অধ্যায় 317

317.1

নারদ উবাচ
অশোকং শোকনাশার্থং শাস্ত্রং শান্তিকরং শিবম্
নিশম্য লভতে বুদ্ধিং তাং লব্ধ্বা সুখমেধতে

317.2

শোকস্থানসহস্রাণি ভয়স্থানশতানি চ
দিবসে দিবসে মূঢমাবিশন্তি ন পণ্ডিতম্

317.3

তস্মাদনিষ্টনাশার্থমিতিহাসং নিবোধ মে
তিষ্ঠতে চেদ্বশে বুদ্ধির্লভতে শোকনাশনম্

317.4

অনিষ্টসংপ্রয়োগাচ্চ বিপ্রয়োগাত্প্রিয়স্য চ
মনুষ্যা মানসৈর্দুঃখৈর্যুজ্যন্তে অল্পবুদ্ধয়ঃ

317.5

দ্রব্যেষু সমতীতেষু যে গুণাস্তান্ন চিন্তয়েৎ
তাননাদ্রিয়মাণস্য স্নেহবন্ধঃ প্রমুচ্যতে

317.6

দোষদর্শী ভবেত্তত্র যত্র রাগঃ প্রবর্ততে
অনিষ্টবদ্ধিতং পশ্যেত্তথা ক্ষিপ্রং বিরজ্যতে

317.7

নার্থো ন ধর্মো ন যশো যোঽতীতমনুশোচতি
অপ্যভাবেন যুজ্যেত তচ্চাস্য ন নিবর্ততে

317.8

গুণৈর্ভূতানি যুজ্যন্তে বিয়ুজ্যন্তে তথৈব চ
সর্বাণি নৈতদেকস্য শোকস্থানং হি বিদ্যতে

317.9

মৃতং বা যদি বা নষ্টং যোঽতীতমনুশোচতি
দুঃখেন লভতে দুঃখং দ্বাবনর্থৌ প্রপদ্যতে

317.10

নাশ্রু কুর্বন্তি যে বুদ্ধ্যা দৃষ্ট্বা লোকেষু সংততিম্
সম্যক্প্রপশ্যতঃ সর্বং নাশ্রুকর্মোপপদ্যতে

317.11

দুঃখোপঘাতে শারীরে মানসে বাপ্যুপস্থিতে
যস্মিন্ন শক্যতে কর্তুং যত্নস্তন্নানুচিন্তয়েৎ

317.12

ভৈষজ্যমেতদ্দুঃখস্য যদেতন্নানুচিন্তয়েৎ
চিন্ত্যমানং হি ন ব্যেতি ভূয়শ্চাপি প্রবর্ধতে

317.13

প্রজ্ঞয়া মানসং দুঃখং হন্যাচ্ছারীরমৌষধৈঃ
এতদ্বিজ্ঞানসামর্থ্যং ন বালৈঃ সমতামিয়াৎ

317.14

অনিত্যং যৌবনং রূপং জীবিতং দ্রব্যসংচয়ঃ
আরোগ্যং প্রিয়সংবাসো গৃধ্যেত্তত্র ন পণ্ডিতঃ

317.15

ন জানপদিকং দুঃখমেকঃ শোচিতুমর্হতি
অশোচন্প্রতিকুর্বীত যদি পশ্যেদুপক্রমম্

317.16

সুখাদ্বহুতরং দুঃখং জীবিতে নাত্র সংশয়ঃ
স্নিগ্ধত্বং চেন্দ্রিয়ার্থেষু মোহান্মরণমপ্রিয়ম্

317.17

পরিত্যজতি যো দুঃখং সুখং বাপ্যুভয়ং নরঃ
অভ্যেতি ব্রহ্ম সোঽত্যন্তং ন তং শোচন্তি পণ্ডিতাঃ

317.18

দুঃখমর্থা হি ত্যজ্যন্তে পালনে ন চ তে সুখাঃ
দুঃখেন চাধিগম্যন্তে নাশমেষাং ন চিন্তয়েৎ

317.19

অন্যামন্যাং ধনাবস্থাং প্রাপ্য বৈশেষিকীং নরাঃ
অতৃপ্তা যান্তি বিধ্বংসং সংতোষং যান্তি পণ্ডিতাঃ

317.20

সর্বে ক্ষয়ান্তা নিচয়াঃ পতনান্তাঃ সমুচ্ছ্রয়াঃ
সংয়োগা বিপ্রয়োগান্তা মরণান্তং হি জীবিতম্

317.21

অন্তো নাস্তি পিপাসায়াস্তুষ্টিস্তু পরমং সুখম্
তস্মাত্সংতোষমেবেহ ধনং পশ্যন্তি পণ্ডিতাঃ

317.22

নিমেষমাত্রমপি হি বয়ো গচ্ছন্ন তিষ্ঠতি
স্বশরীরেষ্বনিত্যেষু নিত্যং কিমনুচিন্তয়েৎ

317.23

ভূতেষ্বভাবং সংচিন্ত্য যে বুদ্ধ্বা তমসঃ পরম্
ন শোচন্তি গতাধ্বানঃ পশ্যন্তঃ পরমাং গতিম্

317.24

সংচিন্বানকমেবৈনং কামানামবিতৃপ্তকম্
ব্যাঘ্রঃ পশুমিবাসাদ্য মৃত্যুরাদায় গচ্ছতি

317.25

অথাপ্যুপায়ং সংপশ্যেদ্দুঃখস্য পরিমোক্ষণে
অশোচন্নারভেতৈব যুক্তশ্চাব্যসনী ভবেৎ

317.26

শব্দে স্পর্শে চ রূপে চ গন্ধেষু চ রসেষু চ
নোপভোগাত্পরং কিংচিদ্ধনিনো বাধনস্য বা

317.27

প্রাক্সংপ্রয়োগাদ্ভূতানাং নাস্তি দুঃখমনাময়ম্
বিপ্রয়োগাত্তু সর্বস্য ন শোচেত্প্রকৃতিস্থিতঃ

317.28

ধৃত্যা শিশ্নোদরং রক্ষেত্পাণিপাদং চ চক্ষুষা
চক্ষুঃশ্রোত্রে চ মনসা মনো বাচং চ বিদ্যয়া

317.29

প্রণয়ং প্রতিসংহৃত্য সংস্তুতেষ্বিতরেষু চ
বিচরেদসমুন্নদ্ধঃ স সুখী স চ পণ্ডিতঃ

317.30

অধ্যাত্মরতিরাসীনো নিরপেক্ষো নিরামিষঃ
আত্মনৈব সহায়েন যশ্চরেত্স সুখী ভবেৎ

Contains text from DharmicData, made available under the Open Database License (ODbL). Simple meanings are written by AI and can contain mistakes.