Utshovঅধ্যায় 315
315.1
ভীষ্ম উবাচ
এতচ্ছ্রুত্বা গুরোর্বাক্যং ব্যাসশিষ্যা মহৌজসঃ
অন্যোন্যং হৃষ্টমনসঃ পরিষস্বজিরে তদা
315.2
উক্তাঃ স্মো যদ্ভগবতা তদাত্বায়তিসংহিতম্
তন্নো মনসি সংরূঢং করিষ্যামস্তথা চ তৎ
315.3
অন্যোন্যং চ সভাজ্যৈবং সুপ্রীতমনসঃ পুনঃ
বিজ্ঞাপয়ন্তি স্ম গুরুং পুনর্বাক্যবিশারদাঃ
315.4
শৈলাদস্মান্মহীং গন্তুং কাঙ্ক্ষিতং নো মহামুনে
বেদাননেকধা কর্তুং যদি তে রুচিতং বিভো
315.5
শিষ্যাণাং বচনং শ্রুত্বা পরাশরসুতঃ প্রভুঃ
প্রত্যুবাচ ততো বাক্যং ধর্মার্থসহিতং হিতম্
315.6
ক্ষিতিং বা দেবলোকং বা গম্যতাং যদি রোচতে
অপ্রমাদশ্চ বঃ কার্যো ব্রহ্ম হি প্রচুরচ্ছলম্
315.7
তেঽনুজ্ঞাতাস্ততঃ সর্বে গুরুণা সত্যবাদিনা
জগ্মুঃ প্রদক্ষিণং কৃত্বা ব্যাসং মূর্ধ্নাভিবাদ্য চ
315.8
অবতীর্য মহীং তেঽথ চাতুর্হোত্রমকল্পয়ন্
সংয়াজয়ন্তো বিপ্রাংশ্চ রাজন্যাংশ্চ বিশস্তথা
315.9
পূজ্যমানা দ্বিজৈর্নিত্যং মোদমানা গৃহে রতাঃ
যাজনাধ্যাপনরতাঃ শ্রীমন্তো লোকবিশ্রুতাঃ
315.10
অবতীর্ণেষু শিষ্যেষু ব্যাসঃ পুত্রসহায়বান্
তূষ্ণীং ধ্যানপরো ধীমানেকান্তে সমুপাবিশৎ
315.11
তং দদর্শাশ্রমপদে নারদঃ সুমহাতপাঃ
অথৈনমব্রবীত্কালে মধুরাক্ষরয়া গিরা
315.12
ভো ভো মহর্ষে বাসিষ্ঠ ব্রহ্মঘোষো ন বর্ততে
একো ধ্যানপরস্তূষ্ণীং কিমাস্সে চিন্তয়ন্নিব
315.13
ব্রহ্মঘোষৈর্বিরহিতঃ পর্বতোঽয়ং ন শোভতে
রজসা তমসা চৈব সোমঃ সোপপ্লবো যথা
315.14
ন ভ্রাজতে যথাপূর্বং নিষাদানামিবালয়ঃ
দেবর্ষিগণজুষ্টোঽপি বেদধ্বনিনিরাকৃতঃ
315.15
ঋষয়শ্চ হি দেবাশ্চ গন্ধর্বাশ্চ মহৌজসঃ
বিমুক্তা ব্রহ্মঘোষেণ ন ভ্রাজন্তে যথা পুরা
315.16
নারদস্য বচঃ শ্রুত্বা কৃষ্ণদ্বৈপায়নোঽব্রবীৎ
মহর্ষে যত্ত্বয়া প্রোক্তং বেদবাদবিচক্ষণ
315.17
এতন্মনোনুকূলং মে ভবানর্হতি ভাষিতুম্
সর্বজ্ঞঃ সর্বদর্শী চ সর্বত্র চ কুতূহলী
315.18
ত্রিষু লোকেষু যদ্বৃত্তং সর্বং তব মতে স্থিতম্
তদাজ্ঞাপয় বিপ্রর্ষে ব্রূহি কিং করবাণি তে
315.19
যন্ময়া সমনুষ্ঠেয়ং ব্রহ্মর্ষে তদুদাহর
বিয়ুক্তস্যেহ শিষ্যৈর্মে নাতিহৃষ্টমিদং মনঃ
315.20
নারদ উবাচ
অনাম্নায়মলা বেদা ব্রাহ্মণস্যাব্রতং মলম্
মলং পৃথিব্যা বাহীকাঃ স্ত্রীণাং কৌতূহলং মলম্
315.21
অধীয়তাং ভবান্বেদান্সার্ধং পুত্রেণ ধীমতা
বিধুন্বন্ব্রহ্মঘোষেণ রক্ষোভয়কৃতং তমঃ
315.22
ভীষ্ম উবাচ
নারদস্য বচঃ শ্রুত্বা ব্যাসঃ পরমধর্মবিৎ
তথেত্যুবাচ সংহৃষ্টো বেদাভ্যাসে দৃঢব্রতঃ
315.23
শুকেন সহ পুত্রেণ বেদাভ্যাসমথাকরোৎ
স্বরেণোচ্চৈঃ স শৈক্ষেণ লোকানাপূরয়ন্নিব
315.24
তয়োরভ্যসতোরেবং নানাধর্মপ্রবাদিনোঃ
বাতোঽতিমাত্রং প্রববৌ সমুদ্রানিলবেজিতঃ
315.25
ততোঽনধ্যায় ইতি তং ব্যাসঃ পুত্রমবারয়ৎ
শুকো বারিতমাত্রস্তু কৌতূহলসমন্বিতঃ
315.26
অপৃচ্ছত্পিতরং ব্রহ্মন্কুতো বায়ুরভূদয়ম্
আখ্যাতুমর্হতি ভবান্বায়োঃ সর্বং বিচেষ্টিতম্
315.27
শুকস্যৈতদ্বচঃ শ্রুত্বা ব্যাসঃ পরমবিস্মিতঃ
অনধ্যায়নিমিত্তেঽস্মিন্নিদং বচনমব্রবীৎ
315.28
দিব্যং তে চক্ষুরুত্পন্নং স্বস্থং তে নির্মলং মনঃ
তমসা রজসা চাপি ত্যক্তঃ সত্ত্বে ব্যবস্থিতঃ
315.29
আদর্শে স্বামিব ছায়াং পশ্যস্যাত্মানমাত্মনা
ন্যস্যাত্মনি স্বয়ং বেদান্বুদ্ধ্যা সমনুচিন্তয়
315.30
দেবয়ানচরো বিষ্ণোঃ পিতৃয়ানশ্চ তামসঃ
দ্বাবেতৌ প্রেত্য পন্থানৌ দিবং চাধশ্চ গচ্ছতঃ
315.31
পৃথিব্যামন্তরিক্ষে চ যত্র সংবান্তি বায়বঃ
সপ্তৈতে বায়ুমার্গা বৈ তান্নিবোধানুপূর্বশঃ
315.32
তত্র দেবগণাঃ সাধ্যাঃ সমভূবন্মহাবলাঃ
তেষামপ্যভবত্পুত্রঃ সমানো নাম দুর্জয়ঃ
315.33
উদানস্তস্য পুত্রোঽভূদ্ব্যানস্তস্যাভবত্সুতঃ
অপানশ্চ ততো জ্ঞেয়ঃ প্রাণশ্চাপি ততঃ পরম্
315.34
অনপত্যোঽভবত্প্রাণো দুর্ধর্ষঃ শত্রুতাপনঃ
পৃথক্কর্মাণি তেষাং তু প্রবক্ষ্যামি যথাতথম্
315.35
প্রাণিনাং সর্বতো বায়ুশ্চেষ্টা বর্তয়তে পৃথক্
প্রাণনাচ্চৈব ভূতানাং প্রাণ ইত্যভিধীয়তে
315.36
প্রেরয়ত্যভ্রসংঘাতান্ধূমজাংশ্চোষ্মজাংশ্চ যঃ
প্রথমঃ প্রথমে মার্গে প্রবহো নাম সোঽনিলঃ
315.37
অম্বরে স্নেহমভ্রেভ্যস্তডিদ্ভ্যশ্চোত্তমদ্যুতিঃ
আবহো নাম সংবাতি দ্বিতীয়ঃ শ্বসনো নদন্
315.38
উদয়ং জ্যোতিষাং শশ্বত্সোমাদীনাং করোতি যঃ
অন্তর্দেহেষু চোদানং যং বদন্তি মহর্ষয়ঃ
315.39
যশ্চতুর্ভ্যঃ সমুদ্রেভ্যো বায়ুর্ধারয়তে জলম্
উদ্ধৃত্যাদদতে চাপো জীমূতেভ্যোঽম্বরেঽনিলঃ
315.40
যোঽদ্ভিঃ সংয়োজ্য জীমূতান্পর্জন্যায় প্রয়চ্ছতি
উদ্বহো নাম বর্ষিষ্ঠস্ত্রিতীয়ঃ স সদাগতিঃ
315.41
সমুহ্যমানা বহুধা যেন নীলাঃ পৃথগ্ঘনাঃ
বর্ষমোক্ষকৃতারম্ভাস্তে ভবন্তি ঘনাঘনাঃ
315.42
সংহতা যেন চাবিদ্ধা ভবন্তি নদতাং নদাঃ
রক্ষণার্থায় সংভূতা মেঘত্বমুপয়ান্তি চ
315.43
যোঽসৌ বহতি দেবানাং বিমানানি বিহায়সা
চতুর্থঃ সংবহো নাম বায়ুঃ স গিরিমর্দনঃ
315.44
যেন বেগবতা রুগ্ণা রূক্ষেণারুজতা রসান্
বায়ুনা বিহতা মেঘা ন ভবন্তি বলাহকাঃ
315.45
দারুণোত্পাতসংচারো নভসঃ স্তনয়িত্নুমান্
পঞ্চমঃ স মহাবেগো বিবহো নাম মারুতঃ
315.46
যস্মিন্পারিপ্লবে দিব্যা বহন্ত্যাপো বিহায়সা
পুণ্যং চাকাশগঙ্গায়াস্তোয়ং বিষ্টভ্য তিষ্ঠতি
315.47
দূরাত্প্রতিহতো যস্মিন্নেকরশ্মির্দিবাকরঃ
যোনিরংশুসহস্রস্য যেন ভাতি বসুংধরা
315.48
যস্মাদাপ্যায়তে সোমো নিধির্দিব্যোঽমৃতস্য চ
ষষ্ঠঃ পরিবহো নাম স বায়ুর্জবতাং বরঃ
315.49
সর্বপ্রাণভৃতাং প্রাণান্যোঽন্তকালে নিরস্যতি
যস্য বর্ত্মানুবর্তেতে মৃত্যুবৈবস্বতাবুভৌ
315.50
সম্যগন্বীক্ষতাং বুদ্ধ্যা শান্তয়াধ্যাত্মনিত্যয়া
ধ্যানাভ্যাসাভিরামাণাং যোঽমৃতত্বায় কল্পতে
315.51
যং সমাসাদ্য বেগেন দিশামন্তং প্রপেদিরে
দক্ষস্য দশ পুত্রাণাং সহস্রাণি প্রজাপতেঃ
315.52
যেন সৃষ্টঃ পরাভূতো যাত্যেব ন নিবর্ততে
পরাবহো নাম পরো বায়ুঃ স দুরতিক্রমঃ
315.53
এবমেতেঽদিতেঃ পুত্রা মারুতাঃ পরমাদ্ভুতাঃ
অনারমন্তঃ সংবান্তি সর্বগাঃ সর্বধারিণঃ
315.54
এতত্তু মহদাশ্চর্যং যদয়ং পর্বতোত্তমঃ
কম্পিতঃ সহসা তেন বায়ুনাভিপ্রবায়তা
315.55
বিষ্ণোর্নিঃশ্বাসবাতোঽয়ং যদা বেগসমীরিতঃ
সহসোদীর্যতে তাত জগত্প্রব্যথতে তদা
315.56
তস্মাদ্ব্রহ্মবিদো ব্রহ্ম নাধীয়ন্তেঽতিবায়তি
বায়োর্বায়ুভয়ং হ্যুক্তং ব্রহ্ম তত্পীডিতং ভবেৎ
315.57
এতাবদুক্ত্বা বচনং পরাশরসুতঃ প্রভুঃ
উক্ত্বা পুত্রমধীষ্বেতি ব্যোমগঙ্গাময়াত্তদা