অধ্যায় 307

307.1

যুধিষ্ঠির উবাচ
ঐশ্বর্যং বা মহত্প্রাপ্য ধনং বা ভরতর্ষভ
দীর্ঘমায়ুরবাপ্যাথ কথং মৃত্যুমতিক্রমেৎ

তপসা বা সুমহতা কর্মণা বা শ্রুতেন বা
রসায়নপ্রয়োগৈর্বা কৈর্নোপৈতি জরান্তকৌ

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ভিক্ষোঃ পঞ্চশিখস্যেহ সংবাদং জনকস্য চ

বৈদেহো জনকো রাজা মহর্ষিং বেদবিত্তমম্
পর্যপৃচ্ছত্পঞ্চশিখং ছিন্নধর্মার্থসংশয়ম্

কেন বৃত্তেন ভগবন্নতিক্রামেজ্জরান্তকৌ
তপসা বাথ বুদ্ধ্যা বা কর্মণা বা শ্রুতেন বা

এবমুক্তঃ স বৈদেহং প্রত্যুবাচ পরোক্ষবিৎ
নিবৃত্তির্নৈতয়োরস্তি নানিবৃত্তিঃ কথংচন

ন হ্যহানি নিবর্তন্তে ন মাসা ন পুনঃ ক্ষপাঃ
সোঽয়ং প্রপদ্যতেঽধ্বানং চিরায় ধ্রুবমধ্রুবঃ

সর্বভূতসমুচ্ছেদঃ স্রোতসেবোহ্যতে সদা
উহ্যমানং নিমজ্জন্তমপ্লবে কালসাগরে
জরামৃত্যুমহাগ্রাহে ন কশ্চিদভিপদ্যতে

নৈবাস্য ভবিতা কশ্চিন্নাসৌ ভবতি কস্যচিৎ
পথি সংগতমেবেদং দারৈরন্যৈশ্চ বন্ধুভিঃ
নায়মত্যন্তসংবাসো লব্ধপূর্বো হি কেনচিৎ

ক্ষিপ্যন্তে তেন তেনৈব নিষ্টনন্তঃ পুনঃ পুনঃ
কালেন জাতা জাতা হি বায়ুনেবাভ্রসংচয়াঃ

জরামৃত্যূ হি ভূতানাং খাদিতারৌ বৃকাবিব
বলিনাং দুর্বলানাং চ হ্রস্বানাং মহতামপি

এবংভূতেষু ভূতেষু নিত্যভূতাধ্রুবেষু চ
কথং হৃষ্যেত জাতেষু মৃতেষু চ কথং জ্বরেৎ

কুতোঽহমাগতঃ কোঽস্মি ক্ব গমিষ্যামি কস্য বা
কস্মিন্স্থিতঃ ক্ব ভবিতা কস্মাত্কিমনুশোচসি

দ্রষ্টা স্বর্গস্য ন হ্যস্তি তথৈব নরকস্য চ
আগমাংস্ত্বনতিক্রম্য দদ্যাচ্চৈব যজেত চ