Utshovঅধ্যায় 318
318.1
নারদ উবাচ
সুখদুঃখবিপর্যাসো যদা সমুপপদ্যতে
নৈনং প্রজ্ঞা সুনীতং বা ত্রায়তে নাপি পৌরুষম্
318.2
স্বভাবাদ্যত্নমাতিষ্ঠেদ্যত্নবান্নাবসীদতি
জরামরণরোগেভ্যঃ প্রিয়মাত্মানমুদ্ধরেৎ
318.3
রুজন্তি হি শরীরাণি রোগাঃ শারীরমানসাঃ
সায়কা ইব তীক্ষ্ণাগ্রাঃ প্রয়ুক্তা দৃঢধন্বিভিঃ
318.4
ব্যাধিতস্য বিবিত্সাভিস্ত্রস্যতো জীবিতৈষিণঃ
অবশস্য বিনাশায় শরীরমপকৃষ্যতে
318.5
স্রবন্তি ন নিবর্তন্তে স্রোতাংসি সরিতামিব
আয়ুরাদায় মর্ত্যানাং রাত্র্যহানি পুনঃ পুনঃ
318.6
ব্যত্যয়ো হ্যয়মত্যন্তং পক্ষয়োঃ শুক্লকৃষ্ণয়োঃ
জাতং মর্ত্যং জরয়তি নিমেষং নাবতিষ্ঠতে
318.7
সুখদুঃখানি ভূতানামজরো জরয়ন্নসৌ
আদিত্যো হ্যস্তমভ্যেতি পুনঃ পুনরুদেতি চ
318.8
অদৃষ্টপূর্বানাদায় ভাবানপরিশঙ্কিতান্
ইষ্টানিষ্টান্মনুষ্যাণামস্তং গচ্ছন্তি রাত্রয়ঃ
318.9
যো যমিচ্ছেদ্যথাকামং কামানাং তত্তদাপ্নুয়াৎ
যদি স্যান্ন পরাধীনং পুরুষস্য ক্রিয়াফলম্
318.10
সংয়তাশ্চ হি দক্ষাশ্চ মতিমন্তশ্চ মানবাঃ
দৃশ্যন্তে নিষ্ফলাঃ সন্তঃ প্রহীণাশ্চ স্বকর্মভিঃ
318.11
অপরে বালিশাঃ সন্তো নির্গুণাঃ পুরুষাধমাঃ
আশীর্ভিরপ্যসংয়ুক্তা দৃশ্যন্তে সর্বকামিনঃ
318.12
ভূতানামপরঃ কশ্চিদ্ধিংসায়াং সততোত্থিতঃ
বঞ্চনায়াং চ লোকস্য স সুখেষ্বেব জীর্যতে
318.13
অচেষ্টমানমাসীনং শ্রীঃ কংচিদুপতিষ্ঠতি
কশ্চিত্কর্মানুসৃত্যান্যো ন প্রাপ্যমধিগচ্ছতি
318.14
অপরাধং সমাচক্ষ্ব পুরুষস্য স্বভাবতঃ
শুক্রমন্যত্র সংভূতং পুনরন্যত্র গচ্ছতি
318.15
তস্য যোনৌ প্রসক্তস্য গর্ভো ভবতি বা ন বা
আম্রপুষ্পোপমা যস্য নিবৃত্তিরুপলভ্যতে
318.16
কেষাংচিত্পুত্রকামানামনুসংতানমিচ্ছতাম্
সিদ্ধৌ প্রয়তমানানাং নৈবাণ্ডমুপজায়তে
318.17
গর্ভাচ্চোদ্বিজমানানাং ক্রুদ্ধাদাশীবিষাদিব
আয়ুষ্মাঞ্জায়তে পুত্রঃ কথং প্রেতঃ পিতৈব সঃ
318.18
দেবানিষ্ট্বা তপস্তপ্ত্বা কৃপণৈঃ পুত্রগৃদ্ধিভিঃ
দশ মাসান্পরিধৃতা জায়ন্তে কুলপাংসনাঃ
318.19
অপরে ধনধান্যানি ভোগাংশ্চ পিতৃসংচিতান্
বিপুলানভিজায়ন্তে লব্ধাস্তৈরেব মঙ্গলৈঃ
318.20
অন্যোন্যং সমভিপ্রেত্য মৈথুনস্য সমাগমে
উপদ্রব ইবাবিষ্টো যোনিং গর্ভঃ প্রপদ্যতে
318.21
শীর্ণং পরশরীরেণ নিচ্ছবীকং শরীরিণম্
প্রাণিনাং প্রাণসংরোধে মাংসশ্লেষ্মবিচেষ্টিতম্
318.22
নির্দগ্ধং পরদেহেন পরদেহং চলাচলম্
বিনশ্যন্তং বিনাশান্তে নাবি নাবমিবাহিতম্
318.23
সংগত্যা জঠরে ন্যস্তং রেতোবিন্দুমচেতনম্
কেন যত্নেন জীবন্তং গর্ভং ত্বমিহ পশ্যসি
318.24
অন্নপানানি জীর্যন্তে যত্র ভক্ষাশ্চ ভক্ষিতাঃ
তস্মিন্নেবোদরে গর্ভঃ কিং নান্নমিব জীর্যতে
318.25
গর্ভমূত্রপুরীষাণাং স্বভাবনিয়তা গতিঃ
ধারণে বা বিসর্গে বা ন কর্তুর্বিদ্যতে বশঃ
318.26
স্রবন্তি হ্যুদরাদ্গর্ভা জায়মানাস্তথাপরে
আগমেন সহান্যেষাং বিনাশ উপপদ্যতে
318.27
এতস্মাদ্যোনিসংবন্ধাদ্যো জীবন্পরিমুচ্যতে
প্রজাং চ লভতে কাংচিত্পুনর্দ্বংদ্বেষু মজ্জতি
318.28
শতস্য সহজাতস্য সপ্তমীং দশমীং দশাম্
প্রাপ্নুবন্তি ততঃ পঞ্চ ন ভবন্তি শতায়ুষঃ
318.29
নাভ্যুত্থানে মনুষ্যাণাং যোগাঃ স্যুর্নাত্র সংশয়ঃ
ব্যাধিভিশ্চ বিমথ্যন্তে ব্যালৈঃ ক্ষুদ্রমৃগা ইব
318.30
ব্যাধিভির্ভক্ষ্যমাণানাং ত্যজতাং বিপুলং ধনম্
বেদনাং নাপকর্ষন্তি যতমানাশ্চিকিত্সকাঃ
318.31
তে চাপি নিপুণা বৈদ্যাঃ কুশলাঃ সংভৃতৌষধাঃ
ব্যাধিভিঃ পরিকৃষ্যন্তে মৃগা ব্যাধৈরিবার্দিতাঃ
318.32
তে পিবন্তঃ কষায়াংশ্চ সর্পীংষি বিবিধানি চ
দৃশ্যন্তে জরয়া ভগ্না নাগা নাগৈরিবোত্তমৈঃ
318.33
কে বা ভুবি চিকিত্সন্তে রোগার্তান্মৃগপক্ষিণঃ
শ্বাপদানি দরিদ্রাংশ্চ প্রায়ো নার্তা ভবন্তি তে
318.34
ঘোরানপি দুরাধর্ষান্নৃপতীনুগ্রতেজসঃ
আক্রম্য রোগ আদত্তে পশূন্পশুপচো যথা
318.35
ইতি লোকমনাক্রন্দং মোহশোকপরিপ্লুতম্
স্রোতসা সহসা ক্ষিপ্তং হ্রিয়মাণং বলীয়সা
318.36
ন ধনেন ন রাজ্যেন নোগ্রেণ তপসা তথা
স্বভাবা ব্যতিবর্তন্তে যে নিয়ুক্তাঃ শরীরিষু
318.37
ন ম্রিয়েরন্ন জীর্যেরন্সর্বে স্যুঃ সর্বকামিকাঃ
নাপ্রিয়ং প্রতিপশ্যেয়ুরুত্থানস্য ফলং প্রতি
318.38
উপর্যুপরি লোকস্য সর্বো ভবিতুমিচ্ছতি
যততে চ যথাশক্তি ন চ তদ্বর্ততে তথা
318.39
ঐশ্বর্যমদমত্তাংশ্চ মত্তান্মদ্যমদেন চ
অপ্রমত্তাঃ শঠাঃ ক্রূরা বিক্রান্তাঃ পর্যুপাসতে
318.40
ক্লেশাঃ প্রতিনিবর্তন্তে কেষাংচিদসমীক্ষিতাঃ
স্বং স্বং চ পুনরন্যেষাং ন কিংচিদভিগম্যতে
318.41
মহচ্চ ফলবৈষম্যং দৃশ্যতে কর্মসংধিষু
বহন্তি শিবিকামন্যে যান্ত্যন্যে শিবিকাগতাঃ
318.42
সর্বেষামৃদ্ধিকামানামন্যে রথপুরঃসরাঃ
মনুজাশ্চ শতস্ত্রীকাঃ শতশো বিধবাঃ স্ত্রিয়ঃ
318.43
দ্বংদ্বারামেষু ভূতেষু গচ্ছন্ত্যেকৈকশো নরাঃ
ইদমন্যত্পরং পশ্য মাত্র মোহং করিষ্যসি
318.44
ত্যজ ধর্মমধর্মং চ উভে সত্যানৃতে ত্যজ
উভে সত্যানৃতে ত্যক্ত্বা যেন ত্যজসি তং ত্যজ
318.45
এতত্তে পরমং গুহ্যমাখ্যাতমৃষিসত্তম
যেন দেবাঃ পরিত্যজ্য মর্ত্যলোকং দিবং গতাঃ
318.46
ভীষ্ম উবাচ
নারদস্য বচঃ শ্রুত্বা শুকঃ পরমবুদ্ধিমান্
সংচিন্ত্য মনসা ধীরো নিশ্চয়ং নাধ্যগচ্ছত
318.47
পুত্রদারৈর্মহান্ক্লেশো বিদ্যাম্নায়ে মহাঞ্শ্রমঃ
কিং নু স্যাচ্ছাশ্বতং স্থানমল্পক্লেশং মহোদয়ম্
318.48
ততো মুহূর্তং সংচিন্ত্য নিশ্চিতাং গতিমাত্মনঃ
পরাবরজ্ঞো ধর্মস্য পরাং নৈঃশ্রেয়সীং গতিম্
318.49
কথং ত্বহমসংক্লিষ্টো গচ্ছেয়ং পরমাং গতিম্
নাবর্তেয়ং যথা ভূয়ো যোনিসংসারসাগরে
318.50
পরং ভাবং হি কাঙ্ক্ষামি যত্র নাবর্ততে পুনঃ
সর্বসঙ্গান্পরিত্যজ্য নিশ্চিতাং মনসো গতিম্
318.51
তত্র যাস্যামি যত্রাত্মা শমং মেঽধিগমিষ্যতি
অক্ষয়শ্চাব্যয়শ্চৈব যত্র স্থাস্যামি শাশ্বতঃ
318.52
ন তু যোগমৃতে শক্যা প্রাপ্তুং সা পরমা গতিঃ
অববন্ধো হি মুক্তস্য কর্মভির্নোপপদ্যতে
318.53
তস্মাদ্যোগং সমাস্থায় ত্যক্ত্বা গৃহকলেবরম্
বায়ুভূতঃ প্রবেক্ষ্যামি তেজোরাশিং দিবাকরম্
318.54
ন হ্যেষ ক্ষয়মাপ্নোতি সোমঃ সুরগণৈর্যথা
কম্পিতঃ পততে ভূমিং পুনশ্চৈবাধিরোহতি
ক্ষীয়তে হি সদা সোমঃ পুনশ্চৈবাভিপূর্যতে
318.55
রবিস্তু সংতাপয়তি লোকান্রশ্মিভিরুল্বণৈঃ
সর্বতস্তেজ আদত্তে নিত্যমক্ষয়মণ্ডলঃ
318.56
অতো মে রোচতে গন্তুমাদিত্যং দীপ্ততেজসম্
অত্র বত্স্যামি দুর্ধর্ষো নিঃসঙ্গেনান্তরাত্মনা
318.57
সূর্যস্য সদনে চাহং নিক্ষিপ্যেদং কলেবরম্
ঋষিভিঃ সহ যাস্যামি সৌরং তেজোঽতিদুঃসহম্
318.58
আপৃচ্ছামি নগান্নাগান্গিরীনুর্বীং দিশো দিবম্
দেবদানবগন্ধর্বান্পিশাচোরগরাক্ষসান্
318.59
লোকেষু সর্বভূতানি প্রবেক্ষ্যামি নসংশয়ঃ
পশ্যন্তু যোগবীর্যং মে সর্বে দেবাঃ সহর্ষিভিঃ
318.60
অথানুজ্ঞাপ্য তমৃষিং নারদং লোকবিশ্রুতম্
তস্মাদনুজ্ঞাং সংপ্রাপ্য জগাম পিতরং প্রতি
318.61
সোঽভিবাদ্য মহাত্মানমৃষিং দ্বৈপায়নং মুনিম্
শুকঃ প্রদক্ষিণীকৃত্য কৃষ্ণমাপৃষ্টবান্মুনিঃ
318.62
শ্রুত্বা ঋষিস্তদ্বচনং শুকস্য; প্রীতো মহাত্মা পুনরাহ চৈনম্
ভো ভোঃ পুত্র স্থীয়তাং তাবদদ্য; যাবচ্চক্ষুঃ প্রীণয়ামি ত্বদর্থম্
318.63
নিরপেক্ষঃ শুকো ভূত্বা নিঃস্নেহো মুক্তবন্ধনঃ
মোক্ষমেবানুসংচিন্ত্য গমনায় মনো দধে
পিতরং সংপরিত্যজ্য জগাম দ্বিজসত্তমঃ