Utshovঅধ্যায় 320
320.1
ভীষ্ম উবাচ
ইত্যেবমুক্ত্বা বচনং ব্রহ্মর্ষিঃ সুমহাতপাঃ
প্রাতিষ্ঠত শুকঃ সিদ্ধিং হিত্বা লোকাংশ্চতুর্বিধান্
320.2
তমো হ্যষ্টবিধং হিত্বা জহৌ পঞ্চবিধং রজঃ
ততঃ সত্ত্বং জহৌ ধীমাংস্তদদ্ভুতমিবাভবৎ
320.3
ততস্তস্মিন্পদে নিত্যে নির্গুণে লিঙ্গবর্জিতে
ব্রহ্মণি প্রত্যতিষ্ঠত্স বিধূমোঽগ্নিরিব জ্বলন্
320.4
উল্কাপাতা দিশাং দাহা ভূমিকম্পাস্তথৈব চ
প্রাদুর্ভূতাঃ ক্ষণে তস্মিংস্তদদ্ভুতমিবাভবৎ
320.5
দ্রুমাঃ শাখাশ্চ মুমুচুঃ শিখরাণি চ পর্বতাঃ
নির্ঘাতশব্দৈশ্চ গিরির্হিমবান্দীর্যতীব হ
320.6
ন বভাসে সহস্রাংশুর্ন জজ্বাল চ পাবকঃ
হ্রদাশ্চ সরিতশ্চৈব চুক্ষুভুঃ সাগরাস্তথা
320.7
ববর্ষ বাসবস্তোয়ং রসবচ্চ সুগন্ধি চ
ববৌ সমীরণশ্চাপি দিব্যগন্ধবহঃ শুচিঃ
320.8
স শৃঙ্গেঽপ্রতিমে দিব্যে হিমবন্মেরুসংভবে
সংশ্লিষ্টে শ্বেতপীতে দ্বে রুক্মরূপ্যময়ে শুভে
320.9
শতয়োজনবিস্তারে তির্যগূর্ধ্বং চ ভারত
উদীচীং দিশমাশ্রিত্য রুচিরে সংদদর্শ হ
320.10
সোঽবিশঙ্কেন মনসা তথৈবাভ্যপতচ্ছুকঃ
ততঃ পর্বতশৃঙ্গে দ্বে সহসৈব দ্বিধাকৃতে
অদৃশ্যেতাং মহারাজ তদদ্ভুতমিবাভবৎ
320.11
ততঃ পর্বতশৃঙ্গাভ্যাং সহসৈব বিনিঃসৃতঃ
ন চ প্রতিজঘানাস্য স গতিং পর্বতোত্তমঃ
320.12
ততো মহানভূচ্ছব্দো দিবি সর্বদিবৌকসাম্
গন্ধর্বাণামৃষীণাং চ যে চ শৈলনিবাসিনঃ
320.13
দৃষ্ট্বা শুকমতিক্রান্তং পর্বতং চ দ্বিধাকৃতম্
সাধু সাধ্বিতি তত্রাসীন্নাদঃ সর্বত্র ভারত
320.14
স পূজ্যমানো দেবৈশ্চ গন্ধর্বৈরৃষিভিস্তথা
যক্ষরাক্ষসসংঘৈশ্চ বিদ্যাধরগণৈস্তথা
320.15
দিব্যৈঃ পুষ্পৈঃ সমাকীর্ণমন্তরিক্ষং সমন্ততঃ
আসীত্কিল মহারাজ শুকাভিপতনে তদা
320.16
ততো মন্দাকিনীং রম্যামুপরিষ্টাদভিব্রজন্
শুকো দদর্শ ধর্মাত্মা পুষ্পিতদ্রুমকাননাম্
320.17
তস্যাং ক্রীডন্ত্যভিরতাঃ স্নান্তি চৈবাপ্সরোগণাঃ
শূন্যাকারং নিরাকারাঃ শুকং দৃষ্ট্বা বিবাসসঃ
320.18
তং প্রক্রমন্তমাজ্ঞায় পিতা স্নেহসমন্বিতঃ
উত্তমাং গতিমাস্থায় পৃষ্ঠতোঽনুসসার হ
320.19
শুকস্তু মারুতাদূর্ধ্বং গতিং কৃত্বান্তরিক্ষগাম্
দর্শয়িত্বা প্রভাবং স্বং সর্বভূতোঽভবত্তদা
320.20
মহায়োগগতিং ত্বগ্র্যাং ব্যাসোত্থায় মহাতপাঃ
নিমেষান্তরমাত্রেণ শুকাভিপতনং যয়ৌ
320.21
স দদর্শ দ্বিধা কৃত্বা পর্বতাগ্রং শুকং গতম্
শশংসুরৃষয়স্তস্মৈ কর্ম পুত্রস্য তত্তদা
320.22
ততঃ শুকেতি দীর্ঘেণ শৈক্ষেণাক্রন্দিতস্তদা
স্বয়ং পিত্রা স্বরেণোচ্চৈস্ত্রীঁল্লোকাননুনাদ্য বৈ
320.23
শুকঃ সর্বগতো ভূত্বা সর্বাত্মা সর্বতোমুখঃ
প্রত্যভাষত ধর্মাত্মা ভোঃশব্দেনানুনাদয়ন্
320.24
তত একাক্ষরং নাদং ভো ইত্যেব সমীরয়ন্
প্রত্যাহরজ্জগত্সর্বমুচ্চৈঃ স্থাবরজঙ্গমম্
320.25
ততঃ প্রভৃতি চাদ্যাপি শব্দানুচ্চারিতান্পৃথক্
গিরিগহ্বরপৃষ্ঠেষু ব্যাজহার শুকং প্রতি
320.26
অন্তর্হিতঃ প্রভাবং তু দর্শয়িত্বা শুকস্তদা
গুণান্সংত্যজ্য শব্দাদীন্পদমধ্যগমত্পরম্
320.27
মহিমানং তু তং দৃষ্ট্বা পুত্রস্যামিততেজসঃ
নিষসাদ গিরিপ্রস্থে পুত্রমেবানুচিন্তয়ন্
320.28
ততো মন্দাকিনীতীরে ক্রীডন্তোঽপ্সরসাং গণাঃ
আসাদ্য তমৃষিং সর্বাঃ সংভ্রান্তা গতচেতসঃ
320.29
জলে নিলিল্যিরে কাশ্চিত্কাশ্চিদ্গুল্মান্প্রপেদিরে
বসনান্যাদদুঃ কাশ্চিদ্দৃষ্ট্বা তং মুনিসত্তমম্
320.30
তাং মুক্ততাং তু বিজ্ঞায় মুনিঃ পুত্রস্য বৈ তদা
সক্ততামাত্মনশ্চৈব প্রীতোঽভূদ্ব্রীডিতশ্চ হ
320.31
তং দেবগন্ধর্ববৃতো মহর্ষিগণপূজিতঃ
পিনাকহস্তো ভগবানভ্যাগচ্ছত শংকরঃ
320.32
তমুবাচ মহাদেবঃ সান্ত্বপূর্বমিদং বচঃ
পুত্রশোকাভিসংতপ্তং কৃষ্ণদ্বৈপায়নং তদা
320.33
অগ্নের্ভূমেরপাং বায়োরন্তরিক্ষস্য চৈব হ
বীর্যেণ সদৃশঃ পুত্রস্ত্বয়া মত্তঃ পুরা বৃতঃ
320.34
স তথালক্ষণো জাতস্তপসা তব সংভৃতঃ
মম চৈব প্রভাবেন ব্রহ্মতেজোময়ঃ শুচিঃ
320.35
স গতিং পরমাং প্রাপ্তো দুষ্প্রাপামজিতেন্দ্রিয়ৈঃ
দৈবতৈরপি বিপ্রর্ষে তং ত্বং কিমনুশোচসি
320.36
যাবত্স্থাস্যন্তি গিরয়ো যাবত্স্থাস্যন্তি সাগরাঃ
তাবত্তবাক্ষয়া কীর্তিঃ সপুত্রস্য ভবিষ্যতি
320.37
ছায়াং স্বপুত্রসদৃশীং সর্বতোঽনপগাং সদা
দ্রক্ষ্যসে ত্বং চ লোকেঽস্মিন্মত্প্রসাদান্মহামুনে
320.38
সোঽনুনীতো ভগবতা স্বয়ং রুদ্রেণ ভারত
ছায়াং পশ্যন্সমাবৃত্তঃ স মুনিঃ পরয়া মুদা
320.39
ইতি জন্ম গতিশ্চৈব শুকস্য ভরতর্ষভ
বিস্তরেণ ময়াখ্যাতং যন্মাং ত্বং পরিপৃচ্ছসি
320.40
এতদাচষ্ট মে রাজন্দেবর্ষির্নারদঃ পুরা
ব্যাসশ্চৈব মহায়োগী সংজল্পেষু পদে পদে
320.41
ইতিহাসমিমং পুণ্যং মোক্ষধর্মার্থসংহিতম্
ধারয়েদ্যঃ শমপরঃ স গচ্ছেত্পরমাং গতিম্