Utshovঅধ্যায় 308
308.1
যুধিষ্ঠির উবাচ
অপরিত্যজ্য গার্হস্থ্যং কুরুরাজর্ষিসত্তম
কঃ প্রাপ্তো বিনয়ং বুদ্ধ্যা মোক্ষতত্ত্বং বদস্ব মে
308.2
সংন্যস্যতে যথাত্মায়ং সংন্যস্তাত্মা যথা চ যঃ
পরং মোক্ষস্য যচ্চাপি তন্মে ব্রূহি পিতামহ
308.3
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
জনকস্য চ সংবাদং সুলভায়াশ্চ ভারত
308.4
সংন্যাসফলিকঃ কশ্চিদ্বভূব নৃপতিঃ পুরা
মৈথিলো জনকো নাম ধর্মধ্বজ ইতি শ্রুতঃ
308.5
স বেদে মোক্ষশাস্ত্রে চ স্বে চ শাস্ত্রে কৃতাগমঃ
ইন্দ্রিয়াণি সমাধায় শশাস বসুধামিমাম্
308.6
তস্য বেদবিদঃ প্রাজ্ঞাঃ শ্রুত্বা তাং সাধুবৃত্ততাম্
লোকেষু স্পৃহয়ন্ত্যন্যে পুরুষাঃ পুরুষেশ্বর
308.7
অথ ধর্ময়ুগে তস্মিন্যোগধর্মমনুষ্ঠিতা
মহীমনুচচারৈকা সুলভা নাম ভিক্ষুকী
308.8
তয়া জগদিদং সর্বমটন্ত্যা মিথিলেশ্বরঃ
তত্র তত্র শ্রুতো মোক্ষে কথ্যমানস্ত্রিদণ্ডিভিঃ
308.9
সা সুসূক্ষ্মাং কথাং শ্রুত্বা তথ্যং নেতি সসংশয়া
দর্শনে জাতসংকল্পা জনকস্য বভূব হ
308.10
ততঃ সা বিপ্রহায়াথ পূর্বরূপং হি যোগতঃ
অবিভ্রদনবদ্যাঙ্গী রূপমন্যদনুত্তমম্
308.11
চক্ষুর্নিমেষমাত্রেণ লঘ্বস্ত্রগতিগামিনী
বিদেহানাং পুরীং সুভ্রূর্জগাম কমলেক্ষণা
308.12
সা প্রাপ্য মিথিলাং রম্যাং সমৃদ্ধজনসংকুলাম্
ভৈক্ষচর্যাপদেশেন দদর্শ মিথিলেশ্বরম্
308.13
রাজা তস্যাঃ পরং দৃষ্ট্বা সৌকুমার্যং বপুস্তথা
কেয়ং কস্য কুতো বেতি বভূবাগতবিস্ময়ঃ
308.14
ততোঽস্যাঃ স্বাগতং কৃত্বা ব্যাদিশ্য চ বরাসনম্
পূজিতাং পাদশৌচেন বরান্নেনাপ্যতর্পয়ৎ
308.15
অথ ভুক্তবতী প্রীতা রাজানং মন্ত্রিভির্বৃতম্
সর্বভাষ্যবিদাং মধ্যে চোদয়ামাস ভিক্ষুকী
308.16
সুলভা ত্বস্য ধর্মেষু মুক্তো নেতি সসংশয়া
সত্ত্বং সত্ত্বেন যোগজ্ঞা প্রবিবেশ মহীপতে
308.17
নেত্রাভ্যাং নেত্রয়োরস্য রশ্মীন্সংয়োজ্য রশ্মিভিঃ
সা স্ম সংচোদয়িষ্যন্তং যোগবন্ধৈর্ববন্ধ হ
308.18
জনকোঽপ্যুত্স্ময়ন্রাজা ভাবমস্যা বিশেষয়ন্
প্রতিজগ্রাহ ভাবেন ভাবমস্যা নৃপোত্তমঃ
308.19
তদেকস্মিন্নধিষ্ঠানে সংবাদঃ শ্রূয়তাময়ম্
ছত্রাদিষু বিমুক্তস্য মুক্তায়াশ্চ ত্রিদণ্ডকে
308.20
ভগবত্যাঃ ক্ব চর্যেয়ং কৃতা ক্ব চ গমিষ্যসি
কস্য চ ত্বং কুতো বেতি পপ্রচ্ছৈনাং মহীপতিঃ
308.21
শ্রুতে বয়সি জাতৌ চ সদ্ভাবো নাধিগম্যতে
এষ্বর্থেষূত্তরং তস্মাত্প্রবেদ্যং সত্সমাগমে
308.22
ছত্রাদিষু বিশেষেষু মুক্তং মাং বিদ্ধি সর্বশঃ
স ত্বাং সংমন্তুমিচ্ছামি মানার্হাসি মতা হি মে
308.23
যস্মাচ্চৈতন্ময়া প্রাপ্তং জ্ঞানং বৈশেষিকং পুরা
যস্য নান্যঃ প্রবক্তাস্তি মোক্ষে তমপি মে শৃণু
308.24
পারাশর্যসগোত্রস্য বৃদ্ধস্য সুমহাত্মনঃ
ভিক্ষোঃ পঞ্চশিখস্যাহং শিষ্যঃ পরমসংমতঃ
308.25
সাংখ্যজ্ঞানে তথা যোগে মহীপালবিধৌ তথা
ত্রিবিধে মোক্ষধর্মেঽস্মিন্গতাধ্বা ছিন্নসংশয়ঃ
308.26
স যথাশাস্ত্রদৃষ্টেন মার্গেণেহ পরিব্রজন্
বার্ষিকাংশ্চতুরো মাসান্পুরা ময়ি সুখোষিতঃ
308.27
তেনাহং সাংখ্যমুখ্যেন সুদৃষ্টার্থেন তত্ত্বতঃ
শ্রাবিতস্ত্রিবিধং মোক্ষং ন চ রাজ্যাদ্বিচালিতঃ
308.28
সোঽহং তামখিলাং বৃত্তিং ত্রিবিধাং মোক্ষসংহিতাম্
মুক্তরাগশ্চরাম্যেকঃ পদে পরমকে স্থিতঃ
308.29
বৈরাগ্যং পুনরেতস্য মোক্ষস্য পরমো বিধিঃ
জ্ঞানাদেব চ বৈরাগ্যং জায়তে যেন মুচ্যতে
308.30
জ্ঞানেন কুরুতে যত্নং যত্নেন প্রাপ্যতে মহৎ
মহদ্দ্বংদ্বপ্রমোক্ষায় সা সিদ্ধির্যা বয়োতিগা
308.31
সেয়ং পরমিকা বুদ্ধিঃ প্রাপ্তা নির্দ্বংদ্বতা ময়া
ইহৈব গতমোহেন চরতা মুক্তসঙ্গিনা
308.32
যথা ক্ষেত্রং মৃদূভূতমদ্ভিরাপ্লাবিতং তথা
জনয়ত্যঙ্কুরং কর্ম নৃণাং তদ্বত্পুনর্ভবম্
308.33
যথা চোত্তাপিতং বীজং কপালে যত্র তত্র বা
প্রাপ্যাপ্যঙ্কুরহেতুত্বমবীজত্বান্ন জায়তে
308.34
তদ্বদ্ভগবতা তেন শিখাপ্রোক্তেন ভিক্ষুণা
জ্ঞানং কৃতমবীজং মে বিষয়েষু ন জায়তে
308.35
নাভিষজ্জতি কস্মিংশ্চিন্নানর্থে ন পরিগ্রহে
নাভিরজ্যতি চৈতেষু ব্যর্থত্বাদ্রাগদোষয়োঃ
308.36
যশ্চ মে দক্ষিণং বাহুং চন্দনেন সমুক্ষয়েৎ
সব্যং বাস্যা চ যস্তক্ষেত্সমাবেতাবুভৌ মম
308.37
সুখী সোঽহমবাপ্তার্থঃ সমলোষ্টাশ্মকাঞ্চনঃ
মুক্তসঙ্গঃ স্থিতো রাজ্যে বিশিষ্টোঽন্যৈস্ত্রিদণ্ডিভিঃ
308.38
মোক্ষে হি ত্রিবিধা নিষ্ঠা দৃষ্টা পূর্বৈর্মহর্ষিভিঃ
জ্ঞানং লোকোত্তরং যচ্চ সর্বত্যাগশ্চ কর্মণাম্
308.39
জ্ঞাননিষ্ঠাং বদন্ত্যেকে মোক্ষশাস্ত্রবিদো জনাঃ
কর্মনিষ্ঠাং তথৈবান্যে যতয়ঃ সূক্ষ্মদর্শিনঃ
308.40
প্রহায়োভয়মপ্যেতজ্জ্ঞানং কর্ম চ কেবলম্
তৃতীয়েয়ং সমাখ্যাতা নিষ্ঠা তেন মহাত্মনা
308.41
যমে চ নিয়মে চৈব দ্বেষে কামে পরিগ্রহে
মানে দম্ভে তথা স্নেহে সদৃশাস্তে কুটুম্বিভিঃ
308.42
ত্রিদণ্ডাদিষু যদ্যস্তি মোক্ষো জ্ঞানেন কেনচিৎ
ছত্রাদিষু কথং ন স্যাত্তুল্যহেতৌ পরিগ্রহে
308.43
যেন যেন হি যস্যার্থঃ কারণেনেহ কস্যচিৎ
তত্তদালম্বতে দ্রব্যং সর্বঃ স্বে স্বে পরিগ্রহে
308.44
দোষদর্শী তু গার্হস্থ্যে যো ব্রজত্যাশ্রমান্তরম্
উত্সৃজন্পরিগৃহ্ণংশ্চ সোঽপি সঙ্গান্ন মুচ্যতে
308.45
আধিপত্যে তথা তুল্যে নিগ্রহানুগ্রহাত্মনি
রাজর্ষিভিক্ষুকাচার্যা মুচ্যন্তে কেন হেতুনা
308.46
অথ সত্যাধিপত্যেঽপি জ্ঞানেনৈবেহ কেবলম্
মুচ্যন্তে কিং ন মুচ্যন্তে পদে পরমকে স্থিতাঃ
308.47
কাষায়ধারণং মৌণ্ড্যং ত্রিবিষ্টব্ধঃ কমণ্ডলুঃ
লিঙ্গান্যত্যর্থমেতানি ন মোক্ষায়েতি মে মতিঃ
308.48
যদি সত্যপি লিঙ্গেঽস্মিঞ্জ্ঞানমেবাত্র কারণম্
নির্মোক্ষায়েহ দুঃখস্য লিঙ্গমাত্রং নিরর্থকম্
308.49
অথ বা দুঃখশৈথিল্যং বীক্ষ্য লিঙ্গে কৃতা মতিঃ
কিং তদেবার্থসামান্যং ছত্রাদিষু ন লক্ষ্যতে
308.50
আকিংচন্যে ন মোক্ষোঽস্তি কৈংচন্যে নাস্তি বন্ধনম্
কৈংচন্যে চেতরে চৈব জন্তুর্জ্ঞানেন মুচ্যতে
308.51
তস্মাদ্ধর্মার্থকামেষু তথা রাজ্যপরিগ্রহে
বন্ধনায়তনেষ্বেষু বিদ্ধ্যবন্ধে পদে স্থিতম্
308.52
রাজ্যৈশ্বর্যময়ঃ পাশঃ স্নেহায়তনবন্ধনঃ
মোক্ষাশ্মনিশিতেনেহ ছিন্নস্ত্যাগাসিনা ময়া
308.53
সোঽহমেবংগতো মুক্তো জাতাস্থস্ত্বয়ি ভিক্ষুকি
অয়থার্থো হি তে বর্ণো বক্ষ্যামি শৃণু তন্মম
308.54
সৌকুমার্যং তথা রূপং বপুরগ্র্যং তথা বয়ঃ
তবৈতানি সমস্তানি নিয়মশ্চেতি সংশয়ঃ
308.55
যচ্চাপ্যননুরূপং তে লিঙ্গস্যাস্য বিচেষ্টিতম্
মুক্তোঽয়ং স্যান্ন বেত্যস্মাদ্ধর্ষিতো মত্পরিগ্রহঃ
308.56
ন চ কামসমায়ুক্তে মুক্তেঽপ্যস্তি ত্রিদণ্ডকম্
ন রক্ষ্যতে ত্বয়া চেদং ন মুক্তস্যাস্তি গোপনা
308.57
মত্পক্ষসংশ্রয়াচ্চায়ং শৃণু যস্তে ব্যতিক্রমঃ
আশ্রয়ন্ত্যাঃ স্বভাবেন মম পূর্বপরিগ্রহম্
308.58
প্রবেশস্তে কৃতঃ কেন মম রাষ্ট্রে পুরে তথা
কস্য বা সংনিসর্গাত্ত্বং প্রবিষ্টা হৃদয়ং মম
308.59
বর্ণপ্রবরমুখ্যাসি ব্রাহ্মণী ক্ষত্রিয়ো হ্যহম্
নাবয়োরেকয়োগোঽস্তি মা কৃথা বর্ণসংকরম্
308.60
বর্তসে মোক্ষধর্মেষু গার্হস্থ্যে ত্বহমাশ্রমে
অয়ং চাপি সুকষ্টস্তে দ্বিতীয়োঽঽশ্রমসংকরঃ
308.61
সগোত্রাং বাসগোত্রাং বা ন বেদ ত্বাং ন বেত্থ মাম্
সগোত্রমাবিশন্ত্যাস্তে তৃতীয়ো গোত্রসংকরঃ
308.62
অথ জীবতি তে ভর্তা প্রোষিতোঽপ্যথ বা ক্বচিৎ
অগম্যা পরভার্যেতি চতুর্থো ধর্মসংকরঃ
308.63
সা ত্বমেতান্যকার্যাণি কার্যাপেক্ষা ব্যবস্যসি
অবিজ্ঞানেন বা যুক্তা মিথ্যাজ্ঞানেন বা পুনঃ
308.64
অথ বাপি স্বতন্ত্রাসি স্বদোষেণেহ কেনচিৎ
যদি কিংচিচ্ছ্রুতং তেঽস্তি সর্বং কৃতমনর্থকম্
308.65
ইদমন্যত্তৃতীয়ং তে ভাবস্পর্শবিঘাতকম্
দুষ্টায়া লক্ষ্যতে লিঙ্গং প্রবক্তব্যং প্রকাশিতম্
308.66
ন ময্যেবাভিসংধিস্তে জয়ৈষিণ্যা জয়ে কৃতঃ
যেয়ং মত্পরিষত্কৃত্স্না জেতুমিচ্ছসি তামপি
308.67
তথা হ্যেবং পুনশ্চ ত্বং দৃষ্টিং স্বাং প্রতিমুঞ্চসি
মত্পক্ষপ্রতিঘাতায় স্বপক্ষোদ্ভাবনায় চ
308.68
সা স্বেনামর্ষজেন ত্বমৃদ্ধিমোহেন মোহিতা
ভূয়ঃ সৃজসি যোগাস্ত্রং বিষামৃতমিবৈকধা
308.69
ইচ্ছতোর্হি দ্বয়োর্লাভঃ স্ত্রীপুংসোরমৃতোপমঃ
অলাভশ্চাপ্যরক্তস্য সোঽত্র দোষো বিষোপমঃ
308.70
মা স্প্রাক্ষীঃ সাধু জানীষ্ব স্বশাস্ত্রমনুপালয়
কৃতেয়ং হি বিজিজ্ঞাসা মুক্তো নেতি ত্বয়া মম
এতত্সর্বং প্রতিচ্ছন্নং ময়ি নার্হসি গূহিতুম্
308.71
সা যদি ত্বং স্বকার্যেণ যদ্যন্যস্য মহীপতেঃ
তত্ত্বং সত্রপ্রতিচ্ছন্না ময়ি নার্হসি গূহিতুম্
308.72
ন রাজানং মৃষা গচ্ছেন্ন দ্বিজাতিং কথংচন
ন স্ত্রিয়ং স্ত্রীগুণোপেতাং হন্যুর্হ্যেতে মৃষাগতাঃ
308.73
রাজ্ঞাং হি বলমৈশ্বর্যং ব্রহ্ম ব্রহ্মবিদাং বলম্
রূপয়ৌবনসৌভাগ্যং স্ত্রীণাং বলমনুত্তমম্
308.74
অত এতৈর্বলৈরেতে বলিনঃ স্বার্থমিচ্ছতা
আর্জবেনাভিগন্তব্যা বিনাশায় হ্যনার্জবম্
308.75
সা ত্বং জাতিং শ্রুতং বৃত্তং ভাবং প্রকৃতিমাত্মনঃ
কৃত্যমাগমনে চৈব বক্তুমর্হসি তত্ত্বতঃ
308.76
ইত্যেতৈরসুখৈর্বাক্যৈরয়ুক্তৈরসমঞ্জসৈঃ
প্রত্যাদিষ্টা নরেন্দ্রেণ সুলভা ন ব্যকম্পত
308.77
উক্তবাক্যে তু নৃপতৌ সুলভা চারুদর্শনা
ততশ্চারুতরং বাক্যং প্রচক্রামাথ ভাষিতুম্
308.78
নবভির্নবভিশ্চৈব দোষৈর্বাগ্বুদ্ধিদূষণৈঃ
অপেতমুপপন্নার্থমষ্টাদশগুণান্বিতম্
308.79
সৌক্ষ্ম্যং সংখ্যাক্রমৌ চোভৌ নির্ণয়ঃ সপ্রয়োজনঃ
পঞ্চৈতান্যর্থজাতানি বাক্যমিত্যুচ্যতে নৃপ
308.80
এষামেকৈকশোঽর্থানাং সৌক্ষ্ম্যাদীনাং সুলক্ষণম্
শৃণু সংসার্যমাণানাং পদার্থৈঃ পদবাক্যতঃ
308.81
জ্ঞানং জ্ঞেয়েষু ভিন্নেষু যথাভেদেন বর্ততে
তত্রাতিশয়িনী বুদ্ধিস্তত্সৌক্ষ্ম্যমিতি বর্ততে
308.82
দোষাণাং চ গুণানাং চ প্রমাণং প্রবিভাগশঃ
কংচিদর্থমভিপ্রেত্য সা সংখ্যেত্যুপধার্যতাম্
308.83
ইদং পূর্বমিদং পশ্চাদ্বক্তব্যং যদ্বিবক্ষিতম্
ক্রময়োগং তমপ্যাহুর্বাক্যং বাক্যবিদো জনাঃ
308.84
ধর্মার্থকামমোক্ষেষু প্রতিজ্ঞায় বিশেষতঃ
ইদং তদিতি বাক্যান্তে প্রোচ্যতে স বিনির্ণয়ঃ
308.85
ইচ্ছাদ্বেষভবৈর্দুঃখৈঃ প্রকর্ষো যত্র জায়তে
তত্র যা নৃপতে বৃত্তিস্তত্প্রয়োজনমিষ্যতে
308.86
তান্যেতানি যথোক্তানি সৌক্ষ্ম্যাদীনি জনাধিপ
একার্থসমবেতানি বাক্যং মম নিশাময়
308.87
উপেতার্থমভিন্নার্থং নাপবৃত্তং ন চাধিকম্
নাশ্লক্ষ্ণং ন চ সংদিগ্ধং বক্ষ্যামি পরমং তব
308.88
ন গুর্বক্ষরসংবদ্ধং পরাঙ্মুখমুখং ন চ
নানৃতং ন ত্রিবর্গেণ বিরুদ্ধং নাপ্যসংস্কৃতম্
308.89
ন ন্যূনং কষ্টশব্দং বা ব্যুত্ক্রমাভিহিতং ন চ
ন শেষং নানুকল্পেন নিষ্কারণমহেতুকম্
308.90
কামাত্ক্রোধাদ্ভয়াল্লোভাদ্দৈন্যাদানার্যকাত্তথা
হ্রীতোঽনুক্রোশতো মানান্ন বক্ষ্যামি কথংচন
308.91
বক্তা শ্রোতা চ বাক্যং চ যদা ত্ববিকলং নৃপ
সমমেতি বিবক্ষায়াং তদা সোঽর্থঃ প্রকাশতে
308.92
বক্তব্যে তু যদা বক্তা শ্রোতারমবমন্যতে
স্বার্থমাহ পরার্থং বা তদা বাক্যং ন রোহতি
308.93
অথ যঃ স্বার্থমুত্সৃজ্য পরার্থং প্রাহ মানবঃ
বিশঙ্কা জায়তে তস্মিন্বাক্যং তদপি দোষবৎ
308.94
যস্তু বক্তা দ্বয়োরর্থমবিরুদ্ধং প্রভাষতে
শ্রোতুশ্চৈবাত্মনশ্চৈব স বক্তা নেতরো নৃপ
308.95
তদর্থবদিদং বাক্যমুপেতং বাক্যসংপদা
অবিক্ষিপ্তমনা রাজন্নেকাগ্রঃ শ্রোতুমর্হসি
308.96
কাসি কস্য কুতো বেতি ত্বয়াহমভিচোদিতা
তত্রোত্তরমিদং বাক্যং রাজন্নেকমনাঃ শৃণু
308.97
যথা জতু চ কাষ্ঠং চ পাংসবশ্চোদবিন্দুভিঃ
সুশ্লিষ্টানি তথা রাজন্প্রাণিনামিহ সংভবঃ
308.98
শব্দঃ স্পর্শো রসো রূপং গন্ধঃ পঞ্চেন্দ্রিয়াণি চ
পৃথগাত্মা দশাত্মানঃ সংশ্লিষ্টা জতুকাষ্ঠবৎ
308.99
ন চৈষাং চোদনা কাচিদস্তীত্যেষ বিনিশ্চয়ঃ
একৈকস্যেহ বিজ্ঞানং নাস্ত্যাত্মনি তথা পরে
308.100
ন বেদ চক্ষুশ্চক্ষুষ্ট্বং শ্রোত্রং নাত্মনি বর্ততে
তথৈব ব্যভিচারেণ ন বর্তন্তে পরস্পরম্
সংশ্লিষ্টা নাভিজায়ন্তে যথাপ ইহ পাংসবঃ
308.101
বাহ্যানন্যানপেক্ষন্তে গুণাংস্তানপি মে শৃণু
রূপং চক্ষুঃ প্রকাশশ্চ দর্শনে হেতবস্ত্রয়ঃ
যথৈবাত্র তথান্যেষু জ্ঞানজ্ঞেয়েষু হেতবঃ
308.102
জ্ঞানজ্ঞেয়ান্তরে তস্মিন্মনো নামাপরো গুণঃ
বিচারয়তি যেনায়ং নিশ্চয়ে সাধ্বসাধুনী
308.103
দ্বাদশস্ত্বপরস্তত্র বুদ্ধির্নাম গুণঃ স্মৃতঃ
যেন সংশয়পূর্বেষু বোদ্ধব্যেষু ব্যবস্যতি
308.104
অথ দ্বাদশকে তস্মিন্সত্ত্বং নামাপরো গুণঃ
মহাসত্ত্বোঽল্পসত্ত্বো বা জন্তুর্যেনানুমীয়তে
308.105
ক্ষেত্রজ্ঞ ইতি চাপ্যন্যো গুণস্তত্র চতুর্দশঃ
মমায়মিতি যেনায়ং মন্যতে ন চ মন্যতে
308.106
অথ পঞ্চদশো রাজন্গুণস্তত্রাপরঃ স্মৃতঃ
পৃথক্কলাসমূহস্য সামগ্র্যং তদিহোচ্যতে
308.107
গুণস্ত্বেবাপরস্তত্র সংঘাত ইতি ষোডশঃ
আকৃতির্ব্যক্তিরিত্যেতৌ গুণৌ যস্মিন্সমাশ্রিতৌ
308.108
সুখদুঃখে জরামৃত্যূ লাভালাভৌ প্রিয়াপ্রিয়ে
ইতি চৈকোনবিংশোঽয়ং দ্বংদ্বয়োগ ইতি স্মৃতঃ
308.109
ঊর্ধ্বমেকোনবিংশত্যাঃ কালো নামাপরো গুণঃ
ইতীমং বিদ্ধি বিংশত্যা ভূতানাং প্রভবাপ্যয়ম্
308.110
বিংশকশ্চৈষ সংঘাতো মহাভূতানি পঞ্চ চ
সদসদ্ভাবয়োগৌ চ গুণাবন্যৌ প্রকাশকৌ
308.111
ইত্যেবং বিংশতিশ্চৈব গুণাঃ সপ্ত চ যে স্মৃতাঃ
বিধিঃ শুক্রং বলং চেতি ত্রয় এতে গুণাঃ পরে
308.112
একবিংশশ্চ দশ চ কলাঃ সংখ্যানতঃ স্মৃতাঃ
সমগ্রা যত্র বর্তন্তে তচ্ছরীরমিতি স্মৃতম্
308.113
অব্যক্তং প্রকৃতিং ত্বাসাং কলানাং কশ্চিদিচ্ছতি
ব্যক্তং চাসাং তথৈবান্যঃ স্থূলদর্শী প্রপশ্যতি
308.114
অব্যক্তং যদি বা ব্যক্তং দ্বয়ীমথ চতুষ্টয়ীম্
প্রকৃতিং সর্বভূতানাং পশ্যন্ত্যধ্যাত্মচিন্তকাঃ
308.115
সেয়ং প্রকৃতিরব্যক্তা কলাভির্ব্যক্ততাং গতা
অহং চ ত্বং চ রাজেন্দ্র যে চাপ্যন্যে শরীরিণঃ
308.116
বিন্দুন্যাসাদয়োঽবস্থাঃ শুক্রশোণিতসংভবাঃ
যাসামেব নিপাতেন কললং নাম জায়তে
308.117
কললাদর্বুদোত্পত্তিঃ পেশী চাপ্যর্বুদোদ্ভবা
পেশ্যাস্ত্বঙ্গাভিনির্বৃত্তির্নখরোমাণি চাঙ্গতঃ
308.118
সংপূর্ণে নবমে মাসে জন্তোর্জাতস্য মৈথিল
জায়তে নামরূপত্বং স্ত্রী পুমান্বেতি লিঙ্গতঃ
308.119
জাতমাত্রং তু তদ্রূপং দৃষ্ট্বা তাম্রনখাঙ্গুলি
কৌমাররূপমাপন্নং রূপতো নোপলভ্যতে
308.120
কৌমারাদ্যৌবনং চাপি স্থাবির্যং চাপি যৌবনাৎ
অনেন ক্রময়োগেন পূর্বং পূর্বং ন লভ্যতে
308.121
কলানাং পৃথগর্থানাং প্রতিভেদঃ ক্ষণে ক্ষণে
বর্ততে সর্বভূতেষু সৌক্ষ্ম্যাত্তু ন বিভাব্যতে
308.122
ন চৈষামপ্যয়ো রাজঁল্লক্ষ্যতে প্রভবো ন চ
অবস্থায়ামবস্থায়াং দীপস্যেবার্চিষো গতিঃ
308.123
তস্যাপ্যেবংপ্রভাবস্য সদশ্বস্যেব ধাবতঃ
অজস্রং সর্বলোকস্য কঃ কুতো বা ন বা কুতঃ
308.124
কস্যেদং কস্য বা নেদং কুতো বেদং ন বা কুতঃ
সংবন্ধঃ কোঽস্তি ভূতানাং স্বৈরপ্যবয়বৈরিহ
308.125
যথাদিত্যান্মণেশ্চৈব বীরুদ্ভ্যশ্চৈব পাবকঃ
ভবত্যেবং সমুদয়াত্কলানামপি জন্তবঃ
308.126
আত্মন্যেবাত্মনাত্মানং যথা ত্বমনুপশ্যসি
এবমেবাত্মনাত্মানমন্যস্মিন্কিং ন পশ্যসি
যদ্যাত্মনি পরস্মিংশ্চ সমতামধ্যবস্যসি
308.127
অথ মাং কাসি কস্যেতি কিমর্থমনুপৃচ্ছসি
ইদং মে স্যাদিদং নেতি দ্বংদ্বৈর্মুক্তস্য মৈথিল
কাসি কস্য কুতো বেতি বচনে কিং প্রয়োজনম্
308.128
রিপৌ মিত্রেঽথ মধ্যস্থে বিজয়ে সংধিবিগ্রহে
কৃতবান্যো মহীপাল কিং তস্মিন্মুক্তলক্ষণম্
308.129
ত্রিবর্গে সপ্তধা ব্যক্তং যো ন বেদেহ কর্মসু
সঙ্গবান্যস্ত্রিবর্গে চ কিং তস্মিন্মুক্তলক্ষণম্
308.130
প্রিয়ে চৈবাপ্রিয়ে চৈব দুর্বলে বলবত্যপি
যস্য নাস্তি সমং চক্ষুঃ কিং তস্মিন্মুক্তলক্ষণম্
308.131
তদমুক্তস্য তে মোক্ষে যোঽভিমানো ভবেন্নৃপ
সুহৃদ্ভিঃ স নিবার্যস্তে বিচিত্তস্যেব ভেষজৈঃ
308.132
তানি তান্যনুসংদৃশ্য সঙ্গস্থানান্যরিংদম
আত্মনাত্মনি সংপশ্যেত্কিং তস্মিন্মুক্তলক্ষণম্
308.133
ইমান্যন্যানি সূক্ষ্মাণি মোক্ষমাশ্রিত্য কানিচিৎ
চতুরঙ্গপ্রবৃত্তানি সঙ্গস্থানানি মে শৃণু
308.134
য ইমাং পৃথিবীং কৃত্স্নামেকচ্ছত্রাং প্রশাস্তি হ
একমেব স বৈ রাজা পুরমধ্যাবসত্যুত
308.135
তত্পুরে চৈকমেবাস্য গৃহং যদধিতিষ্ঠতি
গৃহে শয়নমপ্যেকং নিশায়াং যত্র লীয়তে
308.136
শয্যার্ধং তস্য চাপ্যত্র স্ত্রীপূর্বমধিতিষ্ঠতি
তদনেন প্রসঙ্গেন ফলেনৈবেহ যুজ্যতে
308.137
এবমেবোপভোগেষু ভোজনাচ্ছাদনেষু চ
গুণেষু পরিমেয়েষু নিগ্রহানুগ্রহৌ প্রতি
308.138
পরতন্ত্রঃ সদা রাজা স্বল্পে সোঽপি প্রসজ্জতে
সংধিবিগ্রহয়োগে চ কুতো রাজ্ঞঃ স্বতন্ত্রতা
308.139
স্ত্রীষু ক্রীডাবিহারেষু নিত্যমস্যাস্বতন্ত্রতা
মন্ত্রে চামাত্যসমিতৌ কুত এব স্বতন্ত্রতা
308.140
যদা ত্বাজ্ঞাপয়ত্যন্যাংস্তদাস্যোক্তা স্বতন্ত্রতা
অবশঃ কার্যতে তত্র তস্মিংস্তস্মিন্গুণে স্থিতঃ
308.141
স্বপ্তুকামো ন লভতে স্বপ্তুং কার্যার্থিভির্জনৈঃ
শয়নে চাপ্যনুজ্ঞাতঃ সুপ্ত উত্থাপ্যতেঽবশঃ
308.142
স্নাহ্যালভ পিব প্রাশ জুহুধ্যগ্নীন্যজেতি চ
বদস্ব শৃণু চাপীতি বিবশঃ কার্যতে পরৈঃ
308.143
অভিগম্যাভিগম্যৈনং যাচন্তে সততং নরাঃ
ন চাপ্যুত্সহতে দাতুং বিত্তরক্ষী মহাজনাৎ
308.144
দানে কোশক্ষয়ো হ্যস্য বৈরং চাপ্যপ্রয়চ্ছতঃ
ক্ষণেনাস্যোপবর্তন্তে দোষা বৈরাগ্যকারকাঃ
308.145
প্রাজ্ঞাঞ্শূরাংস্তথৈবাঢ্যানেকস্থানেঽপি শঙ্কতে
ভয়মপ্যভয়ে রাজ্ঞো যৈশ্চ নিত্যমুপাস্যতে
308.146
যদা চৈতে প্রদুষ্যন্তি রাজন্যে কীর্তিতা ময়া
তদৈবাস্য ভয়ং তেভ্যো জায়তে পশ্য যাদৃশম্
308.147
সর্বঃ স্বে স্বে গৃহে রাজা সর্বঃ স্বে স্বে গৃহে গৃহী
নিগ্রহানুগ্রহৌ কুর্বংস্তুল্যো জনক রাজভিঃ
308.148
পুত্রা দারাস্তথৈবাত্মা কোশো মিত্রাণি সংচয়ঃ
পরৈঃ সাধারণা হ্যেতে তৈস্তৈরেবাস্য হেতুভিঃ
308.149
হতো দেশঃ পুরং দগ্ধং প্রধানঃ কুঞ্জরো মৃতঃ
লোকসাধারণেষ্বেষু মিথ্যাজ্ঞানেন তপ্যতে
308.150
অমুক্তো মানসৈর্দুঃখৈরিচ্ছাদ্বেষপ্রিয়োদ্ভবৈঃ
শিরোরোগাদিভী রোগৈস্তথৈব বিনিপাতিভিঃ
308.151
দ্বংদ্বৈস্তৈস্তৈরুপহতঃ সর্বতঃ পরিশঙ্কিতঃ
বহুপ্রত্যর্থিকং রাজ্যমুপাস্তে গণয়ন্নিশাঃ
308.152
তদল্পসুখমত্যর্থং বহুদুঃখমসারবৎ
কো রাজ্যমভিপদ্যেত প্রাপ্য চোপশমং লভেৎ
308.153
মমেদমিতি যচ্চেদং পুরং রাষ্ট্রং চ মন্যসে
বলং কোশমমাত্যাংশ্চ কস্যৈতানি ন বা নৃপ
308.154
মিত্রামাত্যং পুরং রাষ্ট্রং দণ্ডঃ কোশো মহীপতিঃ
সপ্তাঙ্গশ্চক্রসংঘাতো রাজ্যমিত্যুচ্যতে নৃপ
308.155
সপ্তাঙ্গস্যাস্য রাজ্যস্য ত্রিদণ্ডস্যেব তিষ্ঠতঃ
অন্যোন্যগুণয়ুক্তস্য কঃ কেন গুণতোঽধিকঃ
308.156
তেষু তেষু হি কালেষু তত্তদঙ্গং বিশিষ্যতে
যেন যত্সিধ্যতে কার্যং তত্প্রাধান্যায় কল্পতে
308.157
সপ্তাঙ্গশ্চাপি সংঘাতস্ত্রয়শ্চান্যে নৃপোত্তম
সংভূয় দশবর্গোঽয়ং ভুঙ্ক্তে রাজ্যং হি রাজবৎ
308.158
যশ্চ রাজা মহোত্সাহঃ ক্ষত্রধর্মরতো ভবেৎ
স তুষ্যেদ্দশভাগেন ততস্ত্বন্যো দশাবরৈঃ
308.159
নাস্ত্যসাধারণো রাজা নাস্তি রাজ্যমরাজকম্
রাজ্যেঽসতি কুতো ধর্মো ধর্মেঽসতি কুতঃ পরম্
308.160
যোঽপ্যত্র পরমো ধর্মঃ পবিত্রং রাজরাজ্যয়োঃ
পৃথিবী দক্ষিণা যস্য সোঽশ্বমেধো ন বিদ্যতে
308.161
সাহমেতানি কর্মাণি রাজ্যদুঃখানি মৈথিল
সমর্থা শতশো বক্তুমথ বাপি সহস্রশঃ
308.162
স্বদেহে নাভিষঙ্গো মে কুতঃ পরপরিগ্রহে
ন মামেবংবিধাং মুক্তামীদৃশং বক্তুমর্হসি
308.163
ননু নাম ত্বয়া মোক্ষঃ কৃত্স্নঃ পঞ্চশিখাচ্ছ্রুতঃ
সোপায়ঃ সোপনিষদঃ সোপাসঙ্গঃ সনিশ্চয়ঃ
308.164
তস্য তে মুক্তসঙ্গস্য পাশানাক্রম্য তিষ্ঠতঃ
ছত্রাদিষু বিশেষেষু কথং সঙ্গঃ পুনর্নৃপ
308.165
শ্রুতং তে ন শ্রুতং মন্যে মিথ্যা বাপি শ্রুতং শ্রুতম্
অথ বা শ্রুতসংকাশং শ্রুতমন্যচ্ছ্রুতং ত্বয়া
308.166
অথাপীমাসু সংজ্ঞাসু লৌকিকীষু প্রতিষ্ঠসি
অভিষঙ্গাবরোধাভ্যাং বদ্ধস্ত্বং প্রাকৃতো যথা
308.167
সত্ত্বেনানুপ্রবেশো হি যোঽয়ং ত্বয়ি কৃতো ময়া
কিং তবাপকৃতং তত্র যদি মুক্তোঽসি সর্বতঃ
308.168
নিয়মো হ্যেষ ধর্মেষু যতীনাং শূন্যবাসিতা
শূন্যমাবাসয়ন্ত্যা চ ময়া কিং কস্য দূষিতম্
308.169
ন পাণিভ্যাং ন বাহুভ্যাং পাদোরুভ্যাং ন চানঘ
ন গাত্রাবয়বৈরন্যৈঃ স্পৃশামি ত্বা নরাধিপ
308.170
কুলে মহতি জাতেন হ্রীমতা দীর্ঘদর্শিনা
নৈতত্সদসি বক্তব্যং সদ্বাসদ্বা মিথঃ কৃতম্
308.171
ব্রাহ্মণা গুরবশ্চেমে তথামাত্যা গুরূত্তমাঃ
ত্বং চাথ গুরুরপ্যেষামেবমন্যোন্যগৌরবম্
308.172
তদেবমনুসংদৃশ্য বাচ্যাবাচ্যং পরীক্ষতা
স্ত্রীপুংসোঃ সমবায়োঽয়ং ত্বয়া বাচ্যো ন সংসদি
308.173
যথা পুষ্করপর্ণস্থং জলং তত্পর্ণসংস্থিতম্
তিষ্ঠত্যস্পৃশতী তদ্বত্ত্বয়ি বত্স্যামি মৈথিল
308.174
যদি বাপ্যস্পৃশন্ত্যা মে স্পর্শং জানাসি কংচন
জ্ঞানং কৃতমবীজং তে কথং তেনেহ ভিক্ষুণা
308.175
স গার্হস্থ্যাচ্চ্যুতশ্চ ত্বং মোক্ষং নাবাপ্য দুর্বিদম্
উভয়োরন্তরালে চ বর্তসে মোক্ষবাতিকঃ
308.176
ন হি মুক্তস্য মুক্তেন জ্ঞস্যৈকত্বপৃথক্ত্বয়োঃ
ভাবাভাবসমায়োগে জায়তে বর্ণসংকরঃ
308.177
বর্ণাশ্রমপৃথক্ত্বে চ দৃষ্টার্থস্যাপৃথক্ত্বিনঃ
নান্যদন্যদিতি জ্ঞাত্বা নান্যদন্যত্প্রবর্ততে
308.178
পাণৌ কুণ্ডং তথা কুণ্ডে পয়ঃ পয়সি মক্ষিকাঃ
আশ্রিতাশ্রয়য়োগেন পৃথক্ত্বেনাশ্রয়া বয়ম্
308.179
ন তু কুণ্ডে পয়োভাবঃ পয়শ্চাপি ন মক্ষিকাঃ
স্বয়মেবাশ্রয়ন্ত্যেতে ভাবা ন তু পরাশ্রয়ম্
308.180
পৃথক্ত্বাদাশ্রমাণাং চ বর্ণান্যত্বে তথৈব চ
পরস্পরপৃথক্ত্বাচ্চ কথং তে বর্ণসংকরঃ
308.181
নাস্মি বর্ণোত্তমা জাত্যা ন বৈশ্যা নাবরা তথা
তব রাজন্সবর্ণাস্মি শুদ্ধয়োনিরবিপ্লুতা
308.182
প্রধানো নাম রাজর্ষির্ব্যক্তং তে শ্রোত্রমাগতঃ
কুলে তস্য সমুত্পন্নাং সুলভাং নাম বিদ্ধি মাম্
308.183
দ্রোণশ্চ শতশৃঙ্গশ্চ বক্রদ্বারশ্চ পর্বতঃ
মম সত্রেষু পূর্বেষাং চিতা মঘবতা সহ
308.184
সাহং তস্মিন্কুলে জাতা ভর্তর্যসতি মদ্বিধে
বিনীতা মোক্ষধর্মেষু চরাম্যেকা মুনিব্রতম্
308.185
নাস্মি সত্রপ্রতিচ্ছন্না ন পরস্বাভিমানিনী
ন ধর্মসংকরকরী স্বধর্মেঽস্মি ধৃতব্রতা
308.186
নাস্থিরা স্বপ্রতিজ্ঞায়াং নাসমীক্ষ্যপ্রবাদিনী
নাসমীক্ষ্যাগতা চাহং ত্বত্সকাশং জনাধিপ
308.187
মোক্ষে তে ভাবিতাং বুদ্ধিং শ্রুত্বাহং কুশলৈষিণী
তব মোক্ষস্য চাপ্যস্য জিজ্ঞাসার্থমিহাগতা
308.188
ন বর্গস্থা ব্রবীম্যেতত্স্বপক্ষপরপক্ষয়োঃ
মুক্তো ন মুচ্যতে যশ্চ শান্তো যশ্চ ন শাম্যতি
308.189
যথা শূন্যে পুরাগারে ভিক্ষুরেকাং নিশাং বসেৎ
তথা হি ত্বচ্ছরীরেঽস্মিন্নিমাং বত্স্যামি শর্বরীম্
308.190
সাহমাসনদানেন বাগাতিথ্যেন চার্চিতা
সুপ্তা সুশরণা প্রীতা শ্বো গমিষ্যামি মৈথিল
308.191
ইত্যেতানি স বাক্যানি হেতুমন্ত্যর্থবন্তি চ
শ্রুত্বা নাধিজগৌ রাজা কিংচিদন্যদতঃ পরম্