Utshovঅধ্যায় 309
309.1
যুধিষ্ঠির উবাচ
কথং নির্বেদমাপন্নঃ শুকো বৈয়াসকিঃ পুরা
এতদিচ্ছামি কৌরব্য শ্রোতুং কৌতূহলং হি মে
309.2
ভীষ্ম উবাচ
প্রাকৃতেন সুবৃত্তেন চরন্তমকুতোভয়ম্
অধ্যাপ্য কৃত্স্নং স্বাধ্যায়মন্বশাদ্বৈ পিতা সুতম্
309.3
ধর্মং পুত্র নিষেবস্ব সুতীক্ষ্ণৌ হি হিমাতপৌ
ক্ষুত্পিপাসে চ বায়ুং চ জয় নিত্যং জিতেন্দ্রিয়ঃ
309.4
সত্যমার্জবমক্রোধমনসূয়াং দমং তপঃ
অহিংসাং চানৃশংস্যং চ বিধিবত্পরিপালয়
309.5
সত্যে তিষ্ঠ রতো ধর্মে হিত্বা সর্বমনার্জবম্
দেবতাতিথিশেষেণ যাত্রাং প্রাণস্য সংশ্রয়
309.6
ফেনপাত্রোপমে দেহে জীবে শকুনিবত্স্থিতে
অনিত্যে প্রিয়সংবাসে কথং স্বপিষি পুত্রক
309.7
অপ্রমত্তেষু জাগ্রত্সু নিত্যয়ুক্তেষু শত্রুষু
অন্তরং লিপ্সমানেষু বালস্ত্বং নাববুধ্যসে
309.8
গণ্যমানেষু বর্ষেষু ক্ষীয়মাণে তথায়ুষি
জীবিতে শিষ্যমাণে চ কিমুত্থায় ন ধাবসি
309.9
ঐহলৌকিকমীহন্তে মাংসশোণিতবর্ধনম্
পারলৌকিককার্যেষু প্রসুপ্তা ভৃশনাস্তিকাঃ
309.10
ধর্মায় যেঽভ্যসূয়ন্তি বুদ্ধিমোহান্বিতা নরাঃ
অপথা গচ্ছতাং তেষামনুয়াতাপি পীড্যতে
309.11
যে তু তুষ্টাঃ সুনিয়তাঃ সত্যাগমপরায়ণাঃ
ধর্ম্যং পন্থানমারূঢাস্তানুপাস্স্ব চ পৃচ্ছ চ
309.12
উপধার্য মতং তেষাং বৃদ্ধানাং ধর্মদর্শিনাম্
নিয়চ্ছ পরয়া বুদ্ধ্যা চিত্তমুত্পথগামি বৈ
309.13
অদ্যকালিকয়া বুদ্ধ্যা দূরে শ্ব ইতি নির্ভয়াঃ
সর্বভক্ষা ন পশ্যন্তি কর্মভূমিং বিচেতসঃ
309.14
ধর্মনিঃশ্রেণিমাস্থায় কিংচিত্কিংচিত্সমারুহ
কোশকারবদাত্মানং বেষ্টয়ন্নাববুধ্যসে
309.15
নাস্তিকং ভিন্নমর্যাদং কূলপাতমিবাস্থিরম্
বামতঃ কুরু বিস্রব্ধো নরং বেণুমিবোদ্ধতম্
309.16
কামং ক্রোধং চ মৃত্যুং চ পঞ্চেন্দ্রিয়জলাং নদীম্
নাবং ধৃতিময়ীং কৃত্বা জন্মদুর্গাণি সংতর
309.17
মৃত্যুনাভ্যাহতে লোকে জরয়া পরিপীডিতে
অমোঘাসু পতন্তীষু ধর্ময়ানেন সংতর
309.18
তিষ্ঠন্তং চ শয়ানং চ মৃত্যুরন্বেষতে যদা
নির্বৃতিং লভসে কস্মাদকস্মান্মৃত্যুনাশিতঃ
309.19
সংচিন্বানকমেবৈনং কামানামবিতৃপ্তকম্
বৃকীবোরণমাসাদ্য মৃত্যুরাদায় গচ্ছতি
309.20
ক্রমশঃ সংচিতশিখো ধর্মবুদ্ধিময়ো মহান্
অন্ধকারে প্রবেষ্টব্যে দীপো যত্নেন ধার্যতাম্
309.21
সংপতন্দেহজালানি কদাচিদিহ মানুষে
ব্রাহ্মণ্যং লভতে জন্তুস্তত্পুত্র পরিপালয়
309.22
ব্রাহ্মণস্য হি দেহোঽয়ং ন কামার্থায় জায়তে
ইহ ক্লেশায় তপসে প্রেত্য ত্বনুপমং সুখম্
309.23
ব্রাহ্মণ্যং বহুভিরবাপ্যতে তপোভি;স্তল্লব্ধ্বা ন পরিপণেন হেডিতব্যম্
স্বাধ্যায়ে তপসি দমে চ নিত্যয়ুক্তঃ; ক্ষেমার্থী কুশলপরঃ সদা যতস্ব
309.24
অব্যক্তপ্রকৃতিরয়ং কলাশরীরঃ; সূক্ষ্মাত্মা ক্ষণত্রুটিশো নিমেষরোমা
ঋত্বাস্যঃ সমবলশুক্লকৃষ্ণনেত্রো; মাসাঙ্গো দ্রবতি বয়োহয়ো নরাণাম্
309.25
তং দৃষ্ট্বা প্রসৃতমজস্রমুগ্রবেগং; গচ্ছন্তং সততমিহাব্যপেক্ষমাণম্
চক্ষুস্তে যদি ন পরপ্রণেতৃনেয়ং; ধর্মে তে ভবতু মনঃ পরং নিশম্য
309.26
যেঽমী তু প্রচলিতধর্মকামবৃত্তাঃ; ক্রোশন্তঃ সততমনিষ্টসংপ্রয়োগাঃ
ক্লিশ্যন্তে পরিগতবেদনাশরীরা; বহ্বীভিঃ সুভৃশমধর্মবাসনাভিঃ
309.27
রাজা ধর্মপরঃ সদা শুভগোপ্তা; সমীক্ষ্য সুকৃতিনাং দধাতি লোকান্
বহুবিধমপি চরতঃ প্রদিশতি; সুখমনুপগতং নিরবদ্যম্
309.28
শ্বানো ভীষণায়োমুখানি বয়াংসি; বডগৃধ্রকুলপক্ষিণাং চ সংঘাঃ
নরাং কদনে রুধিরপা গুরুবচন;নুদমুপরতং বিশসন্তি
309.29
মর্যাদা নিয়তাঃ স্বয়ংভুবা য ইহেমাঃ; প্রভিনত্তি দশগুণা মনোনুগত্বাৎ
নিবসতি ভৃশমসুখং পিতৃবিষয়;বিপিনমবগাহ্য স পাপঃ
309.30
যো লুব্ধঃ সুভৃশং প্রিয়ানৃতশ্চ মনুষ্যঃ; সততনিকৃতিবঞ্চনারতিঃ স্যাৎ
উপনিধিভিরসুখকৃত্স পরমনিরয়গো; ভৃশমসুখমনুভবতি দুষ্কৃতকর্মা
309.31
উষ্ণাং বৈতরণীং মহানদী;মবগাঢোঽসিপত্রবনভিন্নগাত্রঃ
পরশুবনশয়ো নিপতিতো; বসতি চ মহানিরয়ে ভৃশার্তঃ
309.32
মহাপদানি কত্থসে ন চাপ্যবেক্ষসে পরম্
চিরস্য মৃত্যুকারিকামনাগতাং ন বুধ্যসে
309.33
প্রয়াস্যতাং কিমাস্যতে সমুত্থিতং মহদ্ভয়ম্
অতিপ্রমাথি দারুণং সুখস্য সংবিধীয়তাম্
309.34
পুরা মৃতঃ প্রণীয়সে যমস্য মৃত্যুশাসনাৎ
তদন্তিকায় দারুণৈঃ প্রয়ত্নমার্জবে কুরু
309.35
পুরা সমূলবান্ধবং প্রভুর্হরত্যদুঃখবিৎ
তবেহ জীবিতং যমো ন চাস্তি তস্য বারকঃ
309.36
পুরা বিবাতি মারুতো যমস্য যঃ পুরঃসরঃ
পুরৈক এব নীয়সে কুরুষ্ব সাংপরায়িকম্
309.37
পুরা সহিক্ক এব তে প্রবাতি মারুতোঽন্তকঃ
পুরা চ বিভ্রমন্তি তে দিশো মহাভয়াগমে
309.38
স্মৃতিশ্চ সংনিরুধ্যতে পুরা তবেহ পুত্রক
সমাকুলস্য গচ্ছতঃ সমাধিমুত্তমং কুরু
309.39
কৃতাকৃতে শুভাশুভে প্রমাদকর্মবিপ্লুতে
স্মরন্পুরা ন তপ্যসে নিধত্স্ব কেবলং নিধিম্
309.40
পুরা জরা কলেবরং বিজর্জরীকরোতি তে
বলাঙ্গরূপহারিণী নিধত্স্ব কেবলং নিধিম্
309.41
পুরা শরীরমন্তকো ভিনত্তি রোগসায়কৈঃ
প্রসহ্য জীবিতক্ষয়ে তপো মহত্সমাচর
309.42
পুরা বৃকা ভয়ংকরা মনুষ্যদেহগোচরাঃ
অভিদ্রবন্তি সর্বতো যতস্ব পুণ্যশীলনে
309.43
পুরান্ধকারমেককোঽনুপশ্যসি ত্বরস্ব বৈ
পুরা হিরণ্ময়ান্নগান্নিরীক্ষসেঽদ্রিমূর্ধনি
309.44
পুরা কুসংগতানি তে সুহৃন্মুখাশ্চ শত্রবঃ
বিচালয়ন্তি দর্শনাদ্ঘটস্ব পুত্র যত্পরম্
309.45
ধনস্য যস্য রাজতো ভয়ং ন চাস্তি চৌরতঃ
মৃতং চ যন্ন মুঞ্চতি সমর্জয়স্ব তদ্ধনম্
309.46
ন তত্র সংবিভজ্যতে স্বকর্মভিঃ পরস্পরম্
যদেব যস্য যৌতকং তদেব তত্র সোঽশ্নুতে
309.47
পরত্র যেন জীব্যতে তদেব পুত্র দীয়তাম্
ধনং যদক্ষয়ং ধ্রুবং সমর্জয়স্ব তত্স্বয়ম্
309.48
ন যাবদেব পচ্যতে মহাজনস্য যাবকম্
অপক্ব এব যাবকে পুরা প্রণীয়সে ত্বর
309.49
ন মাতৃপিতৃবান্ধবা ন সংস্তুতঃ প্রিয়ো জনঃ
অনুব্রজন্তি সংকটে ব্রজন্তমেকপাতিনম্
309.50
যদেব কর্ম কেবলং স্বয়ং কৃতং শুভাশুভম্
তদেব তস্য যৌতকং ভবত্যমুত্র গচ্ছতঃ
309.51
হিরণ্যরত্নসংচয়াঃ শুভাশুভেন সংচিতাঃ
ন তস্য দেহসংক্ষয়ে ভবন্তি কার্যসাধকাঃ
309.52
পরত্রগামিকস্য তে কৃতাকৃতস্য কর্মণঃ
ন সাক্ষিরাত্মনা সমো নৃণামিহাস্তি কশ্চন
309.53
মনুষ্যদেহশূন্যকং ভবত্যমুত্র গচ্ছতঃ
প্রপশ্য বুদ্ধিচক্ষুষা প্রদৃশ্যতে হি সর্বতঃ
309.54
ইহাগ্নিসূর্যবায়বঃ শরীরমাশ্রিতাস্ত্রয়ঃ
ত এব তস্য সাক্ষিণো ভবন্তি ধর্মদর্শিনঃ
309.55
যথানিশেষু সর্বতঃস্পৃশত্সু সর্বদারিষু
প্রকাশগূঢবৃত্তিষু স্বধর্মমেব পালয়
309.56
অনেকপারিপন্থিকে বিরূপরৌদ্ররক্ষিতে
স্বমেব কর্ম রক্ষ্যতাং স্বকর্ম তত্র গচ্ছতি
309.57
ন তত্র সংবিভজ্যতে স্বকর্মণা পরস্পরম্
যথাকৃতং স্বকর্মজং তদেব ভুজ্যতে ফলম্
309.58
যথাপ্সরোগণাঃ ফলং সুখং মহর্ষিভিঃ সহ
তথাপ্নুবন্তি কর্মতো বিমানকামগামিনঃ
309.59
যথেহ যত্কৃতং শুভং বিপাপ্মভিঃ কৃতাত্মভিঃ
তদাপ্নুবন্তি মানবাস্তথা বিশুদ্ধয়োনয়ঃ
309.60
প্রজাপতেঃ সলোকতাং বৃহস্পতেঃ শতক্রতোঃ
ব্রজন্তি তে পরাং গতিং গৃহস্থধর্মসেতুভিঃ
309.61
সহস্রশোঽপ্যনেকশঃ প্রবক্তুমুত্সহামহে
অবুদ্ধিমোহনং পুনঃ প্রভুর্বিনা ন যাবকম্
309.62
গতা দ্বিরষ্টবর্ষতা ধ্রুবোঽসি পঞ্চবিংশকঃ
কুরুষ্ব ধর্মসংচয়ং বয়ো হি তেঽতিবর্ততে
309.63
পুরা করোতি সোঽন্তকঃ প্রমাদগোমুখং দমম্
যথাগৃহীতমুত্থিতং ত্বরস্ব ধর্মপালনে
309.64
যদা ত্বমেব পৃষ্ঠতস্ত্বমগ্রতো গমিষ্যসি
তথা গতিং গমিষ্যতঃ কিমাত্মনা পরেণ বা
309.65
যদেকপাতিনাং সতাং ভবত্যমুত্র গচ্ছতাম্
ভয়েষু সাংপরায়িকং নিধত্স্ব তং মহানিধিম্
309.66
সকূলমূলবান্ধবং প্রভুর্হরত্যসঙ্গবান্
ন সন্তি যস্য বারকাঃ কুরুষ্ব ধর্মসংনিধিম্
309.67
ইদং নিদর্শনং ময়া তবেহ পুত্র সংমতম্
স্বদর্শনানুমানতঃ প্রবর্ণিতং কুরুষ্ব তৎ
309.68
দধাতি যঃ স্বকর্মণা ধনানি যস্য কস্যচিৎ
অবুদ্ধিমোহজৈর্গুণৈঃ শতৈক এব যুজ্যতে
309.69
শ্রুতং সমর্থমস্তু তে প্রকুর্বতঃ শুভাঃ ক্রিয়াঃ
তদেব তত্র দর্শনং কৃতজ্ঞমর্থসংহিতম্
309.70
নিবন্ধনী রজ্জুরেষা যা গ্রামে বসতো রতিঃ
ছিত্ত্বৈনাং সুকৃতো যান্তি নৈনাং ছিন্দন্তি দুষ্কৃতঃ
309.71
কিং তে ধনেন কিং বন্ধুভিস্তে; কিং তে পুত্রৈঃ পুত্রক যো মরিষ্যসি
আত্মানমন্বিচ্ছ গুহাং প্রবিষ্টং; পিতামহাস্তে ক্ব গতাশ্চ সর্বে
309.72
শ্বঃকার্যমদ্য কুর্বীত পূর্বাহ্ণে চাপরাহ্ণিকম্
কো হি তদ্বেদ কস্যাদ্য মৃত্যুসেনা নিবেক্ষ্যতে
309.73
অনুগম্য শ্মশানান্তং নিবর্তন্তীহ বান্ধবাঃ
অগ্নৌ প্রক্ষিপ্য পুরুষং জ্ঞাতয়ঃ সুহৃদস্তথা
309.74
নাস্তিকান্নিরনুক্রোশান্নরান্পাপমতৌ স্থিতান্
বামতঃ কুরু বিশ্রব্ধং পরং প্রেপ্সুরতন্দ্রিতঃ
309.75
এবমভ্যাহতে লোকে কালেনোপনিপীডিতে
সুমহদ্ধৈর্যমালম্ব্য ধর্মং সর্বাত্মনা কুরু
309.76
অথেমং দর্শনোপায়ং সম্যগ্যো বেত্তি মানবঃ
সম্যক্স ধর্মং কৃত্বেহ পরত্র সুখমেধতে
309.77
ন দেহভেদে মরণং বিজানতাং; ন চ প্রণাশঃ স্বনুপালিতে পথি
ধর্মং হি যো বর্ধয়তে স পণ্ডিতো; য এব ধর্মাচ্চ্যবতে স মুহ্যতি
309.78
প্রয়ুক্তয়োঃ কর্মপথি স্বকর্মণোঃ; ফলং প্রয়োক্তা লভতে যথাবিধি
নিহীনকর্মা নিরয়ং প্রপদ্যতে; ত্রিবিষ্টপং গচ্ছতি ধর্মপারগঃ
309.79
সোপানভূতং স্বর্গস্য মানুষ্যং প্রাপ্য দুর্লভম্
তথাত্মানং সমাদধ্যাদ্ভ্রশ্যেত ন পুনর্যথা
309.80
যস্য নোত্ক্রামতি মতিঃ স্বর্গমার্গানুসারিণী
তমাহুঃ পুণ্যকর্মাণমশোচ্যং মিত্রবান্ধবৈঃ
309.81
যস্য নোপহতা বুদ্ধির্নিশ্চয়েষ্ববলম্বতে
স্বর্গে কৃতাবকাশস্য তস্য নাস্তি মহদ্ভয়ম্
309.82
তপোবনেষু যে জাতাস্তত্রৈব নিধনং গতাঃ
তেষামল্পতরো ধর্মঃ কামভোগমজানতাম্
309.83
যস্তু ভোগান্পরিত্যজ্য শরীরেণ তপশ্চরেৎ
ন তেন কিংচিন্ন প্রাপ্তং তন্মে বহুমতং ফলম্
309.84
মাতাপিতৃসহস্রাণি পুত্রদারশতানি চ
অনাগতান্যতীতানি কস্য তে কস্য বা বয়ম্
309.85
ন তেষাং ভবতা কার্যং ন কার্যং তব তৈরপি
স্বকৃতৈস্তানি যাতানি ভবাংশ্চৈব গমিষ্যতি
309.86
ইহ লোকে হি ধনিনঃ পরোঽপি স্বজনায়তে
স্বজনস্তু দরিদ্রাণাং জীবতামেব নশ্যতি
309.87
সংচিনোত্যশুভং কর্ম কলত্রাপেক্ষয়া নরঃ
ততঃ ক্লেশমবাপ্নোতি পরত্রেহ তথৈব চ
309.88
পশ্য ত্বং ছিদ্রভূতং হি জীবলোকং স্বকর্মণা
তত্কুরুষ্ব তথা পুত্র কৃত্স্নং যত্সমুদাহৃতম্
309.89
তদেতত্সংপ্রদৃশ্যৈব কর্মভূমিং প্রবিশ্য তাম্
শুভান্যাচরিতব্যানি পরলোকমভীপ্সতা
309.90
মাসর্তুসংজ্ঞাপরিবর্তকেন; সূর্যাগ্নিনা রাত্রিদিবেন্ধনেন
স্বকর্মনিষ্ঠাফলসাক্ষিকেণ; ভূতানি কালঃ পচতি প্রসহ্য
309.91
ধনেন কিং যন্ন দদাতি নাশ্নুতে; বলেন কিং যেন রিপূন্ন বাধতে
শ্রুতেন কিং যেন ন ধর্মমাচরে;ত্কিমাত্মনা যো ন জিতেন্দ্রিয়ো বশী
309.92
ইদং দ্বৈপায়নবচো হিতমুক্তং নিশম্য তু
শুকো গতঃ পরিত্যজ্য পিতরং মোক্ষদেশিকম্