Utshovঅধ্যায় 321
321.1
যুধিষ্ঠির উবাচ
গৃহস্থো ব্রহ্মচারী বা বানপ্রস্থোঽথ ভিক্ষুকঃ
য ইচ্ছেত্সিদ্ধিমাস্থাতুং দেবতাং কাং যজেত সঃ
321.2
কুতো হ্যস্য ধ্রুবঃ স্বর্গঃ কুতো নিঃশ্রেয়সং পরম্
বিধিনা কেন জুহুয়াদ্দৈবং পিত্র্যং তথৈব চ
321.3
মুক্তশ্চ কাং গতিং গচ্ছেন্মোক্ষশ্চৈব কিমাত্মকঃ
স্বর্গতশ্চৈব কিং কুর্যাদ্যেন ন চ্যবতে দিবঃ
321.4
দেবতানাং চ কো দেবঃ পিতৄণাং চ তথা পিতা
তস্মাত্পরতরং যচ্চ তন্মে ব্রূহি পিতামহ
321.5
ভীষ্ম উবাচ
গূঢং মাং প্রশ্নবিত্প্রশ্নং পৃচ্ছসে ত্বমিহানঘ
ন হ্যেষ তর্কয়া শক্যো বক্তুং বর্ষশতৈরপি
321.6
ঋতে দেবপ্রসাদাদ্বা রাজঞ্জ্ঞানাগমেন বা
গহনং হ্যেতদাখ্যানং ব্যাখ্যাতব্যং তবারিহন্
321.7
অত্রাপ্যুদাহরন্তীমমিতিহাসং পুরাতনম্
নারদস্য চ সংবাদমৃষের্নারায়ণস্য চ
321.8
নারায়ণো হি বিশ্বাত্মা চতুর্মূর্তিঃ সনাতনঃ
ধর্মাত্মজঃ সংবভূব পিতৈবং মেঽভ্যভাষত
321.9
কৃতে যুগে মহারাজ পুরা স্বায়ংভুবেঽন্তরে
নরো নারায়ণশ্চৈব হরিঃ কৃষ্ণস্তথৈব চ
321.10
তেভ্যো নারায়ণনরৌ তপস্তেপতুরব্যয়ৌ
বদর্যাশ্রমমাসাদ্য শকটে কনকাময়ে
321.11
অষ্টচক্রং হি তদ্যানং ভূতয়ুক্তং মনোরমম্
তত্রাদ্যৌ লোকনাথৌ তৌ কৃশৌ ধমনিসংততৌ
321.12
তপসা তেজসা চৈব দুর্নিরীক্ষৌ সুরৈরপি
যস্য প্রসাদং কুর্বাতে স দেবৌ দ্রষ্টুমর্হতি
321.13
নূনং তয়োরনুমতে হৃদি হৃচ্ছয়চোদিতঃ
মহামেরোর্গিরেঃ শৃঙ্গাত্প্রচ্যুতো গন্ধমাদনম্
321.14
নারদঃ সুমহদ্ভূতং লোকান্সর্বানচীচরৎ
তং দেশমগমদ্রাজন্বদর্যাশ্রমমাশুগঃ
321.15
তয়োরাহ্নিকবেলায়াং তস্য কৌতূহলং ত্বভূৎ
ইদং তদাস্পদং কৃত্স্নং যস্মিঁল্লোকাঃ প্রতিষ্ঠিতাঃ
321.16
সদেবাসুরগন্ধর্বাঃ সর্ষিকিংনরলেলিহাঃ
একা মূর্তিরিয়ং পূর্বং জাতা ভূয়শ্চতুর্বিধা
321.17
ধর্মস্য কুলসংতানো মহানেভির্বিবর্ধিতঃ
অহো হ্যনুগৃহীতোঽদ্য ধর্ম এভিঃ সুরৈরিহ
নরনারায়ণাভ্যাং চ কৃষ্ণেন হরিণা তথা
321.18
তত্র কৃষ্ণো হরিশ্চৈব কস্মিংশ্চিত্কারণান্তরে
স্থিতৌ ধর্মোত্তরৌ হ্যেতৌ তথা তপসি ধিষ্ঠিতৌ
321.19
এতৌ হি পরমং ধাম কানয়োরাহ্নিকক্রিয়া
পিতরৌ সর্বভূতানাং দৈবতং চ যশস্বিনৌ
কাং দেবতাং নু যজতঃ পিতৄন্বা কান্মহামতী
321.20
ইতি সংচিন্ত্য মনসা ভক্ত্যা নারায়ণস্য হ
সহসা প্রাদুরভবত্সমীপে দেবয়োস্তদা
321.21
কৃতে দৈবে চ পিত্র্যে চ ততস্তাভ্যাং নিরীক্ষিতঃ
পূজিতশ্চৈব বিধিনা যথাপ্রোক্তেন শাস্ত্রতঃ
321.22
তং দৃষ্ট্বা মহদাশ্চর্যমপূর্বং বিধিবিস্তরম্
উপোপবিষ্টঃ সুপ্রীতো নারদো ভগবানৃষিঃ
321.23
নারায়ণং সংনিরীক্ষ্য প্রসন্নেনান্তরাত্মনা
নমস্কৃত্বা মহাদেবমিদং বচনমব্রবীৎ
321.24
বেদেষু সপুরাণেষু সাঙ্গোপাঙ্গেষু গীয়সে
ত্বমজঃ শাশ্বতো ধাতা মতোঽমৃতমনুত্তমম্
প্রতিষ্ঠিতং ভূতভব্যং ত্বয়ি সর্বমিদং জগৎ
321.25
চত্বারো হ্যাশ্রমা দেব সর্বে গার্হস্থ্যমূলকাঃ
যজন্তে ত্বামহরহর্নানামূর্তিসমাস্থিতম্
321.26
পিতা মাতা চ সর্বস্য জগতঃ শাশ্বতো গুরুঃ
কং ত্বদ্য যজসে দেবং পিতরং কং ন বিদ্মহে
321.27
শ্রীভগবানুবাচ
অবাচ্যমেতদ্বক্তব্যমাত্মগুহ্যং সনাতনম্
তব ভক্তিমতো ব্রহ্মন্বক্ষ্যামি তু যথাতথম্
321.28
যত্তত্সূক্ষ্মমবিজ্ঞেয়মব্যক্তমচলং ধ্রুবম্
ইন্দ্রিয়ৈরিন্দ্রিয়ার্থৈশ্চ সর্বভূতৈশ্চ বর্জিতম্
321.29
স হ্যন্তরাত্মা ভূতানাং ক্ষেত্রজ্ঞশ্চেতি কথ্যতে
ত্রিগুণব্যতিরিক্তোঽসৌ পুরুষশ্চেতি কল্পিতঃ
তস্মাদব্যক্তমুত্পন্নং ত্রিগুণং দ্বিজসত্তম
321.30
অব্যক্তা ব্যক্তভাবস্থা যা সা প্রকৃতিরব্যয়া
তাং যোনিমাবয়োর্বিদ্ধি যোঽসৌ সদসদাত্মকঃ
আবাভ্যাং পূজ্যতেঽসৌ হি দৈবে পিত্র্যে চ কল্পিতে
321.31
নাস্তি তস্মাত্পরোঽন্যো হি পিতা দেবোঽথ বা দ্বিজঃ
আত্মা হি নৌ স বিজ্ঞেয়স্ততস্তং পূজয়াবহে
321.32
তেনৈষা প্রথিতা ব্রহ্মন্মর্যাদা লোকভাবিনী
দৈবং পিত্র্যং চ কর্তব্যমিতি তস্যানুশাসনম্
321.33
ব্রহ্মা স্থাণুর্মনুর্দক্ষো ভৃগুর্ধর্মস্তপো দমঃ
মরীচিরঙ্গিরাত্রিশ্চ পুলস্ত্যঃ পুলহঃ ক্রতুঃ
321.34
বসিষ্ঠঃ পরমেষ্ঠী চ বিবস্বান্সোম এব চ
কর্দমশ্চাপি যঃ প্রোক্তঃ ক্রোধো বিক্রীত এব চ
321.35
একবিংশতিরুত্পন্নাস্তে প্রজাপতয়ঃ স্মৃতাঃ
তস্য দেবস্য মর্যাদাং পূজয়ন্তি সনাতনীম্
321.36
দৈবং পিত্র্যং চ সততং তস্য বিজ্ঞায় তত্ত্বতঃ
আত্মপ্রাপ্তানি চ ততো জানন্তি দ্বিজসত্তমাঃ
321.37
স্বর্গস্থা অপি যে কেচিত্তং নমস্যন্তি দেহিনঃ
তে তত্প্রসাদাদ্গচ্ছন্তি তেনাদিষ্টফলাং গতিম্
321.38
যে হীনাঃ সপ্তদশভির্গুণৈঃ কর্মভিরেব চ
কলাঃ পঞ্চদশ ত্যক্ত্বা তে মুক্তা ইতি নিশ্চয়ঃ
321.39
মুক্তানাং তু গতির্ব্রহ্মন্ক্ষেত্রজ্ঞ ইতি কল্পিতঃ
স হি সর্বগতশ্চৈব নির্গুণশ্চৈব কথ্যতে
321.40
দৃশ্যতে জ্ঞানয়োগেন আবাং চ প্রসৃতৌ ততঃ
এবং জ্ঞাত্বা তমাত্মানং পূজয়াবঃ সনাতনম্
321.41
তং বেদাশ্চাশ্রমাশ্চৈব নানাতনুসমাস্থিতাঃ
ভক্ত্যা সংপূজয়ন্ত্যাদ্যং গতিং চৈষাং দদাতি সঃ
321.42
যে তু তদ্ভাবিতা লোকে একান্তিত্বং সমাস্থিতাঃ
এতদভ্যধিকং তেষাং যত্তে তং প্রবিশন্ত্যুত
321.43
ইতি গুহ্যসমুদ্দেশস্তব নারদ কীর্তিতঃ
ভক্ত্যা প্রেম্ণা চ বিপ্রর্ষে অস্মদ্ভক্ত্যা চ তে শ্রুতঃ