Utshovঅধ্যায় 316
316.1
ভীষ্ম উবাচ
এতস্মিন্নন্তরে শূন্যে নারদঃ সমুপাগমৎ
শুকং স্বাধ্যায়নিরতং বেদার্থান্বক্তুমীপ্সিতান্
316.2
দেবর্ষিং তু শুকো দৃষ্ট্বা নারদং সমুপস্থিতম্
অর্ঘ্যপূর্বেণ বিধিনা বেদোক্তেনাভ্যপূজয়ৎ
316.3
নারদোঽথাব্রবীত্প্রীতো ব্রূহি ব্রহ্মবিদাং বর
কেন ত্বাং শ্রেয়সা তাত যোজয়ামীতি হৃষ্টবৎ
316.4
নারদস্য বচঃ শ্রুত্বা শুকঃ প্রোবাচ ভারত
অস্মিঁল্লোকে হিতং যত্স্যাত্তেন মাং যোক্তুমর্হসি
316.5
নারদ উবাচ
তত্ত্বং জিজ্ঞাসতাং পূর্বমৃষীণাং ভাবিতাত্মনাম্
সনত্কুমারো ভগবানিদং বচনমব্রবীৎ
316.6
নাস্তি বিদ্যাসমং চক্ষুর্নাস্তি বিদ্যাসমং তপঃ
নাস্তি রাগসমং দুঃখং নাস্তি ত্যাগসমং সুখম্
316.7
নিবৃত্তিঃ কর্মণঃ পাপাত্সততং পুণ্যশীলতা
সদ্বৃত্তিঃ সমুদাচারঃ শ্রেয় এতদনুত্তমম্
316.8
মানুষ্যমসুখং প্রাপ্য যঃ সজ্জতি স মুহ্যতি
নালং স দুঃখমোক্ষায় সঙ্গো বৈ দুঃখলক্ষণম্
316.9
সক্তস্য বুদ্ধিশ্চলতি মোহজালবিবর্ধিনী
মোহজালাবৃতো দুঃখমিহ চামুত্র চাশ্নুতে
316.10
সর্বোপায়েন কামস্য ক্রোধস্য চ বিনিগ্রহঃ
কার্যঃ শ্রেয়োর্থিনা তৌ হি শ্রেয়োঘাতার্থমুদ্যতৌ
316.11
নিত্যং ক্রোধাত্তপো রক্ষেচ্ছ্রিয়ং রক্ষেত মত্সরাৎ
বিদ্যাং মানাবমানাভ্যামাত্মানং তু প্রমাদতঃ
316.12
আনৃশংস্যং পরো ধর্মঃ ক্ষমা চ পরমং বলম্
আত্মজ্ঞানং পরং জ্ঞানং ন সত্যাদ্বিদ্যতে পরম্
316.13
সত্যস্য বচনং শ্রেয়ঃ সত্যাদপি হিতং ভবেৎ
যদ্ভূতহিতমত্যন্তমেতত্সত্যং মতং মম
316.14
সর্বারম্ভফলত্যাগী নিরাশীর্নিষ্পরিগ্রহঃ
যেন সর্বং পরিত্যক্তং স বিদ্বান্স চ পণ্ডিতঃ
316.15
ইন্দ্রিয়ৈরিন্দ্রিয়ার্থেভ্যশ্চরত্যাত্মবশৈরিহ
অসজ্জমানঃ শান্তাত্মা নির্বিকারঃ সমাহিতঃ
316.16
আত্মভূতৈরতদ্ভূতঃ সহ চৈব বিনৈব চ
স বিমুক্তঃ পরং শ্রেয়ো নচিরেণাধিগচ্ছতি
316.17
অদর্শনমসংস্পর্শস্তথাসংভাষণং সদা
যস্য ভূতৈঃ সহ মুনে স শ্রেয়ো বিন্দতে পরম্
316.18
ন হিংস্যাত্সর্বভূতানি মৈত্রায়ণগতশ্চরেৎ
নেদং জন্ম সমাসাদ্য বৈরং কুর্বীত কেনচিৎ
316.19
আকিংচন্যং সুসংতোষো নিরাশীষ্ট্বমচাপলম্
এতদাহুঃ পরং শ্রেয় আত্মজ্ঞস্য জিতাত্মনঃ
316.20
পরিগ্রহং পরিত্যজ্য ভব তাত জিতেন্দ্রিয়ঃ
অশোকং স্থানমাতিষ্ঠ ইহ চামুত্র চাভয়ম্
316.21
নিরামিষা ন শোচন্তি ত্যজেহামিষমাত্মনঃ
পরিত্যজ্যামিষং সৌম্য দুঃখতাপাদ্বিমোক্ষ্যসে
316.22
তপোনিত্যেন দান্তেন মুনিনা সংয়তাত্মনা
অজিতং জেতুকামেন ভাব্যং সঙ্গেষ্বসঙ্গিনা
316.23
গুণসঙ্গেষ্বনাসক্ত একচর্যারতঃ সদা
ব্রাহ্মণো নচিরাদেব সুখমায়াত্যনুত্তমম্
316.24
দ্বংদ্বারামেষু ভূতেষু য একো রমতে মুনিঃ
বিদ্ধি প্রজ্ঞানতৃপ্তং তং জ্ঞানতৃপ্তো ন শোচতি
316.25
শুভৈর্লভতি দেবত্বং ব্যামিশ্রৈর্জন্ম মানুষম্
অশুভৈশ্চাপ্যধোজন্ম কর্মভির্লভতেঽবশঃ
316.26
তত্র মৃত্যুজরাদুঃখৈঃ সততং সমভিদ্রুতঃ
সংসারে পচ্যতে জন্তুস্তত্কথং নাববুধ্যসে
316.27
অহিতে হিতসংজ্ঞস্ত্বমধ্রুবে ধ্রুবসংজ্ঞকঃ
অনর্থে চার্থসংজ্ঞস্ত্বং কিমর্থং নাববুধ্যসে
316.28
সংবেষ্ট্যমানং বহুভির্মোহতন্তুভিরাত্মজৈঃ
কোশকারবদাত্মানং বেষ্টয়ন্নাববুধ্যসে
316.29
অলং পরিগ্রহেণেহ দোষবান্হি পরিগ্রহঃ
কৃমির্হি কোশকারস্তু বধ্যতে স্বপরিগ্রহাৎ
316.30
পুত্রদারকুটুম্বেষু সক্তাঃ সীদন্তি জন্তবঃ
সরঃপঙ্কার্ণবে মগ্না জীর্ণা বনগজা ইব
316.31
মহাজালসমাকৃষ্টান্স্থলে মত্স্যানিবোদ্ধৃতান্
স্নেহজালসমাকৃষ্টান্পশ্য জন্তূন্সুদুঃখিতান্
316.32
কুটুম্বং পুত্রদারং চ শরীরং দ্রব্যসংচয়াঃ
পারক্যমধ্রুবং সর্বং কিং স্বং সুকৃতদুষ্কৃতম্
316.33
যদা সর্বং পরিত্যজ্য গন্তব্যমবশেন তে
অনর্থে কিং প্রসক্তস্ত্বং স্বমর্থং নানুতিষ্ঠসি
316.34
অবিশ্রান্তমনালম্বমপাথেয়মদৈশিকম্
তমঃকান্তারমধ্বানং কথমেকো গমিষ্যসি
316.35
ন হি ত্বা প্রস্থিতং কশ্চিত্পৃষ্ঠতোঽনুগমিষ্যতি
সুকৃতং দুষ্কৃতং চ ত্বা যাস্যন্তমনুয়াস্যতি
316.36
বিদ্যা কর্ম চ শৌর্যং চ জ্ঞানং চ বহুবিস্তরম্
অর্থার্থমনুসার্যন্তে সিদ্ধার্থস্তু বিমুচ্যতে
316.37
নিবন্ধনী রজ্জুরেষা যা গ্রামে বসতো রতিঃ
ছিত্ত্বৈনাং সুকৃতো যান্তি নৈনাং ছিন্দন্তি দুষ্কৃতঃ
316.38
রূপকূলাং মনঃস্রোতাং স্পর্শদ্বীপাং রসাবহাম্
গন্ধপঙ্কাং শব্দজলাং স্বর্গমার্গদুরাবহাম্
316.39
ক্ষমারিত্রাং সত্যময়ীং ধর্মস্থৈর্যবটাকরাম্
ত্যাগবাতাধ্বগাং শীঘ্রাং বুদ্ধিনাবা নদীং তরেৎ
316.40
ত্যজ ধর্মমধর্মং চ উভে সত্যানৃতে ত্যজ
উভে সত্যানৃতে ত্যক্ত্বা যেন ত্যজসি তং ত্যজ
316.41
ত্যজ ধর্মমসংকল্পাদধর্মং চাপ্যহিংসয়া
উভে সত্যানৃতে বুদ্ধ্যা বুদ্ধিং পরমনিশ্চয়াৎ
316.42
অস্থিস্থূণং স্নায়ুয়ুতং মাংসশোণিতলেপনম্
চর্মাবনদ্ধং দুর্গন্ধি পূর্ণং মূত্রপুরীষয়োঃ
316.43
জরাশোকসমাবিষ্টং রোগায়তনমাতুরম্
রজস্বলমনিত্যং চ ভূতাবাসং সমুত্সৃজ
316.44
ইদং বিশ্বং জগত্সর্বমজগচ্চাপি যদ্ভবেৎ
মহাভূতাত্মকং সর্বং মহদ্যত্পরমাণু যৎ
316.45
ইন্দ্রিয়াণি চ পঞ্চৈব তমঃ সত্ত্বং রজস্তথা
ইত্যেষ সপ্তদশকো রাশিরব্যক্তসংজ্ঞকঃ
316.46
সর্বৈরিহেন্দ্রিয়ার্থৈশ্চ ব্যক্তাব্যক্তৈর্হি সংহিতঃ
পঞ্চবিংশক ইত্যেষ ব্যক্তাব্যক্তময়ো গুণঃ
316.47
এতৈঃ সর্বৈঃ সমায়ুক্তঃ পুমানিত্যভিধীয়তে
ত্রিবর্গোঽত্র সুখং দুঃখং জীবিতং মরণং তথা
316.48
য ইদং বেদ তত্ত্বেন স বেদ প্রভবাপ্যয়ৌ
পারাশর্যেহ বোদ্ধব্যং জ্ঞানানাং যচ্চ কিংচন
316.49
ইন্দ্রিয়ৈর্গৃহ্যতে যদ্যত্তত্তদ্ব্যক্তমিতি স্থিতিঃ
অব্যক্তমিতি বিজ্ঞেয়ং লিঙ্গগ্রাহ্যমতীন্দ্রিয়ম্
316.50
ইন্দ্রিয়ৈর্নিয়তৈর্দেহী ধারাভিরিব তর্প্যতে
লোকে বিততমাত্মানং লোকং চাত্মনি পশ্যতি
316.51
পরাবরদৃশঃ শক্তির্জ্ঞানবেলাং ন পশ্যতি
পশ্যতঃ সর্বভূতানি সর্বাবস্থাসু সর্বদা
316.52
ব্রহ্মভূতস্য সংয়োগো নাশুভেনোপপদ্যতে
জ্ঞানেন বিবিধান্ক্লেশানতিবৃত্তস্য মোহজান্
লোকে বুদ্ধিপ্রকাশেন লোকমার্গো ন রিষ্যতে
316.53
অনাদিনিধনং জন্তুমাত্মনি স্থিতমব্যয়ম্
অকর্তারমমূর্তং চ ভগবানাহ তীর্থবিৎ
316.54
যো জন্তুঃ স্বকৃতৈস্তৈস্তৈঃ কর্মভির্নিত্যদুঃখিতঃ
স দুঃখপ্রতিঘাতার্থং হন্তি জন্তূননেকধা
316.55
ততঃ কর্ম সমাদত্তে পুনরন্যন্নবং বহু
তপ্যতেঽথ পুনস্তেন ভুক্ত্বাপথ্যমিবাতুরঃ
316.56
অজস্রমেব মোহার্তো দুঃখেষু সুখসংজ্ঞিতঃ
বধ্যতে মথ্যতে চৈব কর্মভির্মন্থবত্সদা
316.57
ততো নিবৃত্তো বন্ধাত্স্বাত্কর্মণামুদয়াদিহ
পরিভ্রমতি সংসারং চক্রবদ্বহুবেদনঃ
316.58
স ত্বং নিবৃত্তবন্ধস্তু নিবৃত্তশ্চাপি কর্মতঃ
সর্ববিত্সর্বজিত্সিদ্ধো ভব ভাববিবর্জিতঃ
316.59
সংয়মেন নবং বন্ধং নিবর্ত্য তপসো বলাৎ
সংপ্রাপ্তা বহবঃ সিদ্ধিমপ্যবাধাং সুখোদয়াম্