Utshovঅধ্যায় 319
319.1
ভীষ্ম উবাচ
গিরিপৃষ্ঠং সমারুহ্য সুতো ব্যাসস্য ভারত
সমে দেশে বিবিক্তে চ নিঃশলাক উপাবিশৎ
319.2
ধারয়ামাস চাত্মানং যথাশাস্ত্রং মহামুনিঃ
পাদাত্প্রভৃতি গাত্রেষু ক্রমেণ ক্রময়োগবিৎ
319.3
ততঃ স প্রাঙ্মুখো বিদ্বানাদিত্যে নচিরোদিতে
পাণিপাদং সমাধায় বিনীতবদুপাবিশৎ
319.4
ন তত্র পক্ষিসংঘাতো ন শব্দো নাপি দর্শনম্
যত্র বৈয়াসকির্ধীমান্যোক্তুং সমুপচক্রমে
319.5
স দদর্শ তদাত্মানং সর্বসঙ্গবিনিঃসৃতম্
প্রজহাস ততো হাসং শুকঃ সংপ্রেক্ষ্য ভাস্করম্
319.6
স পুনর্যোগমাস্থায় মোক্ষমার্গোপলব্ধয়ে
মহায়োগীশ্বরো ভূত্বা সোঽত্যক্রামদ্বিহায়সম্
319.7
ততঃ প্রদক্ষিণং কৃত্বা দেবর্ষিং নারদং তদা
নিবেদয়ামাস তদা স্বং যোগং পরমর্ষয়ে
319.8
দৃষ্টো মার্গঃ প্রবৃত্তোঽস্মি স্বস্তি তেঽস্তু তপোধন
ত্বত্প্রসাদাদ্গমিষ্যামি গতিমিষ্টাং মহাদ্যুতে
319.9
নারদেনাভ্যনুজ্ঞাতস্ততো দ্বৈপায়নাত্মজঃ
অভিবাদ্য পুনর্যোগমাস্থায়াকাশমাবিশৎ
319.10
কৈলাসপৃষ্ঠাদুত্পত্য স পপাত দিবং তদা
অন্তরিক্ষচরঃ শ্রীমান্ব্যাসপুত্রঃ সুনিশ্চিতঃ
319.11
তমুদ্যন্তং দ্বিজশ্রেষ্ঠং বৈনতেয়সমদ্যুতিম্
দদৃশুঃ সর্বভূতানি মনোমারুতরংহসম্
319.12
ব্যবসায়েন লোকাংস্ত্রীন্সর্বান্সোঽথ বিচিন্তয়ন্
আস্থিতো দিব্যমধ্বানং পাবকার্কসমপ্রভঃ
319.13
তমেকমনসং যান্তমব্যগ্রমকুতোভয়ম্
দদৃশুঃ সর্বভূতানি জঙ্গমানীতরাণি চ
319.14
যথাশক্তি যথান্যায়ং পূজয়াং চক্রিরে তদা
পুষ্পবর্ষৈশ্চ দিব্যৈস্তমবচক্রুর্দিবৌকসঃ
319.15
তং দৃষ্ট্বা বিস্মিতাঃ সর্বে গন্ধর্বাপ্সরসাং গণাঃ
ঋষয়শ্চৈব সংসিদ্ধাঃ পরং বিস্ময়মাগতাঃ
319.16
অন্তরিক্ষচরঃ কোঽয়ং তপসা সিদ্ধিমাগতঃ
অধঃকায়োর্ধ্ববক্ত্রশ্চ নেত্রৈঃ সমভিবাহ্যতে
319.17
ততঃ পরমধীরাত্মা ত্রিষু লোকেষু বিশ্রুতঃ
ভাস্করং সমুদীক্ষন্স প্রাঙ্মুখো বাগ্যতোঽগমৎ
শব্দেনাকাশমখিলং পূরয়ন্নিব সর্বতঃ
319.18
তমাপতন্তং সহসা দৃষ্ট্বা সর্বাপ্সরোগণাঃ
সংভ্রান্তমনসো রাজন্নাসন্পরমবিস্মিতাঃ
পঞ্চচূডাপ্রভৃতয়ো ভৃশমুত্ফুল্ললোচনাঃ
319.19
দৈবতং কতমং হ্যেতদুত্তমাং গতিমাস্থিতম্
সুনিশ্চিতমিহায়াতি বিমুক্তমিব নিঃস্পৃহম্
319.20
ততঃ সমতিচক্রাম মলয়ং নাম পর্বতম্
উর্বশী পূর্বচিত্তিশ্চ যং নিত্যমুপসেবতে
তে স্ম ব্রহ্মর্ষিপুত্রস্য বিস্ময়ং যয়তুঃ পরম্
319.21
অহো বুদ্ধিসমাধানং বেদাভ্যাসরতে দ্বিজে
অচিরেণৈব কালেন নভশ্চরতি চন্দ্রবৎ
পিতৃশুশ্রূষয়া সিদ্ধিং সংপ্রাপ্তোঽয়মনুত্তমাম্
319.22
পিতৃভক্তো দৃঢতপাঃ পিতুঃ সুদয়িতঃ সুতঃ
অনন্যমনসা তেন কথং পিত্রা বিবর্জিতঃ
319.23
উর্বশ্যা বচনং শ্রুত্বা শুকঃ পরমধর্মবিৎ
উদৈক্ষত দিশঃ সর্বা বচনে গতমানসঃ
319.24
সোঽন্তরিক্ষং মহীং চৈব সশৈলবনকাননাম্
আলোকয়ামাস তদা সরাংসি সরিতস্তথা
319.25
ততো দ্বৈপায়নসুতং বহুমানপুরঃসরম্
কৃতাঞ্জলিপুটাঃ সর্বা নিরীক্ষন্তে স্ম দেবতাঃ
319.26
অব্রবীত্তাস্তদা বাক্যং শুকঃ পরমধর্মবিৎ
পিতা যদ্যনুগচ্ছেন্মাং ক্রোশমানঃ শুকেতি বৈ
319.27
ততঃ প্রতিবচো দেয়ং সর্বৈরেব সমাহিতৈঃ
এতন্মে স্নেহতঃ সর্বে বচনং কর্তুমর্হথ
319.28
শুকস্য বচনং শ্রুত্বা দিশঃ সবনকাননাঃ
সমুদ্রাঃ সরিতঃ শৈলাঃ প্রত্যূচুস্তং সমন্ততঃ
319.29
যথাজ্ঞাপয়সে বিপ্র বাঢমেবং ভবিষ্যতি
ঋষের্ব্যাহরতো বাক্যং প্রতিবক্ষ্যামহে বয়ম্