Utshovঅধ্যায় 313
313.1
ভীষ্ম উবাচ
ততঃ স রাজা জনকো মন্ত্রিভিঃ সহ ভারত
পুরঃ পুরোহিতং কৃত্বা সর্বাণ্যন্তঃপুরাণি চ
313.2
আসনং চ পুরস্কৃত্য রত্নানি বিবিধানি চ
শিরসা চার্ঘ্যমাদায় গুরুপুত্রং সমভ্যগাৎ
313.3
স তদাসনমাদায় বহুরত্নবিভূষিতম্
স্পর্ধ্যাস্তরণসংস্তীর্ণং সর্বতোভদ্রমৃদ্ধিমৎ
313.4
পুরোধসা সংগৃহীতং হস্তেনালভ্য পার্থিবঃ
প্রদদৌ গুরুপুত্রায় শুকায় পরমার্চিতম্
313.5
তত্রোপবিষ্টং তং কার্ষ্ণিং শাস্ত্রতঃ প্রত্যপূজয়ৎ
পাদ্যং নিবেদ্য প্রথমমর্ঘ্যং গাং চ ন্যবেদয়ৎ
স চ তাং মন্ত্রবত্পূজাং প্রত্যগৃহ্ণাদ্যথাবিধি
313.6
প্রতিগৃহ্য চ তাং পূজাং জনকাদ্দ্বিজসত্তমঃ
গাং চৈব সমনুজ্ঞায় রাজানমনুমান্য চ
313.7
পর্যপৃচ্ছন্মহাতেজা রাজ্ঞঃ কুশলমব্যয়ম্
অনাময়ং চ রাজেন্দ্র শুকঃ সানুচরস্য হ
313.8
অনুজ্ঞাতঃ স তেনাথ নিষসাদ সহানুগঃ
উদারসত্ত্বাভিজনো ভূমৌ রাজা কৃতাঞ্জলিঃ
313.9
কুশলং চাব্যয়ং চৈব পৃষ্ট্বা বৈয়াসকিং নৃপঃ
কিমাগমনমিত্যেব পর্যপৃচ্ছত পার্থিবঃ
313.10
শুক উবাচ
পিত্রাহমুক্তো ভদ্রং তে মোক্ষধর্মার্থকোবিদঃ
বিদেহরাজো যাজ্যো মে জনকো নাম বিশ্রুতঃ
313.11
তত্র গচ্ছস্ব বৈ তূর্ণং যদি তে হৃদি সংশয়ঃ
প্রবৃত্তৌ বা নিবৃত্তৌ বা স তে ছেত্স্যতি সংশয়ম্
313.12
সোঽহং পিতুর্নিয়োগাত্ত্বামুপপ্রষ্টুমিহাগতঃ
তন্মে ধর্মভৃতাং শ্রেষ্ঠ যথাবদ্বক্তুমর্হসি
313.13
কিং কার্যং ব্রাহ্মণেনেহ মোক্ষার্থশ্চ কিমাত্মকঃ
কথং চ মোক্ষঃ কর্তব্যো জ্ঞানেন তপসাপি বা
313.14
জনক উবাচ
যত্কার্যং ব্রাহ্মণেনেহ জন্মপ্রভৃতি তচ্ছৃণু
কৃতোপনয়নস্তাত ভবেদ্বেদপরায়ণঃ
313.15
তপসা গুরুবৃত্ত্যা চ ব্রহ্মচর্যেণ চাভিভো
দেবতানাং পিতৄণাং চাপ্যনৃণশ্চানসূয়কঃ
313.16
বেদানধীত্য নিয়তো দক্ষিণামপবর্জ্য চ
অভ্যনুজ্ঞামথ প্রাপ্য সমাবর্তেত বৈ দ্বিজঃ
313.17
সমাবৃত্তস্তু গার্হস্থ্যে সদারো নিয়তো বসেৎ
অনসূয়ুর্যথান্যায়মাহিতাগ্নিস্তথৈব চ
313.18
উত্পাদ্য পুত্রপৌত্রং তু বন্যাশ্রমপদে বসেৎ
তানেবাগ্নীন্যথাশাস্ত্রমর্চয়ন্নতিথিপ্রিয়ঃ
313.19
স বনেঽগ্নীন্যথান্যায়মাত্মন্যারোপ্য ধর্মবিৎ
নির্দ্বংদ্বো বীতরাগাত্মা ব্রহ্মাশ্রমপদে বসেৎ
313.20
শুক উবাচ
উত্পন্নে জ্ঞানবিজ্ঞানে প্রত্যক্ষে হৃদি শাশ্বতে
কিমবশ্যং নিবস্তব্যমাশ্রমেষু বনেষু চ
313.21
এতদ্ভবন্তং পৃচ্ছামি তদ্ভবান্বক্তুমর্হতি
যথাবেদার্থতত্ত্বেন ব্রূহি মে ত্বং জনাধিপ
313.22
জনক উবাচ
ন বিনা জ্ঞানবিজ্ঞানং মোক্ষস্যাধিগমো ভবেৎ
ন বিনা গুরুসংবন্ধং জ্ঞানস্যাধিগমঃ স্মৃতঃ
313.23
আচার্যঃ প্লাবিতা তস্য জ্ঞানং প্লব ইহোচ্যতে
বিজ্ঞায় কৃতকৃত্যস্তু তীর্ণস্তদুভয়ং ত্যজেৎ
313.24
অনুচ্ছেদায় লোকানামনুচ্ছেদায় কর্মণাম্
পূর্বৈরাচরিতো ধর্মশ্চাতুরাশ্রম্যসংকথঃ
313.25
অনেন ক্রময়োগেন বহুজাতিষু কর্মণা
কৃত্বা শুভাশুভং কর্ম মোক্ষো নামেহ লভ্যতে
313.26
ভাবিতৈঃ কারণৈশ্চায়ং বহুসংসারয়োনিষু
আসাদয়তি শুদ্ধাত্মা মোক্ষং বৈ প্রথমাশ্রমে
313.27
তমাসাদ্য তু মুক্তস্য দৃষ্টার্থস্য বিপশ্চিতঃ
ত্রিষ্বাশ্রমেষু কো ন্বর্থো ভবেত্পরমভীপ্সতঃ
313.28
রাজসাংস্তামসাংশ্চৈব নিত্যং দোষান্বিবর্জয়েৎ
সাত্ত্বিকং মার্গমাস্থায় পশ্যেদাত্মানমাত্মনা
313.29
সর্বভূতেষু চাত্মানং সর্বভূতানি চাত্মনি
সংপশ্যন্নোপলিপ্যেত জলে বারিচরো যথা
313.30
পক্ষীব প্লবনাদূর্ধ্বমমুত্রানন্ত্যমশ্নুতে
বিহায় দেহং নির্মুক্তো নির্দ্বংদ্বঃ প্রশমং গতঃ
313.31
অত্র গাথাঃ পুরা গীতাঃ শৃণু রাজ্ঞা যয়াতিনা
ধার্যন্তে যা দ্বিজৈস্তাত মোক্ষশাস্ত্রবিশারদৈঃ
313.32
জ্যোতিরাত্মনি নান্যত্র রতং তত্রৈব চৈব তৎ
স্বয়ং চ শক্যং তদ্দ্রষ্টুং সুসমাহিতচেতসা
313.33
ন বিভেতি পরো যস্মান্ন বিভেতি পরাচ্চ যঃ
যশ্চ নেচ্ছতি ন দ্বেষ্টি ব্রহ্ম সংপদ্যতে তদা
313.34
যদা ভাবং ন কুরুতে সর্বভূতেষু পাপকম্
কর্মণা মনসা বাচা ব্রহ্ম সংপদ্যতে তদা
313.35
সংয়োজ্য তপসাত্মানমীর্ষ্যামুত্সৃজ্য মোহিনীম্
ত্যক্ত্বা কামং চ লোভং চ ততো ব্রহ্মত্বমশ্নুতে
313.36
যদা শ্রব্যে চ দৃশ্যে চ সর্বভূতেষু চাপ্যয়ম্
সমো ভবতি নির্দ্বংদ্বো ব্রহ্ম সংপদ্যতে তদা
313.37
যদা স্তুতিং চ নিন্দাং চ সমত্বেনৈব পশ্যতি
কাঞ্চনং চায়সং চৈব সুখদুঃখে তথৈব চ
313.38
শীতমুষ্ণং তথৈবার্থমনর্থং প্রিয়মপ্রিয়ম্
জীবিতং মরণং চৈব ব্রহ্ম সংপদ্যতে তদা
313.39
প্রসার্যেহ যথাঙ্গানি কূর্মঃ সংহরতে পুনঃ
তথেন্দ্রিয়াণি মনসা সংয়ন্তব্যানি ভিক্ষুণা
313.40
তমঃপরিগতং বেশ্ম যথা দীপেন দৃশ্যতে
তথা বুদ্ধিপ্রদীপেন শক্য আত্মা নিরীক্ষিতুম্
313.41
এতত্সর্বং প্রপশ্যামি ত্বয়ি বুদ্ধিমতাং বর
যচ্চান্যদপি বেত্তব্যং তত্ত্বতো বেদ তদ্ভবান্
313.42
ব্রহ্মর্ষে বিদিতশ্চাসি বিষয়ান্তমুপাগতঃ
গুরোস্তব প্রসাদেন তব চৈবোপশিক্ষয়া
313.43
তস্যৈব চ প্রসাদেন প্রাদুর্ভূতং মহামুনে
জ্ঞানং দিব্যং মমাপীদং তেনাসি বিদিতো মম
313.44
অধিকং তব বিজ্ঞানমধিকা চ গতিস্তব
অধিকং চ তবৈশ্বর্যং তচ্চ ত্বং নাববুধ্যসে
313.45
বাল্যাদ্বা সংশয়াদ্বাপি ভয়াদ্বাপ্যবিমোক্ষজাৎ
উত্পন্নে চাপি বিজ্ঞানে নাধিগচ্ছতি তাং গতিম্
313.46
ব্যবসায়েন শুদ্ধেন মদ্বিধৈশ্ছিন্নসংশয়ঃ
বিমুচ্য হৃদয়গ্রন্থীনাসাদয়তি তাং গতিম্
313.47
ভবাংশ্চোত্পন্নবিজ্ঞানঃ স্থিরবুদ্ধিরলোলুপঃ
ব্যবসায়াদৃতে ব্রহ্মন্নাসাদয়তি তত্পরম্
313.48
নাস্তি তে সুখদুঃখেষু বিশেষো নাস্তি লোলুপা
নৌত্সুক্যং নৃত্তগীতেষু ন রাগ উপজায়তে
313.49
ন বন্ধুষু নিবন্ধস্তে ন ভয়েষ্বস্তি তে ভয়ম্
পশ্যামি ত্বাং মহাভাগ তুল্যলোষ্টাশ্মকাঞ্চনম্
313.50
অহং চ ত্বানুপশ্যামি যে চাপ্যন্যে মনীষিণঃ
আস্থিতং পরমং মার্গমক্ষয়ং তমনাময়ম্
313.51
যত্ফলং ব্রাহ্মণস্যেহ মোক্ষার্থশ্চ যদাত্মকঃ
তস্মিন্বৈ বর্তসে বিপ্র কিমন্যত্পরিপৃচ্ছসি