Utshovঅধ্যায় 314
314.1
ভীষ্ম উবাচ
এতচ্ছ্রুত্বা তু বচনং কৃতাত্মা কৃতনিশ্চয়ঃ
আত্মনাত্মানমাস্থায় দৃষ্ট্বা চাত্মানমাত্মনা
314.2
কৃতকার্যঃ সুখী শান্তস্তূষ্ণীং প্রায়াদুদঙ্মুখঃ
শৈশিরং গিরিমুদ্দিশ্য সধর্মা মাতরিশ্বনঃ
314.3
এতস্মিন্নেব কালে তু দেবর্ষির্নারদস্তদা
হিমবন্তমিয়াদ্দ্রষ্টুং সিদ্ধচারণসেবিতম্
314.4
তমপ্সরোগণাকীর্ণং গীতস্বননিনাদিতম্
কিংনরাণাং সমূহৈশ্চ ভৃঙ্গরাজৈস্তথৈব চ
314.5
মদ্গুভিঃ খঞ্জরীটৈশ্চ বিচিত্রৈর্জীবজীবকৈঃ
চিত্রবর্ণৈর্ময়ূরৈশ্চ কেকাশতবিরাজিতৈঃ
রাজহংসসমূহৈশ্চ হৃষ্টৈঃ পরভৃতৈস্তথা
314.6
পক্ষিরাজো গরুত্মাংশ্চ যং নিত্যমধিগচ্ছতি
চত্বারো লোকপালাশ্চ দেবাঃ সর্ষিগণাস্তথা
যত্র নিত্যং সমায়ান্তি লোকস্য হিতকাম্যয়া
314.7
বিষ্ণুনা যত্র পুত্রার্থে তপস্তপ্তং মহাত্মনা
যত্রৈব চ কুমারেণ বাল্যে ক্ষিপ্তা দিবৌকসঃ
314.8
শক্তির্ন্যস্তা ক্ষিতিতলে ত্রৈলোক্যমবমন্য বৈ
যত্রোবাচ জগত্স্কন্দঃ ক্ষিপন্বাক্যমিদং তদা
314.9
যোঽন্যোঽস্তি মত্তোঽভ্যধিকো বিপ্রা যস্যাধিকং প্রিয়াঃ
যো ব্রহ্মণ্যো দ্বিতীয়োঽস্তি ত্রিষু লোকেষু বীর্যবান্
314.10
সোঽভ্যুদ্ধরত্বিমাং শক্তিমথ বা কম্পয়ত্বিতি
তচ্ছ্রুত্বা ব্যথিতা লোকাঃ ক ইমামুদ্ধরেদিতি
314.11
অথ দেবগণং সর্বং সংভ্রান্তেন্দ্রিয়মানসম্
অপশ্যদ্ভগবান্বিষ্ণুঃ ক্ষিপ্তং সাসুররাক্ষসম্
কিং ন্বত্র সুকৃতং কার্যং ভবেদিতি বিচিন্তয়ন্
314.12
স নামৃষ্যত তং ক্ষেপমবৈক্ষত চ পাবকিম্
স প্রহস্য বিশুদ্ধাত্মা শক্তিং প্রজ্বলিতাং তদা
কম্পয়ামাস সব্যেন পাণিনা পুরুষোত্তমঃ
314.13
শক্ত্যাং তু কম্পমানায়াং বিষ্ণুনা বলিনা তদা
মেদিনী কম্পিতা সর্বা সশৈলবনকাননা
314.14
শক্তেনাপি সমুদ্ধর্তুং কম্পিতা সা ন তূদ্ধৃতা
রক্ষতা স্কন্দরাজস্য ধর্ষণাং প্রভবিষ্ণুনা
314.15
তাং কম্পয়িত্বা ভগবান্প্রহ্রাদমিদমব্রবীৎ
পশ্য বীর্যং কুমারস্য নৈতদন্যঃ করিষ্যতি
314.16
সোঽমৃষ্যমাণস্তদ্বাক্যং সমুদ্ধরণনিশ্চিতঃ
জগ্রাহ তাং তস্য শক্তিং ন চৈনামপ্যকম্পয়ৎ
314.17
নাদং মহান্তং মুক্ত্বা স মূর্ছিতো গিরিমূর্ধনি
বিহ্বলঃ প্রাপতদ্ভূমৌ হিরণ্যকশিপোঃ সুতঃ
314.18
যত্রোত্তরাং দিশং গত্বা শৈলরাজস্য পার্শ্বতঃ
তপোঽতপ্যত দুর্ধর্ষস্তাত নিত্যং বৃষধ্বজঃ
314.19
পাবকেন পরিক্ষিপ্তো দীপ্যতা তস্য চাশ্রমঃ
আদিত্যবন্ধনং নাম দুর্ধর্ষমকৃতাত্মভিঃ
314.20
ন তত্র শক্যতে গন্তুং যক্ষরাক্ষসদানবৈঃ
দশয়োজনবিস্তারমগ্নিজ্বালাসমাবৃতম্
314.21
ভগবান্পাবকস্তত্র স্বয়ং তিষ্ঠতি বীর্যবান্
সর্ববিঘ্নান্প্রশময়ন্মহাদেবস্য ধীমতঃ
314.22
দিব্যং বর্ষসহস্রং হি পাদেনৈকেন তিষ্ঠতঃ
দেবান্সংতাপয়ংস্তত্র মহাদেবো ধৃতব্রতঃ
314.23
ঐন্দ্রীং তু দিশমাস্থায় শৈলরাজস্য ধীমতঃ
বিবিক্তে পর্বততটে পারাশর্যো মহাতপাঃ
বেদানধ্যাপয়ামাস ব্যাসঃ শিষ্যান্মহাতপাঃ
314.24
সুমন্তুং চ মহাভাগং বৈশংপায়নমেব চ
জৈমিনিং চ মহাপ্রাজ্ঞং পৈলং চাপি তপস্বিনম্
314.25
এভিঃ শিষ্যৈঃ পরিবৃতো ব্যাস আস্তে মহাতপাঃ
তত্রাশ্রমপদং পুণ্যং দদর্শ পিতুরুত্তমম্
আরণেয়ো বিশুদ্ধাত্মা নভসীব দিবাকরঃ
314.26
অথ ব্যাসঃ পরিক্ষিপ্তং জ্বলন্তমিব পাবকম্
দদর্শ সুতমায়ান্তং দিবাকরসমপ্রভম্
314.27
অসজ্জমানং বৃক্ষেষু শৈলেষু বিষমেষু চ
যোগয়ুক্তং মহাত্মানং যথা বাণং গুণচ্যুতম্
314.28
সোঽভিগম্য পিতুঃ পাদাবগৃহ্ণাদরণীসুতঃ
যথোপজোষং তৈশ্চাপি সমাগচ্ছন্মহামুনিঃ
314.29
ততো নিবেদয়ামাস পিত্রে সর্বমশেষতঃ
শুকো জনকরাজেন সংবাদং প্রীতমানসঃ
314.30
এবমধ্যাপয়ঞ্শিষ্যান্ব্যাসঃ পুত্রং চ বীর্যবান্
উবাস হিমবত্পৃষ্ঠে পারাশর্যো মহামুনিঃ
314.31
ততঃ কদাচিচ্ছিষ্যাস্তং পরিবার্যাবতস্থিরে
বেদাধ্যয়নসংপন্নাঃ শান্তাত্মানো জিতেন্দ্রিয়াঃ
314.32
বেদেষু নিষ্ঠাং সংপ্রাপ্য সাঙ্গেষ্বতিতপস্বিনঃ
অথোচুস্তে তদা ব্যাসং শিষ্যাঃ প্রাঞ্জলয়ো গুরুম্
314.33
মহতা শ্রেয়সা যুক্তা যশসা চ স্ম বর্ধিতাঃ
একং ত্বিদানীমিচ্ছামো গুরুণানুগ্রহং কৃতম্
314.34
ইতি তেষাং বচঃ শ্রুত্বা ব্রহ্মর্ষিস্তানুবাচ হ
উচ্যতামিতি তদ্বত্সা যদ্বঃ কার্যং প্রিয়ং ময়া
314.35
এতদ্বাক্যং গুরোঃ শ্রুত্বা শিষ্যাস্তে হৃষ্টমানসাঃ
পুনঃ প্রাঞ্জলয়ো ভূত্বা প্রণম্য শিরসা গুরুম্
314.36
ঊচুস্তে সহিতা রাজন্নিদং বচনমুত্তমম্
যদি প্রীত উপাধ্যায়ো ধন্যাঃ স্মো মুনিসত্তম
314.37
কাঙ্ক্ষামস্তু বয়ং সর্বে বরং দত্তং মহর্ষিণা
ষষ্ঠঃ শিষ্যো ন তে খ্যাতিং গচ্ছেদত্র প্রসীদ নঃ
314.38
চত্বারস্তে বয়ং শিষ্যা গুরুপুত্রশ্চ পঞ্চমঃ
ইহ বেদাঃ প্রতিষ্ঠেরন্নেষ নঃ কাঙ্ক্ষিতো বরঃ
314.39
শিষ্যাণাং বচনং শ্রুত্বা ব্যাসো বেদার্থতত্ত্ববিৎ
পরাশরাত্মজো ধীমান্পরলোকার্থচিন্তকঃ
উবাচ শিষ্যান্ধর্মাত্মা ধর্ম্যং নৈঃশ্রেয়সং বচঃ
314.40
ব্রাহ্মণায় সদা দেয়ং ব্রহ্ম শুশ্রূষবে ভবেৎ
ব্রহ্মলোকে নিবাসং যো ধ্রুবং সমভিকাঙ্ক্ষতি
314.41
ভবন্তো বহুলাঃ সন্তু বেদো বিস্তার্যতাময়ম্
নাশিষ্যে সংপ্রদাতব্যো নাব্রতে নাকৃতাত্মনি
314.42
এতে শিষ্যগুণাঃ সর্বে বিজ্ঞাতব্যা যথার্থতঃ
নাপরীক্ষিতচারিত্রে বিদ্যা দেয়া কথংচন
314.43
যথা হি কনকং শুদ্ধং তাপচ্ছেদনিঘর্ষণৈঃ
পরীক্ষেত তথা শিষ্যানীক্ষেত্কুলগুণাদিভিঃ
314.44
ন নিয়োজ্যাশ্চ বঃ শিষ্যা অনিয়োগে মহাভয়ে
যথামতি যথাপাঠং তথা বিদ্যা ফলিষ্যতি
314.45
সর্বস্তরতু দুর্গাণি সর্বো ভদ্রাণি পশ্যতু
শ্রাবয়েচ্চতুরো বর্ণান্কৃত্বা ব্রাহ্মণমগ্রতঃ
314.46
বেদস্যাধ্যয়নং হীদং তচ্চ কার্যং মহত্স্মৃতম্
স্তুত্যর্থমিহ দেবানাং বেদাঃ সৃষ্টাঃ স্বয়ংভুবা
314.47
যো নির্বদেত সংমোহাদ্ব্রাহ্মণং বেদপারগম্
সোঽপধ্যানাদ্ব্রাহ্মণস্য পরাভূয়াদসংশয়ম্
314.48
যশ্চাধর্মেণ বিব্রূয়াদ্যশ্চাধর্মেণ পৃচ্ছতি
তয়োরন্যতরঃ প্রৈতি বিদ্বেষং বাধিগচ্ছতি
314.49
এতদ্বঃ সর্বমাখ্যাতং স্বাধ্যায়স্য বিধিং প্রতি
উপকুর্যাচ্চ শিষ্যাণামেতচ্চ হৃদি বো ভবেৎ