাঞ্জলিপুটা হৃষ্টা নম ইত্যেব বাদিনঃ
323.37
ততোঽভিবদতাং তেষামশ্রৌষ্ম বিপুলং ধ্বনিম্
বলিঃ কিলোপহ্রিয়তে তস্য দেবস্য তৈর্নরৈঃ
323.38
বয়ং তু তেজসা তস্য সহসা হৃতচেতসঃ
ন কিংচিদপি পশ্যামো হৃতদৃষ্টিবলেন্দ্রিয়াঃ
323.39
একস্তু শব্দোঽবিরতঃ শ্রুতোঽস্মাভিরুদীরিতঃ
জিতং তে পুণ্ডরীকাক্ষ নমস্তে বিশ্বভাবন
323.40
নমস্তেঽস্তু হৃষীকেশ মহাপুরুষপূর্বজ
ইতি শব্দঃ শ্রুতোঽস্মাভিঃ শিক্ষাক্ষরসমীরিতঃ
323.41
এতস্মিন্নন্তরে বায়ুঃ সর্বগন্ধবহঃ শুচিঃ
দিব্যান্যুবাহ পুষ্পাণি কর্মণ্যাশ্চৌষধীস্তথা
323.42
তৈরিষ্টঃ পঞ্চকালজ্ঞৈর্হরিরেকান্তিভির্নরৈঃ
নূনং তত্রাগতো দেবো যথা তৈর্বাগুদীরিতা
বয়ং ত্বেনং ন পশ্যামো মোহিতাস্তস্য মায়য়া
323.43
মারুতে সংনিবৃত্তে চ বলৌ চ প্রতিপাদিতে
চিন্তাব্যাকুলিতাত্মানো জাতাঃ স্মোঽঙ্গিরসাং বর
323.44
মানবানাং সহস্রেষু তেষু বৈ শুদ্ধয়োনিষু
অস্মান্ন কশ্চিন্মনসা চক্ষুষা বাপ্যপূজয়ৎ
323.45
তেঽপি স্বস্থা মুনিগণা একভাবমনুব্রতাঃ
নাস্মাসু দধিরে ভাবং ব্রহ্মভাবমনুষ্ঠিতাঃ
323.46
ততোঽস্মান্সুপরিশ্রান্তাংস্তপসা চাপি কর্শিতান্
উবাচ খস্থং কিমপি ভূতং তত্রাশরীরকম্
323.47
দৃষ্টা বঃ পুরুষাঃ শ্বেতাঃ সর্বেন্দ্রিয়বিবর্জিতাঃ
দৃষ্টো ভবতি দেবেশ এভির্দৃষ্টৈর্দ্বিজোত্তমাঃ
323.48
গচ্ছধ্বং মুনয়ঃ সর্বে যথাগতমিতোঽচিরাৎ
ন স শক্যো অভক্তেন দ্রষ্টুং দেবঃ কথংচন
323.49
কামং কালেন মহতা একান্তিত্বং সমাগতৈঃ
শক্যো দ্রষ্টুং স ভগবান্প্রভামণ্ডলদুর্দৃশঃ
323.50
মহত্কার্যং তু কর্তব্যং যুষ্মাভির্দ্বিজসত্তমাঃ
ইতঃ কৃতয়ুগেঽতীতে বিপর্যাসং গতেঽপি চ
323.51
বৈবস্বতেঽন্তরে বিপ্রাঃ প্রাপ্তে ত্রেতায়ুগে ততঃ
সুরাণাং কার্যসিদ্ধ্যর্থং সহায়া বৈ ভবিষ্যথ
323.52
ততস্তদদ্ভুতং বাক্যং নিশম্যৈবং স্ম সোমপ
তস্য প্রসাদাত্প্রাপ্তাঃ স্মো দেশমীপ্সিতমঞ্জসা
323.53
এবং সুতপসা চৈব হব্যকব্যৈস্তথৈব চ
দেবোঽস্মাভির্ন দৃষ্টঃ স কথং ত্বং দ্রষ্টুমর্হসি
নারায়ণো মহদ্ভূতং বিশ্বসৃগ্ঘব্যকব্যভুক্
323.54
ভীষ্ম উবাচ
এবমেকতবাক্যেন দ্বিতত্রিতমতেন চ
অনুনীতঃ সদস্যৈশ্চ বৃহস্পতিরুদারধীঃ
সমানীয় ততো যজ্ঞং দৈবতং সমপূজয়ৎ
323.55
সমাপ্তয়জ্ঞো রাজাপি প্রজাঃ পালিতবান্বসুঃ
ব্রহ্মশাপাদ্দিবো ভ্রষ্টঃ প্রবিবেশ মহীং ততঃ
323.56
অন্তর্ভূমিগতশ্চৈব সততং ধর্মবত্সলঃ
নারায়ণপরো ভূত্বা নারায়ণপদং জগৌ
323.57
তস্যৈব চ প্রসাদেন পুনরেবোত্থিতস্তু সঃ
মহীতলাদ্গতঃ স্থানং ব্রহ্মণঃ সমনন্তরম্
পরাং গতিমনুপ্রাপ্ত ইতি নৈষ্ঠিকমঞ্জসা