Utshovঅধ্যায় 322
322.1
ভীষ্ম উবাচ
স এবমুক্তো দ্বিপদাং বরিষ্ঠো; নারায়ণেনোত্তমপূরুষেণ
জগাদ বাক্যং দ্বিপদাং বরিষ্ঠং; নারায়ণং লোকহিতাধিবাসম্
322.2
যদর্থমাত্মপ্রভবেহ জন্ম; তবোত্তমং ধর্মগৃহে চতুর্ধা
তত্সাধ্যতাং লোকহিতার্থমদ্য; গচ্ছামি দ্রষ্টুং প্রকৃতিং তবাদ্যাম্
322.3
বেদাঃ স্বধীতা মম লোকনাথ; তপ্তং তপো নানৃতমুক্তপূর্বম্
পূজাং গুরূণাং সততং করোমি; পরস্য গুহ্যং ন চ ভিন্নপূর্বম্
322.4
গুপ্তানি চত্বারি যথাগমং মে; শত্রৌ চ মিত্রে চ সমোঽস্মি নিত্যম্
তং চাদিদেবং সততং প্রপন্ন; একান্তভাবেন বৃণোম্যজস্রম্
এভির্বিশেষৈঃ পরিশুদ্ধসত্ত্বঃ; কস্মান্ন পশ্যেয়মনন্তমীশম্
322.5
তত্পারমেষ্ঠ্যস্য বচো নিশম্য; নারায়ণঃ সাত্বতধর্মগোপ্তা
গচ্ছেতি তং নারদমুক্তবান্স; সংপূজয়িত্বাত্মবিধিক্রিয়াভিঃ
322.6
ততো বিসৃষ্টঃ পরমেষ্ঠিপুত্রঃ; সোঽভ্যর্চয়িত্বা তমৃষিং পুরাণম্
খমুত্পপাতোত্তমবেগয়ুক্ত;স্ততোঽধিমেরৌ সহসা নিলিল্যে
322.7
তত্রাবতস্থে চ মুনির্মুহূর্ত;মেকান্তমাসাদ্য গিরেঃ স শৃঙ্গে
আলোকয়ন্নুত্তরপশ্চিমেন; দদর্শ চাত্যদ্ভুতরূপয়ুক্তম্
322.8
ক্ষীরোদধেরুত্তরতো হি দ্বীপঃ; শ্বেতঃ স নাম্না প্রথিতো বিশালঃ
মেরোঃ সহস্রৈঃ স হি যোজনানাং; দ্বাত্রিংশতোর্ধ্বং কবিভির্নিরুক্তঃ
322.9
অতীন্দ্রিয়াশ্চানশনাশ্চ তত্র; নিষ্পন্দহীনাঃ সুসুগন্ধিনশ্চ
শ্বেতাঃ পুমাংসো গতসর্বপাপা;শ্চক্ষুর্মুষঃ পাপকৃতাং নরাণাম্
322.10
বজ্রাস্থিকায়াঃ সমমানোন্মানা; দিব্যান্বয়রূপাঃ শুভসারোপেতাঃ
ছত্রাকৃতিশীর্ষা মেঘৌঘনিনাদাঃ; সত্পুষ্করচতুষ্কা রাজীবশতপাদাঃ
322.11
ষষ্ট্যা দন্তৈর্যুক্তাঃ শুক্লৈ;রষ্টাভির্দংষ্ট্রাভির্যে
জিহ্বাভির্যে বিষ্বগ্বক্ত্রং; লেলিহ্যন্তে সূর্যপ্রখ্যম্
322.12
ভক্ত্যা দেবং বিশ্বোত্পন্নং; যস্মাত্সর্বে লোকাঃ সূতাঃ
বেদা ধর্মা মুনয়ঃ শান্তা; দেবাঃ সর্বে তস্য বিসর্গাঃ
322.13
যুধিষ্ঠির উবাচ
অতীন্দ্রিয়া নিরাহারা অনিষ্পন্দাঃ সুগন্ধিনঃ
কথং তে পুরুষা জাতাঃ কা তেষাং গতিরুত্তমা
322.14
যে বিমুক্তা ভবন্তীহ নরা ভরতসত্তম
তেষাং লক্ষণমেতদ্ধি যচ্ছ্বেতদ্বীপবাসিনাম্
322.15
তস্মান্মে সংশয়ং ছিন্ধি পরং কৌতূহলং হি মে
ত্বং হি সর্বকথারামস্ত্বাং চৈবোপাশ্রিতা বয়ম্
322.16
ভীষ্ম উবাচ
বিস্তীর্ণৈষা কথা রাজঞ্শ্রুতা মে পিতৃসংনিধৌ
সৈষা তব হি বক্তব্যা কথাসারো হি স স্মৃতঃ
322.17
রাজোপরিচরো নাম বভূবাধিপতির্ভুবঃ
আখণ্ডলসখঃ খ্যাতো ভক্তো নারায়ণং হরিম্
322.18
ধার্মিকো নিত্যভক্তশ্চ পিতৄন্নিত্যমতন্দ্রিতঃ
সাম্রাজ্যং তেন সংপ্রাপ্তং নারায়ণবরাত্পুরা
322.19
সাত্বতং বিধিমাস্থায় প্রাক্সূর্যমুখনিঃসৃতম্
পূজয়ামাস দেবেশং তচ্ছেষেণ পিতামহান্
322.20
পিতৃশেষেণ বিপ্রাংশ্চ সংবিভজ্যাশ্রিতাংশ্চ সঃ
শেষান্নভুক্সত্যপরঃ সর্বভূতেষ্বহিংসকঃ
সর্বভাবেন ভক্তঃ স দেবদেবং জনার্দনম্
322.21
তস্য নারায়ণে ভক্তিং বহতোঽমিত্রকর্শন
একশয্যাসনং শক্রো দত্তবান্দেবরাট্স্বয়ম্
322.22
আত্মা রাজ্যং ধনং চৈব কলত্রং বাহনানি চ
এতদ্ভগবতে সর্বমিতি তত্প্রেক্ষিতং সদা
322.23
কাম্যনৈমিত্তিকাজস্রং যজ্ঞিয়াঃ পরমক্রিয়াঃ
সর্বাঃ সাত্বতমাস্থায় বিধিং চক্রে সমাহিতঃ
322.24
পঞ্চরাত্রবিদো মুখ্যাস্তস্য গেহে মহাত্মনঃ
প্রায়ণং ভগবত্প্রোক্তং ভুঞ্জতে চাগ্রভোজনম্
322.25
তস্য প্রশাসতো রাজ্যং ধর্মেণামিত্রঘাতিনঃ
নানৃতা বাক্সমভবন্মনো দুষ্টং ন চাভবৎ
ন চ কায়েন কৃতবান্স পাপং পরমণ্বপি
322.26
যে হি তে মুনয়ঃ খ্যাতাঃ সপ্ত চিত্রশিখণ্ডিনঃ
তৈরেকমতিভির্ভূত্বা যত্প্রোক্তং শাস্ত্রমুত্তমম্
322.27
মরীচিরত্র্যঙ্গিরসৌ পুলস্ত্যঃ পুলহঃ ক্রতুঃ
বসিষ্ঠশ্চ মহাতেজা এতে চিত্রশিখণ্ডিনঃ
322.28
সপ্ত প্রকৃতয়ো হ্যেতাস্তথা স্বায়ংভুবোঽষ্টমঃ
এতাভির্ধার্যতে লোকস্তাভ্যঃ শাস্ত্রং বিনিঃসৃতম্
322.29
একাগ্রমনসো দান্তা মুনয়ঃ সংয়মে রতাঃ
ইদং শ্রেয় ইদং ব্রহ্ম ইদং হিতমনুত্তমম্
লোকান্সংচিন্ত্য মনসা ততঃ শাস্ত্রং প্রচক্রিরে
322.30
তত্র ধর্মার্থকামা হি মোক্ষঃ পশ্চাচ্চ কীর্তিতঃ
মর্যাদা বিবিধাশ্চৈব দিবি ভূমৌ চ সংস্থিতাঃ
322.31
আরাধ্য তপসা দেবং হরিং নারায়ণং প্রভুম্
দিব্যং বর্ষসহস্রং বৈ সর্বে তে ঋষিভিঃ সহ
322.32
নারায়ণানুশাস্তা হি তদা দেবী সরস্বতী
বিবেশ তানৃষীন্সর্বাঁল্লোকানাং হিতকাম্যয়া
322.33
ততঃ প্রবর্তিতা সম্যক্তপোবিদ্ভির্দ্বিজাতিভিঃ
শব্দে চার্থে চ হেতৌ চ এষা প্রথমসর্গজা
322.34
আদাবেব হি তচ্ছাস্ত্রমোংকারস্বরভূষিতম্
ঋষিভির্ভাবিতং তত্র যত্র কারুণিকো হ্যসৌ
322.35
ততঃ প্রসন্নো ভগবাননির্দিষ্টশরীরগঃ
ঋষীনুবাচ তান্সর্বানদৃশ্যঃ পুরুষোত্তমঃ
322.36
কৃতং শতসহস্রং হি শ্লোকানামিদমুত্তমম্
লোকতন্ত্রস্য কৃত্স্নস্য যস্মাদ্ধর্মঃ প্রবর্ততে
322.37
প্রবৃত্তৌ চ নিবৃত্তৌ চ যোনিরেতদ্ভবিষ্যতি
ঋগ্যজুঃসামভির্জুষ্টমথর্বাঙ্গিরসৈস্তথা
322.38
তথা প্রমাণং হি ময়া কৃতো ব্রহ্মা প্রসাদজঃ
রুদ্রশ্চ ক্রোধজো বিপ্রা যূয়ং প্রকৃতয়স্তথা
322.39
সূর্যাচন্দ্রমসৌ বায়ুর্ভূমিরাপোঽগ্নিরেব চ
সর্বে চ নক্ষত্রগণা যচ্চ ভূতাভিশব্দিতম্
322.40
অধিকারেষু বর্তন্তে যথাস্বং ব্রহ্মবাদিনঃ
সর্বে প্রমাণং হি যথা তথৈতচ্ছাস্ত্রমুত্তমম্
322.41
ভবিষ্যতি প্রমাণং বৈ এতন্মদনুশাসনম্
অস্মাত্প্রবক্ষ্যতে ধর্মান্মনুঃ স্বায়ংভুবঃ স্বয়ম্
322.42
উশনা বৃহস্পতিশ্চৈব যদোত্পন্নৌ ভবিষ্যতঃ
তদা প্রবক্ষ্যতঃ শাস্ত্রং যুষ্মন্মতিভিরুদ্ধৃতম্
322.43
স্বায়ংভুবেষু ধর্মেষু শাস্ত্রে চোশনসা কৃতে
বৃহস্পতিমতে চৈব লোকেষু প্রবিচারিতে
322.44
যুষ্মত্কৃতমিদং শাস্ত্রং প্রজাপালো বসুস্ততঃ
বৃহস্পতিসকাশাদ্বৈ প্রাপ্স্যতে দ্বিজসত্তমাঃ
322.45
স হি মদ্ভাবিতো রাজা মদ্ভক্তশ্চ ভবিষ্যতি
তেন শাস্ত্রেণ লোকেষু ক্রিয়াঃ সর্বাঃ করিষ্যতি
322.46
এতদ্ধি সর্বশাস্ত্রাণাং শাস্ত্রমুত্তমসংজ্ঞিতম্
এতদর্থ্যং চ ধর্ম্যং চ যশস্যং চৈতদুত্তমম্
322.47
অস্য প্রবর্তনাচ্চৈব প্রজাবন্তো ভবিষ্যথ
স চ রাজা শ্রিয়া যুক্তো ভবিষ্যতি মহান্বসুঃ
322.48
সংস্থিতে তু নৃপে তস্মিঞ্শাস্ত্রমেতত্সনাতনম্
অন্তর্ধাস্যতি তত্সত্যমেতদ্বঃ কথিতং ময়া
322.49
এতাবদুক্ত্বা বচনমদৃশ্যঃ পুরুষোত্তমঃ
বিসৃজ্য তানৃষীন্সর্বান্কামপি প্রস্থিতো দিশম্
322.50
ততস্তে লোকপিতরঃ সর্বলোকার্থচিন্তকাঃ
প্রাবর্তয়ন্ত তচ্ছাস্ত্রং ধর্ময়োনিং সনাতনম্
322.51
উত্পন্নেঽঽঙ্গিরসে চৈব যুগে প্রথমকল্পিতে
সাঙ্গোপনিষদং শাস্ত্রং স্থাপয়িত্বা বৃহস্পতৌ
322.52
জগ্মুর্যথেপ্সিতং দেশং তপসে কৃতনিশ্চয়াঃ
ধারণাত্সর্বলোকানাং সর্বধর্মপ্রবর্তকাঃ