Utshovঅধ্যায় 311
311.1
ভীষ্ম উবাচ
স লব্ধ্বা পরমং দেবাদ্বরং সত্যবতীসুতঃ
অরণীং ত্বথ সংগৃহ্য মমন্থাগ্নিচিকীর্ষয়া
311.2
অথ রূপং পরং রাজন্বিভ্রতীং স্বেন তেজসা
ঘৃতাচীং নামাপ্সরসমপশ্যদ্ভগবানৃষিঃ
311.3
ঋষিরপ্সরসং দৃষ্ট্বা সহসা কামমোহিতঃ
অভবদ্ভগবান্ব্যাসো বনে তস্মিন্যুধিষ্ঠির
311.4
সা চ কৃত্বা তদা ব্যাসং কামসংবিগ্নমানসম্
শুকী ভূত্বা মহারাজ ঘৃতাচী সমুপাগমৎ
311.5
স তামপ্সরসং দৃষ্ট্বা রূপেণান্যেন সংবৃতাম্
শরীরজেনানুগতঃ সর্বগাত্রাতিগেন হ
311.6
স তু ধৈর্যেণ মহতা নিগৃহ্ণন্হৃচ্ছয়ং মুনিঃ
ন শশাক নিয়ন্তুং তদ্ব্যাসঃ প্রবিসৃতং মনঃ
ভাবিত্বাচ্চৈব ভাবস্য ঘৃতাচ্যা বপুষা হৃতঃ
311.7
যত্নান্নিয়চ্ছতস্তস্য মুনেরগ্নিচিকীর্ষয়া
অরণ্যামেব সহসা তস্য শুক্রমবাপতৎ
311.8
সোঽবিশঙ্কেন মনসা তথৈব দ্বিজসত্তমঃ
অরণীং মমন্থ ব্রহ্মর্ষিস্তস্যাং জজ্ঞে শুকো নৃপ
311.9
শুক্রে নির্মথ্যমানে তু শুকো জজ্ঞে মহাতপাঃ
পরমর্ষির্মহায়োগী অরণীগর্ভসংভবঃ
311.10
যথাধ্বরে সমিদ্ধোঽগ্নির্ভাতি হব্যমুপাত্তবান্
তথারূপঃ শুকো জজ্ঞে প্রজ্বলন্নিব তেজসা
311.11
বিভ্রত্পিতুশ্চ কৌরব্য রূপবর্ণমনুত্তমম্
বভৌ তদা ভাবিতাত্মা বিধূমোঽগ্নিরিব জ্বলন্
311.12
তং গঙ্গা সরিতাং শ্রেষ্ঠা মেরুপৃষ্ঠে জনেশ্বর
স্বরূপিণী তদাভ্যেত্য স্নাপয়ামাস বারিণা
311.13
অন্তরিক্ষাচ্চ কৌরব্য দণ্ডঃ কৃষ্ণাজিনং চ হ
পপাত ভুবি রাজেন্দ্র শুকস্যার্থে মহাত্মনঃ
311.14
জেগীয়ন্তে স্ম গন্ধর্বা ননৃতুশ্চাপ্সরোগণাঃ
দেবদুন্দুভয়শ্চৈব প্রাবাদ্যন্ত মহাস্বনাঃ
311.15
বিশ্বাবসুশ্চ গন্ধর্বস্তথা তুম্বুরুনারদৌ
হাহাহূহূ চ গন্ধর্বৌ তুষ্টুবুঃ শুকসংভবম্
311.16
তত্র শক্রপুরোগাশ্চ লোকপালাঃ সমাগতাঃ
দেবা দেবর্ষয়শ্চৈব তথা ব্রহ্মর্ষয়োঽপি চ
311.17
দিব্যানি সর্বপুষ্পাণি প্রববর্ষাত্র মারুতঃ
জঙ্গমং স্থাবরং চৈব প্রহৃষ্টমভবজ্জগৎ
311.18
তং মহাত্মা স্বয়ং প্রীত্যা দেব্যা সহ মহাদ্যুতিঃ
জাতমাত্রং মুনেঃ পুত্রং বিধিনোপানয়ত্তদা
311.19
তস্য দেবেশ্বরঃ শক্রো দিব্যমদ্ভুতদর্শনম্
দদৌ কমণ্ডলুং প্রীত্যা দেববাসাংসি চাভিভো
311.20
হংসাশ্চ শতপত্রাশ্চ সারসাশ্চ সহস্রশঃ
প্রদক্ষিণমবর্তন্ত শুকাশ্চাষাশ্চ ভারত
311.21
আরণেয়স্তথা দিব্যং প্রাপ্য জন্ম মহাদ্যুতিঃ
তত্রৈবোবাস মেধাবী ব্রতচারী সমাহিতঃ
311.22
উত্পন্নমাত্রং তং বেদাঃ সরহস্যাঃ সসংগ্রহাঃ
উপতস্থুর্মহারাজ যথাস্য পিতরং তথা
311.23
বৃহস্পতিং তু বব্রে স বেদবেদাঙ্গভাষ্যবিৎ
উপাধ্যায়ং মহারাজ ধর্মমেবানুচিন্তয়ন্
311.24
সোঽধীত্য বেদানখিলান্সরহস্যান্সসংগ্রহান্
ইতিহাসং চ কার্ত্স্ন্যেন রাজশাস্ত্রাণি চাভিভো
311.25
গুরবে দক্ষিণাং দত্ত্বা সমাবৃত্তো মহামুনিঃ
উগ্রং তপঃ সমারেভে ব্রহ্মচারী সমাহিতঃ
311.26
দেবতানামৃষীণাং চ বাল্যেঽপি স মহাতপাঃ
সংমন্ত্রণীয়ো মান্যশ্চ জ্ঞানেন তপসা তথা
311.27
ন ত্বস্য রমতে বুদ্ধিরাশ্রমেষু নরাধিপ
ত্রিষু গার্হস্থ্যমূলেষু মোক্ষধর্মানুদর্শিনঃ