Utshovঅধ্যায় 312
312.1
ভীষ্ম উবাচ
স মোক্ষমনুচিন্ত্যৈব শুকঃ পিতরমভ্যগাৎ
প্রাহাভিবাদ্য চ গুরুং শ্রেয়োর্থী বিনয়ান্বিতঃ
312.2
মোক্ষধর্মেষু কুশলো ভগবান্প্রব্রবীতু মে
যথা মে মনসঃ শান্তিঃ পরমা সংভবেত্প্রভো
312.3
শ্রুত্বা পুত্রস্য বচনং পরমর্ষিরুবাচ তম্
অধীষ্ব পুত্র মোক্ষং বৈ ধর্মাংশ্চ বিবিধানপি
312.4
পিতুর্নিয়োগাজ্জগ্রাহ শুকো ব্রহ্মবিদাং বরঃ
যোগশাস্ত্রং চ নিখিলং কাপিলং চৈব ভারত
312.5
স তং ব্রাহ্ম্যা শ্রিয়া যুক্তং ব্রহ্মতুল্যপরাক্রমম্
মেনে পুত্রং যদা ব্যাসো মোক্ষবিদ্যাবিশারদম্
312.6
উবাচ গচ্ছেতি তদা জনকং মিথিলেশ্বরম্
স তে বক্ষ্যতি মোক্ষার্থং নিখিলেন বিশেষতঃ
312.7
পিতুর্নিয়োগাদগমন্মৈথিলং জনকং নৃপম্
প্রষ্টুং ধর্মস্য নিষ্ঠাং বৈ মোক্ষস্য চ পরায়ণম্
312.8
উক্তশ্চ মানুষেণ ত্বং পথা গচ্ছেত্যবিস্মিতঃ
ন প্রভাবেণ গন্তব্যমন্তরিক্ষচরেণ বৈ
312.9
আর্জবেণৈব গন্তব্যং ন সুখান্বেষিণা পথা
নান্বেষ্টব্যা বিশেষাস্তু বিশেষা হি প্রসঙ্গিনঃ
312.10
অহংকারো ন কর্তব্যো যাজ্যে তস্মিন্নরাধিপে
স্থাতব্যং চ বশে তস্য স তে ছেত্স্যতি সংশয়ম্
312.11
স ধর্মকুশলো রাজা মোক্ষশাস্ত্রবিশারদঃ
যাজ্যো মম স যদ্ব্রূয়াত্তত্কার্যমবিশঙ্কয়া
312.12
এবমুক্তঃ স ধর্মাত্মা জগাম মিথিলাং মুনিঃ
পদ্ভ্যাং শক্তোঽন্তরিক্ষেণ ক্রান্তুং ভূমিং সসাগরাম্
312.13
স গিরীংশ্চাপ্যতিক্রম্য নদীস্তীর্ত্বা সরাংসি চ
বহুব্যালমৃগাকীর্ণা বিবিধাশ্চাটবীস্তথা
312.14
মেরোর্হরেশ্চ দ্বে বর্ষে বর্ষং হৈমবতং তথা
ক্রমেণৈব ব্যতিক্রম্য ভারতং বর্ষমাসদৎ
312.15
স দেশান্বিবিধান্পশ্যংশ্চীনহূণনিষেবিতান্
আর্যাবর্তমিমং দেশমাজগাম মহামুনিঃ
312.16
পিতুর্বচনমাজ্ঞায় তমেবার্থং বিচিন্তয়ন্
অধ্বানং সোঽতিচক্রাম খেঽচরঃ খে চরন্নিব
312.17
পত্তনানি চ রম্যাণি স্ফীতানি নগরাণি চ
রত্নানি চ বিচিত্রাণি শুকঃ পশ্যন্ন পশ্যতি
312.18
উদ্যানানি চ রম্যাণি তথৈবায়তনানি চ
পুণ্যানি চৈব তীর্থানি সোঽতিক্রম্য তথাধ্বনঃ
312.19
সোঽচিরেণৈব কালেন বিদেহানাসসাদ হ
রক্ষিতান্ধর্মরাজেন জনকেন মহাত্মনা
312.20
তত্র গ্রামান্বহূন্পশ্যন্বহ্বন্নরসভোজনান্
পল্লীঘোষান্সমৃদ্ধাংশ্চ বহুগোকুলসংকুলান্
312.21
স্ফীতাংশ্চ শালিয়বসৈর্হংসসারসসেবিতান্
পদ্মিনীভিশ্চ শতশঃ শ্রীমতীভিরলংকৃতান্
312.22
স বিদেহানতিক্রম্য সমৃদ্ধজনসেবিতান্
মিথিলোপবনং রম্যমাসসাদ মহর্দ্ধিমৎ
312.23
হস্ত্যশ্বরথসংকীর্ণং নরনারীসমাকুলম্
পশ্যন্নপশ্যন্নিব তত্সমতিক্রামদচ্যুতঃ
312.24
মনসা তং বহন্ভারং তমেবার্থং বিচিন্তয়ন্
আত্মারামঃ প্রসন্নাত্মা মিথিলামাসসাদ হ
312.25
তস্যা দ্বারং সমাসাদ্য দ্বারপালৈর্নিবারিতঃ
স্থিতো ধ্যানপরো মুক্তো বিদিতঃ প্রবিবেশ হ
312.26
স রাজমার্গমাসাদ্য সমৃদ্ধজনসংকুলম্
পার্থিবক্ষয়মাসাদ্য নিঃশঙ্কঃ প্রবিবেশ হ
312.27
তত্রাপি দ্বারপালাস্তমুগ্রবাচো ন্যষেধয়ন্
তথৈব চ শুকস্তত্র নির্মন্যুঃ সমতিষ্ঠত
312.28
ন চাতপাধ্বসংতপ্তঃ ক্ষুত্পিপাসাশ্রমান্বিতঃ
প্রতাম্যতি গ্লায়তি বা নাপৈতি চ তথাতপাৎ
312.29
তেষাং তু দ্বারপালানামেকঃ শোকসমন্বিতঃ
মধ্যংগতমিবাদিত্যং দৃষ্ট্বা শুকমবস্থিতম্
312.30
পূজয়িত্বা যথান্যায়মভিবাদ্য কৃতাঞ্জলিঃ
প্রাবেশয়ত্ততঃ কক্ষ্যাং দ্বিতীয়াং রাজবেশ্মনঃ
312.31
তত্রাসীনঃ শুকস্তাত মোক্ষমেবানুচিন্তয়ন্
ছায়ায়ামাতপে চৈব সমদর্শী মহাদ্যুতিঃ
312.32
তং মুহূর্তাদিবাগম্য রাজ্ঞো মন্ত্রী কৃতাঞ্জলিঃ
প্রাবেশয়ত্ততঃ কক্ষ্যাং তৃতীয়াং রাজবেশ্মনঃ
312.33
তত্রান্তঃপুরসংবদ্ধং মহচ্চৈত্ররথোপমম্
সুবিভক্তজলাক্রীডং রম্যং পুষ্পিতপাদপম্
312.34
তদ্দর্শয়িত্বা স শুকং মন্ত্রী কাননমুত্তমম্
অর্হমাসনমাদিশ্য নিশ্চক্রাম ততঃ পুনঃ
312.35
তং চারুবেষাঃ সুশ্রোণ্যস্তরুণ্যঃ প্রিয়দর্শনাঃ
সূক্ষ্মরক্তাম্বরধরাস্তপ্তকাঞ্চনভূষণাঃ
312.36
সংলাপোল্লাপকুশলা নৃত্তগীতবিশারদাঃ
স্মিতপূর্বাভিভাষিণ্যো রূপেণাপ্সরসাং সমাঃ
312.37
কামোপচারকুশলা ভাবজ্ঞাঃ সর্বকোবিদাঃ
পরং পঞ্চাশতো নার্যো বারমুখ্যাঃ সমাদ্রবন্
312.38
পাদ্যাদীনি প্রতিগ্রাহ্য পূজয়া পরয়ার্চ্য চ
দেশকালোপপন্নেন সাধ্বন্নেনাপ্যতর্পয়ন্
312.39
তস্য ভুক্তবতস্তাত তদন্তঃপুরকাননম্
সুরম্যং দর্শয়ামাসুরেকৈকশ্যেন ভারত
312.40
ক্রীডন্ত্যশ্চ হসন্ত্যশ্চ গায়ন্ত্যশ্চৈব তাঃ শুকম্
উদারসত্ত্বং সত্ত্বজ্ঞাঃ সর্বাঃ পর্যচরংস্তদা
312.41
আরণেয়স্তু শুদ্ধাত্মা ত্রিসংদেহস্ত্রিকর্মকৃৎ
বশ্যেন্দ্রিয়ো জিতক্রোধো ন হৃষ্যতি ন কুপ্যতি
312.42
তস্মৈ শয্যাসনং দিব্যং বরার্হং রত্নভূষিতম্
স্পর্ধ্যাস্তরণসংস্তীর্ণং দদুস্তাঃ পরমস্ত্রিয়ঃ
312.43
পাদশৌচং তু কৃত্বৈব শুকঃ সংধ্যামুপাস্য চ
নিষসাদাসনে পুণ্যে তমেবার্থং বিচিন্তয়ন্
312.44
পূর্বরাত্রে তু তত্রাসৌ ভূত্বা ধ্যানপরায়ণঃ
মধ্যরাত্রে যথান্যায়ং নিদ্রামাহারয়ত্প্রভুঃ
312.45
ততো মুহূর্তাদুত্থায় কৃত্বা শৌচমনন্তরম্
স্ত্রীভিঃ পরিবৃতো ধীমান্ধ্যানমেবান্বপদ্যত
312.46
অনেন বিধিনা কার্ষ্ণিস্তদহঃশেষমচ্যুতঃ
তাং চ রাত্রিং নৃপকুলে বর্তয়ামাস ভারত