অধ্যায় 310

310.1

যুধিষ্ঠির উবাচ
কথং ব্যাসস্য ধর্মাত্মা শুকো জজ্ঞে মহাতপাঃ
সিদ্ধিং চ পরমাং প্রাপ্তস্তন্মে ব্রূহি পিতামহ

310.2

কস্যাং চোত্পাদয়ামাস শুকং ব্যাসস্তপোধনঃ
ন হ্যস্য জননীং বিদ্ম জন্ম চাগ্র্যং মহাত্মনঃ

310.3

কথং চ বালস্য সতঃ সূক্ষ্মজ্ঞানে গতা মতিঃ
যথা নান্যস্য লোকেঽস্মিন্দ্বিতীয়স্যেহ কস্যচিৎ

310.4

এতদিচ্ছাম্যহং শ্রোতুং বিস্তরেণ মহাদ্যুতে
ন হি মে তৃপ্তিরস্তীহ শৃণ্বতোঽমৃতমুত্তমম্

310.5

মাহাত্ম্যমাত্ময়োগং চ বিজ্ঞানং চ শুকস্য হ
যথাবদানুপূর্ব্যেণ তন্মে ব্রূহি পিতামহ

310.6

ভীষ্ম উবাচ
ন হায়নৈর্ন পলিতৈর্ন বিত্তেন ন বন্ধুভিঃ
ঋষয়শ্চক্রিরে ধর্মং যোঽনূচানঃ স নো মহান্

310.7

তপোমূলমিদং সর্বং যন্মাং পৃচ্ছসি পাণ্ডব
তদিন্দ্রিয়াণি সংয়ম্য তপো ভবতি নান্যথা

310.8

ইন্দ্রিয়াণাং প্রসঙ্গেন দোষমৃচ্ছত্যসংশয়ম্
সংনিয়ম্য তু তান্যেব সিদ্ধিং প্রাপ্নোতি মানবঃ

310.9

অশ্বমেধসহস্রস্য বাজপেয়শতস্য চ
যোগস্য কলয়া তাত ন তুল্যং বিদ্যতে ফলম্

310.10

অত্র তে বর্তয়িষ্যামি জন্ময়োগফলং যথা
শুকস্যাগ্র্যাং গতিং চৈব দুর্বিদামকৃতাত্মভিঃ

310.11

মেরুশৃঙ্গে কিল পুরা কর্ণিকারবনায়ুতে
বিজহার মহাদেবো ভীমৈর্ভূতগণৈর্বৃতঃ

310.12

শৈলরাজসুতা চৈব দেবী তত্রাভবত্পুরা
তত্র দিব্যং তপস্তেপে কৃষ্ণদ্বৈপায়নঃ প্রভুঃ

310.13

যোগেনাত্মানমাবিশ্য যোগধর্মপরায়ণঃ
ধারয়ন্স তপস্তেপে পুত্রার্থং কুরুসত্তম

310.14

অগ্নের্ভূমেরপাং বায়োরন্তরিক্ষস্য চাভিভো
বীর্যেণ সংমিতঃ পুত্রো মম ভূয়াদিতি স্ম হ

310.15

সংকল্পেনাথ সোঽনেন দুষ্প্রাপেণাকৃতাত্মভিঃ
বরয়ামাস দেবেশমাস্থিতস্তপ উত্তমম্

310.16

অতিষ্ঠন্মারুতাহারঃ শতং কিল সমাঃ প্রভুঃ
আরাধয়ন্মহাদেবং বহুরূপমুমাপতিম্

310.17

তত্র ব্রহ্মর্ষয়শ্চৈব সর্বে দেবর্ষয়স্তথা
লোকপালাশ্চ লোকেশং সাধ্যাশ্চ বসুভিঃ সহ

310.18

আদিত্যাশ্চৈব রুদ্রাশ্চ দিবাকরনিশাকরৌ
মরুতো মারুতশ্চৈব সাগরাঃ সরিতস্তথা

310.19

অশ্বিনৌ দেবগন্ধর্বাস্তথা নারদপর্বতৌ
বিশ্বাবসুশ্চ গন্ধর্বঃ সিদ্ধাশ্চাপ্সরসাং গণাঃ

310.20

তত্র রুদ্রো মহাদেবঃ কর্ণিকারময়ীং শুভাম্
ধারয়াণঃ স্রজং ভাতি জ্যোত্স্নামিব নিশাকরঃ

310.21

তস্মিন্দিব্যে বনে রম্যে দেবদেবর্ষিসংকুলে
আস্থিতঃ পরমং যোগমৃষিঃ পুত্রার্থমুদ্যতঃ

310.22

ন চাস্য হীয়তে বর্ণো ন গ্লানিরুপজায়তে
ত্রয়াণামপি লোকানাং তদদ্ভুতমিবাভবৎ

310.23

জটাশ্চ তেজসা তস্য বৈশ্বানরশিখোপমাঃ
প্রজ্বলন্ত্যঃ স্ম দৃশ্যন্তে যুক্তস্যামিততেজসঃ

310.24

মার্কণ্ডেয়ো হি ভগবানেতদাখ্যাতবান্মম
স দেবচরিতানীহ কথয়ামাস মে সদা

310.25

তা এতাদ্যাপি কৃষ্ণস্য তপসা তেন দীপিতাঃ
অগ্নিবর্ণা জটাস্তাত প্রকাশন্তে মহাত্মনঃ

310.26

এবংবিধেন তপসা তস্য ভক্ত্যা চ ভারত
মহেশ্বরঃ প্রসন্নাত্মা চকার মনসা মতিম্

310.27

উবাচ চৈনং ভগবাংস্ত্র্যম্বকঃ প্রহসন্নিব
এবংবিধস্তে তনয়ো দ্বৈপায়ন ভবিষ্যতি

310.28

যথা হ্যগ্নির্যথা বায়ুর্যথা ভূমির্যথা জলম্
যথা চ খং তথা শুদ্ধো ভবিষ্যতি সুতো মহান্

310.29

তদ্ভাবভাবী তদ্বুদ্ধিস্তদাত্মা তদপাশ্রয়ঃ
তেজসাবৃত্য লোকাংস্ত্রীন্যশঃ প্রাপ্স্যতি কেবলম্

Contains text from DharmicData, made available under the Open Database License (ODbL). Simple meanings are written by AI and can contain mistakes.